!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Царовска: Во Македонија 21,5 отсто од населението живее во сиромаштија


Скопје, 17 октомври, 2017 - 11:22 (META) 

Во Македонија 21,5 отсто од населението живее во сиромаштија, а целта е на среден рок стапката на сиромаштија да се намали под 16 проценти во 2020 година, вели министерката за труд и социјална политика, Мила Царовска, по повод Меѓународниот ден за борба против сиромаштијата (17 октомври).

Таа вели дека за исполнување на целта, клучен е економскиот развој кој ќе значи повеќе средства и услуги за сите.

– За да успее борбата против сиромаштијата, на младите мора да им се гарантира перспектива, можност да работат и да напредуваат дома, за да запре нивното иселување, а треба многу да се работи и на подобрување на економската позиција на жените во нашето општество, како и на квалитетно и достапно образование и социјални услуги – вели Царовска.

Според неа, во Македонија, за жал, покрај тие што немаат работа, сиромашни се и голем број вработени и поради тоа е важно зголемување на минималните приходи.


„Балкански барометар 2017“: Сиромаштијата и корупцијата и понатаму најголеми проблеми


Скопје, 9 октомври, 2017 - 18:09 (META) 

Незадоволството на жителите во регионот на Југоисточна Европа е сè уште над просекот, но полека се намалува, а невработеноста, сиромаштијата и корупцијата и понатаму се меѓу главните проблеми.

Ова се дел од заклучоците претставени во истражувањето „Балкански барометар 2017“, што се извршува по нарачка на Регионалниот совет за соработка (РCC) на повеќе од 8.000 испитаници во Албанија, Босна и Херцеговина, Косово, Македонија, Србија, Хрватска, Црна Гора и во Турција.

Истражувањето беше презентирано денеска во Брисел, во присуство на претставници од РCC, високи претставници од Европската комисија, експерти и невладини организации.

Како најголем проблем и понатаму се гледа невработеноста, а околу 50 отсто од испитаниците би живееле и би работеле во странство, но надвор од Балканот.

На прашањето колку сте задоволни со тоа како се одвиваат работите во вашето општество, во просек, 58 отсто од жителите на Балканот се незадоволни, а само 14 отсто се задоволни. Во Македонија, според истиот извор, 49 отсто се или целосно или делумно незадоволни, 34 отсто се индиферентни по тоа прашање, а 14 отсто се делумно или целосно задоволни.

Но, на прашањето за финансиската состојба, дури 82 отсто од домаќинствата во регионот се соочиле со проблем да не можат да си дозволат храна, облека или други основни потреби, при што најсиромашни се Косово, Македонија и Босна и Херцеговина. Во Македонија дури 90 отсто од испитаниците признале дека се соочиле со проблемот на сиромаштијата.

Како главно прашање за загриженост е и владеењето, а во тие рамки како најголем проблем се перципира корупцијата.
Перцепцијата за корупција е најголема во БИХ, додека најмали индекси бележат Црна Гора, Косово и Македонија.

На Балканот најмногу поткуп се плаќа во здравството. Во просек, 12 проценти од жителите на Балканот платиле поткуп во здравството, додека во Македонија 9 отсто. По здравството, најмногу поткуп им се плаќа на полицијата и на судството, а Македонија се истакнува по плаќање поткуп и за образование и за добивање разни други услуги од институциите.

Притоа, масовна е недовербата во борбата против корупцијата, бидејќи високи 73 проценти од испитаниците сметаат дека нивните влади не се борат ефикасно.

Во барометарот се направени и споредби за разликите во погледите помеѓу бизнис-заедницата и јавното мислење на граѓаните, бидејќи паралелно беше објавен и барометар за мислењето на приватниот бизнис-сектор. Притоа, бизнис-заедницата е многу поголем оптимист од граѓаните во поглед на прогрес на земјите од регионот во наредните 12 месеци, при што дури 43 проценти веруваат во тоа, додека меѓу испитаните граѓани само 25 отсто имаат позитивен став во поглед на ова прашање.

Тоа се однесува и на зачленувањето во ЕУ. Околу 57 проценти од бизнисмените сметаат дека членството во ЕУ е „добра работа“, додека кај граѓаните тој процент е само 42 отсто.

Регионалниот совет за соработка во ЈИЕ е оперативно тело на земјите членки на Процесот за соработка во ЈИЕ, чиј основач и член е и Република Македонија. „Балкански барометар“ се објавува редовно во последните неколку години и се смета за алатка за остварување на Стратегијата 2020.


Царовска: 220.000 работници се сиромашни, односно секој трет вработен


Скопје, 15 септември, 2017 - 16:20 (META) 

Според податоци од Министерството за труд и социјална политика, 220.000 работници, односно секој трет вработен е сиромашен, додека според одредени индикатори на Еуростат за 2015 година, 8,9 проценти од вработените се сиромашни.

