Камчев и осомничените во „Империја“ добија нови 30 дена притвор


Скопје, 10 декември, 2018 - 14:47 (META) 

Кривичниот суд во Скопје им определи нови 30 дена притвор на осомничените во случајот „Империја“ на Специјалното јавно обвинителство.

СЈО до судот доставило предлог со кој бара на осомничените да им биде продолжен притворот за нови 30 дена, поради тоа што сè уште опстојуваат причините поради кои им била првично изречена оваа мерка за обезбедување присуство.

Бизнисменот Јордан Камчев, неговите соработници Ненад Јосифовиќ и Зорица Арсовска, Цветан Панделески – директорот на комбинатот „Пелагонија“ и Тодор Мирчевски, директорот на контроверзната компанија „Ексико“, остануваат уште еден месец во притвор. За екс шефот на УБК, Сашо Мијалков СЈО дополнително побара притвор за овој случај.

Камчев, Мијалков и другите се обвинети за злосторничко здружување, оштетување и повластување доверители, злоупотреба на службената положба, измама и перење пари.


Со нов закон СЈО ќе може да го гони претседателот, пратеници, амбасадори, судии …


Скопје, 7 декември, 2018 - 10:18 (META) 

Министерството за правда го објави нацртот на предлог-законот за Специјално јавно обвинителство во кој промени во однос на надлежностите за кривичните дела кои можат да бидат предмет на оваа институција во однос на актуелното законско решение. Досега, Специјалниот јавен обвинител беше овластен и надлежен да истражува и гони кривични дела поврзани и кои произлегуваат од содржината на неовластеното следење на комуникациите извршени во периодот меѓу 2008 и 2015 година.

Со предложеното решение се предвидува СЈО да може да истражува и гони кривични дела извршени од претседателот на Македонија , поставените амбасадори и други претставници во странство и именувани лица од претседателот, избрани или именувани функционери во и од Собранието, во и од Владата, во судовите, јавното обвинителство, Судскиот совет, Советот на јавните обвинители  и избраните градоначалници на единици на локалната самоуправа и Град Скопје.

Се предвидува и надлежност за прогон СЈО да има за кривични дела извршени од одговорни лица во политички партии против изборите и гласањето, како и од областа на животната средина и природат, културното наследство и природните реткости, јавните финансии, платниот промет и стопанството, вооружените сили, службената должност, неовластеното оддавање информации и податоци за сведоците и други ако овие дела се сторени во врска со постапки кои ги води Специјалното јавно обвинителство.


Јанакиески тврди дека не планирал да бега, СЈО вели дека притворот е законит


Скопје, 26 ноември, 2018 - 16:28 (META) 

Ниту сум планирал да бегам, ниту ќе бегам, рече ексминистерот Миле Јанакиески во Апелацискиот суд во Скопје каде што се одржа јавна седница по жалбата за мерката притворот која му ја определи Судот на барање на СЈО.

Тој посочи дека една година и 4 месеци редовно се јавувал во судот и воопшто нема констатација дека ги прекршил овие законски мерки, а ја оспори и службената белешка од УБК врз основа на која се базира решението за притвор, нарекувајќи ја фиктивна.

За средбата кај претседателот Иванов рече дека била на 13 ноември во 16 часот, на која присуствувале уште две лица, од кои едниот бил претставник од Кабинет, преку кого била организирана средбата. Јанакиески рече дека не се разговарало за амнестијата, туку, како што рече го информирал Иванов за иницијатива поврзана со актуелната политичка состојба во Македонија.

Јанакиески исто така негираше дека поседува банкарски сметки во странство. Тој рече дека испратил допис до СЈО и Кривичниот совет каде ги информирал дека доколку достават докази дека поседува макар една сметка во странство и овој наод биде потврден од релевантни институции, спремен е итно да се спогоди за сите судски предмети кои ги води СЈО, па макар тоа би било и доживотна казна затвор.

-На 13 ноември обвинетиот, Миле Јанакиески, се спремаше да бега. Ваквите околности дека подготвува бегство ги дознавме од органи надлежни за прибирање такви информации – рече обвинителката на СЈО, Лиле Стефанова, повикувајќи се на службената белешка од УБК.

Наспроти тврдењата на одбраната, Стефанова рече дека решението на Кривичниот совет за притвор е законито и издржано.

