Хајредини: ДУИ и осумтемина „одметнати“ ќе ги деактивираат и СЈО и бомбите


Владиниот коалициски партнер ДУИ е непремостива пречка за постоењето на Специјалното јавно обвинителство и понатамошното објавување на „бомбите“, смета аналитичарот и колумнист Џевдет Хајредини, кој додава дека судбината на СЈО ја запечатуваат и осумтемина пратеници „одметнати“ од ВМРО-ДПМНЕ.

Власта, нагласува Хајредини, ниту без едните, ниту без другите нема да може да спроведе ниедна реформа за која е потребно двотретинско мнозинство во Собранието.

– Потенцијална „бомба“ за реформите кои треба да се спроведат, за сите закони за чие носење е потребно двотретинско мнозинство, нема да се надмине отпорот на коалицискиот партнер ДУИ кон продолжувањето на работата на Специјалното јавно обвинителство – смета Хајредини.

Тој потсетува дека формирањето на СЈО било најтешката тема на преговорите за Пржинскиот договор, и оти ова обвинителство било формирано со обврска да престане понатамошното јавно објавување на „бомбите“, односно нелегално прислучуваните разговори.

Според Хајредини, запечатувањето на судбината на СЈО е услов за гласовите на ДУИ во реформите на администрацијата, правосудството, но и Изборниот законик.

– За такви реформи се потребни 80 пратеници, од ДУИ не ќе може воопшто да се очекува да се сложат „бомбите“ да се објават од било која страна, а се заканува опасност да се појават од разни страни – вели Хајредини.

Дополнителна пречка за понатамошното постоење на СЈО, смета Хајредини, се и осумтемина „одметнати“ пратеници од ВМРО-ДПМНЕ.

– Многу од овие работи им одговараат и на тие осум пратеници – вели тој.

Хајредини потсетува дека меѓународната заедница постојано ја нагласува важноста на работата на СЈО и потребата почнатите истраги да добијат ефективни затворски казни. Тоа го нагласи и државниот министер за европски прашања во МНР на Германија, Михаел Рот, кој порача дека мора да продолжат истрагите поврзани со прислушуваните разговори и Специјалното јавно обвинителство, поради неизвесноста неговиот мандат да се продолжи со двотретинско мнозинство, да се интегрира во редовните структури на Обвинителството.

На 30 јануари Врховниот суд на општа седница утврди начелно правно мислење дека СЈО не може да постапува по „трокот на траење“ од 18 месеци, предвиден со законот со кој е формирано. Судот расправал за СЈО по иницијатива на адвокатите Боро Тасевски и Еленко Миланов.

–  Јавното обвинителство за гонење на кривични дела поврзани и кои произлегуваат од содржината на незаконското следење на комуникациите може да покрене обвинение или да нареди запирање на истражната постапка во период не подолг од 18 месеци од денот на преземањето на предметите и материјалите од негова надлежност, како кумулативен услов, кој не може да биде пречекорен сметано од денот на прием на материјалите од неовластено следење на комуникации од член 2 од Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, и по истекот на тој рок од 18 месеци, не е овластен тужител за преземање на јавнообвинителски работи на предистражни и истражни дејствија, предвидени со Законот за кривичната постапка – соопшти Врховниот суд.


Јовески го испрати барањето за автентично толкување до Собранието


Скопје, 13 февруари, 2019 - 16:13 (META) 

Јавниот обвинител Љубомир Јовески денеска до Собранието го испрати барањето за автентично толкување за член 22 од Законот за Специјалното јавно обвинителство.

Ваквиот потег уследи откако стручниот колегиум на Јавното обвинителство на проширениот состанок пред една седмица одлучи дека начелно-правното мислење на Врховниот суд за предметите на Специјалното јавно обвинителство ја нарушува законитоста и дека ќе поднесе барање до Собранието за давање автентично толкување на член 22. од Законот за СЈО.

Сè почна со одлуката на Врховниот суд, кој на општа седница на 30 јануари, одлучувајќи по иницијатива на адвокатите Боро Тасевски и Еленко Миланов, бранители на голем дел од обвинетите во случаите на СЈО, донесе мислење дека Специјалното обвинителство не смеело да почнува истраги и да отвора судски процеси по истекот на рокот од 18 месеци внесен во законот за ова обвинителство.

„Потребата од давање автентично толкување произлегува од  различното толкување на чл. 22 од Законот за јавното обвинителство  за гонење на кривични дела поврзани и кои произлегуваат од содржината на незаконското следење на комуникациите“, се вели во барањето што Јовески денеска го испрати до Собранието.


Апелација им го продолжи куќниот притвор на Камчев, Панделески и Јосифовиќ


Скопје, 8 февруари, 2019 - 16:29 (META) 

На предлог на Специјалното јавно обвинителство, Апелацискиот суд Скопје им ги продолжи мерките куќен притвор во траење од 30 дена за осомничените Јордан Камчев, Цветан Панделески и Ненад Јосифовиќ во предметот „Империја“.

