Продолжува судењето за предметот „Поткуп“ во кој е обвинет Заев


Скопје, 16 април, 2018 - 9:51 (META) 

Во Основен суд Скопје 1, на денешното рочиште за предметот „Поткуп“, во кој е обвинет премиерот Зоран Заев за барање поткуп во времето кога беше градоначалник на Струмица, треба да продолжи слушањето на разговорите од посебните истражни мерки (ПИМ).

Снимките кои ги обезбедил струмичкиот бизнисмен Иван Николов Сачевалиев, од кои еден дел можеше да види јавноста на „Јутјуб“, почна на минатото рочиште, во четвртокот, без присуство на јавноста. Заев и неговите адвокати побараа оваа снимка да биде презентирана јавно, бидејќи, според нив, снимката која беше објавена на „Јутјуб“, а со која се создаде впечаток дека Заев барал поткуп, е нецелосна.

Според Заев, во разговорите апсолутно нема никакви докази и оти станува збор за редовни комуникации на тогашен градоначалник со осомниченото лице и сите други лица, како што се директори на институции, граѓани кои се јавуваат кај тогашниот градоначалник на Струмица.

Заев рече дека не ја знае точната бројка на сите разговори, но оти се работи за преку 10.000 разговори, дел направени како ПИ-мерки, а дел снимени без вклученост на обвинителството.

Адвокатите на Заев побараа исказот на сведокот Сачевалиев од претходното рочиште да не биде прифатен како доказ во постапката. Тие сметаат дека судската постапка не може да се базира на неговиот исказ бидејќи тој бил агент-провокатор, односно бил инструиран да бара поткуп. За ова барање Судечкиот совет најави дека дополнително ќе се изјасни.


Апелација: Кривичен повторно да одлучува дали ќе се користат снимките со Заев за „Поткуп“


Скопје, 28 декември, 2017 - 13:49 (META) 

Кривичниот суд повторно ќе треба да одлучува дали снимката од посебните истражни мерки ќе се користат како доказ во судскиот процес за случајот „Поткуп“, во кој обвинет е премиерот и лидер на СДСМ, Зоран Заев.

Апелацискиот суд денеска соопшти дека донел одлука со која се укинува претходната одлука на Кривичниот суд – снимката да биде дел од доказниот материјал, и предметот да се врати на повторно одлучување во првостепениот суд.

Апелација одлучуваше по жалбата на одбраната на Заев, која бара снимката од ПИ-мерките да биде издвоена од доказниот материјал бидејќи делови од неа се објавени на видео-сервисот „Јутјуб“.

Според Апелацискиот суд претседателот на Советот што го суди предметот го прекршил законот бидејќи одлуката за снимката ја донел вон рочиштето за главна расправа.

Инаку, претседател на судечкиот совет во случајот „Поткуп“ беше Дијана Груевска – Илиевска. Таа повеќе нема да го суди овој случај бидејќи со новиот распоред на претседателот на Кривичниот суд, Иван Џолев е префрлена од Одделението за организиран криминал во Одделението за кривично полнолетни.


Одложено судењето на Заев за „Поткуп“, се чека одлука на Апелација за снимките


Скопје, 25 декември, 2017 - 11:00 (META) 

Денешното рочиште од судењето за случајот „Поткуп“ во кој обвинет е премиерот и лидер на СДСМ, Зоран Заев се одложи за 29 јаниуари, следната година, бидејќи предметот е во Апелацискиот суд Скопје кој треба да одлужува по жалбата на Заев околу користењето на посебните истражни мерки (ПИМ) како доказ во судската постапка.

Одбраната на Заев бара снимката од ПИ-мерките да не се користи како доказ, бидејќи делови од неа беа јавно објавени на видео-сервисот „Јутјуб“.

Одговарајќи на новинарски прашања по рочиштето, Заев рече оти очекува Апелација да ја прифати жалбата, но, како што додаде, ќе ја почитува одлуката на судот, каква и да биде таа.

– Жалбата е суштествена во самата постапка и се однесува на тоа дали јавно објавените ПИ-мерки во продолжение на рочиштето ќе бидат доказ или не. Јас сакам таа снимка да биде јавно достапна за да може да ја видат сите комплетно, без деловите каде е пресечена заради тоа што не само што сум убеден во добивањето на правдата и потврдувањето на мојата невиност затоа што извршувам висока политичка функција – рече Заев.

