!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ракометарите на „Вардар“ пристигнаа на плоштадот Македонија, славењето почна


Скопје, 6 јуни, 2017 - 14:54 (META) 

Десетици илјади граѓани денеска се собраа на плоштадот Македонија во Скопје, каде ги пречекаа европските шампиони во ракомет, ракометарите на „Вардар“.

Час и половина ечеа навивачки и патриотски песни, а се вееја знамињата на ракометниот клуб „Вардар“, на Македонија и со сонцето на Вергина.

Ракометарите пристигнаа во 13.45 часот со двокатен автобус во боите на клубот. Тие беа придружувани од полиција, а кога пристигнаа, добија громогласен аплауз од граѓаните.

На почетокот на манифестацијата, химната на Македонија ја отпеја пејачката Викторија Лоба, а потоа водителите, по претставувањето на кратката историја за клубот, почнаа да ги прозиваат ракометарите на сцената.

Сите истакнаа дека ова е заслужена победа за Македонија и дека сè уште не можат да поверуваат дека успеале да се искачат на ракометниот врв на Европа.

Тренерот на женскиот тим на РК „Вардар“, Гордана Нацева, рече дека не треба да чекаме уште 15 години за да имаме вакви прослави. Таа истакна дека тоа што тимот на „Вардар“ е со меѓународен состав, покажал дека како народ, нација и држава заслужуваме ваква победа. На крајот од својот говор, Нацева ја повика „Пивара Скопје“ да ја смени својата реклама, во која се вели дека некои се радуваат и на четврто место, бидејќи Македонците знаат да се радуваат и на прво место.

Сопственикот на клубот, Сергеј Самсоненко, рече дека пред да заминат да ги одиграат последните натпревари, се договориле да се претставуваат како туристи, кои дошле да се прошетат, за на крај да им покажат дека се дојдени да бидат шампиони.

По говорот на Самсоненко, ракометарите, заедно со насобраните граѓани, заедно запеаја „Ој Вардаре, македонски, ти ја красиш Македонија“.


Тачи: Ослободувањето на Харадинај е добра вест за Косово


Приштина, 27 април, 2017 - 12:11 (META) 

Косовскиот претседател Хашим Тачи оцени дека одлуката на францускиот суд за ослободување на лидерот на Алијансата за иднина на Косово, Рамуш Харадинај, е добра вест за Косово.

Во рекацијата на својот фејсбук-профил, тој напиша дека оваа одлука е доказ за неправедни обвинувања на Србија спрема припадниците на Ослободителната војска на Косово (ОВК).

„Пресудата на судот во Колмар, господинот Харадинај да се врати на Косово, е добра вест за неговото семејство, соработниците и за сите граѓани на Косово. Уште еднаш се докажа дека обвиненијата на Србија против ОВК се неправедни и спротивни на демократските принципи“, напиша Тачи.

Косовските медиуми јавуваат дека во Приштина почнало славење со многу пукотници. Рамуш Харадинај се очекува да пристигне во 19.30 часот.


Македонците учествуваа на парадата за Денот на Австралија во Мелбурн


Мелбурн, 26 јануари, 2017 - 12:01 (META) 

Австралија денеска го слави националниот празник, 26 јануари. По тој повод, во Австралија се организираа низа манифестации, меѓу кои најпознати се парадите во големите градови.

Во центарот на Мелбурн се одржа традиционалната парада на која продефилираа повеќе од 80 етнички заедници што живеат во Австралија, меѓу кои и македонската, предводена од Советот на македонската заедница за Мелбурн и за Викторија.

– На почетокот, се интонираше химната на Австралија и беа прочитани реферати по повод празникот, а говор одржа и премиерот на Викторија, Даниел Ендруз. Пред политичкиот врв на Викторија, претставници на дипломатскиот кор, бизнисмени и обични луѓе, продефилираа голем број етнички групи од целиот свет кои живеат во Австралија и ја прават уникатна и единствена оваа земја – вели Никола Ставрески.

Австралија е пример за мултикултурна држава со единство, мир и хармонија, за соживот на повеќе од осумдесет нации во една држава, вели тој и додадва дека Македонците секоја година се дел од овој настан.

– Македонците, кои секоја година се дел од овој голем настан, и оваа година со гордост продефилираа на парадата, веејќи ги националното и државното знаме на Република Македонија. Тие уште еднаш покажаа дека се гордеат со своето потекло и достоинствено нè претставија пред највисокиот врв на Викторија. Од страна на организаторот беа именувани како Македонци и претставници на македонската заедница од Мелбурн и од Викторија. Поддршка на нашите учесници им даде и генералниот конзул на Република Македонија, Бети Коруновска, која беше во редовите на дипломатскиот кор и која ги поздрави нашите учесници – додава Ставрески.