-Обвинетиот Миле Јанакиески во своето долго излагање не негираше дека бил на разговор кај претседателот, но не кажа какви разговори воделе. Убедена сум дека постојат околности дека не можеме да го задржиме да побегне доколку не биде определена мерката притвор – рече Стефанова и го повика Апилациониот суд да ја потврди одлуката на Кривичниот совет.

Адвокатката Сања Алексиќ, во образложението за жалбата по притворот кој му е определен на обвинетиот екс генерален секретар на Владата, Кирил Божиновски рече дека Божиновски немал намера да бега затоа што е татко на две малолетни деца, едно на возраст од 1 година и 10 месеци, а другото на возраст од три години.

Од друга страна, тој, како што рече Алексиќ, треба да се грижи за болната сопруга на која и е дијагностицирано воспаление на жлездите како последица на стрес.

Апелацискиот суд има два дена рок да одлучи по жалбите.


Апелација ќе одлучува за притворите на Јанакиески и Божиновски


Скопје, 26 ноември, 2018 - 9:54 (META) 

Во Апелацискиот суд Скопје денеска ќе се одржат јавни седници за притворите на поранешниот министер за транспорт и врски Миле Јанакиески и поранешниот генерален секретар на Владата, Кирил Божиновски.

Јанакиески е обвинет во неколку случаи на Специјалното јавно обвинителство, а Божиновски, како поранешен генерален секретар на ВМРО-ДПМНЕ, е обвинет во случајот „Титаник”.

Двајцата се во притвор по бегството на поранешниот премиер Никола Груевски во Унгарија.

Обвинителката на СЈО, Лиле Стефанова изјави дека притвор за Јанакиески и Божиновски е побаран, бидејќи СЈО имало информации дека и тие двајца планирале да побегнат, исто како и Груевски.

Одбраната на Јанакиески и Божиновски на ваквата мерка поднесе жалби до Апелацискиот суд.


Во понеделник јавни седници во Апелација за притворите на Јанакиески и Божиновски


Скопје, 23 ноември, 2018 - 16:03 (META) 

Во Апелацискиот суд Скопје во понеделник ќе се одржат две јавни седници за притворите на поранешниот министер за транспорт и врски Миле Јанакиески и поранешниот генерален секретар на Владата, Кирил Божиновски.

Јанакиевски е обвинет во неколку случаи на Специјалното јавно обвинителство, а Божиновски, како поранешен генерален секретар на ВМРО-ДПМНЕ, е обвинет во случајот „Титаник”.

Двајцата се во притвор по бегството на поранешниот премиер Никола Груевски во Унгарија.
Обвинителката на СЈО, Лиле Стефанова изјави дека притвор за Јанакиески и Божиновски е побаран, бидејќи СЈО имало информации дека и тие двајца планирале да побегнат исто како и Груевски.

Одбраната на Јанакиески и Божиновски на ваквата мерка поднесе жалби до Апелацискиот суд.


СЈО поднесе две обвиненија за „Талир“ против Груевски, Божиноски, Јанакиески и Димовски


Скопје, 22 ноември, 2018 - 15:52 (META) 

Специјалното јавно обвинителство соопшти дека поднело две обвиненија во врска со предметот „Талир“, едното за незаконското финансирање на политичката партија ВМРО-ДПМНЕ, а другото за незаконската изградба на седиштето на партијата.

Обвинението за незаконското финансирање на политичката партија ВМРО-ДПМНЕ е поднесено против поранешниот лидер на партијата, а сегашен азилант во Унгарија, Никола Груевски, потоа за Кирил Божиновски, Миле Јанакиевски, Илија Димовски, Леко Ристоски и Елизабета Чингаровска како и за политичка партија – ВМРО-ДПМНЕ.

„Обвинетиот Груевски во периодот од 2009 година до 2015 година со злоупотреба на службената положба обезбедувал финансии од анонимни и противправни извори на финансирање на ВМРО-ДПМНЕ. Божиновски и Јанакиевски вршеле притисок на претставници на правните лица кои имале склучено договори за јавни набавки со државни органи, јавни претпријатија или единици на локална самоуправа истите да обезбедат финансиски средства во готовина за потребите на финансирање на ВМРО-ДПМНЕ како против услуга за добиените јавни набавки и реализираниот профит. Вака обезбедените пари во готовина, Груевски не ги вратил на лицата од кои средствата доаѓале, односно не ги упатил во Буџетот на Република Македонија со што прибавил незаконски средства за финансирање на ВМРО-ДПМНЕ во износ од најмалку 4.608.661 евра“, се вели во соопштението од СЈО.

