!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Тунтев: Следната недела ќе ги поднесеме законите за СЈО


Скопје, 22 јуни, 2017 - 15:48 (META) 

Парламентарното мнозинство ги известило координаторите на парламентарните политички партии дека е потребно да се постигне политички договор за законите за СЈО, информираше координаторот на пратеничката група на СДСМ, Томислав Тунтев, кој додаде дека законите во собраниска процедура ќе влезат наредната недела.

– Ние уште минатата година како опозиција ги предложивме законот за заштитени сведоци и законот за продолжување на рокот за обвиненија на СЈО, но тие беа одбиени од ВМРО-ДПМНЕ. Тоа се истите закони со кои треба да се овозможи непречено функционирање на оваа обвинителство и затоа сметам дека треба да дадат поддршка сите политички чинители. Впрочем, овие закони се дел од Договорот од Пржино и се дел од реформските приоритети на Прибе – изјави Тунтев.

Координаторот на пратеничката група на СДСМ рече дека и Собранието, како и Владата, ќе биде отворено за граѓаните да имаат можност одблизу да се информираат за работата на законодавниот дом.


Прибе в петок на Охридската школа на природното право


Охрид, 20 јуни, 2017 - 12:48 (META) 

Рајнхард Прибе, раководителот на комисијата што во име на ЕУ во 2015 година го подготви списокот на неопходните реформи кои земјава треба да ги преземе за да го надмине застојот на патот кон зачленување во ЕУ, в петок во Охрид ќе одржи предавање на Охридската школа на природното право „Демократија и владеење на правото“.

Неговото пристигање во земјава вчера вицепремиерот за евроинтеграции, Бујар Османи, го најави за следниот вторник, но Прибе ќе пристигне порано за да учествува на конференцијата во Охрид во организација на МАНУ. Засега не е познато дали тој ќе има некои средби со политичари и со функционери.

Предавањето што ќе го одржи експертот на ЕУ е насловено „Демократија, владеење на правото и човекови права – релевантноста на вредностите на Европската Унија за земјите кандидатки“.

На школата која трае цела седмица, предавања ќе одржат професори од правните факултети од земјава, а ќе учествуваат и министерот за правда, Биљен Салији, и специјалните обвинителки Катица Јанева, Фатиме Фетаи и Ленче Ристовска.


По два часа распит во СЈО, Мијалков замина без да даде изјава


Скопје, 16 јуни, 2017 - 15:25 (META) 

Два часа траеше распитот на поранешниот директор на УБК, Сашо Мијалков, во Специјалното јавно обвинителство, но и понатаму е непознато за кои случаи тој беше повикан денеска да даде исказ.

По излегувањето од просториите на СЈО, Мијалков не сакаше да даде изјава за медиумите, а за тоа за што е повикан упати на одговор во Обвинителството. Оттаму, пак, не откриваат за кои случаи поранешниот директор на УБК беше повикан на распит.

Како што дознава „Мета“, Мијалков денеска во СЈО побарал увид во повеќе предмети што се водат против него.

Тој во СЈО се појави заедно со неговиот нов адвокат и поранешен државен јавен обвинител, Љупчо Шврговски.

Поранешниот директор на УБК е осомничен во неколку предмети на СЈО, меѓу кои се „Таргет“, „Тврдина“, „Тортура“ и „Трезор“.


Мијалков пристигна на распит во СЈО


Скопје, 16 јуни, 2017 - 13:06 (META) 

Поранешниот директор на Управата за безбедност и контраразузнавање, Сашо Мијалков, денеска пристигна во Специјалното јавно обвинителство каде, најверојатно, треба да даде исказ за некои од случаите за кои го гони СЈО.

Мијалков пристигна околу 13 часот придружуван од адвокатот Љупчо Шврговски, но не сакаше да даде изјава за медиумите пред да влезе во просториите на СЈО.

Засега од СЈО не откриваат за кои слуачи Мијалков е повикан на распит. Тој е осомничен во повеќе случаи на СЈО, меѓу кои „Тортура“, „Таргет“ и „Тврдина“.