Ова денеска го истакна министерката за труд и социјална политика, Мила Царовска, која се обрати на шестата национална конференција на сиромашни и социјално исклучени лица во организација на Македонската платформа против сиромаштија. Настанот со „Работа, колку да не е без ич“ беше посветен на лицата кои се вработени, но сиромашни.

Во обраќањето на министерката беше спомнато дека за надминување на сиромаштијата кај вработените, клучна улога имаат синдикатите.

„Многу е важно тие да функционираат и да се грижат повеќе да бидат блиски со работниците, наместо со политичките елити. Ако имаме силни синдикати, многу помалку ќе зборуваме за кршење на работничките права. Во Македонија малку работници се свесни за нивните права или чувствуваат страв дека нема кој да ги заштити. Во таа насока, во секоја приватна компанија со најмалку 20 вработени, ќе треба работните односи да се уредат и со колективен договор, покрај Законот за работни односи“, изјави Царовска.

Таа укажа дека постои неповолна почетна позиција за креирање политики поради недостигот од релевантна статистика, затоа што истата се базира на податоци од пописот во 2002 година, а оттогаш состојбата во Македонија е многу изменета.

Министерката се задржа и на проблемот со неформалната, сива економија. Луѓето кои собираат пластика, хартија, стакло, како што посочи, се исклучени од системот. Иако тие помагаат државата да го исчисти сметот, тие не се социјално обезбедени и немаат заштита при работа.


Инсталација „Леб за сите“ поставена во центарот на Скопје


Скопје, 14 септември, 2017 - 13:15 (META) 

Инсталација на џиновски леб со натпис „Леб за сите“ и статистички податоци кои укажуваат на социо-економската состојба во државата, сиромаштијата и на нискиот стандард на граѓаните е поставен во центарот на Скопје, на мини-плоштадот меѓу булеварот Партизански одреди и улицата Аминта Трети (кај дирекцијата на „Службен весник“).

„Стапката на сиромашни лица во Република Македонија изнесува 21,5 отсто или повеќе од 450.000 луѓе. 70.000 луѓе можат да си дозволат три достојни оброци неделно. Повеќе од 100.000 луѓе преживуваат со помалку од 100 денари дневно“, пишува на инсталацијата.

Ова не е прва инсталација од ваков тип, која укажува на негативните состојби во земјава.

Како сега, така и во март минатата година, анонимни автори на истото место поставија скулптура на џиновско апче „дијазепам“. Идејата беше да се укаже на порастот на трендот на секојдневна употреба на овој антидепресив.


Просечниот личен доход е 302 евра месечно, а кај најбогатите тој изнесува 4.180 евра


Скопје, 25 август, 2017 - 15:15 (META) 

Просечниот личен доход лани изнесувал 302 евра месечно, а најбогатите (еден процент) во Македонија имале просечен доход од околу 4.180 евра месечно, објави Министерството за финансии врз основа на податоци од Управата за јавни приходи.

Од Министерство за финансии велат дека „бројките покажуваат дека Македонија е со висока стапка на доходовна нееднаквост помеѓу граѓаните“.

– Педесет проценти од луѓето во Македонија што остваруваат доход, имаат доход што е под 212 евра месечно, 70 проценти имаат доход што е под 297 евра месечно, 90 проценти имаат доход што е под 495 евра месечно, а од друга страна, два проценти од луѓето имаат доход над 1.044 евра, а еден процент од луѓето имаат доход над 1.523 евра – изјави советникот во кабинетот на министерот за финансии, Бранимир Јовановиќ.

Тој посочи дека највисокиот доход лани изнесувал 2,6 милиони евра, а 15 лица оствариле доход од над еден милион евра. Половина милион евра доход, лани имале 66 лица.

– 775  лица кои имале над 100 илјади евра доход заедно оствариле доход од 190 милиони евра, што е еднакво на вкупниот остварен доход на 210 илјади лица кои имале најниски приходи – појасни Јовановиќ.

Тој додаде дека неопходна е даночна реформа со која најбогатите треба да плаќаат повисоки даноци.

Министерот за финанасии, Драган Тевдовски оцени дека направената анализа е важна, бидејќи без веродостојни податоци не може да се креираат нови економски и социјални политики, а од друга страна се создава притисок да се работи на намалување на неедаквоста на доходот.

– Подготвуваме даночна реформа, до крајот на годинава ќе излеземе со нашите предлози – истакна Тевдовски.

Со анализата се опфатени околу 90 проценти од граѓаните кои оставруваат доход или 940 илјади лица.


