Промовирана поштенската марка со ликот на Скендербег


Скопје, 17 јануари, 2018 - 16:14 (META) 

На свечаната академија во Собранието по повод 550-годишнината од смртта на Ѓерѓ Кастриот – Скендербег беше промовирана поштенска марка со ликот на Скендербег.

Поштенската марка е издадена со номинална вредност од 18 денари и тираж од 6.000 примероци.

Ликовното решение е на Лариса Живковска Донев. Покрај него, на поштенската марка на македонски и на албански јазик е напишан поводот за нејзинот издавање, односно 550-годишнината од смртта на Скендербег и името на државата Република Македонија, на латиница.

Директорот на „Македонска пошта“, Фаадис Реџепи во своето обраќање истакна дека издавањето на поштенската марка е допринос на „Македонски пошти“ за македонската и за светската филателија имајќи го предвид големото дело на Скендерберг кое е инспирација за многу генерации.

– Поштенските марки имаат постојана вредност и додека патуваат низ светот промовираат разлини културни и историски вредности. Тие се отворена книга на мало парче хартија што ги обединува луѓето, градовите, заедниците и различните јазици – рече Реџепи.


Историско и цивилизациското наследство на Скендербег треба да не обединуваат


Скопје, 17 јануари, 2018 - 15:58 (META) 

Скендербег е национален херој на Албанците, но и на сите народи кои сакаат мир на Балканот, изјави лидерот на ДУИ, Али Ахмети по повод 550-годишнината од смртта на Ѓерѓ Кастриот – Скендербег, која беше одбележана денеска.

Ахмети, претседателот на Собранието, Талат Џафери, министри, пратеници и функционери од ДУИ положија цвеќе пред споменикот на Скендербег во Скопје, откако претходно беше интонирана албанската химна.

– Скендербег останува централна личност за сите народи на Балканот кои го сакаат мирот. Денеска достоинствено можам да кажам дека и Охридскиот договор е во духот на Скендербег – рече Ахмети.

Прашан зошто нема претставници од другите партии на Албанците, но и на Македонците, Ахмети истакна „имало јавна покана за сите“.

Претходно во Големата купола на Собранието беше одржана свечена академија на која, покрај претседателот на Собранието, се обратија и директорот на Институтот на духовното и културното наследство на Албанците, Скендер Асани, директорот на Институтот за национална историја, Драги Ѓеорѓиев и професорот Владо Поповски, историчар и член на Одборот за одбележување на годишнината.

Џафери во своето обраќање истакна дека ликот и делото на Ѓерѓ Кастриоти – Скендербег е тесно поврзано со сите кои денеска живеат во Република Македонија, односно со „вековните стремежи и борбата на албанскиот и македонскиот народ за слобода и самостојност“.

– Да не заборавиме дека големиот македонски поет Глигор Прличев има напишано поема на грчки јазик која се вика Скендербег. Скендербег наоѓа место и во зборниците на Кузман Шапкарев, како и во Зборникот на народни песни на браќата Миладиновци. Односно, како што има речено големиот современ македонски поет, есеист, историчар и академик, Гане Тодоровски: „Скендербег е позитивен историски јунак во македонската историска меморија“ – рече Џафери.

Тој нагласи дека денес кога регионот и секоја поединечна држава се соочуваат со разни предизвици „токму споменот за Скендербег и неговото историско и цивилизациско наследство, треба да не обединува“, повторно цитирајќи го Гане Тодоровски, кој во своето експозе по повод 600 години од раѓањето на Скендербег, во МАНУ, рекол: „Големиот Скендербег, вечниот Скендербег, е божјото око кое бдее врз мирот на Балканот“.

По повод 550-годишнината денеска беше презентирана и поштенска марка со ликот на Скендербег.


Протестот за „Диво Насеље“ мирен, се скандираше „УЧК“


Скопје, 5 ноември, 2017 - 14:54 (META) 

Со скандирања, во кои главно се слушале „УЧК“, под силно полициско обезбедување, заврши протестот против пресудите за „Диво Насеље“. Нема забележани инциденти.

Во толпата што тргна од плоштадот Скендер-бег и се упати кон Основен суд Скопје 1, каде беше изречена пресудата за обвинетите, се слушаа скандирања, од кои предничеше „УЧК“. Иако првично беше најавено дека ќе се оди и до Собранието на Република Македонија, тоа не се случи, туку од плоштадот, поворката се упати кон судот.

Протестот беше поддржан од семејствата на обвинетите, кои на плоштадот Скендер-бег се обратија пред помала група поддржувачи. Толпата беше под силно полициско обезбедување.


Протест за „Диво Насеље“ дeнеска пред Кривичен суд во Скопје


Скопје, 5 ноември, 2017 - 10:39 (META) 

На потегот од плоштадот Скендер-бег до Основен суд Скопје 1, денеска со почеток од 13 часот, ќе се одржи протест против судската пресуда за случајот „Диво Насеље“.

Протестот го организира Здружението за албанска култура, коe вчера го пријави настанот во полициската станица Бит-пазар.

Во повикот за протестот што го пренесоа дел од медиумите е наведено дека треба да присуствуваат сите граѓани кои сметаат дека „изживувањето и самоволието на судот во изрекување на казните се уште еден пример за неправедна правда и за двојни аршини од страна на судот“.

Претходно, на социјалните мрежи се договараше учеството, а според тоа, се очекуваат и демонстранти од Косово и од Албанија, кои го најавуваа своето учество.

„Нашето учество само ќе укаже на тоа колку сите сме за соживот, без маски и агенди“, велат организаторите.