Милошоски: СЈО врши притисок врз пратениците за да гласаат за уставните измени


Скопје, 16 октомври, 2018 - 12:30 (META) 

Пратеникот на ВМРО-ДПМНЕ, Антонијо Милошоски, по распитот во Специјалното јавно обвинителство (СЈО) за случајот „Моќник“ денеска обвини дека тој распит и распитите на 15 негови колеги – пратеници од ВМРО-ДПМНЕ се притисок за тие да гласаат за уставните измени.

– По неуспешниот референдум, околу 15 мои колеги пратеници, меѓу кои и јас, се повикани од страна на Специјалното јавно обвинителство за разни предмети. Со тоа се покажува дека Обвинителството има своја политичка намена, односно сите овие случаи и постапки и распити имаат за цел да принудат дел од пратениците да гласаат против волјата на народот, односно за измена на Уставот на Република Македонија. Предметите не би ги коментирал во подробности, но би кажал дека истите се неосновани и самиот тајминг на покренување на предметите после пропаднатиот референдум навестува дека СЈО има селективна правда и е политичка институција што сака да изврши притисок врз поголем дел на пратениците од опозицијата да гласаат за уставните измени- изјави Милошоски.

Тој рече дека нема да потклекне под притисоците и ќе гласа според тоа како се определил народот на референдумот, односно „против“.

Инаку, Милошоски е првообвинет во случајот на СЈО против вкупно 13 лица, меѓу кои се и неговиот татко и тогашниот градоначалник на општина Македонски Брод, како и поранешниот прв лустратор Томе Аџиев.


Јанкулоска, покрај 6-те години затвор доби и забрана за напуштање на Скопје


Скопје, 8 октомври, 2018 - 13:49 (META) 

Судечкиот совет го прифати предлогот на СЈО и определи на Гордана Јанкулоска мерка на претпазливост – забрана за напуштање на живеалиштето и престојувалиштето до извршување на казната од шест години затвор што денеска и беше изречена за набавката на луксузниот „мерцедес С600“, за кој Специјалното јавно обвинителство поведе обвинение познато како „Тенк“.

Јанкулоска е прогласена за виновна за злоупотреба на службената положба и овластување. Според судот, таа знаела дека се работи за исклучително скапо возило. Осудениот Никола Груевски ја поттикнал Јанкулоска да го купи возилото, таа, пак, со умисла го поттикнала Ѓоко Поповски да ја изврши задачата за набавката на возилото. Возилото е набавено во незаконска постапка, а се со цел да му се исполни желбата на Груевски, образложи судијката Кацарска.

Обвинителката Фатиме Фетаи по објавувањето на пресудата рече дека до правосилноста на пресудата постои можност за бегство на осудената Јанкулоска, но имајќи ги предвид нејзините семејни околности, предложи да и се определи мерка забрана за напуштање на живеалиштето до извршување на казната.

 


Јанкулоска осудена на 6 години затвор за набавка на „мерцедесот“


Скопје, 8 октомври, 2018 - 12:44 (META) 

Судијката Добрила Кацарска и досуди шест години затворска казна на поранешната министерка за внатрешни работи, Гордана Јанкуловска во случајот „Тенк“ на СЈО за набавка на луксузниот „мерцедес“ од речиси 600.000 евра.

Судијката Кацарска рече дека обвинетата Јанкулоска е виновна за злоупотреба на службена должност и овластување.

-Неспорно е дека е набавено патничко моторно возило „мерцедес гард“. Обвинетата Јанкулоска знаела дека се работи за исклучително скапо возило, а заедно со Ѓоко Поповски преземале дејствија за да му ја исполнат желбата на сега осудениот Никола Груевски. Аудио снимките покажаа дека се бара луксузен пакет на опрема – рече Кацарска.

Јанкулоска не присуствуваше на рочиштето на кое се читаше пресудата. Таа од утрово се наоѓа во Кривичниот суд во Скопје, но во старата зграда каде се одржува рочиште за случајот „Таргет-Тврдина“ во кој таа е меѓу обвинетите. На изрекувањето на пресудата присутен е еден од нејзините адвокати, Боро Тасевски, како и обвинителите од СЈО Фатиме Фетаи и Стевчо Донев.

Судењето за Јанкулоска почна на крајот на август годинава, откако обвинетата се породи. Неа и се суди посебно откако Судот го прифати барањето на адвокатите за лекарското боледување поради нејзината бременост.

Во овој предмет веќе со правосилна пресуда се осудени поранешниот премиер Никола Груевски на две години затвор и екс помошник министер во МВР Ѓоко Поповски на 4 години и 6 месеци. Груевски, исто така, не дојде да ја слушне пресудата.


Груевски по одлуката на Апелација: Нема да гласам за уставни промени


Скопје, 5 октомври, 2018 - 13:28 (META) 

Казната затвор е политички прогон, изјави експремиерот Никола Груевски по соопштувањето на одлуката на Апелациониот суд со која му се потврдува двегодишната затворска казна за случајот ,,Тенк” на СЈО за набавка на мерцедесот од 600.000 евра.

