!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Втор круг од претседателските избори во Словенија


Љубљана, 12 ноември, 2017 - 9:05 (META) 

Во Словенија денеска се одржува вториот круг од претседателските избори, на кои граѓаните можат да изберат меѓу актуелниот претседател Борут Пахор и градоначалникот на Камник, Марјан Шарец.
За победа во првиот круг од изборите, одржан пред три недели, на Пахор му недостигаа околу 20.000 гласови, додека Шарец освои 25 отсто од гласовите.

Според проекциите и анкетите, Пахор кој се повикува на своето искуство во политиката и се смета за гарант за политичката стабилност, и понатаму е фаворите за конечна победа, но со многу потесен резултат.

За разлика од Пахор, кој во текот на долгогодишната кариера, меѓу другото бил претседател на парламент, премиер и европратеник, 15 години помладиот Шарец е дипломиран актер и поранешен комичар кој со политика на локално нив почнал да се занимава пред седум години. Шарец истакнува дека најголема предност му е тоа што не припаѓа на политичката елита.


Словенците денеска избираат претседател, Борут Пахор фаворит


Љубљана, 22 октомври, 2017 - 10:35 (META) 

Повеќе од 3.000 избирачки места утрово во 7 часот се отворени во Словенија, а 1,7 милиони гласачи по шести пат од осамостојувањето на земјата ќе избираат претседател на државата.

За шеф на држвата се тркаат девет кандидати, меѓу кои пет се жени, најмногу досега. Сепак, најголеми шанси за победа на претседателските избори, според испитувањата на јавното мислење објавени изминатите денови, има актуелниот претседател на Словенија, Борут Пахор, кој се бори за својот втор петгодишен мандат.

Според последните анкети, Пахор би можел да добие повеќе од 50 отсто од гласовите, а најблизок конкурент му е Марјан Шарец, со 20 отсто од гласовите, пренесува ХРТ.

Избирачките места се затвораат во 19 часот, кога ќе бидат објавени проекциите на резултатите врз основа на анкетите за излезност.

Првичните резултати ќе бидат објавени денеска, доцна навечер, кога ќе биде познато дали ќе биде потребен втор круг од изборите, кој би се одржал за две недели.


Отстранети билбордите во Загреб што ја изнервираа Меланија Трамп


Загреб, 20 септември, 2017 - 10:59 (META) 

Рекламните билборди на училиште за странски јазици во центарот на Загреб на кои беше првата дама на САД, Меланија Трамп, се отстранети, а училиштето се извини откако доби закана за тужба од словенечкиот адвокат на Меланија.

На билбордот на „Амерички институт“ со кој се рекламираат курсеви по англиски јазик, покрај фотографијата на Меланија Трамп пишуваше „Замислете си колку далеку може да стасате со малку познавање англиски јазик“ (Just imagine how far you can go with a little bit of English). Билбордите биле отстранети вчера.

Наташа Пирц-Мусар, адвокатка на првата дама на САД, вели дека е задоволна од извинувањето на училиштето и од признавањето дека го прекршиле законот, како и од повлекувањето на билбордите.

Ивис Буриќ, портпарол на училиштето, се извинила за билбордите и рекла дека намерата била тие да звучат позитивно. Сепак, кампањата била успешна, оти билбордите привлекле големо внимание, појаснила Буриќ за медиумите.


Иванов – Брглез: Да се продлабочи економската соработка меѓу Македонија и Словенија


Скопје, 12 септември, 2017 - 18:22 (META) 

Претседателот Ѓорге Иванов и претседателот на словенечкиот Државниот збор, Милан Брглез, денеска разговараа за билатералните односи меѓу Македонија и Словенија, вклучувајќи ја соработката на парламентарно ниво.

Двајцата соговорници, како што соопштија од кабинетот на претседателот, констатирале дека во континуитет двете земји негуваат пријателски односи, без отворени прашања, базирани на долгогодишна конструктивна соработка и на заемна поддршка на билатерален и на мултилатерален план.

Иванов изразил задоволство од добрата динамика на политичкиот дијалог меѓу двете земји и од континуираната реализација на средби на високо ниво. Тој се заблагодарил за поддршка што Словенија ѝ ја дава на Македонија на паток кон ЕУ и кон НАТО и изразил надеж дека таа ќе продолжи во следниот период.

Во разговорите била посочена потребата за продлабочување на економската соработка и за зголемување на трговската размена меѓу двете земји, за што беше констатирано дека постои голем потенцијал.


Шекеринска во посета на Словенија, на средби со Пахор и со Могерини


Скопје, 3 септември, 2017 - 12:45 (META) 

Министерката за одбрана, Радмила Шекеринска, заедно со делегација од Министерството, утре и задутре ќе престојува во Република Словенија, на покана на министерката за одбрана на Словенија, Андреја Катич.

