Спасени шестмина загубени скијачи на Попова Шапка


Тетово, 11 февруари, 2018 - 22:21 (META) 

Пронајдени и спасени вечерва околу 21 часот биле шестмина скијачи кои денеска се изгубија на Попова Шапка.

Околу 17. 30 часот  во Полициското одделение Попова Шапка дошол 30-годишниот Ф.Р од тетовското село Лисец. заедно со косовскиот државјанин М.З. и пријавиле дека двајца косовски и четворица македонски државјани околу 14.30 часот со жичница се искачиле на „Церипашина“ и потоа се спуштиле по патеката Јелак. Но, поради густата магла залутале и се изгубиле во непознат шумски предел, некаде два километри северно од месноста „Шипковачки бачила“, над селото Вешала.

Веднаш е организирана потрага по шестмината скијачи и околу 21 часот сите се пронајдени живи и здрави во месноста „Студорек“ , во близина на „Шипковачки бачила“, и со ратрак веќе се спуштаат кон Полициското одделение Попова Шапка.


Четири лица загинаа во лавина на западот на Австрија


Виена, 15 март, 2017 - 20:07 (META) 

Четворица скијачи загинаа денеска, кога лавина затрупала група од осум лица, на западот на Австрија, потврди полицијата. Според надлежните, другите четворица преживеале и биле евакуирани со хеликоптер.

По потрагата, спасувачките служби успеале да ги извлечат телата на настраданите скијачи, за кои се верува дека се Швајцарци.

Несреќата се случила во близина на врвот Јохгрибенкоф, на 2.450 метри надморска височина.

По оваа несреќа, бројот на загинати во лавини во Австрија се искачи на 17 лица од почетокот на годината.


Задоцнетиот официјален почеток на скијачката сезона на Попова Шапка со многу проблеми


Тетово, 18 јануари, 2017 - 16:05 (META) 

Многу проблеми го обележаа задоцнетиот почеток на скијачката сезона на Попова Шапка. Ски-лифтовите и жичниците работеа само половина час, а скијачите нервозни ги напуштија скијачките терени.

– Оваа скијачка сезона на Попова Шапка е катастрофална. Сите ски-центри проработеа, тука абер немаат. Денеска најавија дека ќе ги пуштат ски-лифтовите, но имаше постојани дефекти уште претпладне престанаа да работаат. Ништо тука не функционира, ниту ратраците не ги тапкаат ски-патеките – вели една скијачка која попладнево нервозна го напушти скијачкиот центар.

Сопствениците на хотелите на Попова Шапка велат дека без ски-лифтови и ски-патеки, центарот не може да функционира.

– Требаше одамна да проработат ски-лифтовите. Без нив, ние немаме гости. Навистина немаше доволно снег и дуваше ветер, но колку за скијање, имаше снег, кој претходно требаше добро да се натапка. Сепак, службите не беа подготвени добро и снегот го оддува ветер. Сега гледаме дека и кај ски-лифтовите се појавуваат дефекти, значи и тие не ги подготвиле – вели еден сопственик на хотел на Попова Шапка.

Од раководството на скијачкиот центар Попова Шапка, кој е во сопственост на државната компанија „ЕЛЕМ Турс“, денеска одбегнуваа да дадат каква било изјава или коментар, околу задоцнетиот и неуспешен почеток на скијачката сезона, која во неколку ски-центри во Македонија трае веќе неколку недели.


Шест скијачи загинаа во лавина на италијанските Алпи


Рим, 12 март, 2016 - 17:59 (META) 

Лавина усмрти шест скијачи во Монте Невозо на италијанските Алпи, надвор од скијалиштето, соопштија италијанските власти.

Италијанската полиција ја потврди информацијата за жртвите во лавината што се случила денеска околу пладне, на висина од околу 3.000 метри.

Спасувачката акција сè уште е во тек. На местото на несреќата пристигнал хеликоптер со кој се донесени кучиња трагачи, кои се обидуваат да ги лоцираат преживеаните.

Како што се наведува, жртвите биле во група која скијала надвор од скијачката патека. Засега не е познато колку луѓе биле во групата, ниту што ја предизвикало лавината.