Шврговски ќе му биде адвокат на Мијалков во предметите на СЈО


Скопје, 14 јуни, 2017 - 20:06 (META) 

Поранешниот државен обвинител Љупчо Шврговски ќе му биде адвокат на поранешниот шеф на тајната полиција, Сашо Мијалков, во неколку предмети на СЈО – „Таргет“, „Тврдина“, „Трезор“ и „Тортура“, потврдил Шврговски за телевизија „Телма“.

Одбраната на обвинетите од СЈО ќе се дополни и со други познати адвокатски имиња, но засега никој официјално не ја потврдува информацијата дека Никола Додевски, кој досега ги застапуваше речиси сите функционери на ВМРО-ДПМНЕ, повеќе нема да биде нивен бранител во предметите на СЈО.

Шврговски вели дека во конкретните предмети влегува на местото на Додевски, но нема информација дали неговиот колега нема да ги брани и другите функционери на ВМРО-ДПМНЕ. И другите адвокати од тимот на Додевски денеска велат дека немаат информации и не сакаа да коментираат. Додевски претходно беше повикан за сведок во случајот „Талир“ за незаконско финансирање на ВМРО-ДПМНЕ.

„Талир“ и „Таргет“ се дел од истрагите што деновиве ги привршува СЈО и се повикуваат сведоци и осомничени. Поранешниот генерален секретар на ВМРО-ДПМНЕ, Кирил Божиновски, денеска вторпат не дојде на распит за овој предмет поврзан со незаконско финансирање на партијата.


Заев: Има три варијанти за продолжување на мандатот на СЈО


Скопје, 13 јуни, 2017 - 16:42 (META) 

Ќе направам сè што е во моја надлежност за рокот за поднесување обвиненија на СЈО да се продолжи, изјави премиерот Зоран Заев, по излегувањето од Специјалното јавно обвинителство, каде во својство на сведок и оштетен даваше исказ за случајот „Таргет“. Тој наведе три можности за решавање на ова прашање. Едната, како што рече, е преку измени на Законот за СЈО во Собрание со двотретинско мнозинство, другата е преку Уставниот суд и последната е СЈО да биде инкорпорирано како посебно одделение во редовното Јавно обвинителство.

Одговарајќи на новинарски прашања, премиерот рече дека на денешната владина седница не станало збор за разрешувањето на актуелните директори на УБК и на БЈБ и за именување нови. Од кадровските прашања, денеска на дневен ред било само именувањето на Магдалена Несторовска за нов државен секретар во МВР и биле констатирани оставките на државните секретари во другите министерства, кои засега се испразнети и треба да бидат пополнети со нови, на предлог на ресорните министри.

Во однос на шпекулациите дека Зоран Верушевски би можел да биде нов директор на УБК, Заев рече дека тој ги исполнува сите критериуми, но тој би претпочитал за таа позиција да се бара друго решение, односно кандидат кој би дошол однатре, имајќи ги превид, како што рече, сериозните реформи што треба да бидат спроведени во Управата за безбедност и за контраразузнавање.

Што се однесува на постапката за разрешување на државниот јавен обвинител Марко Зврлевски, премиерот истакна дека штом е готово мислењето на Советот на јавни обвинители и доколку Владата нема повеќе обврски во рамки на процедурата, таа е подготвена да го испрати предлогот во Собранието.

– Штом биде разрешен актуелниот јавен обвинител, Владата веднаш ќе иницира постапка до Собранието за назначување на нов јавен обвинител – рече Заев, додавајќи дека негов личен став е новиот јавен обвинител да биде експерт, кој ќе ја има довербата, пред сè, кај граѓаните.

Заев денеска во СЈО дал исказ во својство на сведок и на оштетен во случајот „Таргет“ и, како што рече, останува на располагање и понатаму да даде придонес за конечно да биде расветлен скандалот со незаконското прислушување.


Заев и Верушевски пристигнаа во СЈО, но не дадоа изјава за новинарите


Скопје, 13 јуни, 2017 - 15:00 (META) 

Премиерот Зоран Заев и поранешниот директор на Управата за безбедност и за контраразузнавање, Зоран Верушевски, попладнево во 14.30 пристигнаа во Специјалното јавно обвинителство, каде треба да дадат исказ за случајот „Таргет“.

Верушевски пристигна во придружба на адвокатот Филип Медарски. Тој и Заев не дадоа изјави за новинарите пред да влезат во СЈО.

