Распука мозаикот на плоштадот „Скендербег“


Скопје, 28 ноември, 2018 - 12:33 (META) 

Една година по официјалното отворање на плоштадот „Скендербег“ во Скопје, мозаикот  распукува, јави „Порталб“.

Покрај мозаикот на фотографијата, има и бројни други пукнатини по ѕидовите на издигнатиот плоштад.

Од сајтот се обратиле во Општина Чаир, чија инвестиција беше плоштадот, а од таму добиле одговор дека нема оштетувања на мозаикот.

„Секторот за урбанизам во Општина Чаир постојано се грижи за одржувањето на плоштадот ,Скендербег’ преку поставување на потребната урбана опрема, засадување цвеќиња и редовно чистење. Комисијата ангажирана од овој сектор при последната теренска проверка откри оштетувања на плочките и на скалилата, коишто ќе бидат поправени наскоро. Во однос на тврдењето за оштетување на мозаикот, споменатата комисија, составена од архитекти и инженери, не откри оштетувања што бараат естетски интервенции“, одговориле од Општина Чаир.


Град Скопје ќе прави мобилна апликација за споделување превоз заради намалување на загадувањето


Скопје, 6 ноември, 2018 - 15:51 (META) 

Град Скопје планира апликација за мобилни телефони за оперативните системи Андроид и ИОС, со која скопјани ќе може да се организираат и да се договараат за заеднички превоз со автомобил, како една од мерките за намалување на загадувањето на воздухот.

Огласот за изработувач на апликациите е распишан во петокот, планирани се верзии на македонски и албански јазик, а според проценките, за тоа би се потрошиле вкупно 5.000 евра.

Според замислата, скопјани преку апликацијата би се договарале да се превезат до некое место со автомобил во кој има слободни места, за да се намали сообраќањето на автомобили, а со тоа и количеството испуштени гасови и загадувачки честички од ауспусите.

Во огласот се бара апликацијата да има можност за креирање на профил на корисникот или логирање преку Фејсбук, можност за внесување на рутата, деновите и времето кога ја вози или патува на рутата, можност за поврзување на корисникот во зависност од тоа дали е пријавен како возач или како патник со сите корисници кои ја возат или патуваат на таа рута.

Исто така, апликацијата треба да има ГПС лоцирање на корисникот и можност за прикажување на сите други рути на кои има регистрирано корисници и можност за бирање на рутата во било кое време, можност за избор на возач или патник во било кое време, овозможување комуникација за корисниците на групата, можност за откажување на рута како возач или место како патник, како и известување за затворени улици и булевари.


„Еко-свест“ покрена петиција за мерки за намалување на аерозагадувањето во Скопје


Скопје, 2 ноември, 2018 - 13:00 (META) 

Центарот за истражување и информирање за животна средина „Еко-свест“ по најновите извештаи за загадувањето на воздухот во Скопје, покрена онлајн-петиција со која од Министерството за животна средина и просторно планирање (МЖСПП) и Град Скопје се бараат итни чекори за борба против причините за загадување на скопскиот воздух.

Еко-свест“ ги повика сите граѓани да се потпишат на петицијата, со која се бара забрана за употребата на јаглен за загревање на домаќинствата, како и ограничување на движењето на возилата во центарот на Скопје, како и нов зимски сообраќаен режим во градот.

Се бара и намалување на ДДВ за топлинска енергија и намалување на трошоците за приклучување на старите и новите згради на централното градско греење, како и подобрување на јавниот транспорт. Дополнително се предлагаат стимулации за работниците кои одат до работа и до работа дома пеш или со велосипед или пак ќе се организираат повеќе лица да патуваат со еден автомобил.

Се предлага и ограничување на индустријата и градежните активности во зимскиот период, како и строги казни за палењето диви депонии или стрништа.

Петицијата може да се потпише тука.


Бујар Османи утре од Атина во Скопје се враќа со првиот лет по повеќе од една деценија


Скопје, 31 октомври, 2018 - 15:48 (META) 

Вицепремиерот за европски прашања Бујар Османи утре ќе отпатува во работна посета на Атина, од каде ќе се врати со авион, со првиот лет меѓу Скопје и Атина по повеќе од една деценија, соопштија од кабинетот на Османи.

