Петиција во Словачка против тенковите на моторџиите „Ноќни волци“


Братислава, 6 август, 2018 - 9:48 (META) 

Повеќе од 200 истакнати имиња од Словачка ја потпишале досега петицијата со која се бара од премиерот Петер Пелегрини да преземе мерки за растурање на кампот на моторџиската група „Ноќни волци“, која има свои ограноци во многу земји, а е основана во Русија и ужива сесрдна поддршка од рускиот претседател Владимир Путин.

Петицијата беше покрената откако преку снимки се дозна дека се дозна дека во логорот на „Ноќни волци“ во Долна Крупа, на околу 65 километри североисточно од главниот град Братислава, има тенкови, оклопни возила и противавионски топови.


Унгарскиот и словачкиот амбасадор: Очекуваме Македонија да ги почне преговорите со ЕУ


Скопје, 20 јуни, 2018 - 13:01 (META) 

Очекуваме добри вести идната недела, Македонија да ги почне преговорите со ЕУ. Ќе помогнеме колку што можеме зашто земјата треба да стане полноправен член што поскоро, а договорот со Грција е само дополнителен, силен поттик во оваа насока, рекоа денеска амбасадорите на Унгарија и на Словачка во Македонија, Ласло Дукс и Хенрик Маркуш, на прес-конференцијата по повод примопредавањето на претседателството со Вишеградската група.

И Дукс и Маркуш напоменаа дека Вишеградската четворка е силен поддржувач на проширувањето на ЕУ. За членството на Македонија, времето е повеќе од вистинско, а изборот е јасен.

– Отворањето на преговорите треба да почне во секој случај иако Договорот со Грција дава дополнителен, огромен придонес во оваа насока. Жалиме што процесот на преговори не почна уште пред многу години – истакна амбасадорот Маркуш, одговорајќи на новинарско прашање.

Унгарското претседателство официјално завршува на 30 јуни по што го презема Словачка на 1 јули.


Словачка за 10 години би можела да излезе од НАТО, тврди Чарногурски


Братислава, 24 октомври, 2017 - 13:58 (META) 

Во следните 10 години, Словачка би можел да излезе од НАТО, изјави поранешниот словачки премиер, Јан Чарногурски.

– Алијансата на ниту еден начин не ја чува нашата земја. Словачка со ниту една држава не е во судир, а членството во НАТО ја вовлекува Братислава во вештачко создавање конфликт со Русија. Затоа, голема е веројатноста во следните 10 години Словачка да излезе од НАТО – рече Чарногурски во интервју за рускиот весник „Известија“.

Поранешниот словачки премиер вели дека Алијансата се покажала како неспособна да се спротивстави на современите закани, со кои се соочуваат европските членки на НАТО, како што е меѓународниот тероризам и бранот мигранти.


Постојат двојни аршини за стоката за западот и за истокот на Европа, призна Јункер


Брисел, 27 јули, 2017 - 16:21 (META) 

Претседателот на Европската комисија, Жан Клод-Јункер, по средбата со словачкиот премиер Роберт Фицо во Брисел, призна дека навистина постои проблем со двојните аршини за продуктите и стоките наменети за Западот и за посткомунистиките земји кои се членки на ЕУ.

Јункер оцени дека проблемот не е безначаен и дека практиката на различен состав е неприфатлива, но рече дека за тоа веројтано нема да биде потребно воведување нови европски закони.

– ЕК смета дека проблемот со различен производ со исто име не е безначаен. Ќе му посветам внимание на проблемот – рече Јункер на заедничката прес-конференција со Фицо.

За Европската комисија е неприфатлива практиката, на пример, во сувомесните производи за новите Европејци да има помалку месо и повеќе адитиви иако цената е речиси иста, а некогаш е и помала на Запад, или прашокот за перење подобро да пере на западот на Европа, отколку на истокот. Јункер рече дека засега не се потребни нови прописи, но не го исклучи нивното носење доколку не се реши проблемот.

