ССК и УЈП заеднички ќе се борат против нерегистрираните бизниси


Скопје, 11 јули, 2018 - 16:43 (META) 

Сојузот на стопански комори на Македонија (ССК) и Управата за јавни приходи (УЈП) денеска потпишаа Меморандум за соработка за заеднички да се координираат за регистрирање на субјектите кои немаат регистрирано фирма, a со цел намалување на сивата економија и нелојалната конкуренција

Меморандумот за соработка помеѓу институциите го потпишаа претседателката на ССК, Данела Арсовска и директорката на УЈП, Сања Лукаревска.

„Неформалната т.е сивата економија е еден од најголемите проблеми бидејќи оние кои учествуваат во неа неправично и незаконски ги става во повластена положба во однос на оние што си имаат регистрирано фирми и ги исполнуваат законските обврски. Според последните податоци на меѓународните организации, во земјава секоја година фирмите губат до 15 проценти од профитот поради сивата економија во сите сектори. Инспекциските служби треба да практикуваат тие што ќе ги затекнат на терен по службена должност да ги регистрираат за да се воведат во системот, да плаќаат даноци и бидат лојална конкуренција“, изјави Арсовска.

Таа појасни дека тие субјекти никаде не фигурираат, прават милионски профити на црно, а не се регистрирани и работат со готовина.

Анализите на ССК покажаа дека оние кои работат без фирма во старт се повеќе од 50 проценти поконкурентни од регистрираните фирми, поради тоа што не плаќаат ДДВ, не плаќаат продонеси по основ на социјално и пензиско осигурување, тековните трошоци ги плаќаат како лица, наместо да плаќаат индустриска струја и вода како регистрираните фирми, со што, не само што го оштетуваат буџетот, туку и нудат цени пониски и до 50 проценти, кои, регистриран бизнис што ги плаќа сите давачки, не може да ги постигне.

Според извештајот на ОЕЦД во Македонија има 25 отсто учество на сивата економија во вкупната економија, а што се потврди и во извештајот на ЕУ во кој се вели дека сивата економија останува главна пречка за бизнисот и влијае на конкурентноста на формалниот приватен сектор. Просечното ниво во европските земји се движи од 12 до 15 проценти.


ССК: Неформалната економија најголем проблем во сите сектори


Скопје, 4 јули, 2018 - 15:04 (META) 

Сузбивање на неформалната економија во Македонија која изнесува над 30 проценти е главниот предизвик за обезбедување поволен деловен амбиент за малите и средни претпријатија кои се стожер на македонската економија и сочинуваат 99,7 проценти од сите компании со учество од 70 отсто во домашниот бруто-производ (БДП).

Ова беше една од темите на која претседателката на  на Сојузот на стопански комори, Данела Арсовска и членовите на Управниот одбор, дискутираа со министерот задолжен за регулатива за подобрување на инвестициската клима за домашните претпријатија, Зоран Шапуриќ.

Според анализите на Сојузот, неформалната економија најмногу е застапена во транспорт, градежништво, туризам, угостителство, услужни дејности и земјоделство.

„Неформалната економија, претставува директна нелојална конкуренција на регистрираните и го поткопува развојот на стопанството. Потребно е да се овозможи функционален механизам за справување со сивата економија, бидејќи таа не придонесува во буџетот и дополнително ги дестимулира компаниите да инвестираат со тоа што ги руши основите на еднаквост врз кои се темели еден пазарен систем“, изјави Арсовска.

Таа додаде дека неформалната економија бележи пораст секоја година и доколку не се отпочне со сериозна акција за нејзино сузбивање финално ќе предизвика и дерегистрирање на оние претпријатија кои работат на пазарот и нивно преминување во сивата зона.

Анализите на Светска банка покажуваат дека учеството на компаниите кои се борат против нерегистрираните или неформални компании во Македонија е 55, 5 проценти или најмногу во регионот пред Црна Гора со 52,4 проценти, Хрватска со 48,2 проценти, Албанија со 40,2, Србија со 37, 5 проценти и Словенија со 26,5 проценти.


Анѓушев: Прогресивниот данок претставува порамномерен товар на даночната политика


Скопје, 20 април, 2018 - 16:19 (META) 

Во државата во моментов се води само дискусија за промена на персоналниот данок, а сите останати даноци и понатаму остануваат исти, одговори на новинарско прашање вицепремиерот за економски прашања, Кочо Анѓушев на „Конференцијата за зголемување на конкурентноста на домашните мали и средни претпријатија со цел подобрување на нивната соработка со странските инвеститори – Можности и предизвици“

– Данокот на добивка, данокот на имот и сите останати даноци остануваат исти, предмет на дискусија во Владата е само прагот на платата над која ќе се зголеми персоналниот данок. Таа дискусија ќе ја прошириме со целокупната зантересирана јавност и сите чинители на економското живеење во земјава – изјави Анѓушев.

