„Црвени знаменца“ ќе алармираат за ризик од корупција на системот за јавни набавки


Скопје, 12 декември, 2018 - 14:10 (META) 

Реформата на системот на јавни набавки е еден од главните приоритети, јавните набавки се една од клучните алатки во економските политики на една Влада и веројатно се највидливиот сигнал за доброто управување со јавните финансии, рече денеска министерот за финансии Драган Тевдовски на прес-конференција по повод завршување на проектот за „Зајакнување на праксата на јавни набавки“ имплементиран од Бирото за јавни набавки (БЈН) и Светска банка (СБ).

Сигнализирање ризик од корупција, надградба на електронскиот систем за јавни набавки и јакнење на капацитетот на Бирото за јавни набавки, се трите успешно имплементирани активности преку заедничкиот проект на БЈН и Светска банка.

– Новата управна контрола што ќе ја врши Бирото за јавни набавки во голема мера ќе се потпира на системот за проценка на ризик кој директно произлегува од главната активност на проектот за генерирање индикатори на успешност и ризици, кои во праксата се познати како „црвени знаменца“. Исто така, се имплементираа модули за електронска жалба и електронска архива кои се предвидени како решенија во новиот закон и кои треба значително да ја олеснат неговата примена во овие сегменти што покажуваа одредени слабости во досегашната практика – истакна Тевдовски.

Според податоците, во Македонија минатата година вредноста на склучените договори изнесувала 38,2 милијарди денари, што е 6,2 процента од БДП. Во светски рамки, на пример во ЕУ, јавните набавки се еднакви на БДП на Франција, или приближно еднакви на светската продажба на автомобили. Ова е само уште една потврда за важноста на јавните набавки за една економија.

Директорот на Канцеларијата на Светска банка во Макeдонија, Марко Мантованели, оцени дека „црвени знаменца“ ќе го поддржат следењето на системот и ќе алармираат во текот на обработката, што ќе придонесе за зголемување на транспарентноста.

– Програмата не беше огромна, но беше насочена кон клучните функционалности и го пренесе системот за електронски јавни набавки на наредното ниво – рече Мантованели и изрази отвореност за натамошна соработка во исполнување на оваа агенда.

Директорот за јавни набавки, Бардул Насуфи, објаснувајќи ги бенефитите од имплементацијата на проектот, рече дека сега сите проекти финансирани од меѓународни организации можат да се објавуваат на Електронскиот систем.

– Ова претставува одлична можност без дополнителни трошоци да се публикуваат тендерите онаму каде што е најкорисно и каде што секоја заинтересирана фирма ќе ја види можноста што ја има за учество. Се олесни и регистрацијата на странските економски оператори на Електронскиот систем. Имплементиравме плаќање на надоместокот со кредитна картичка, што  ја прави регистрацијата брза и поевтина бидејќи банкарските трошоци се далеку пониски – појасни Насуфи.

Проектот за „Зајакнување на праксата на јавни набавки“ е финансиран од Фондот за грант средства за зајакнување на финансиската отчетност, со кој управува Светска банка. Главен финансиер на проектот е Европската комисија. Неговата цел е да се подобри управувањето со јавните финансии во регионот на Европа и Централна Азија.


Oпштините побрзо ќе ги услужуваат граѓаните со софтверот за градежно земјиште


Скопје, 13 март, 2018 - 12:42 (META) 

Министерството за транспорт и врски го предаде на Заедницата на единиците на локалните самоуправи (ЗЕЛС) софтверскиот систем „е-Градежно земјиште“ кој треба да го користат општините во Македонија.

Оваа софтверска програма има за цел да им овозможи на граѓаните да ја спроведат целата постапка по поднесени барања за отуѓување, за давање на долготраен и краткотраен закуп, за давање на право на трајно користење, за пренесување на право на сопственост и засновање на право на стварна службеност на градежно земјиште во сопственост на државата.

Премиерот Зоран Заев рече дека, пренесувањето на надележостите од централна кон локалните власти, ќе создаде услови за уште поодговорно работење на општините во интерес на граѓаните.

– Со пренесувањето на софтверот за управување со градежното земјиште, општините ќе бидат многу помоќни, ќе бидат многу посилни, пофлексибилни, попосветени, да им излезат во пресрет на барањата на граѓаните или на компаниите. Ова, треба да значи охрабрување за сите инвеститори во Македонија, дека постапките кои ќе ги водат како први чекори за идни градби ќе бидат решени на локално ниво – рече премиерот Зоран Заев.

Тој додаде дека овој сервис кој е во рацете на општините е уште еден чекор од децентрализацијата, односно од пренесувањето на правата и обврските од централната на локалната власт.

Со програмата „е-Градежно земјиште“, во период од неколку месеци се очекува да има забрзување на сите постапки и да се воспостави висок степен на прецизност и дисциплина во однос на роковите.


Заев ги поздрави оставките во Антикорупциска комисија


Скопје, 6 март, 2018 - 15:34 (META) 

Убеден сум дека на Македонија и треба сериозна Антикорупциска комисија која што ќе биде поставена според сите меѓународни практики, ќе биде будното око на следење на извршната власт и сè што има допир со народните пари, одговори премиерот Зоран Заев на новинарско прашање за оставките во оваа комисија.