За да прикријат дека парите доаѓаат од кривично дело Груевски, Божиновски, Јанакиевски и Чингароска, организирале средствата да бидат уплатени на жиро сметката на ВМРО-ДПМНЕ преку готовински уплати на ПП10 уплатници во кои биле внесени невистинити податоци дека уплатата ја вршат лицата наведени во уплатниците, иако тоа не било случај.

Потоа, Димовски, Чингароска, Ристоски и Јанакиески, како овластени потписници на сметката на партијата иако знаеле дека парите потекнуваат од кривично дело, ги пуштиле во натамошен оптек со потпишување на налози за плаќање на обврските и купување на недвижен имот за политичката партија ВМРО-ДПМНЕ.

СЈО за Груевски, кој е првообвинет во случајот бара притвор, а за Чингаровска обврска да се јавува еднаш неделно во Кривичен суд и привремено одземање на пасош.

Обвинението за изградба на седиштето на политичката партија ВМРО-ДПМНЕ е поднесено против Груевски и Божиновски, кои со злоупотреба на службената положба, овозможиле правното лице ДГ „Бетон“ АД Скопје да го изгради седиштето на ВМРО-ДПМНЕ, иако „Бетон“ имал склучено договори за јавни набавки со државни органи и јавни установи или претпријатија.

„За реализирање на оваа цел обвинетите ја искористиле состојбата на зависност во која се наоѓала „Бетон“ во однос на политичката партија ВМРО-ДПМНЕ, со оглед дека над 75 отсто од приходите кои ги остварило правното лице во 2011 и 2012 година биле од државни органи, единици на локална самоуправа или јавни претпријатија раководени од функционери на политичката партија ВМРО-ДПМНЕ. Обвинетите договориле несразмерна корист за политичката партија ВМРО-ДПМНЕ во однос на обврските кои ги имало „Бетон“, овозможувајќи му да го изгради седиштето на ВМРО-ДПМНЕ кое имало инвестициска вредност од 6.906.231 евра, како и да уплати на жиро сметката на партијата 2.155.668 евра, иако вложувањата на политичката партија ВМРО-ДПМНЕ изнесувале само 815.323 евра“, додаваат СЈО во објаснувањето.

Со ова, обвинетите прибавиле значителна имотна корист за политичката партија ВМРО-ДПМНЕ во износ од 8.246.576 евра.

И кон ова обвинение исто така поднесен е предлог за определување мерка притвор против првообвинетиот Груевски.

Од СЈО велат дека обвиненијата ги подигнуваат откако воспоставиле надлежност врз предмет преземен од Основно јавно обвинителство Скопје.


Владата подготвува нов закон за СЈО, за Јавното обвинителство и за кривична постапка


Скопје, 15 ноември, 2018 - 10:00 (META) 

Коинциденција или не, Владата реши да менува три клучни закони од областа на кривичниот прогон токму на 13 ноември, денот кога поранешниот премиер Никола Груевски објави дека пребегнал во Унгарија, каде што бара политички азил.

Министерството за правда токму на овој ден објави дека подготвува предлог закон за Специјалното јавно обвинителство кој треба да биде готов до крајот на месецот.

„Целта на законот е да се изврши уредување на материјата за статусот, надлежностите и други прашања поврзани со Специјалното јавно обвинителство. Во текот на подготовката на законот ќе бидат вклучени судии, јавни обвинители, меѓународни организации и надлежни институции“, соопшти Министерството.

Истовремено, Министерство за правда подготвува предлог закон за јавното обвинителство. Во образложението се вели дека законот за кривичната постапка е донесен во 2010 година, а започна да се применува од 2013 година и дека со него биле воведени значајни новини кои во најголем дел се однесуваат на јавното обвинителство.

„Затоа е потребно Законот за јавното обвинителство да се усогласи со соодветните решенија пропишани во Законот за кривичната постапка. Целта на Законот е да се изврши усогласување со меѓународните стандарди и да се усогласи со соодветните решенија пропишани во Законот за кривичната постапка“, информираат од Министерството.