Тој потенцираше дека зголемувањето на персоналниот данок за одредена категорија граѓани претставува социјална правда и порамномерен товар на даночната политика.

Во делот на фискалната политика, покрај ставање под контрола на сивата економија, Анѓушев оцени дека има и простор за други типови на поголема фискална дисциплина, пред се, кај трансферните цени на компаниите кои имаат свои компании ќерки во другите држави.

– Спорен е начинот на префактурирање, односно на наплаќање или ценовната политика на компаниите кога си продаваат компанија мајка на ќерка од една во друга држава. Тоа е причината за многу пропаднати фабрики во земјава како и една од најголемите причини поради кои „Фени“ дојде во ситуацијата во која дојде – додаде тој.


Богов сугерира да се оданочува сивата економија, не го коментира прогресивниот данок


Охрид, 13 април, 2018 - 13:53 (META) 

Прогресивното оданочување е владина политика и тука Народната банка не може да се меша, но можам да сугерирам да се зафатат со оданочување на сивата економија, одговори Гувернерот на Народната банка, Димитар Богов, на новинарско прашање во врска со прогресивното оданочување на седмата годишна истражувачка конференција во организација на Народна банка која што втор ден се одржува во Охрид.

– Можам да сугерирам дека во земјите од регионот, каде што сивата економија е прилично висока и голем дел од економските активности не се оданочени, има простор јавните финансии да се подобрат преку зафат од оние економии кои сега не плаќаат данок – изјави Богов.

Тој рече дека во поглед на фискалната политика, тоа е владина политика и секоја влада со неа оди на избори пред гласачите.

– Тоа е нивно право и одговорност. Монетарната политика соодветно ќе се прилагоди на секоја фискална политика. Ако фискалната политика е конзервативна тогаш има простор и монетарната политика да биде порелаксирана и обратно. Даночната политика не би ја коментирал – додаде Богов.


Туристичките работници се соочуваат со нелојална конкуренција и сива економија


Скопје, 11 декември, 2017 - 15:45 (META) 

Здружението на угостителство и туризам при Стопанската комора на Македонија ќе поднесе иницијатива за изменување и дополнување на Законот за туристичка дејност и Законот за угостителска дејност, за да се намалат нелојалната конкуренција и сивата економија во овој сектор, но и да се подобри квалитетот на услугите.

Заменик-претседателот на Здружението, Славе Сирачевски информираше дека ќе се предложи обновување на лиценцата за работа по одреден период од две или три години, за да се обезбеди систем на самоконтрола на пазарот.

– Здружението иницира измена и на процесот на исплата на субвенциите, бидејќи постапката е сложена и обемна, со многу непотребни детали, поради што доаѓа до доцнење во исплата на субвенциите – изјави Асим Мемедовиќ, член на Здружението.

Измени и дополнувања, туристичките работници предлагаат и во делот на дефинирање на работата на туристичките водичи. Во угостителството, Здружението предлага да се направи категоризација на сите угостителски објекти за сместување.

– Тоа подразбира дека освен сегашната категоризација за хотели, мотели и пансиони, од исклучителна важност е да се категоризираат туристичките апартмани, планинарски и ловни домови. Најголемиот проблем во моментов е непостоењето категоризација на апартманите – посочуваат од Здружението.

Туристичките работници, нелојална конкуренција имаат и во продажбата на аранжмани преку онлајн-платформите.

Инаку, според податоците на Државниот завод за статистика, во првите девет месеци годинава, во однос лани, бројот на туристи е зголемен за 16,7 проценти, а бројот на ноќевањата е зголемен за 12,4 проценти.

Најмногу туристи има од Србија, Хрватска, Албанија, Косово, Германија, Бугарија, Полска и Грција. Согласно политиката на субвенционирање, од 2010 година заклучно со 2017 година ќе бидат исплатени 11,9 милиони евра.


Секој втор работник е пријавен на плата пониска од таа што реално ја добива


Скопје, 26 октомври, 2016 - 10:22 (META) 

Речиси секој втор работник е пријавен на плата која е пониска од таа што реално ја добива, односно на секој втор работник му се исплаќаат придонеси за здравствено и за социјално осигурување на плата која е пониска од реалната.

Ова го покажала анкетата спроведена од Центарот за истражување и креирање на политики (ЦИКП), во текот на мај и на јуни годинава.