Случајот „Таргет“ се однесува на незаконското следење на комуникациите, односно на тоа кој прислушувал, по чија наредба и колку луѓе биле опфатени од незаконското прислушување.

СЈО минатата година во ноември го презентираше случајот „Тергет“, при што откри дека вкупно 5.817 телефонски броеви незаконски биле прислушувани од Управата за безбедност и контраразузнавање преку нејзините системи за следење на комуникации, и тоа во период од 2008 година до 2015 година.

За десет поранешни и сегашни вработени во УБК, кои се наоѓале на раководни позиции или биле дел од пониски ешалони, постои основно сомневање дека ја искористувале службената положба и незаконски прислушувале.


Димовски иронично: Во СЈО сум затоа што многу зборувам во Собранието


Скопје, 12 јуни, 2017 - 14:06 (META) 

Попладнево околу 14 часот, во СЈО пристигна и пратеникот и член на ИК на ВМРО-ДПМНЕ, Илија Димовски, кој е повикан да даде исказ како еден од осомничените во случајот „Талир“.

Пред да влезе во просториите на СЈО, на новинарско прашање зошто е повикан и осомничен, Димовски иронично рече дека е повикан поради неговите чести говори и обраќања во Собранието што некому не му се допаѓале.

Претходно, во СЈО беше директорот на центарот за комунукации на ВМРО-ДПМНЕ, Иво Котевски, кој, како што рече, не дал исказ, туку тоа ќе го направи откако ќе изврши увид во доказите.

Попладнево околу 14 часот, просториите на СЈО ги напушти поранешниот началник на Петтата управа, Горан Грујовски, кој во СЈО пристигна околу 11 часот.

Грујовски, кој е осомничен во неколку случаи на СЈО, поврзани со незаконското прислушување, не сакаше да даде изјава за медиумите.


Котевски: Побарав увид во доказите на СЈО, ако воопшто ги има


Скопје, 12 јуни, 2017 - 13:10 (META) 

Директорот на центарот за комуникации на ВМРО-ДПМНЕ, Иво Котевски, денеска не дал исказ во Специјалното јавно обвинителство за случајот „Талир“, во кој е еден од осомничените. Тој, како и претходните функционери на ВМРО-ДПМНЕ што во петокот беа повикани во СЈО, побарал увид во доказниот материјал.

– Не знам зошто сум осомничен. Денеска се договоривме, во некој од наредните денови да извршиме увид во доказниот материјал и во списите, ако воопшто ги има – рече Котевски.

Тој истакна дека од тоа што можело и претходно да се види, а и сега, СЈО продолжува да биде партиска експозитура на СДСМ.

– СДСМ и Зоран Заев имаат големи обврски кон граѓаните, што произлегуваат од нивните ветувања, но наместо да ги исполнуваат, тие ја дефокусираат јавноста преку нарачки до СЈО за гонење исклучиво на функционери на ВМРО-ДПМНЕ – рече Котевски.

Прашан каде е лидерот на партијата, Никола Груевски, директорот на центарот за комуникации на ВМРО-ДПМНЕ не одговори конкретно. Тој рече дека во СЈО дошол лично, на покана, а околу прашањето за Груевски додаде дека ќе имаат информација како партија во текот на денот.


Котевски дојде на распит во СЈО


Скопје, 12 јуни, 2017 - 12:20 (META) 

Точно напладне во Специјалното јавно обвинителство продолжи распитот на осомничените во случајот „Талир“, а прв во просториите на обвинителството дојде директорот на Центарот за комуникации на ВМРО-ДПМНЕ, Иво Котевски.

Пред да влезе во СЈО, Котевски не даде изјава за медиумите. Во текот на денот, во обвинителството треба да се појават Илија Димовски, Кирил Божиновски, Мартин Протогер, Александар Бичиклиски, додека лидерот на партијата, Никола Груевски, најверојатно нема да дојде, бидејќи сè уште не ја примил поканата за распит, а според информации објавени во дел од медиумите, заминал со семејството на патување надвор од земјава.

Пред Котевски, денеска во СЈО дојде и поранешниот началник на петтата управа, Горан Грујовски, кој е осомничен во случаите „Тврдина“ и „Тврдина 2“.