Инаку, јавната седница на која Апелацискиот суд треба да ја разгледува жалбата на одбраната на Заев е закажана за денеска.

Последната седница на Апелација беше одложена на неопределно време бидејќи судијата Африм Фидани, кој беше судија-известител за предметот, е избран за судија во Врховниот суд.

Заев во случајот „Поткуп“ е обвинет за барање и за земање на поткуп од околу 160.000 евра од струмичкиот бизнисмен Иван Николов Сачевалиев за легализација на земјиште.


ВМРО-ДПМНЕ: Со одложувањето на рочиштето за „Поткуп“, судството го допре дното


Скопје, 27 ноември, 2017 - 17:31 (META) 

Одложувањето на рочиштето за предметот „Поткуп“ на неопределено време е уште еден доказ дека судството под притисок на СДС го допре дното, реагира опозициската ВМРО-ДПМНЕ.

Правдата и законите во оваа држава важат за сите освен за Зоран Заев и за криминалното партиско раководство околу него, велат од партијата.

– Нема кривично дело за кое судењето не можело да почне повеќе од две години. Нема обвинет кој бил соочен со докази за кривичното дело и успеал повеќе од две години да го одложува почнувањето на предметот. Целата јавност виде како во функција на градоначалник на Струмица, Зоран Заев бара поткуп од 200.000 евра по принцип „едно евро за Вицето, едно за црквата“, а судот трета година не може да створи услови за да почне да му се суди – изјави на прес-конференција Невенка Стаменковска, пратеничка во Собранието од ВМРО-ДПМНЕ.

Таа додаде дека досега беа измислувани десетици апсурдни причини за да се одолговлекува правдата.

– Судот му прогледуваше низ прсти и кога велеше дека не го признава и нема да ги почитува неговите одлуки, а го толерираше и кога одложуваше рочишта заради наводни средби со портири или други вработени по амбасади. Судиите не реагираа ниту кога им се закануваше со реизбор, а премолчуваа и кога во нивно име најавуваше процеси и притвори – рече Стаменковска.


Апелација ја одложи седницата за ПИ-мерките во „Поткуп“ на неопределено време


Скопје, 27 ноември, 2017 - 12:18 (META) 

Апелацискиот суд Скопје ја одложи на неопределно време јавната седница на која треба да се расправа по жалбите на одбраната на премиерот и лидер на СДСМ, Зоран Заев, околу користењето на посебните истражни мерки (ПИМ) како доказ во судскиот процес за случајот „Поткуп“, во кој Заев е обвинет.

Причина за одложувањето на седницата е тоа што судијата известител по овој предмет, Африм Фидани, е избран за судија во Врховниот суд.

Судијата Сафет Кадриу соопшти дека сè уште не е направена прераспределба и поради тоа се одложува седницата на неопределено време.

Одбраната и Заев бараат снимките да не бидат доказ бидејќи веќе биле објавени во јавноста, односно делови од нив биле ставени на видеосервисот „Јутјуб“, а потоа преземени и објавени од медиумите.

Поради чекањето на одлуката на Апелацискиот суд, минатата недела беше одложено рочиштето за „Поткуп“, а следното е закажано за 25 декември.

Заев во случајот „Поткуп“ е осомничен за барање и за земање поткуп во висина од околу 200.000 евра од струмичкиот бизнисмен Иван Николов-Сачевалиев, во врска со легализација на земјиште.


Апелација денеска ќе одлучува дали снимките за Заев ќе бидат доказ во „Поткуп“


Скопје, 27 ноември, 2017 - 10:01 (META) 

Апелацискиот суд Скопје денеска треба да одржи седница на која ќе ја разгледува жалбата на одбраната на премиерот и лидер на СДСМ, Зоран Заев, која бара видеоснимките од посебните истражни мерки (ПИМ) да не бидат користени како доказ во судската постапка за случајот „Поткуп“, во кој Заев е обвинет.

Адвокатите на Заев, претходно, од Кривичниот суд побараа да ги издвои овие снимки од доказниот материјал, но судот го одби нивното барање и донесе решение тие да бидат доказ.