Во рамки на посетата Шекеринска ќе има средби и со претседателот на Словенија, Борут Пахор, и со потпретседателот на словенечката влада, Дејан Жидан.

Шекеринска утре ќе учествува и на Бледскиот стратегиски форум, на кој ќе учествуваат и министерот за надворешни работи, Никола Димитров, како и министерот за информатичко општество и администрација, Дамјан Манчевски.

Министерката Катич утре ќе организира работна вечера за Шекеринска и за потпретседателката на Европската комисија, Федерика Могерини.

Во текот на вториот ден, министерката ќе се сретне со претседателот и со членовите на Одборот за одбрана во словенечкиот Државен збор, а ќе ја посети и касарната Церкље, каде припадници на Армијата на Република Македонија во моментов посетуваат теоретска и практична обука за противвоздушна одбрана со лесниот преносен ракетен систем „Игла“.


Европски суд: Легитимно е враќањето на азилантите во Хрватска


Стразбур, 26 јули, 2017 - 13:10 (META) 

Австрија и Словенија можат легитимно да ги враќаат во Хрватска барателите на азил што стигнале на нивна територија преку Хрватска во екот на мигрантската криза, одлучи денеска Европскиот суд за човекови прави.

Судот заклучил дека во овој случај се применува Даблинскиот договор, според кој земјата на ЕУ во која барателот на азил прво влегол, треба да го разгледа неговото барање за азил.

Австриските и словенечките судови се обратија до Европскиот суд откако еден Сириец и две авганистански семејства го оспорија нивното враќање во Хрватска.

Во екот на мигрантската криза, за време на која само во 2015 година преку море во Европа стигнаа повеќе од милион луѓе, хрватските власти организира превоз на мигранти и на бегалци до хрватско-словенечката граница за да можат да поднесат барање за азил во други земји членки на ЕУ.

Така, сирискиот државјанин поднел барање во Словенија, а членовите на авганистанските семејства во Австрија. Сепак, Словенија и Австрија, повикувајќи се на Даблинскиот договор, сметаат дека Хрватска треба да ги разгледа нивните барања за азил бидејќи илегално влегле во таа земја.


Ќе се евакуираат 400 луѓе од село во Словенија зашто соселанец донел авионска бомба дома


Љубљана, 24 јули, 2017 - 11:42 (META) 

Евакуирани ќе бидат сите, речиси 400 жители на селото Вурберк во североисточниот дел на Словенија, откако нивни сосед нашол неексплодирана авионска бомба и со камион ја донел дома. Селаните ќе бидат евакуирани утре, а ќе им биде дозволено да се вратат во своите домови откако деминерите ќе ја онеспособат бомбата.

Селанецот ја нашол бомбата играјќи „Потрага по богатство“ во близина на замокот Вурберк и наместо да ја извести полицијата, ја откопал и со камион ја донел во својот двор, кој е блиску до селската црква, а дури потоа се јавил в полиција.

– Со оглед на видот на бомбата, тој имал многу среќа. Сè можело да заврши многу лошо. Со оглед на тоа дека бомбата била отстранета од местото на кое паднала за време на бомбардирањето и доколку не се ракувало со неа како што треба, новонастанатите промени би можеле да предизвикаат неконтролирана експлозија – изјавил за новинарите Игор Бох од одделението за неексплодирани средства.

Операцијата за деактивирање на бомбата ќе биде многу комплицирана и ќе се изведе во вторник, кога ќе биде евакуирана целата област во радиус од еден километар, односно, ќе се евакуираат 400 жители.

Човекот кој ја открил бомбата би можел да биде обвинет за нарушување на јавниот ред и мир и осуден на казна до пет години затвор.


Словенија и Хрватска ќе работат земјите од Западен Балкан да станат дел од ЕУ


Крањ, 3 јуни, 2017 - 18:28 (META) 

Словенија и Хрватска ќе продолжат да работат на зачленување на земјите од Западен Балкан во ЕУ, што ќе придонесе за зајакнување на довербата и на стабилноста во регионот. Ова го истакнаа министрите за надворешни работи на двете земји, Карл Ерјавец и Давор Иво Штир, на прес-конференција во Брдо кај Крањ, каде денеска се одржува состанокот на лидерите на Процесот Брдо – Бриони, пренесуваат медиумите.

Ерјавец и Штир оценија дека клучно за државите од Западен Балкан е да ги спроведат потребните реформи, а проширувањето да остане главна цел на Унијата.

