!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Земјите од Западен Балкан ќе бараат да не се воведуваат дозволи за патување во ЕУ


Скопје, 25 октомври, 2017 - 12:18 (META) 

Македонија внимателно го следи развојот на настаните со иницијативата на Европската комисија, граѓаните на трети земји на кои не им е потребна виза за влез во Европската Унија, од 2020 година да аплицираат за дозвола за патување пред да пристигнат во ЕУ, соопшти денеска министерот за надворешни работи, Никола Димитров, по средбата со шефот на косовската дипломатија Беџет Пацоли.

Прашан дали Македонија планира да реагира до Советот на Европа за предложената мерка и дали ќе возврати со реципрочни мерки, Димитров рече дека „ако сакаме да бидеме дел од ЕУ и од шенген-зоната, тогаш слободата на движење е особено важна“.

– Ќе направиме сè да нема дополнителни тешкотии во слободата на движење. Ќе разговарам со сите мои колеги од регионот, да најдеме начин да укажеме дека дополнителни обременувања на слободата на движење не се корисни. Се надевам дека ќе наидеме на разбирање. Што конкретно ќе излезе од тоа, ќе видиме. Мислам дека е рано да се зборува за тоа што треба да се преземе понатаму – рече Димитров, додавајќи дека е потребна поголема отвореност, а не затворање на земјите членки на ЕУ кон регионот и кон Македонија.

Тој рече дека иднината на Балканот е во Европа и изрази благодарност за сè погласните пораки за интегрирање на регионот, но истакна дека е време на конкретни чекори.

– Сакаме 2018 година да биде европска година за Балканот, а ова не соодветствува на тој дух – рече Димитров.

Пацоли повтори дека Косово не треба да остане црна дупка на Европа и изрази надеж дека во 2018 година косовските граѓаните ќе добијат визна либерализација.

Новиот европски систем за патување и овластување (ETIAS -European Travel Information and Authorisation System) треба да овозможи напредни проверки на безвизните патници и на тие за кои се смета дека претставуваат ризик во однос на безбедноста. Пред да заминат во ЕУ, граѓаните ќе треба да платат 10 евра за преку интернет да добијат дозвола за патување во Унијата.


Јункер и Меј следната недела во Лондон ќе разговараат за подготовките за Брексит


Брисел, 20 април, 2017 - 20:37 (META) 

Претседателот на Европската комисија (ЕК), Жан-Клод Јункер, в среда ќе отпатува за Лондон, на разговори со премиерката на Велика Британија, Тереза Меј, околу подготовките за преговорите за излегувањето на земјата од Европската Унија (Брексит).

Портпаролката на ЕК, Мина Андреева, денеска соопштила дека заедно со Јункер во Лондон ќе отпатува и главниот преговарач на ЕУ за Брексит, Мишел Барние. Таа додала дека станува збор за посета на покана на британската премиерка.

Јункер вчера изјави дека преговорите за излегување на Британија од ЕУ ќе почнат по предвремените парламентарни избори во Велика Британија, закажани за 8 јуни.

Прашана за коментар на пишувањата во медиумите дека Меј ќе ја укине слободата на движење на граѓаните на ЕУ во Велика Британија пред изборите, Андреева го повторила ставот на Брисел дека човековите права мора да се почитуваат и дека никој не треба да ги користи како адут во преговорите.

„Сакаме повторно да ги увериме граѓаните на ЕУ што живеат во Велика Британија, како и британските државјани во ЕУ, дека нивните права и понатаму ќе се почитуваат без дискриминација, како и тоа дека ова ќе биде многу важно прашање во преговорите, кога тие ќе почнат“, истакнала портпаролката на ЕК, пренесуваат агенциите.