!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Разбојници нападнале скопјанец и му го украле возилото


Скопје, 21 мај, 2017 - 16:45 (META) 

Две машки лица ноќеска околу 2 часот по полноќ на булеварот „Гоце Делчев“ нападнале возач и му го одзеле возилото, соопшти МВР.

Напаѓачите со возило марка „ровер“ со непознати таблички му го попречиле патот на Б.Д. по што го извлекле од неговото возило „даеву рејсер“, физички го нападнале, му го одзеле возилото и побегнале во непознат правец.

Полицијата презема мерки за пронаоѓање на сторителите и за целосно расчистување на случајот.


Ограбена аптека во Радишани


Скопје, 20 мај, 2017 - 11:45 (META) 

Вработена во аптека во населба Радишани синоќа во 21 часот пријавила во полиција дека непознат маскиран сторител извршил разбојништво.

Сторителот со закана со нож од вработената го одзел дневниот промет и побегнал во непознат правец.

Се преземаат мерки за пронаоѓање на сторителот и за целосно расчистување на случајот.


Земјотрес од 4,2 степени ги разбуди скопјани


Скопје, 14 мај, 2017 - 10:13 (META) 

Земјотрес од 4,2 степени во 4.08 часот утрово ги разбуди скопјани, исплашени дека тоа е можеби почетокот на серија земјотреси слични на тие што од 11 септември минатата година го тресеа подрачјето на главниот град.

Земјотресот имал хипоцентар, односно се случил на длабочина од 2 километри, а епицентарот е кај селото Марино, известува Европско-медитеранскиот сеизмолошки центар.


Лекарка пронајдена мртва со исеченици на рацете и на вратот


Скопје, 10 мај, 2017 - 9:48 (META) 

Во СВР Скопје, вчера во 21 часот било пријавено дека во нејзиниот дом, на улицата Елисие Поповски во Скопје, била пронајдена мртва Ј.С.М. Полицијата извршила увид, при што било констатирано дека покојната има рани од нож на рацете и на вратот, а лекар од брза помош констатирал смрт. По наредба на јавен обвинител, телото е предадено за обдукција, соопштија од СВР Скопје за „Мета“.

Според некои пишувања во македонските медиуми, станува збор за лекарка на Клиниката за нефрологија при Клинички центар и професорка на Медицинскиот факултет.


В недела градските автобуси во Скопје по изменети траси


Скопје, 5 мај, 2017 - 12:58 (META) 

Поради одржувањето на „Скопски маратон 2017“, в недела, во периодот од 7 до 14 часот, градските автобуси во Скопје, односно тие на ЈСП „Скопје“ и на приватните превозници, ќе сообраќаат по посебни траси, кои ќе отстапуваат од вообичаените линии.

Toчниот распоред може да се види на веб-страницата на ЈСП „Скопје“.


За едно деноноќие гореле два автомобили во Скопје


Скопје, 26 април, 2017 - 15:02 (META) 

Два автомобили гореле вчера и ноќеска во Скопје, извести полицијата.

Првиот случај бил пријавен во полиција од скопските пожарникари, кои вчераутро известиле дека изгаснале пожар на автомобил на паркиралиштето до Меѓуградска автобуска станица. Пожарникарите ги известила скопјанка која управувала со автомобилот „бе-ем-ве“ со скопски таблички. Кажала дека штом го паркирала автомобилот, од кај моторот почнал да излегува чад.

Вториот случај е во населбата Бутел, а според некои медиуми, изгорел автомобил на пејачот Сашо Каимовски – Панки. Делумна потврда за тоа има и во полицискиот билтен, односно во наведените иницијали на сопственикот на изгореното возило. Според полицијата, 55 минути по полноќ ноќеска граѓанин пријавил дека е опожарен автомобил „ауди А8“ на С.К. (50). Пожарот на автомобилот на улицата Натанаил Кучевишки го изгаснала Бригадата за противпожарна заштита – Скопје.


Пронајдени двајца мртви мажи во Скопје, едниот бил во трафостаница


Скопје, 26 април, 2017 - 14:39 (META) 

Две мртви машки тела се пронајдени вчера во Скопје, од кои едното е на засега непознато лице, а било пронајдено во трафостаница, извести СВР Скопје.

Имено, вчера вработен во „ЕВН Македонија“ пријавил во полиција дека во подземна вклучена 10-киловолтна трафостаница, лоцирана во непосредна близина на Македонска опера и балет, пронашол безживотно тело на непознато машко лице.

Екипа на брза помош констатирала смрт, а увид извршиле јавен обвинител и увидна екипа на СВР Скопје. По наредба на јавен обвинител, телото на починатото лице е предадено во Институтот за судска медицина и за криминалистика за обдукција.

СВР Скопје вели дека се преземаат мерки  за утврдување на идентитетот на починатиот и за целосно расчистување на случајот.