Тој додаде дека потребна е таква институција која што ќе биде еден од најголемите коректори на слабостите во системот и севкупната определба за борба против корупцијата.

„Ги поздравувам исчекорите, заради тоа што не и е лесно на која било личност или поединец да поднесе оставка заради тоа што била прозвана од јавноста. Ние можеме да ги ослободиме институциите ако бидеме транспарентни, отчетни и ако понесеме одговорност, па макар било тоа и етички“, додаде Заев.


Европскиот парламент го одобри воведувањето на системот за влез на странци


Стразбур, 25 октомври, 2017 - 17:24 (META) 

Заедничкиот електронски систем за регистрација на сите државјани на земји што не се во ЕУ при нивниот влез во шенген-зоната беше поддржан од Европскиот парламент на пленарна седница во Стразбур.

Системот кој би требало да профункционира во 2020 година, односно Влез/излез-систем (Entry/Exit System -EES), ќе ги содржи името, копија од пасошот, отпечатоци од прстите, биометриска фотографија, датум и место на влез во шенген-зоната, а исто така и за излез и информација дали на лицето му е забрането да влезе во зоната. Во него ќе мора да се регистрираат и жителите на земји за кои не е потребна виза за влез и за престој во шенген-зоната до 90 дена, меѓу кои е и Македонија.

Според ЕУ, така ќе може полесно да се утврди дали некој го пречекорил максималниот рок од 90 дена за престој во зоната, а се тврди и дека ќе ги олесни граничните процедури, бидејќи не ќе треба да се удираат печати во пасошите. Според законодавецот, тоа ќе овозможи и полесно откривање на лажни идентитети и на фалсификувани документи. ЕУ смета дека со системот полесно ќе се спречуваат терористички напади или сериозни кривични дела.

Податоците ќе се чуваат во системот во период од три години, а за тие што го пречекориле рокот за престој  – до пет години.

Во системот ќе бидат вклучени и Бугарија и Романија, кои ја поминаа евалуацијата и добиваат пасивен пристап, за разлика од Хрватска, која допрва треба да ја помине евалуацијата.

Министерот за надворешни работи, Никола Димитров, по средбата со косовскиот колега Беџет Пацоли денеска, порача дека ќе разговара со колегите од регионот за заеднички сите да ѝ посочат на ЕУ дека не се потребни дополнителни оптоварувања на можностите за патување.


МЗШВ плати 207.000 евра долг за системот за наводнување на Јужно-вардарска Долина


Скопје, 1 септември, 2017 - 15:39 (META) 

Министерството за земјоделство, шумарство и водостопанство денеска плати 207.000 евра заостанат долг, за консултантски услуги за втората фаза од проектот „Програма за наводнување Јужно-вардарска Долина“.

На овој начин, како што информираат од министерството, се откочува реализацијата на проектот, која беше блокирана поради тоа што претходната влада не плаќала редовно за консултантски услуги во изминатите две години.

„Со подмирувањето на долгот овозможивме меѓународниот консултант на проектот да продолжи со работа, а со тоа и да се продолжат активностите за изградба на системите за наводнување во Валандовскиот Регион. Ова е една од повеќето активности преземени за подобрување и за унапредување на соработката со германската кредитна банка за обнова КФВ“, информираат од МЗШВ.

Со овој проект се предвидени реконструкција, рехабилитација и изградба на систем за наводнување од околу 2.000 хектари во регионот на Удово, Јосифово и на Пирава. За реализација на втората фаза од овој проект, предвидени и обезбедени се околу 16 милиони евра, преку кредит од германската банка и од буџетот на МЗШВ.

Проектот Јужно-вардарска Долина е од витално значење за земјоделството во Јужниот Регион и со неговата реализација долгорочно ќе се реши проблемот со обезбедување вода за наводнување во овој регион.


Пад на електронскиот систем ги откажа летовите на „Бритиш ервејс“


Лондон, 27 мај, 2017 - 16:05 (META) 

Авиокомпанијата „Бритиш ервејс“ ги откажа сите летови од лондонските аеродроми Гетвик и Хитроу поради проблеми со компјутерскиот систем.

Како што наведуваат британските медиуми, на патниците им е речено да не патуваат од аеродромите на британската престолнина поради големите гужви на терминалите.

Сите авиони на „Бритиш ервејс“ се приземјени.

Од компанијата соопштуваат дека големиот системски пад предизвикал прекин на работата на операторите низ целиот свет.


Нухиу: Системот за снимање на командите во МВР не функционирал од 2014 година


Скопје, 11 мај, 2017 - 22:50 (META) 

Министерот за внатрешни работи, Агим Нухиу, во интервју во емисијата „Патот кон…“ на „Алсат М“,  открива дека во МВР , уште пред три години, не функционирал системот за снимање на командите.

– Побарав да се направи увид и проценка дали се снимени сите команди што се издадени преку тетра-системот. Повикав експерт од Германија и тој процени дека два сервера не биле вклучени во апаратот за снимање и дека истиот не работи уште од 2014 година – вели Нухиу.