Од СЈО информираат дека за осомничениот Тодор Мирчевски, покрај веќе изречената мерка на претпазливост – одземање на патна исправа, до Основен суд Скопје 1 – судија на претходна постапка, доставено е барање за определување на дополнителна мерка на претпазливост – јавување во суд еднаш неделно кај службено лице.

За осомничената Зорица Арсовска, пак, како што е наведено во соопштението, покрај веќе изречената мерка на претпазливост – одземање на патна исправа, до Кривичниот суд – судија на претходна постапка, доставено е барање за определување на дополнителни мерки на претпазливост – јавување во суд еднаш неделно кај службено лице, забрана за посетување на деловните простории каде што осомничената работи, како и забрана за превземање на определени работни активности од дома, а кои се поврзани со правните лица – предмет на истрагата.

Осомничените во „Империја“ се товарат за злосторничко здружување, оштетување и повластување на доверители, злоупотреба на службената положба, измама и перење пари.

Кривично се гонат вкупно 13 лица, меѓу кои Сашо Мијалков, Ратка Куноска Камчева, Христина Камчева Стојческа, Лилјана Гајдовска, Владислав Стајковиќ, Дејан Јанев, Ванче Мијалчев и Јованче Тасковски.


Јовески: ОЈО ќе бара автентично толкување за надлежностите на СЈО


Скопје, 7 февруари, 2019 - 15:43 (META) 

Државниот јавен обвинител, Љубомир Јовески соопшти дека стручниот колегиум на Јавното обвинителство на денешниот проширен состанок одлучил дека начелно-правното мислење на Врховниот суд за предметите на Специјалното јавно обвинителство ја нарушува законитоста и ќе поднесе барање до Собранието за давање автентично толкување на член 22. од Законот за СЈО.

Кривичниот суд Скопје завчера побара од државниот јавен обвинител Љубомир Јовески да се произнесе кое обвинителство може во иднина да постапува како овластен тужител во предметите поднесени од Специјалното јавно обвинителство.

Од Судот посочуваат дека, сé до произнесување на државниот јавен обвинител дали предметите ќе останат во надлежност на СЈО или ќе бидат преземени од Јавното обвинителство за организиран криминал и корупција, Основниот суд Скопје 1 – Скопје во сите предмети постапува согласно одредбите од ЗКП, а за предметите на СЈО добиени по истекот на рокот за кој милење даде Врховниот суд, кои се итни и неодложни ќе одлучуваат надлежните кривични совети, сé со цел да не дојде до непотребно одолговлекување.


Oбвинителството на проширена седница ќе решава што понатаму со предметите на СЈО


Скопје, 6 февруари, 2019 - 13:06 (META) 

Јавниот обвинител Љубомир Јовески денеска свикал проширена седница на обвинителите во Јавното обвинителство, на која треба да се дискутира за побараното мислење од скопскиот Кривичен суд. Скопскиот суд побара известување кој обвинител ќе ги работи случаите на Специјалното јавно обвинителство (СЈО) по мислењето од Врховен суд со кој се посочува дека СЈО повеќе од година и пол нема мандат да покренува истраги и да поднесува тужби. Истовремено, судиите од Кривичниот суд побараа Јовески од Собранието да побара автентично толкување на член 22 од Законот за СЈО.

На утрешната седница на Стручниот  колегиум на јавните обвинители во Јавното обвинителство, ќе учествуваат и вишите јавни обвинители на Вишите јавни обвинителства и јавниот обвинител на Основното јавно обвинителство за гонење на организиран криминал и корупција.


Цаца – Николовска: И покрај мислењето на Врховен суд за СЈО, осомничените нема да се спасат


Скопје, 5 февруари, 2019 - 16:47 (META) 

Поранешната судијка во Европскиот суд за човекови права, Маргарита Цаца Николовска, вели дека иако Врховниот суд донесе начелно правно мислење со кое се запираат истражните постапки на Специјалното јавно обвинителство, сепак осомничените нема да се спасат од кривична одговорност. Според неа правниот систем во Македонија треба да продолжи со истражните постапки на предметите кои СЈО не успеа да ги доврши, пишува „Порталб“.

– Факт е дека сите политички партии се согласија за формирањето на ова обвинителство. Тоа е голем и јак елемент за негово постоење. Со негово минизирање сега, јас се согласувам дека СЈО е мртво, сепак нема да може да се ослободат од кривична одговорност на овој начин. Сепак има правен систем и тој правен систем мора да најде начин предметите во кривичната област да се процесуираат и на овој или оној начин дојдат до крајно решение – изјави денеска поранешната судијка.

Таа ја искритикува одуката на Врховниот суд велејќи дека тој нема надлежност да го толкува законот, туку таа надлежност ја има единствено Собранието.

Инаку, денеска и скопскиот Кривичен суд побара од јавниот обвинител Љубомир Јовески да се изјасни кое обвинителство треба да ги води случаите на СЈО, а истовремено и да побара автентично толкување од Собранието.