Одбраната и Заев бараат снимките да не бидат доказ бидејќи веќе биле објавени во јавноста, односно делови од нив биле ставени на видеосервисот „Јутјуб“, а потоа преземени и објавени од медиумите.

Поради чекањето на одлуката на Апелацискиот суд, минатата недела беше одложено рочиштето за „Поткуп“, а следното е закажано за 25 декември.

Заев во случајот „Поткуп“ е осомничен за барање и за земање поткуп во висина од околу 200.000 евра од струмичкиот бизнисмен Иван Николов-Сачевалиев, во врска со легализација на земјиште.


Жешка судска недела за Груевски, Заев и за Талески


Скопје, 25 септември, 2017 - 11:39 (META) 

Скопскиот Кривичен суд за оваа недела на распоредот има набиена агенда на рочишта за случаите „Тврдина 2“, „Поткуп“, „Шамари“ и „Транспортер“, кои предизвикуваат голем интерес во јавноста, а од кои три се по обвиненија поднесени од Специјалното јавно обвинителство.

На обвинителната клупа треба да седнат лидерот на СДСМ и премиер, Зоран Заев, лидерот на ВМРО-ДПМНЕ и поранешен премиер, Никола Груевски, и градоначалникот Битола во заминување, Владимир Талески.

Неделата со набиена судска агенда се совпаѓа со првата седмица од почетокот на кампањата за локалните избори. Поради ова не е исклучена можноста од повторно одложување на рочиштата за овие случаи за кои, и по повеќе од една година, никако да почне главната расправа.

Агендата на судските рочишта изгледа вака:

  • 26 септември (вторник) – Треба да продолжи рочиштето за случајот „Тврдина 2“, во кој првообвинет за уништувањето на документацијата од опремата за незаконското прислушување е поранешниот началник на петтата управа, Горан Грујовски, кој е во бегство. Како ќе продолжи судењето најверојатно ќе се знае утре. Дел од правните експерти велат дека судот може да одлучи на Грујовски да му се суди во отсуство. Тој побегна откако Апелацискиот суд одлучи да го прифати барањето на СЈО да му биде одреден притвор, а Врховниот суд го потврди ваквото решение. Случајот го суди Лидија Петровска.
  • 27 септември (среда) – Треба да продолжи судењето за „Поткуп“, каде Основното јавно обвинителство за организиран криминал и корупција го товари премиерот Зоран Заев дека од струмички бизнисмен барал поткуп од околу 200.000 евра за легализација на градежно земјиште. Заев во јуни оваа година, првпат се појави судот како премиер на државата, а на рочиштето тој и неговата одбрана бараа изземање на снимките од посебните истражни мерки за случајот, бидејќи веќе се објавени на „Јутјуб“. Случајот го суди Дијана Груевска-Илиевска.
  • 28 септември (четврток) – На обвинителната клупа треба повторно да седнат лидерот на ВМРО-ДПМНЕ, Никола Груевски, поранешниот министер за транспорт и врски, Миле Јанакиески, пратеничката Даниела Рангелова и уште 11 лица обвинети за насилствата пред Општина Центар од јуни 2013 година. Инаку, Апелацискиот суд летово ја прифати жалбата на СЈО и донесе одлука прислушуваните разговори да можат да се користат како доказ на судењето за случајот кој во јавноста е познат како „Шамари“. Случајот го суди Татјана Михајлова.
  • 28 септември (четврток) – Треба да почне судењето за случајот „Транспортер“ на СЈО, во кој градоначалникот на Битола, Владимир Талески, и уште 21 лице се товарат за злоупотреби со тендерите за превозот на ученици во Битола, со кои го оштетиле буџетот на Општината за околу 300.000 евра. Инаку, против Талески и уште петмина други вработени во Општина Битола истрага под името „Транспортер 2“ води и Основното јавно обвинителство Битола, исто така, за злоупотреба на службената положба поврзана со избор на фирма за превоз на ученици за учебната 2015/2016 година. Овој случај ѝ е доделен на судијката Лидија Петровска.