Тој во интервјуто потврдува дека имало обид од вработени во МВР да се избришат снимките од безбедносните камери во Собранието од насилствата на 27 април.

– Двајца вработени добиле наредба од еден висок началник во УБК да влезат во Собранието и да ги земаат хард-дисковите, по што ги земале, но, за среќа, имало резервни хард-дискови и ние сепак успеавме да ги земеме снимките – вели министерот за внатрешни работи.

Според него, на 27 април настаните се случувале според однапред смислено сценарио кое требало да послужи како повод за прогласување воена состојба од страна на претседателот на државата, Ѓорге Иванов.

– Сценариото кое, според моето мислење, постоеше е да се удри по Собранието, а има и гласини кои не сум ги потврдил, дека полицајците се повлекле од вршење на законските должности, бидејќи слушнале дека треба да чекаат уште некое време, за претседателот да ја извади армијата и да прогласи вонредна состојба – вели Нухиу.


Народна банка промовираше нов систем за прекугранични плаќања во евра


Скопје, 28 март, 2017 - 12:08 (META) 

Нов систем за прекугранични плаќања во евра промовираше Народна банка. Целта на овој проект е побрзо и посигурно да се извршуваат прекуграничните плаќања во евра и да се намалат трошоците за нив, од што економијата би имала придобивки, вклучително компаниите и домаќинствата.

– Со остварувањето на овој проект, се постигна повисоко ниво на платежна интеграција на Македонија во платежната инфраструктура на Европската Унија. Ова претставува еден голем чекор напред кон приближување на стандардите на работа на Народната банка до стандардите на работа на централните банки, членки на Европската Унија – се вели во соопштението на Народна банка.

Новиот систем најпрво ќе биде претставен пред банкарскиот и пред бизнис-секторот. Во следниот период ќе се промовира и пред пошироката јавност, заради поблиско запознавање на граѓаните со можностите за користење на овој нов канал за извршување на прекуграничните плаќања.

– Со овој проект целосно се оствари препораката за создавање алтернативен канал за плаќања во евра, покрај кореспондентското банкарство, од проектот ИПА „Оценка на потребите на НБРМ“, спроведен од страна на претставници на Европската централна банка и централните банки членки на Евросистемот – додаваат од Народна банка.


Компаниите преку платформата за тендери на ЕУ имаат пристап до европските пазари


Скопје, 14 февруари, 2017 - 13:09 (META) 

Македонските компании преку системот „Тендерс електроник дејли“ (Tenders Electronic Daily) ТЕД, што е платформа на ЕУ за тендери, имаат можност за слободен пристап за бизнис, со земјите членки на Европската Унија, како и Европската економска област и останатите континенти.

Се работи за единствена онлајн платформа, посветена на јавни набавки, која приватниот и јавниот сектор ја користи за пристап до информации за тендери.

„Преку платформата ТЕД се објавуваат 460.000 повици за тендери на годишно ниво, со вредност од околу 420 милијарди евра. Целта е споделување на информации и користење на системот за информирање за јавни тендери во сите земји. Секој ден, од вторник до сабота повеќе од 1.700 огласи за јавни набавки се објавуваат на оваа платформа и постои можност да се пребаруваат огласите за јавни набавки по држава, регион и бизнис-сектор. Со регистрација на платформата компаниите добиваат персонализиран профил за пребарување и во зависност од нивните потреби – изјави извршниот директор на Сојуз на стопански комори на Македонија, Митко Алексов.

Известувањата се од областа на јавни работи, стоки и услуги, потоа секторски договори (вода, енергија, транспорт и телекомуникации) како и известувања за проекти финансирани од Европската инвестициона банка, Европскиот инвестициски фонд, Европската централна банка, Европската банка за обнова и развој и надворешна помош и Европскиот фонд за развој.

Вкупната вредност на јавните набавки и договори во ЕУ е од 12 до 15 проценти од домашниот бруто-производ на ЕУ.

Три четвртини од повиците се од Германија, Франција, Британија, Шпанија, Италија и Полска.


Лицето што се заканило со напад на зградата на Владата било незадоволно од системот


Скопје, 28 јануари, 2017 - 13:12 (META) 

Вчера во 17.40 часот, на телефонскиот број 192, од мобилен телефон се јавил маж во видно алкохолизирана состојба и без да се претстави рекол дека „за 16 минути две ракети ќе бидат испалени кон зградата на Владата на Република Македонија за да ја уништат“, информираат од МВР.

– Министерството за внатрешни работи презеде мерки и набргу потоа пронајден е мажот кој се јавил на 192. Истиот бил однесен во полициска станица, каде објаснил дека неговото јавување било мотивирано затоа што, како што рекол, „сакал да привлече внимание затоа што не бил задоволен од функционирањето на системот во државата“ – се вели во билтенот на МВР.

Имено, во текот на истиот ден, тој бил приведен во полициска станица за друго дело, за кое, според негово тврдење, не бил виновен.

Се преземаат мерки за целосно расчистување на случајот. За настанот е известен јавен обвинител.