Освен овие два закони, во тек е подготовка и на предлог закон за кривичната постапка. Во образложението од Министерството за правда се вели дека во периодот на неговата примена биле лоцирани одредени недостатоци кои е потребно да се отстранат.

„Дополнително, потребно е усогласување на законот со најновите меѓународни стандарди во оваа област. Целта на Законот е да се изврши усогласување со меѓународните стандарди и да се надминат лоцираните слабости во неговата примена“, објаснуваат од Министерството.


Кривичниот совет ги потврди притворите за петмината од „Империја“


Скопје, 14 ноември, 2018 - 17:01 (META) 

Кривичниот совет на Основен суд Скопје 1 ги одби жалбите на адвокатите на петмината притворени во случајот „Империја” што неодамна го отвори Специјалното јавно обвинителство. Во притвор се Орце Камчев, Цветан Панделески, Ненад Јосифовиќ, Тодор Мирчевски и Зорица Арсовска.

Според судот, на јавна седница Кривичниот совет ценејќи ги фактите и доказите во предлогот од СЈО за притвор и во изјавените жалби од адвокатите, донел решение за одбивање на жалбите и потврда на решенијата за притвор донесени од судијата на претходна постапка.


Миле Јанакиески и Кирил Божиновски од утрово во притвор


Скопје, 14 ноември, 2018 - 9:36 (META) 

СЈО поради сомневање за бегство, побара притвор за поранешните функционери од ВМРО-ДПМНЕ и обвинети во случајот „Титаник“, Миле Јанакиески и Кирил Божиновски. Кривичен суд го прифатил предлогот на СЈО и одреди 30 дневен притвор на двете лица.

„Кривичниот совет на одделението за организиран криминал и корупција при Основниот суд Скопје 1 – Скопје, постапувајќи по предлог на Јавното обвинителство за гонење кривични дела поврзани и кои произлегуваат од незаконското следење на комуникациите, за определување мерки за обезбедување присуство против М.Ј. и К.Б. опфатени во предметот со КОК бр. 7/18 од обвинителството означен како „Титаник“, по ценење на фактите и доказите во предлогот донесе решенија со кои го прифати предлогот и на двете лица им определи мерка притвор во траење од 30 дена заради постоење на основите од член 165 ст.1 точка 1. од ЗКП односно „ ако постојат други околности што укажуваат на опасност од бегство“, се вели во соопштението на Кривичен суд.

Од МВР потврдуваат дека Јанакиески и Божиновски од утрово се во притвор во затворот во Шуто Оризари.
По бегството на Груевски, вчера министерот за внатрешни работи Оливер Спасовски изјави дека во притвор треба да бидат ставени обвинетите од случаите на СЈО.

Јанакиески вчера изјави дека најостро го осудува бегството на Никола Груевски и дека нема намера да бега, дека ќе биде во Македонија и ќе дојде во суд на закажаното рочиште за „Титаник“.

-Најостро го осудувам ваквиот чин, бидејќи ќе влијае негативно на судските предмети во целост, а посебно во оние предмети каде сме заедно обвинети – рече Јанакиески.


Груевски: Во Будимпешта сум, побарав политички азил


Будимпешта, 13 ноември, 2018 - 13:36 (META) 

Поранешниот премиер и екс лидер на ВМРО-ДПМНЕ Никола Груевски по кого е распишана потерница, се наоѓа во Будимпешта и таму ќе бара политички азил.

Ова самиот го соопшти на социјалната мрежа „Фејсбук“.

„Во последните неколку денови примив безброј закани по мојот живот. Јас сум во Будимпешта сега, и побарав политички азил од унгарските власти. Секогаш ќе останам верен на каузата на Македонија. Никогаш нема да отстапам“, вели Груевски на статус на „Фејсбук“.

Груевски е правосилно осуден на двегодишна затворска казна во случајот „Тенк“ за незаконска набавка на луксузен „мерцедес“ кој против него го водеше Специјалното јавно обвинителство.

Откако неколку дена не можеше да го најде и да му врачи решение сам да се упати во затвор, Основниот суд вчера побара од МВР да издаде потерница по Груевски.