– Ова е класичен политички прогон. Ќе ги искористам сите правни лекови кои ми стојат на располагање. Овде нема потреба од нови докази затоа што веќе има многу докази за овој случај. Според обвинението, ме гонат дека сум влијаел да се купи возило во кое покрај другите требало да се возам и јас -изјави Груевски.

На новинарско прашање во врска актуелната ситуација во која се потребни пратенички гласови од опозицијата за изгласување на уставните измини, Груевски рече дека нема да се трампа за амнестија.

– Нема да гласам за уставни промени и нема да ги поддржам истите. Јас немам намера да го изневерам народот – изјави Груевски.

Груевски соопштението на Апелација го дочека во судница додека ги слушаше бомбите во ,,Титаник”.


СЈО побара Јанкулоска да биде прогласена за виновна


Скопје, 3 октомври, 2018 - 12:02 (META) 

Обвинителите од Специјалното јавно обвинителство на крајот од своето изнесување на завршните зборови за случајот „Тенк“ побараа обвинетата Гордана Јанкулоска да биде прогласена за виновна со оглед на тоа дека извршила злоупотреба на службената положба за набавка на екстралуксузниот автомобил „мерцедес“.

„Обвинетата Гордана Јанкулоска при набавката на возилото ‘мерцедес ес 600 гард’ била свесна за своето дело и сакала извршување на истото. Таа го поттикнала Поповски незаконски да го фаворизира ‘Макаутостар’ за да се набави ново блиндирано возило по желба на тогашниот премиер, Никола Груевски. Бараме обвинетата да биде прогласена за виновна земајќи ги предвид сите олеснителни и отежителни околности, а со тоа да бидат платени и 313 илјади денари судски трошоци солидарно со Груевски и Поповски“, рече обвинителката Фатиме Фетаи.

За овој случај веќе е осуден поранешниот помошник-министер во МВР Ѓоко Поповски на шест години и шест месеци затворска казна, а поранешниот премиер Никола Груевски, како поттикнувач за извршување на делото, е осуден на две години казна затвор.


Денеска рочишта за „Насилството во општина Центар“, „Тенк“ и за смртта на малата Тамара


Скопје, 17 септември, 2018 - 10:26 (META) 

Во Кривичниот суд денеска треба да се одржат рочишта за предметите „Насилство во општина Центар“ и раздвоената постапка за „Тенк“ на Специјалното јавно обвинителство.

На претходните рочишта на поранешната министерка за внатрешни работи Гордана Јанкулоска во раздвоената постапка за случајот „Тенк“ на СЈО, беа изнесувани материјални докази и сослушани сведоци, кои на некој начин биле вклучени во јавната набавка на блиндираното возило „мерцедес“ во вредност од 600 илјади евра во 2012 година.

Во предметот „Насилство во Центар“ обвинети се поранешниот премиер Никола Груевски, поранешниот министер за транспорт и врски Миле Јанакиески, екс советничката на ВМРО-ДПМНЕ Даниела Рангелова и уште осум други лица.

На претходните рочишта за овој предмет, вина признаа четвртообвинетиот Томислав Лазаров и петообвинетиот Јордан Ристевски и добија условни казни.

Во Кривичниот суд Скопје денеска е закажано судење и за смртта на малата Тамара Димовска од Велес, која во 2015 година почина чекајќи операција на рбетот во странство.

Со обвинение за „несовесно работење во службата“ Основното јавно обвинителство поднесе кривични пријави против поранешната директорка на Детската клиника Аспазија Софијанова како член на второстепената комисија и поранешните директори на Фондот за здравствено осигурување на Република Македонија (ФЗОМ), Маја Парнарџиева – Змејкова и Џемали Мехази.


Срѓан Керим и Јана Станисављева на распит во СЈО за „МПМ“


Скопје, 13 септември, 2018 - 12:03 (META) 

Поранешните први луѓе на Медиа принт Македонија (МПМ), Срѓан Керим и Јана Станисављева, се повикани на распит во Специјалното јавно обвинителство (СЈО), јави „Сведок“.

Двајцата треба да дадат исказ во рамки на истрагата за бројни злоупотреби во МПМ, што ја води ова обвинителството откако предметот го презеде од Основното јавно обвинителство.

Компанијата беше издавач на згаснатите весници „Дневник“,„Вест“ и „Утрински весник“.

Обвинителката Лиле Стефанова за овој случај веќе распрашала и поранешни вработени во весниците, подносители на пријавата, а била одземена и документација за овој случај.

Во Основен суд Скопје 2, во тек е постапка за стечај врз МПМ.


Кривичен суд одговори на обвинувањата од адвокатите и Катица Јанева


Скопје, 30 август, 2018 - 17:08 (META) 

Основниот суд Скопје 1, познат и како Кривичен суд, денеска одговори на обвинувањата од адвокатите на обвинетите во судските процеси во кои обвинението го застапува Специјалното јавно обвинителство (СЈО), но и на вчера кажаната критика од специјалната обвинителка Катица Јанева дека не се закажуваат доволно рочишта за овие предмети.