Тој во Атина ќе се сретне со заменикот министер за надворешни и европски работи на Грција, Јоргос Катругалос. Тема на средбата ќе бидат билатералните односи меѓу двете земји, Договорот од Преспа и обврските на двете земји што произлегуваат од него, но и за мерките за градење доверба,  унапредување на односите меѓу двете земји и поддршката од Грција за нашите европски интеграции.

По завршувањето на официјалната посета, Катругалос и Османи на атинскиот меѓународен аеродром ќе присуствуваат на церемонија по повод првото полетување на авион кон Скопје по пауза од повеќе од 10 години. Османи и делегацијата ќе се вратат во Македонија со овој лет на компанијата „Ејџиан Ерлајнс“.


Кривична пријава за маж што се заканувал на пратениците преку Фејсбук


Скопје, 22 октомври, 2018 - 9:34 (META) 

СВР Скопје и Секторот за компјутерски криминал и дигитална форензика при МВР ќе поднесат кривична пријава против 38-годишниот А.Н. од скопско Коњари, поради закани преку Фејсбук. Кривичната пријава ќе биде за загрозување на сигурноста и за ширење расистички и ксенофобичен материјал преку копјутерски систем.

Полицијата вчера извршила претрес во домот на осомничениот, при што се одземени предмети, а тој бил повикан на службен разговор во полициска станица.

Секторот за компјутерски криминал и дигитална форензика при МВР ги повикува граѓаните што се изложени на вакви закани или ќе ги забележат некаде, случаите да ги пријавуваат во најблиската полициска станица или на адресата cybercrime@moi.gov.mk.


Штипската Клиничка болница плати над 346.000 евра долг кон вработените


Штип, 18 октомври, 2018 - 14:04 (META) 

Со аванс од Фондот за здравствено осигурување, Клиничката болница од Штип им го плати долгот на болничарите, медицинските сестри и докторите, кои во периодот 2015-2017 година не добивале надоместок за дежурство. Над 80% од персоналот ангажиран во дежурствата имаше извршни решенија за наплата, со што на болницата и се закануваше блокада на сметката. Покрај основниот долг од 364.000 евра, болницата платила уште дополнителни околу 80.000 евра за извршување.

Директорот Ален Ѓеоргијев вели дека парите што ги позајмиле, сега Фондот за здравствено осигурување ги сопира на неколку рати. Веќе се минусирани 8 милиони денари од парите што ФЗОМ ги префрла на болницата за редовно работење.

-Ќе го стегнеме ременот, ќе се трудиме и натаму да останаме ликвидни како што сме до сега, бидејќи сè уште не сме навлегле во должничка криза. Можеби овие месец- два ќе имаме некои доцнења во исплатата, меѓутоа, јас сум оптимист дека ќе успееме да го пребродиме овој економски удар – изјави Ѓеоргијев.

Проблемот со неплатените дежурства се провлекуваше со години, за да кулминира кога вработените тужеа на суд, по што се наталожија над 450 извршни решенија.

Директорот Ѓеоргијев вели дека ако имало волја, претходното раководство на болницата лесно можело да го реши проблемот.

-Јасно е кој не ги исплаќал парите. Во законот јасно си пишува како треба да одат исплатите. Гледате колку сето ова нè чини. Некој друг, не знам од кои причини, не плаќал. На крај, по сумирањето на бројките, може ќе побараме одговорност – рече Ѓеоргијев.

Тој се заблагодари на поголемиот дел од вработените, кои по серија преговори, сепак одлучиле да почекаат и не ги активираат извршните решенија, кои, според директорот Ѓеоргијев, сигурно ќе им ја блокирале сметката.

Дежурствата ја чинат Клиничката болница во Штип значаен дел од месечните издатоци, особено со зголемувањата кои ги добија лекарите и средниот персонал. Сепак, повисоките плати не го решаваат проблемот со недостиг на лекари с- пецијалисти, кои акутно, штипската Клиничка болница го решава со позајмици.