Вториот случај бил пријавен вчера попладне, при што пријавувачот кажал дека пронашол починато лице во објект во изградба на улицата Сава Ковачевиќ. Смртта ја констатирала екипа на брза помош, а увидна екипа на СВР Скопје утврдила дека се работи за Г.Б. (27) од Скопје. По наредба на јавен обвинител на телото на починатиот ќе се врши обдукција.


„Гранит“, „Бетон“ и италијанска компанија ќе го градат новиот клинички центар во Скопје


Скопје, 23 април, 2017 - 15:54 (META) 

Новиот клинички центар во Скопје во вредност од 72 милиони евра ќе го градат двете најголеми македонски градежни компании, „Гранит“ и „Бетон“, во соработка со една италијанска компанија, информираше денеска на прес-конференција министерот за здравство Никола Тодоров.

– Оваа понуда е избрана како најприфатлива за доделување на договорот за изведба, а истовремено ги исполнува сите услови што се предвидени за изградба на вакви комплексни објекти. Изборот е направен врз основа на добивање одобрување од страна на Банката за развој на Советот на Европа. Комисијата за секој чекор и одлука добиваше одобрение од стручен тим на Банката за развој на Советот на Европа – истакна Тодоров.

Тој нагласи дека прво ќе се обезбедат привремени пристапни патишта во рамки на Клиничкиот центар, како и трансфер на клиниките за неврологија, кожна и очна клиника во простор каде ќе ги извршуваат своите функции додека трае градбата.

– Рокот за завршување на градбата на новиот клинички центар е предвиден за 45 месеци. Вкупната новопроектирана нето-површина на оваа зграда изнесува 47.000 квадратни метри, околу 6.500 квадратни метри проодни тераси и покривни градини. Зградата се состои од едно подземно ниво, приземје, девет ката и современ хелиодром за транспорт на пациенти на десеттото ниво со површина од 531 квадратен метар – нагласи Тодоров.

Тој не зборуваше за италијанската компанија, но „Телевизија 24“ неодамна објави дека италијанската компанија „ИНСО Системи“, која заедно со двете македонски компании е носител на конзорциумот што го доби тендерот, во последните години работела со загуба, што било спротивно на условите од тендерската документација.


Дачиќ одговори на амбасадорите на САД: Дали ќе реагиравте вака ако го споменаа Скопје?


Белград, 21 април, 2017 - 21:18 (META) 

Како опасни, а не „невнимателни“ ги оквалификува денеска министерот за надворешни работи на Србија, Ивица Дачиќ, изјавите на премиерот на Албанија, Еди Рама, претседателот на Косово, Хашим Тачи, и на Јонуз Муслиу, градоначалникот на општина Бујановац, за обединување на сите Албанци и за создавање на „голема Албанија“.

Со тоа тој одговори на амбасадорите на САД во Белград, Приштина и во Тирана, кои во осудите го употребија терминот „careless“.

-Тие изјави се опасни за мирот и за стабилноста на Балканот и на Европа. Дали амбасадорите би реагирале толку благо да беше споменато Скопје, грчки Епир или црногорскиот Улцињ, како што Муслиу го стави српски Ниш во границата на „голема Албанија“? – праша Дачиќ.

Шефот на српската дипломатија вели дека таквите изјави не се невнимателни, туку одраз на јасната платформа за сите Албанци во „голема Албанија“ и порача дека додека таквите изјави не се окарактеризираат како закана за мирот во регионот, „Албанците ќе продолжат со провокациите“.

Дачиќ порача дека никаде во светот не е дозволено да се повикува на нарушување на територијалниот интегритет на една земја, „па нема да може ни во Србија“.

– Тоа што Србија е воздржана во реакциите и сака да игра конструктивна улога во регионот, не значи дека Србија е слаба, туку тоа е одраз на силата и на посветеноста на мирот – рече српскиот министер за надворешни работи.

Амбасадорот на САД во Србија, Кајл Скот, денеска изјави дека изјавите за обединување што во изминатите денови беа дадени од албанските политичари од Албанија, Косово и од Јужна Србија се невнимателни и дека не придонесуваат за стабилноста на регионот и не го поддржуваат европскиот пат на сите земји на Западен Балкан.

На сличен начин реагираше и амбасадорот на САД во Косово, Грег Делави, кој порача дека САД се против „невнимателните разговори“ за обединување на Косово и на Албанија и против претераните реакции на таквите изјави, што ја поткопуваат регионалната стабилност.


Голем пожар во бараките кај ГУЦ на Партизанска


Скопје, 21 април, 2017 - 13:15 (META) 

Голем пожар избил во бараките кај скопското училиште „Здравко Цветковски“, во близина на бензинската пумпа на „Макпетрол“ на булеварот Партизански одреди.

Противпожарни екипи се на терен и се обидуваат да го изгасат огнот, кој целосно ги зафатил бараките. Нема информации за повредени, но поради густиот чад што се издига и е видлив на булеварот, наводно се евакуирани и учениците од средното училиште.

Засега не се знае причината за пожарот.


.