СДСМ: За зајакнување на економијата, украдените пари ќе се враќаат во буџетот


Скопје, 11 јуни, 2017 - 12:26 (META) 

„Граѓаните ќе дознаат и ќе видат какви злоупотреби се правени и за каков луксуз се трошени нивните пари во изминатите 11 години што предизвика 500.000 граѓани, заради таквото расипничко однесување на ВМРО-ДПМНЕ и на Никола Груевски, да живеат под прагот на сиромаштијата“, се вели во реакцијата на СДСМ на соопштението на ВМРО-ДПМНЕ.

Во него се додава дека тоа е најголемиот страв на криминалното раководство на ВМРО-ДПМНЕ предводено од Никола Груевски.

„Украдените пари ќе се враќаат во буџетот и тоа е еден од начините како ќе се зајакнува економијата и како ќе се отвораат реални работни мести. Заврши времето кога иселувањето на младите, бришењето на невработените од евиденција и нарачаните бројки од контролирани институции, ВМРО-ДПМНЕ можеше да го прикажува како намалување на невработеноста“, велат од СДСМ.


Светска банка ќе издвои 57 милијарди долари за Африка


Вашингтон, 20 март, 2017 - 12:35 (META) 

Светска банка соопшти дека ќе издвои околу 57 милијарди долари за инвестиции во следните три години во државите во Африка.

Најголем дел од тие средства, 45 милијарди долари, ќе ги издвои Агенцијата за меѓународен развој во рамките на Светска банка, која ќе дава бескаматни кредити на најсиромашните земји.

Претседателот на Светска банка, Џим Јонг Ким, оваа недела ќе ги посети Руанда и Танзанија каде што со властите ќе разговара за финансиската поддршка на тој дел на Африка.

Светска банка е одговорна за обезбедување финансии и за давање совети на земјите за да се засили нивниот економски развој и да се намали сиромаштијата, но и за да се сочуваат меѓународните инвестиции.


Дополнително осиромашиле 75 отсто од домаќинствата во Грција


Атина, 26 јануари, 2017 - 11:03 (META) 

Средната класа во Грција полека се топи и дури 75 отсто од домаќинствата во Грција дополнително осиромашиле во текот на 2016 година поради рестрикциите во текот на изминатите години и товарот од сè поголемите даноци. Половината од Грците се подготвени да ја напуштат земјата. Овие поразителни резултати ги покажа годишното истражување на Конфедерацијата на занаетчиите и на трговците во Грција.

Грчките медиуми ударно ги пласираа овие нови сознанија. „Нафтемоборики“ алармира дека економската емиграција е на алармантно ниво и 67,7 отсто од младите планираат да побараат подобра иднина во странство. Сè повеќе се намалува наталитетот, а пензиите се основен извор на приходи за половина од грчките граѓани.

За смрт на средната класа пишува и дневниот весник „Имерисија“, кој исто така ја пренесува поразителната бројка за драстичното намалување на приходите на 75 отсто од Грците.

Истражувањето е спроведено на 1.000 домаќинства во периодот помеѓу 14 и 26 ноември минатата година.


445.000 граѓани живееле под прагот на сиромаштија во 2015 година


Скопје, 23 декември, 2016 - 16:52 (META) 

Стапката на сиромашни лица во Македонија во 2015 година изнесувала 21,5 проценти, објави Државниот завод за статистика.

Минатата година 445.000 граѓани живееле под прагот на сиромаштија, кој за едночлено домаќинство изнесува 78.000, а за четиричлено домаќинство 164.000 денари годишен приход.

Највисока стапка на сиромаштија има кај најмладите, односно децата до 17 години, и таа изнесувала 28,6 проценти, а најниска кај највозрасните, односно постарите од 65 години, кај кои изнесувала 14,5 проценти.

39,7 проценти од невработените, 8,9 проценти од вработените и 7,3 проценти од пензионерите живеат во сиромаштија.

 


Минатата година 21,5 отсто од граѓаните биле сиромашни


Скопје, 28 октомври, 2016 - 15:38 (META) 

Стапката на сиромашни лица во Македонија во 2015 година изнесувала 21,5 отсто, објави денеска Државниот завод за статистика.

Анализирано по типови на домаќинства, стапката на сиромаштија на домаќинствата составени од двајца возрасни со две издржувани деца е 22,8 отсто.

Стапката на сиромашни вработени лица е 9 проценти, додека стапката на сиромашни пензионери е 7,2 проценти.

Коефициентот „џини“ (мерка за нееднаквоста во распределбата на приходите) изнесува 33,8 проценти.

Основа на пресметките на сиромаштијата се приходите, а прагот на сиромаштијата е дефиниран на 60 отсто од медијалниот еквивалентен приход.

Државниот завод за статистика го пресметува индексот врз основа на податоците од анкетата за приходи и услови за живеење, која се спроведува во согласност со препораките на Европската Унија.