Во моментов во Штип секоја недела дежураат специјалисти од Клиничкиот центар од Скопје и од Општата болница од Кочани. Во Штип доаѓаат 5 неврохирурзи од Клиниката за неврохирургија од Скоје, кои освен дежурство преземаат и редовни операции, а има договор за еден детски хирург. Од Општата болница од Кочани дежураат по еден  невролог и еден анестезиолог.


Утре во Скопје ќе се прска против комарци


Скопје, 30 август, 2018 - 10:55 (META) 

Градот Скопје соопшти дека третата фаза прскање против ларви од комарци од авион и од земја ќе се изврши утре, 31 август, додека четвртата фаза од прскањето од земја против возрасни форми на комарци ќе почне в понеделник, а ќе заврши најдоцна в петок.

Доколку временските услови не го дозволуваат вршењето на дезинсекцијата, авионското прскање ќе се изврши првиот нареден ден кога ќе бидат поволни временските услови, а согласно на тоа ќе се извршува и прскањето од земја.

Град Скопје ги повика пчеларите навремено да ги преземат потребните мерки за заштита на пчелите.


Град Скопје ќе ангажира асистенти на стари лица и на ученици


Скопје, 7 август, 2018 - 13:02 (META) 

Вклучувајќи се во програмата за општинско корисна работа, Град Скопје  ќе ангажира десет образовни асистенти во девет средни училишта во Скопје, кои ќе работат со ученици со посебни образовни потреби или ученици со интелектуална попреченост. Исто така, ќе бидат ангажирани и пет персонални асистенти за лицата со телесна попреченост и пет негуватели на стари лица.

За позицијата асистенти ќе бидат работно ангажирани припадници на некоја од ранливите категории на население, вклучувајќи ги и корисниците на социјална помош.  За таа цел, Градот Скопје во соработка со УНДП и Агенцијата за вработување, распиша јавен оглас.

Покрај финансискиот надомест, на асистентите ќе им биде овозможено и бесплатно користење на јавниот градски превоз.


Од недела ограничен сообраќај на дел од булевар „Илинден“


Скопје, 27 јули, 2018 - 15:03 (META) 

Центарот за управување и контрола на сообраќајот на Град Скопје соопшти дека од недела ќе има времен сообраќаен режим на дел од булевар „Илинден“. Ќе биде ограничено движењето на делот од крстосницата со булевар 8 Септември до Сити Мол, во сообраќајната лента во тој правец.

Причината за изменетиот режим се градежни работи за гасоводна мрежа, што ќе ги изведува Акционерското друштво ГА-МА-Скопје. По нивното завршување, ќе се врати нормалниот сообраќаен режим, за што јавноста ќе биде информирана навреме.


Електричен автобус ќе сообраќа шест месеци на линијата „15“ во Скопје


Скопје, 4 мај, 2018 - 12:23 (META) 

Новиот електричен автобус, за кој Град Скопје пред неполни три месеци потпиша договор со израелската компанија „Чериот Моторс“ за пробно користење, од денеска во наредните шест месеци ќе сообраќа на линијата „15“.

– Автобусот е направен во согласност со последните технолошки трендови во оваа индустрија. Станува збор за енергетски ефикасен автобус кој троши минимално количество електрична енергија и е опремен со систем за брзо полнење. Најголемата предност е тоа што воопшто нема емисија на издувни гасови што го загадуваат воздухот – рече градоначалникот Шилегов на денешната презентација на новиот електричен автобус.

Станиците за полнење на крајните постојки во Ново Лисиче и во Карпош 4 се поставени од ЕВН.

Во Скопје веќе сообраќаат два екоавтобуси на гас, на линијата број 5 и на линијата број 2.

– Решавањето на деценискиот проблем со јавниот превоз во Скопје е дел од листата приоритети на градот. Годинава предвидовме буџет за субвенции за набавка на екоавтобуси  во висина од 100 милиони денари и за приватните превозници во висина од 20 милиони денари зашто Скопје заслужува автобуски превоз кој нема да загадува, ќе биде енергетски ефикасен и кој во целост ќе излезе во пресрет на потребите на граѓаните коишто го користат. Свесни сме дека ова не го решава во целост проблемот со загадувањето на Скопје во зимскиот период, но затоа работиме на тоа еден по еден да ги елиминираме причинителите за загадувањето, на долг рок – нагласи Шилегов.