– Словенија го поддржува процесот на проширување и јасно е дека регионот веќе ѝ припаѓа на ЕУ. Сепак, потребно е државите од Западен Балкан да ги спроведат реформите, да изградат институции, да го зајакнат владеењето на правото и да се справат со корупцијата и со организираниот криминал. Уверени сме дека стабилен Западен Балкан придонесува за стабилноста на ЕУ – изјави словенечкиот министер за надворешни работи, Карл Ерјавец.

Министерот за надворешни работи на Хрватска, Давор Иво Штир, истакна дека државите што сакаат да станат членки на ЕУ мора да ги спроведат реформите, но кога ќе бидат исполнети критериумите, вратата за членство мора да биде отворена. Тој нагласи дека ќе работи проширувањето да се одржи на дневниот ред на Унијата, додавајќи дека, всушност, станува збор за процес кој повеќе е „консолидација на Европа, отколку проширување“.

На состанокот на лидери во Брдо кај Крањ учествуваат и претседателот на Македонија, Ѓорге Иванов, и шефот на македонската дипломатија, Никола Димитров.


Наместо нови избори – нова влада, порачаа Пломп, Стефансон и Јазбец


Скопје, 25 април, 2017 - 16:45 (META) 

Амбасадорите на Шведска, на Холандија и на Словенија, Матс Стефансон, Ваутер Пломп и Милан Јазбец, денеска порачаа дека Брисел не гледа потреба за одржување на нови предвремени парламентарни избори, особено зашто последните биле оценети како фер и слободни, а новите избори би значеле само продлабочување на политичката криза во Македонија.

– Изборите што се одржаа во декември беа слободни и фер, како што потврдија многубројните меѓународни набљудувачи. Затоа би имало многу малку корист од нови избори толку бргу по изборите во декември. Сметам дека само ќе ја продолжат кризата, која веќе долго трае – рече холандскиот амбасадор Пломп.

Според шведскиот амбасадор, новите избори може да доведат до дестабилизирање на Македонија, поради што решението треба да се најде во Уставот.

– Нови избори во ваква ситуација би се одржале во клима на екстремна конфронтација, што не е добро за стабилноста. Решението треба да се бара во Уставот. Мислам дека е прерано и за „Пржино 3“ и не сум чул дека за тоа се разговара. За лидерски средби, немам инсајдерски информации, но во ситуација на таква конфронтирачка политичка клима во Македонија, дијалог меѓу опозицијата и владата не е лоша идеја, но тие треба да решат – рече амбасадорот Стефансон.

Словенечкиот амбасадор Милан Јазбец порача дека наместо да се бараат нови избори, политичките лидери треба да се фокусираат на спроведување на резултатите од изборите и на избор на нова влада.

– Фокусирајте се на суштината, обидете се да формирате влада, според односите во парламентот, не гледам потреба за нови избори – рече амбасадорот Јазбец.

Амбасадорите, сепак, не ја потврдија информацијата на германскиот неделник „Шпигел“, дека Европската Унија планира да воведе санкции за Македонија, односно да стави забрана за патување и за блокада на сметките на одредени македонски политичари, како и да ги скрати претпристапните ИПА-фондови. Според неделникот, германската канцеларка Ангела Меркел, наводно, за време на конференцијата на ЕПП во Малта, го предупредила лидерот на ВМРО-ДПМНЕ, Никола Груевски, дека ќе следат санкции доколку не престане блокадата на демократските процеси.

За донесување ваква одлука, потребен е консензус од сите 27 земји членки на ЕУ.


Словенечкото обвинителство поднесе тужба против Јанша и бара да му се одземат 400.000 евра


Љубљана, 20 април, 2017 - 12:32 (META) 

Словенечкото Специјално државно обвинителство поднесе тужба против лидерот на опозицијата, Јанез Јанша, и побара да му се одземе незаконски стекнатиот имот во вредност од 400.000 евра, јавија словенечките медиуми.

Во соопштението на обвинителството не се наведува идентитетот на Јанша, но весникот „Дело“ наведува дека нема сомнежи дека станува збор за претседателот на Словенечката демократска партија (СДП), пратеник во парламентот и некогашен премиер.

Тужбата е поднесена по финансиската истрага почната во 2013 година, во која се испитувало потеклото на имотот на Јанша, на неговата сопруга Уршка, нејзината роднина Наташа Пајенк, која управувала со нивните сметки, неговиот брат Рајко Јанша и на некогашниот секретар на партијата, Јоже Загожен, кој во меѓувреме почина.

Обвинителството одлучило да го тужи Јанша, кај кого во период за кој се однесува истрагата, од 2010 до 2013 година, е утврдена разлика меѓу пријавениот и стекнатиот имот во финансиски средства и во недвижности од 395.388 евра.