Словачкиот премиер Фицо на состанокот со Јункер, еврокомесарката за правда и за потрошувачки права, Вера Јоуров, и со претседателот на Европскиот совет, Доналд Туск, дојде како емисар на Вишеградската четворка, која во последните неколку години е сè погласна во барањата овие земји да престанат да бидат „канта за отпад“ на Европа и оти Чесите, Полјаците, Словаците и Унгарците имаат полно право под исто име да добиваат стока со ист состав и квалитет.

– За мене е најважно дека ЕК го призна проблемот и дека ќе дејствува да се реши. Не е важно како ќе го реши. Сеедно е дали мачката е црна или бела, важно е да лови глувци – рече Фицо и изрази надеж дека постепено ќе исчезне практиката што ги претвора Словаците во Европејци од понизок ред.

Чешката еврокомесарка Јоурова, која исто така активно води борба сите производите во Европа да бидат со ист квалитет, претходно изјавуваше дека сега секоја земја членка има национални контролни механизми кои би можеле да ги искористат за сузбување на практиката на двојни аршини.


Заев на средба со Безак: Мора да има решение по демократски пат!


Скопје, 21 април, 2017 - 17:08 (META) 

Претседателот на СДСМ, Зоран Заев, попладнево на средба со амбасадорот на Република Словачка, Мартин Безак, посочил дека мора да се почитуваат демократските принципи, односно одлуката на околу 700.000 граѓани.

– Решение мора да има низ почитување на демократските принципи. Граѓаните на веродостојни избори се изјаснија за промени. Легитимно е формирано новото парламентарно мнозинство од 67 пратеници избрани од околу 700.000 граѓани.  Продолжуваме кон избор на нов претседател на Собранието и нова влада, според мнозинската волја. Никој не смее спротивно на Уставот и на државните интереси да ја загрозува егзистенцијата и стабилноста на граѓаните, бидејќи тоа се тешки казниви дела – порачал Заев, повикувајќи дека е неопходно сите институции, партии и поединци да овозможат мирен трансфер на власта.

На состанокот се разговарало за итните реформски приоритети што е подготвена да ги реализира новата влада.


Малта го презеде претседавањето со ЕУ


Ла Валета, 1 јануари, 2017 - 12:42 (META) 

Малта од денеска го презема шестмесечното ротационо претседавање со Советот на ЕУ од Словачка.

Како приоритети за време на својот мандат, ги постави прашањата поврзани со миграцијата, безбедноста, единствениот европски пазар, како и соседската политика и поморскиот сектор.

– Малтешкото претседавање останува посветено на процесот на проширување. Проширувањето на ЕУ е долготраен процес кој бара силни реформи од земјите кандидатки – изјави портпаролката на претседателството на Малта, Венди Борг.


Словачки полицајци ќе ја чуваат јужната граница на Македонија


Скопје, 4 ноември, 2016 - 15:03 (META) 

Словачки полицајци ќе спроведуваат заеднички патролни активности со македонските колеги на државната граница со Грција, со намера за превенција на неовластено преминување на државната граница и за подобрување на јавната безбедност, информира Амбасадата на Република Словачка во Скопје. Врз основа на меморандумот за разбирање помеѓу министерствата за внатрешни работи на Словачка и на Македонија, на 7 ноември ќе пристигне петтата ротација на 25 припадници на словачката полиција. Според информациите, тие ќе бидат распоредени во областа на Дојранско Езеро.

Досега Република Словачка испрати вкупно 125 полициски службеници, што е најголем придонес по жител од осумте странски држави што учествуваат во заедничките операции во Македонија.

„Помошта е израз на солидарност во решавањето на мигрантската криза и во контекстот на актуелното словачко претседателство во Советот на ЕУ, каде еден од приоритетите е одржлива мигрантска и азилска политика“, истакнуваат од Амбасадата.