Обвинителството две години истражува како ПИМ-снимката од Заев се нашла на „Јутјуб“


Скопје, 27 јуни, 2017 - 17:24 (META) 

Обвинителството за гонење организиран криминал и корупција две години истражува од каде е објавена и кој ја објавил снимката од посебните истражни мерки (ПИМ) во случајот „Поткуп“ на видеомрежата „Јутјуб“.

Одбраната на премиерот Зоран Заев, кој е обвинет во случајот „Поткуп“, денеска побара од судот да ја изземе снимката од ПИ-мерките од доказниот материјал, токму поради тоа што таа незаконски е објавена на „Јутјуб“.

Застапникот на обвинението во случајот, обвинителот Владимир Милошевски, на рочиштетот рече дека во тек е истрага дали снимката објавена на „Јутјуб“ е идентична со таа од цедето приложено како доказ и за тоа кој и од каде го прикачил видеозаписот на „Јутјуб“.

Милошевски денеска во судницата рече дека се прибираат „докази за геопозицијата и за идентитетот на лицето што го извршило прикачувањето на видеозаписот“, но, на забелешката на судијката Дијана Груевска- Илиевска дека снимката е објавена пред две години, а сè уште нема постапка за случајот, обвинителот рече дека постапката е тајна е не може да сподели повеќе детали за тоа кој ја поставил снимката на социјалните мрежи.

Инаку, спорната снимка сè уште се наоѓа на видеомрежата „Јутјуб“, а беше објавена на 13 мај 2015 година на јутјуб-канал именуван како „hm home“.

Премиерот Зоран Заев рече дека не треба да се биде експерт за да се види дека снимката е иста, само што таа што е објавена на „Јутјуб“ е исечена на две места за да послужи за потребите на политичкото судење кое, како што алудираше тој, било организирано од претходната власт.

Од „Јутјуб“ не се отстранети ниту видеоснимката со Заев и со Никола Груевски за случајот „Пуч“, како и снимките со Љубе Бошкоски и со уште едно лице, а која според информациите, е од ПИ-мерките против Бошкоски за случајот „Кампања“.

Снимката со Заев и со Груевски, снимена со ПИ-мерки во премиерскиот кабинет во 2014 година, кога премиер беше Груевски, е објавена на 7 март 2015 година на канал именуван, како „hoho lol“, додека датумот што стои до видеозаписите со Бошкоски е 21 февруари, а објавувачот е „чкљ чкљ“.

Инаку, видеозаписите со Бошкоски се споменуваат во „бомбата број 3“ што ја објави СДСМ на 20 февруари 2015 година, а се однесуваше за начинот на кој лидерот на Обединети за Македонија беше уапсен еден ден по изборите во 2011 година.

Во разговорот, тогашниот шеф на кабинет на Никола Груевски, Мартин Протогер, ѝ предлага на поранешната министерка за внатрешни работи, Гордана Јанкулоска, да ги „протнат“ снимките во медиумите.

Протогер: Чекај, дали ние можеме освен ова, да… муабетот да го пуштиме?
Јанкулоска: Зависи во каква форма муабетот?
Протогер: Да кажеме што било. Дознава „Канал 5“ дека тоа и тоа. Да го продаде името, да направи ова?
Јанкулоска: Ај да го чуваме тоа за од утре-задутре, да ја напишам пријавата денес, оти знаеш денес мораме да ја исфорсираме да имаме пријава за да нема простор за тензија, он кога ќе си влезе во Шутка друг е муабетот више кога е внатре…


Заев денеска првпат како премиер треба да се појави во суд за случајот „Поткуп“


Скопје, 27 јуни, 2017 - 9:35 (META) 

Премиерот Зоран Заев денеска треба да се појави во Основниот суд Скопје 1, каде треба да продолжи судскиот процес за случајот „Поткуп, во кој тој е обвинет за барање поткуп од околу 200.000 евра од струмички бизнисмен за приватизација на градежно земјиште.

Инаку, ова ќе биде прво појавување на Заев во судот како премиер.

Првото рочиште за случајот „Поткуп“ беше закажано на 25 јануари минатата година, а оттогаш имаше речиси десетина одложувања.

