!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Скопјанец го убил татко си со нож


Скопје, 7 септември, 2017 - 12:45 (META) 

Четириесет и едногодишниот скопјанец И.Т. синоќа со нож го убил својот татко во нивниот дом во населбата Црниче.

Полицијата била повикана од нивна сосетка, на улицата Чедомир Кантарџиев во Скопје, која пријавила дека соседите се тепаат. Кога пристигнале полицајците, на прагот на дневната соба го пронашле избоден Љ.Т. (68), а лекарот од итна медицинска помош констатирал смрт.

Како што соопшти СВР Скопје, сопругата на Љ.Т. изјавила дека додека со сопругот седеле во дневната соба, дошол нивниот син, ја откорнал влезната врата и влегол, по што ја избркал од собата. Потоа почнал да го влече татко си и во еден момент го избодел со нож. Осомничениот потоа заминал и по извесно време се пријавил во Ургентниот центар „Мајка Тереза“ каде побарал помош, бидејќи имал расеченица на десната рака.

Осомничениот И.Т. е приведен и задржан во полициската станица во Кисела Вода, а по наредба на јавен обвинител, телото на убиениот е однесено на обдукција.


Загина скопјанец во сообраќајка кај Лозово


Лозово, 31 март, 2017 - 17:56 (META) 

Во возило што излетало од коловозот кај Лозово на патот Велес – Штип, загина 63-годишен скопјенец, кој бил сопатник во автомобил „шкода“ со скопски регистерски ознаки. Возачот е повреден и со возило на итната помош на Свети Николе е пренесен во болница.

Несреќата се случила денеска околу 15 часот, потврди портпаролката на СВР Штип, Гордана Панајотова. Увид на местото на несреќата вршат јавен обвинител од Свети Николе и полицијата.

Од увидот, според Панајотова, ќе се утврдат и причините за несреќата.


Скопјанец застрелан во расправија во Ченто, се наоѓа во животна опасност


Скопје, 10 март, 2017 - 14:38 (META) 

Откако вчера бил застрелан, 27-годишен скопјанец со тешки повреди е пренесен во Специјалната хируршка болница „Свети Наум Охридски“ во Скопје и се наоѓа во животна опасност, извести МВР.

Инцидентот се случил вчера попладне. Во полиција било пријавено дека на улицата Фуштанска во населбата Ченто, две непознати лица, кои дошле со два автомобили, почнале да се расправаат со Г.Б. (27), по што еден од нив извадил пиштол и стрелал во 27-годишникот, нанесувајќи му прострелна рана во десна надколеница и повеќе повреди на телото. Вооружениот потоа заминал со автомобилот.

Ранетиот е пренесен и задржан на лекување во болницата „Св. Наум Охридски“, каде му се констатирани тешки телесни повреди и се наоѓа во животна опасност.

Полицијата вели дека трага по сторителите.


Амбасада на САД: Заканите ги пријавуваме во МВР, но не бараме кривично гонење


Скопје, 7 февруари, 2017 - 12:25 (META) 

Амбасадата на САД во Скопје ги информира македонските власти за заканите што доаѓаат до нив од разни извори, но не побарала сторителите да бидат правно гонети, туку тоа го остава на надлежните институции во земјава, велат од американската амбасада на прашање на „Мета“ во врска со кривичната пријава поднесена од МВР против скопјанец кој му се заканувал на амбасадорот Џес Бејли преку „Фејсбук“.

„Ги споделуваме информациите за закани со македонските власти, било да доаѓаат преку телефонски повици, писма или од други извори. Ние не баравме да бидат преземени правни дејства, тоа зависи од надлежните власти. Сакаме да напоменеме дека лицето подоцна се извини и ние го прифаќаме неговото извинување“, велат од Амбасадата на САД во Скопје.

Инаку, МВР вчера информираше дека секторот за компјутерски криминал и дигитална форензика поднел кривична пријава против 34-годишниот скопјанец Т.Т., кој се товари дека преку недолични коментари објавени на официјалната фејсбук-страница на амбасадата, во април минатата година, индиректно им се заканувал на амбасадорот на САД во земјава, Џес Бејли, и на неговото семејство.

Скопјанецот, според МВР, е осомничен за кривичното дело повреда на углед на странска држава.


40-годишен скопјанец загина во сообраќајка на патот Гостивар – Кичево


Кичево, 22 ноември, 2016 - 12:49 (META) 

Четириесетгодишен скопјанец го загубил животот во сообраќајна несреќа која синоќа се случила на магистралниот пат Гостивар – Кичево, кај селото Колари, соопшти денеска Јавното обвинителство.

Несреќата се случила кога во С.А. удрило комби со скопски регистарски таблички, што го управувал 52-годишен жител на Скопје.

„Според првичните сознанија, до несреќата дошло кога сега починатото лице излегло од автобус со кој патувало од Скопје за Охрид и ја преминало коловозната лента на необележано место при што било удрено од комбито“, велат од обвинителството,

Надлежен јавен обвинител од ОЈО Кичево, заедно со увидна екипа на МВР, извршил увид на местото на несреќата и издал наредби за вршење обдукција на телото на починатиот и за сообраќајно-техничко вештачење на возилото.

„Од првичните проверки, утврдено е дека возачот на комбито не бил под дејство на алкохол. Истрагата продолжува со преземање на потребните дејства во насока на расветлување на настанот“, додаваат од обвинителството.


Параглајдерист од Скопје тешко се повредил кај Ќафасан


Охрид, 5 август, 2016 - 16:21 (META) 

Триесет и седумгодишнен скопјанец вчера попладне, околу 13.30 часот, тешко се повредил при пад од паралаглајдер кај местото Три шилки, во близина на граничниот премин Ќафасан на македонско-албанската граница, информира МВР.