– Еден од десет работници воопшто немаат потпишано договор за работа со својот работодавец, со што, покрај социјалните придонеси, се избегнува и плаќањето данок на приход. Последиците можат да бидат слаба или неквалитетна социјална и здравствена заштита, необјективна процена на големината на домашниот бруто-производ, нереален број на невработени, односно вработени и социјално загрозени лица, голема стапка на даночна евазија и помал буџет, што претставува предизвик и за фискалната политика на државата – се вели во истражувањето на ЦИКП.

Оттаму велат дека одговорноста за нецелосното исплаќање придонеси најмногу лежи кај работодавците, но дел од вината носат и работниците кои ги прифаќаат таквите услови.

– Резултатите покажуваат дека околу 22,1 отсто од испитаниците би прифатиле да работат непријавени доколку поради тоа би примале повисока плата. Покрај тоа, фактот дека 62,7 проценти од испитаниците (во споредба со 56,4 проценти во 2014 година) изјавуваат дека задолжителното здравствено и социјално осигурување не им обезбедуваат доволно чувство на сигурност, може да се смета за дополнителна причина за прифаќањето на непријавена работа – се додава во истражувањето.

Целта на оваа анкета била да се утврдат различните форми на скриени економски активности денес и да се споредат со резултатите од истата анкета направена во октомври 2014 година.


Намалување на сивата економија и на несреќите на работно место бара ОРМ


Скопје, 14 јули, 2016 - 11:35 (META) 

Нови ефикасни решенија за намалување на повредите и на несреќите на работните места, воведување на системот на бонови при пријавување на сезонските работници во задолжителното социјално осигурување и измени во Законот за трговски друштва, бара Организацијата на работодавци на Македонија (ОРМ).

Во областа на безбедноста и здравјето при работа, ОРМ смета дека досегашната примена на законската регулатива во оваа област не ги дава посакуваните резултати, односно не го намали бројот на повреди и на несреќи на работно место, особено во земјоделството, градежништвото и во преработувачката индустрија, каде бројот на повреди и на несреќи е најголем.

– Законот за безбедност и за здравје при работа предизвикува значителни финансиски импликации, особено за малите и за микрофирмите од услужните дејности, во кои често единствена опрема за работа се компјутерите и работните маси, а кои, според обврските во законот, се изедначени со големите индустриски капацитети каде ризиците за повреди на работното место се значително поголеми – изјави претседателот на ОРМ, Ангел Димитров.

Покрај за безбедноста и за здравјето при работа, ОРМ предлага и значително поедноставување на моделот на пријавување и на плаќање на придонесите за сезонските работници, со што ќе се постигне поефикасна примена на законските одредби за пријавување на овие работници, ќе се зголеми нивната социјална сигурност, а истовремено ќе се влијае на намалување на даночната евазија и на сивата економија.

Членките на ОРМ, како еден од приоритетите ја истакнуваат и потребата од измени во Законот за трговски друштва со кои се олеснат вложувањата на постојните акциoнери во компаниите, што позитивно ќе се одрази и за понатамошно поттикување на домашните и на странските инвестиции во земјата.

 


Сивата економија ќе се намалува со поголема контрола од инспекциските служби


Скопје, 22 декември, 2015 - 14:44 (META) 

За намалување на сивата економија, Сојузот на стопански комори на Македонија (ССК) и Инспекцискиот совет потпишаа меморандум за соработка.

Според претседателката на ССК, Данела Арсовска, не смее да се дозволи регистрираните компании, трговци-поединци и занаетчии што ги почитуваат законите, ги плаќаат даноците, ги исполнуваат стандардите, прописно ги пријавуваат и ги плаќаат работниците, да трпат штета од нерегистрираните субјекти, кои се дел од сивата економија.

– Преку нов проект на контрола на инспекциските служби кај нерегистираните субјекти, заеднички ќе работиме на намалување на нелојалната конкуренција, која е детектирана како еден од најголемите проблеми што ги има домашното стопанство и е една од причините што економскиот пораст е во делумна стагнација во изминатите неколку години – изјави Арсовска.


Сивата економија во државата изнесува 26 проценти


Скопје, 2 ноември, 2015 - 15:17 (META) 

Сивата економија во државата може да изнесува и до 26 проценти, иако податокот до кој дојдовме вели дека тој процент е 22,5 отсто, истакна првиот човек на Сојузот на синдикати на Македонија, Живко Митревски.

Поради ова, ССМ во следниот период ќе почне со кампања против непријавената работа. Една од мерките ќе биде едукација на младите за нивните права, односно дека треба да одбијат работа на црно.

– Непријавени работници има во земјоделството, во градежништвото, во трговијата, во хотелите. Непријавените се на возраст од 15 до 30 години. Но, ние за работа на црно ја сметаме и прекувремената неплатена работа, како и исплатата на дел од сработеното во плик – истакна Митрески.