Најавено е дека полицајците ќе бидат соодветно опремени со теренски моторни возила, термални камери и со уреди за ноќно гледање. Мандатот на словачката полициска мисија ќе трае 30 дена со можност за продолжување.


Неселективно да се спроведе Договорот од Пржино, порача Амбасадата на Словачка


Скопје, 21 октомври, 2016 - 11:26 (META) 

Словачката амбасада ги повика државните институции и политичките партии да се придржуваат до Договорот од Пржино и да не ја опструираат работата на Специјалното јавно обвинителство.

„Словачкото претседателство во Советот на ЕУ нема да ги коментира изјавите на Министерството за внатрешни работи, ниту на Специјалното јавно обвинителство на оваа тема. Сите страни ги повикуваме на доследна и неселективна имплементација на обврските што произлегуваат од Договорот од Пржино, во корист на што поскоро враќање на Скопје на бриселската траекторија“, изјавија од Амбасадата на Словачка, на прашањето на „Мета“ за коментар на последните настани поврзани со опструкцијата на работата на СЈО што ја врши Управата за безбедност и контраразузнавање, заедно со поранешниот министер за внатрешни работи и актуелен директор на Бирото за јавна безбедност, Митко Чавков, и со дополнитениот заменик-министер Оливер Андонов.

Идентични пораки, во врска со случувањата на линија УБК – СЈО, упатија и Делегацијата на Европската Унија, Aмбасадата на САД во земјава, амбасадорот на Велика Британија во Скопје, Чарлс Гарет, и Европската комисија.


Mej: Британија со Брексит не ја напушта Европа


Братислава, 28 јули, 2016 - 18:07 (META) 

Британската премиерка Тереза Меј денеска во Братислава изјави дека Велика Британија со Брексит не ја напушта Европа.

– Остануваме во НАТО. Велика Британија и понатаму ќе стои до своите сојузници на источното крило на НАТО. Неодамна одобривме засилување на британската армија за источното крило и редовно ќе праќаме наши војници на вежбите во Словачка и кај другите сојузници – рече Меј на заедничката прес-конференција со словачкиот премиер Роберт Фицо.

Меј истакна дека Велика Британија по Брексит нема намера да се затвори себеси во изолација и оти сè додека не излезе од Европската Унија, ќе биде активен играч кој сака да учествува во европските одлуки и во потрагата по заедничко решение за мигрантската криза.


Чавков во Братислава: Потребна е засилена европска солидарност за бегалската криза


Братислава, 7 јули, 2016 - 18:23 (META) 

Мигрантската и бегалската криза биле во фокусот на неформалниот состанок на министрите за внатрешни работи и за правда на земјите членки на Европската Унија и на земјите кандидати за членство во Унијата, што денеска се одржа во Братислава, Словачка, а на кој учествуваше и министерот за внатрешни работи на Македонија, Митко Чавков.

Чавков, по состанокот, како што соопштуваат од МВР, меѓу другото истакнал дека е неопходна засилена европска солидарност, како во рамките на заедничкиот европски систем за азил, така и во поглед на зајакнување на шенгенските граници.

На состанокот, според Чавков, било договорено во наредниот период да се продолжи со интензивни контакти и средби, кои треба да бидат претходница на двата клучни настани посветени на мигрантската и на бегалската криза, односно самитот на лидери на глобално ниво во Њујорк и средбата на високо ниво во рамки на Обединетите нации (ОН), кои треба да резултираат со конкретни заклучоци и мерки за справување со кризата.

“Беа детектирани одредени слабости во досегашниот настап и следствено на тоа и реформи што треба да се преземат како во рамки на шенгенскиот каталог, така и во рамките на Фронтекс, односно проширување на неговата мисија, потоа зајакнување на регулатива за датотеки Еуродакт и на капацитети на постоечкиот систем на азил“, изјавил Чавков.

Тој, по состанокот, истакнал дека на дебатата од страна на повеќе земји на ЕУ била нотирана и поздравена досегашната активност и учество на Македонија во справувањето со мигрантската криза.