Според полициските информации, кај Д.Џ. била констатирана скршеница на клучната коска.

По укажаната лекарска помош во Медицинскиот центар во Струга, тој бил префрлен во Специјалната болница „Свети Еразмо“ во Охрид на понатамошно лекување.

Од полицијата велат дека преземаат мерки за расчистување на случајот.


Скопјанец претепан во ТЦ „Чаирчанка“


Скопје, 24 јуни, 2016 - 12:10 (META) 

Ноќеска, околу 1.30 часот, од Ургентниот центар во полиција било пријавено дека кај нив е донесено лице со тешки повреди по телото.

Според полициските информации, станива збор за 27-годишниот А.А. од Скопје, кој бил физички нападнат во трговскиот центар „Чаирчанка“ во населбата Чаир.

Лекарите кај А.А. констатирале тешки телесни повреди. Од полицијата велат дека преземаат мерки за целосно расчистување на случајот.


Притворен скопјанец осомничен за обид за убиство на сопругата


Скопје, 4 април, 2016 - 14:47 (META) 

Секторот за внатрешни работи Скопје поднел кривична пријава против 48-годишен скопјанец, осомничен дека во саботата (2 април) брутално ја претепал сопругата, нанесувајќи ѝ тешки телесни повреди на главата и по телото, соопшти МВР.

Против Т.П. е поднесена пријава со која се товари за обид за убиство при семејно насилство, а судија на претходна постапка му одредил мерка притвор од 30 дена.

Како што информираат од МВР, осомничениот и сопругата воделе бракоразводна парница и повеќе месеци не живееле заедно. Тој во петокот заминал кај сопругата, која заедно со својата седумгодишна ќерка живеела во стан по наем, а следното утро кога требало да си замине, насила ја внел жената во својот автомобил и ја однел на Скопска Црна Гора каде физички ја малтретирал.

„Во тој момент, пријавениот ја убедувал да појде со него за да разговараат, но кога истата го одбила, тој со употреба на сила ја внел во неговото возило и се упатил кон Скопска Црна Гора. Додека возел, со тупаници ја удирал по главата и по телото, заканувајќи ѝ се дека ќе ја убие. Неговата сопруга го молела да престане и да го сопре возилото, а двапати се обидела да избега од возилото. Пријавениот успеал да ја фати при првиот обид, по што продолжил со физичкото малтретирање. При вториот обид да побегне од возилото, во близина на автобуската станица во село Побожје, ѝ помогнал случаен минувач, кој заедно со неговата сопруга ѝ пружил прва помош“, стои во соопштението на МВР за случајот.

Осомничениот побегнал од местото, а неговата сопруга со возило на итната медицинска помош, во бесознание, била пренесена во Клиничкиот центар „Мајка Тереза“, каде ѝ биле констатирани тешки телесни повреди, поради што била задржана на понатамошно лекување.

Кратко време по настанот, екипа на полициската единица „Алфа“ го пронашла и го уапсила скојанецот, а по извршеното алкотестирање, кај него биле констатирани 1,95 промили алкохол во крвта.

На осомничениот, како што информираат од МВР, досега четирипати му биле поднесувани кривични пријави за имотни деликти, а во периодот од 2008 до 2011 година против него биле поднесени и четири прекршочни пријави за загрозување на безбедноста во сообраќајот со управување возило под дејство на алкохол и прекршочна пријава за нарушен јавен ред и мир со малтретирање на друг во стан.


Уапсен скопјанец кој се борел за ИД во Сирија


Скопје, 27 ноември, 2015 - 13:17 (META) 

Министерството за внатрешни работи уапсило 21-годишниот скопјанец со иницијали С.Р., осомничен дека во два наврати патувал во Сирија како припадник на Исламска држава (ИД), соопшти денеска МВР.

Скопјанецот, според Mинистерството, пред неколку недели, по илегален пат се вратил од Сирија во земјава, по што бил лоциран од МВР, а потоа и уапсен по налог на Јавен обвинител.

Против него е поднесена пријава за кривичното дело „учество во странска војска, полиција, паравоени и параполициски формации“.

„Според сознанијата пријавениот бил припадник на ИД и првото заминување за Сирија го остварил во првата половина на 2013 година, додека второто илегално заминување за Сирија го остварил во октомври, минатата година. Пријавениот пред неколку недели илегално се вратил на територијата на Република Македонија по што од страна на Министерството за внатрешни работи беше лоциран и по налог на Јавен обвинител лишен од слобода“, велат од МВР.

Скопјанецот е уапсен во рамките на оперативната акција на МВР, под името „Ќелија“ која почна на почетокот на август годинава, како резултат на повеќемесечна координирана истрага во која беа собрани докази за лица кои учествувале во паравоени формации, собирале финансии и поттикнувале лица да се приклучат на терористичките групи.

Во рамките на акцијата, меѓудругото, беа извршени и 28 претреси во Скопје, Гостивар, Тетово, Куманово и Струга.


Скопјанец пронајден мртов во својот стан


Скопје, 26 ноември, 2015 - 14:11 (META) 

Педесет и деветгодишен скопјанец вчераутро бил пронајден мртов во својот стан на улицата Наум Чакаров, во населбата Ѓорче Петров.

Според полицијата, безживотното тело на Илија Ц. вчера, околу 10 часот, го пронашла неговата сосетка М.Т. (46), која имала клуч од неговиот стан.

Смртта била констатирана од лекар на итната медицинска помош. Увид на местото извршила екипа на Секторот за внатрешни работи Скопје, а по наредба на јавен обвинител телото на починатиот било предадено на Институтот за судска медицина и криминалистика, за обдукција.