Кривичен суд бара Јовески и Собранието да се изјаснат за надлежноста на СЈО


Скопје, 5 февруари, 2019 - 16:26 (META) 

Скопскиот Кривичен суд побара Јавниот обвинител Љубомир Јовески да се изјасни кој обвинител ќе ги работи случаите на Специјалното јавно обвинителство (СЈО) и да побара автентично толкување од Собранието за членот 22 од Законот за специјалното јавно обвинителство, јавува „Порталб“.

Таква одлука била донесена на вчерашниот состанок на Кривичниот суд по правното мислење на Врховниот суд кој го оспорува почнувањето истраги и поднесувањето обвиненија од СЈО по 30 јуни 2017 година и нареди овие случаи да бидат преземени од редовните обвинителства.

Според барањето од судот, Јовески мора да се произнесе кој ќе биде овластен тужител на случаите на СЈО, дали СЈО или Основното јавно обвинителство за гонење организиран криминал и корупција. Притоа јавниот обвинител ќе треба од Собранието да побара автентично толкување на законот за СЈО, бидејќи само законодавецот смее да ги толкува законските одредби, а судските тела се надлежни само за спроведување на одредбите, а не нивното толкување.


Дане Илиев: не е важен моделот за СЈО, туку да продолжат постапките што ги води


Скопје, 5 февруари, 2019 - 11:42 (META) 

Не е важно во која форма ќе функционира Специјалното јавно обвинителство (СЈО), решенија има, важно е да има политичка волја да продолжат постапките што тоа ги покрена и ги презема, смета Дане Илиев, поранешен претседател на Врховниот суд. Тој оценува дека е доведено во прашање постоењето на СЈО.

– Не е добро. Од неколку страни се донесоа прописи кои работата на тоа обвинителство ја доведоа под знак прашалник. Во прашање е доведено и неговото опстојување, дали ќе опстои како јавно обвинителство. Измените во Кривичниот законик, начелното мислење на Врховниот суд, амнестијата… – изјави за „Мета“ Илиев.

По ставот на Врховниот суд, кој минатата недела даде начелно правно мислење дека СЈО не е овластен тужител по истекот на рокот од 18 месеци, предвидени со законот со кој беше формирано, Илиев смета дека со нов закон треба да се најде решение за предметите што ги води ова обвинителство.

– Најверојатно ќе се случи со нов закон, мора да се реши, со директни одредби или со преодни одредби, да се каже што со преземените случаи од јавното обвинителство и со материјалите кои ги поседува. Најлогично е да ги преземе Јавното обвинителство за организиран криминал – смета поранешниот претседател на Врховниот суд.

Според Илиев, не е најважно дали СЈО ќе остане или ќе се претопи во некое од постоечките обвинителства, се додека продолжи процесуирањето на предметите што ги води и обработката на материјалите што ги поседува.

– Идеално решение нема, решенијата се добри, зависи од луѓето. Не е до моделот, туку како ќе се спроведе. Дали постои политичка волја да се спроведе? – се прашува Илиев.


Јовески и Јанева разговарале за одлуката на Врховен суд, СЈО ќе продолжи „да постапува“


Скопје, 31 јануари, 2019 - 13:51 (META) 

Јавниот обвинител на Република Македонија Љубомир Јовески денеска се сретнал со Специјалната јавна обвинителка, Катица Јанева, информираа преку заедничко соопштение двете обвинителства.

Јовески и Јанева разговарале за одлуката донесена на вчерашната седница на Врховен суд дека СЈО не може да покрене обвинение или да нареди запирање на истражната постапка после 18 месеци од денот на преземањето на предметите и материјалите од негова надлежност.

„На средбата беа разгледани состојбите и можностите за натамошно постапување по предметите по кои постапува Јавното обвинителство за гонење на кривични дела поврзани и кои произлегуваат од содржината на незаконското следење на комуникациите. Во тој контекст, Јовески и Јанева се согласија дека постапувањето по овие предмети ќе продолжи согласно позитивните законски прописи“, се вели во соопштението.


Врховен суд: СЈО не смеело да отвора истраги по рокот од 18 месеци


Скопје, 30 јануари, 2019 - 15:29 (META) 

Специјалното јавно обвинителство не смеело да отвора нови случаи по истекот на „рокот на траење“ од 18 месеци, заклучи Врховниот суд. На денешната општа седница Врховниот суд утврдил вакво начелно правно мислење, по иницијативите на адвокатите Боро Тасевски и Еленко Миланов.

– Јавното обвинителство за гонење на кривични дела поврзани и кои произлегуваат од содржината на незаконското следење на комуникациите може да покрене обвинение или да нареди запирање на истражната постапка во период не подолг од 18 месеци од денот на преземањето на предметите и материјалите од негова надлежност, како кумулативен услов, кој не може да биде пречекорен сметано од денот на прием на материјалите од неовластено следење на комуникации од член 2 од Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, и по истекот на тој рок од 18 месеци, не е овластен тужител за преземање на јавнообвинителски работи на предистражни и истражни дејствија, предвидени со Законот за кривичната постапка – стои во известувањето од Врховниот суд.