Адвокатите се бунеа дека многу често се закажуваат рочишта, а некои и се поклопуваат, па не може да учествуваат на сите судења. Така, на денешното судење на Гордана Јанкулоска во случајот „Тенк“, и двајцата нејзини адвокати, Боро Тасевски и Сања Алексиќ, не беа на почетокот на рочиштето, бидејќи биле на судењето за „Насилство во Општина Центар“.

– Или да се јави еден адвокат, или ќе ги казнам и двајцата со висока парична казна и ќе ви назначам бранител по службена должност – и рече судијката Добрила Кацарска на Јанкулоска.

Дваесетина минути подоцна адвокатите дојдоа во судницата.

И поранешниот премиер Никола Груевски не се појави во Апелацискиот суд, каде требаше да се разгледува неговата пресуда во случајот „Тенк“, оти и тој и адвокатите биле на судењето за „Насилство во Општина Центар“.

Од судот порачаа дека судиите ги почитуваат правата на странките, а распоредите се прават со многу напор, за да бидат усогласени јавните расправи.

„Ја информираме јавноста дека судиите при Основниот суд Скопје 1 – Скопје во целост ги почитуваат првата на странките како во овие така и во сите други предмети и со крајни напори се прават прецизни и усогласени распореди на закажаување на главните расправи се со цел да се овозможи доволно време на обвинетите и нивните бранители квалитетно да ја подготват својата одбрана, доследно да се почитува принципот на еднаквост на оружјата и правото на судење во разумен рок“, порачаа од судот.

Велат и дека е проблем тоа што обвинетите во случаите на СЈО им се суди во неколку процеси, па не може да се закажува јавна расправа во ист ден.

„Дополнителен проблем е што поголем дел од обвинетите имаат по двајца или повеќе бранители, па затоа при насрочување на расправите се внимава на судењето да биде присутен барем еден од бранителите кои ги застапуваат обвинетите“, велат од Судот.

Во однос на критиките од Јанева дека за одредени предмети на СЈО не се насрочуваат доволно расправи, од Кривичниот суд напоменуваат дека само во текот на септември 2018 година, од 20 работни дена, во 19 од нив се насрочени расправи за 16 различни предмети по кои постапува Специјалното јавно обвинителство, а воедно термините се усогласени како би се овозможиле доволно време на одбраната да се подготви.

Во соопштението се напоменува и дека во моментов во судот се постапува по 1.633 други предмети во одделението кривично – полнолетни, како  и 126 други предмети во одделот за организиран криминал и корупција, меѓу кои и предмети со над 30 обвинети од кои дел се во притвор, „и овие предмети не може да се занемарат за сметка на други“.


Апелација одлучува за жалбата на Груевски за „Тенк“, Јанкулоска на суд за истиот случај


Скопје, 30 август, 2018 - 9:50 (META) 

Апелациски суд – Скопје денеска ќе одлучува по жалбата на поранешниот премиер Никола Груевски за пресудата во случајот „Тенк“ на Специјалното јавно обвинителство (СЈО) за набавката на луксузниот „мерцедес“ вреден безмалку 600.000 евра

За случајот „Тенк“, поранешниот премиер Никола Груевски, како поттикнувач на делото, е осуден на две години затвор, а поранешниот помошник министер во МВР, Ѓоко Поповски, е осуден на шест години и шест месеци затвор.

Во Основен суд Скопје 1, денеска ќе се одржи ново рочиште во раздвоената постапка против поранешната министерка за внатрешни работи Гордана Јанкулоска за истиот предмет. Во судницата ќе се сослушуваат сведоци.

Јанкулоска вчера во својот воведен исказ наведе дека ќе ги побијат тврдењата дека со набавката се исполнувани нечии „лични желби“ и ќе докажат дека набавката е согласно стандардите за работа на Министерството.


Судењето на Јанкулоска за блиндираниот мерцедес продолжува утре


Скопје, 29 август, 2018 - 17:04 (META) 

Раздвоената судска постапка против поранешната министерка за внатрешни работи Гордана Јанкулоска, за предметот „Тенк“ на Специјалното јавно обвинителство за набавката на луксузниот „мерцедес“ вреден околу 580.000 евра продолжува утре со сослушување на сведоци.

Таа беше издвоена од почнатиот судски процес поради нејзината ризична бременост. Пролетва за набавката на блиндираниот автомобил поранешниот помошник министер во МВР Ѓоко Поповски доби шест години и шест месеци затвор, а поранешниот премиер Никола Груевски, како поттикнувач за извршување на делото, доби две години затвор.

Специјалниот јавен обвинител Стефчо Донев, во воведен говор на денешното рочиште, наведе дека Јанкулоска сторила злоупотреба на службената положба и овластување.

Јанкулоска, во воведен говор пред судот, рече дека иако постапката се одвива во сложени услови, како издвоена од предмет за кој веќе има донесена одлука, сепак ќе ги побијат тврдењата дека со набавката се исполнувани нечии „лични желби“ и ќе докажат дека набавката е согласно стандардите за работа на Министерството.