На рочиштето што се одржа во април оваа година, Заев и неговите адвокати побараа Обвинителството за гонење организиран криминал и корупција да им достави копии од доказите за случајот, меѓу кои и наредбите од посебните истражни мерки (ПИМ) користени во случајот, бидејќи, како што рече тогаш Заев, се сомневаат во законитоста на начинот на кој се обезбедни.

Судијката Дијана Груевска-Илиевска го прифати барањето на одбраната и му наложи на Обвинетелството да ги достави доказите.

Според обвинението, Заев се товари дека во својство на службено лице, како градоначалник на Струмица, од бизнисменот Иван Николов побарал поткуп од 163.924 евра, односно по 2 евра за еден квадратен метар, за градежно земјиште во Струмица кое бизнисменот бил заинтересиран да го приватизира.

Почетокот на денешното рочиште е закажан во 10 часот.


Бурна политичка недела: Хан во Влада, Заев и Груевски на суд, СЈО со истечен рок


Скопје, 22 јуни, 2017 - 11:09 (META) 

Следната недела, од почеток до крај, ќе биде со набиена агенда од настани, кои се од интерес на јавноста, а нивниот исход ќе покаже како процесите важни за земјава ќе се одвиваат во иднина.

Последната недела од јуни, пред официјалниот почеток на летните одмори, ќе биде судбинска за понатамошните „реформски“ активности на Владата и пресудна за понатамошното функционирање на Специјалното јавно обвинителство.

На агендата за следната недела се:

  • 26 јуни – Иако е неработен ден, поради верскиот празник Рамазан-бајрам, в понеделник во земјава доаѓа еврокомесарот за проширување и добрососедска политика, Јоханес Хан, и ќе учествува на владината седница. Засега од Владата, иако беше најавено, не кажуваат дали седницата ќе биде отворена за јавноста и дали ќе се пренесува во живо на јавниот сервис МРТВ. Како што изјави оваа недела вицепремиерот за европски прашања, Бујар Османи, на еврокомесарот Хан ќе му биде предложен нацрт-план со мерките, активностите и со временските рамки за реформските приоритети.
  • 27 јуни – Закажано е рочиште за случајот „Поткуп“. Зоран Заев, првпат како премиер, треба да се појави на судскиот процес во кој тој е обвинет дека како градоначалник на Струмица, од бизнисменот Иван Николов побарал поткуп од 163.924 евра, односно по 2 евра за еден квадратен метар градежно земјиште во Струмица. Првото рочиште за случајот „Поткуп“ беше закажано на 25 јануари минатата година, а оттогаш имаше речиси десетина одложувања.
  • 28 јуни – Закажно е рочиште за насилствата пред Општина Центар од јуни 2013 година. Обвинението за случајот го поднесе Специјалното јавно обвинителство, а обвинети во т.н. случај „Шамари“, се лидерот на ВМРО-ДПМНЕ, Никола Груевски, поранешниот министер за транспрот и врски, Миле Јанакиески, пратеничката Даниела Рангелова и уште десетина други лица. Груевски в среда првпат треба да дојде во суд како лидер на опозициска партија.
  • 29 јуни – Врховниот суд ја закажа јавната седница на која треба да бидат разгледани и да се одлучува по жалбите на шестемина осудени на доживотни затворски казни во случајот „Монструм“, односно за петкратното убиство кај Смиљковско Езеро. Седницата, како што соопшти судот, ќе биде јавна, а ќе се одржи во големата сала на Врховниот суд.
  • 30 јуни – Истекува рокот на Специјалното јавно обвинителство за поднесување обвиненија за истрагите што ги отвори, а кои произлегуваат и се поврзани со прислушуваните разговори. Дел од медиумите пренесоа дека СЈО деновиве ќе поднесе обвиненија за десетина случаи. Специјалното јавно обвинителство изминатите две недели испрати покани до високи функционери на ВМРО-ДПМНЕ осомничени во нивните случи, но само дел се појавија на распит. На распит за случајот „Талир“ не се појави лидерот на партијата, Груевски, а оние што дојдоа (Миле Јанакиески, Иво Котевски, Даниела Рангелова, Сашо Мијалков) побараа увид во доказите и дополнително време. Според Законот за кривична постапка, СЈО е должно да ги испраша осомничените пред да ги заврши истражните постапки и да поднесе обвиненија.