ОН: Материјалната штета од војната во Сирија е 345 милијарди евра


Бејрут, 9 август, 2018 - 10:40 (META) 

Војната во Сирија, која трае повеќе од седум години, предизвикала материјална штета на околу 345 милијарди евра, соопшија Обединетите нации (ОН).

Проценката беше објавена во Бејрут по состанокот на кој учествуваа 50 сириски и меѓународни стручњаци на ОН.

Од таму велат дека за време на војната се уништени различни објекти во вредност од повеќе од 334 милијарди евра. Целиот извештај ќе биде објавен во септември.

Во војната во Сирија од 2011 година настрадале повеќе од 350.000 луѓе, а неколку милиони Сиријци ги напуштиле домовите.


ВМРО-ДПМНЕ: МВР лажеше дека апсело терористи за да ги покрие скандалите


Скопје, 8 август, 2018 - 15:28 (META) 

Опозициската ВМРО-ДПМНЕ порача дека министерот за внатрешни работи Оливер Спасовски и СДСМ се срам за Македонија и го нарушуваат нејзиниот углед со лаги и манипулации, бидејќи вчера излажале дека МВР уапсила седуммина македонски државјани што се бореле со терористите во Сирија, а всушност станувало збор само за преземање на уапсените.

„За да ги покрие скандалите, злоупотребите и криминалите во кои се фатени пријателите на Заев, вчера повторно беше злоупотребено МВР за да се дезинформира јавноста со измислена голема полициска акција против терористи и радикали. Вистината е дека МВР лажеше!“, порача ВМРО-ДПМНЕ, тврдејќи дека поради лагата Спасовски вчера се криел, а МВР не давало дополнителни информации кога и каде биле приведени радикалите.

Опозициската партија посочува дека станува збор само за репатријација, односно преземање на скопскиот аеродром на радикалите уапсени од меѓународната коалиција.

„Вистината ни ја открија денеска нашите партнери од Пентагон кои посочија дека Сириските Демократски Сили до јули заробиле 600 странски платеници од повеќе од 40 земји. Kако што откриваат меѓународните медиуми, македонската полиција вчера немала никаква акција, туку била извршена само репатријација односно преземање на приведените македонски државјани на скопскиот аеродром“, вели партијата.


МВР уапсило седдумина што се бореле во Сирија и Ирак


Скопје, 7 август, 2018 - 9:07 (META) 

Министерството за внатрешни работи (МВР) соопшти дека во соработка со партнерите од Глобалната коалиција за борба против тероризмот и Сириските демократски сили, биле уапсени седуммина македонски државјани за кои постои основан сомнеж дека како терористички борци активно учествувале во војните во Сирија и Ирак.

Се работи за С.Р. (1990), Џ.А. (1993), Б.Ф. (1994), О.Ж. (1987), Е.О (1994), И.Ш. (1977) и А.М. (1995). За нив била распишана меѓународна потерница и биле поднесени кривични пријави во рамки на полициските акции „Ќелија 1“ (август 2015) и „Ќелија 2“ (јули 2016).

„Согласно Националните стратегии за спречување на насилен екстремизам и борба против тероризмот, Република Македонија спроведува програми за дерадикализација на странските терористички борци во затворите, презема активности за зголемување на свесноста за ризикот и заканите од тероризмот и ги зајакнува механизмите за превенција од радикализација на локално ниво“, стои во соопштението од МВР.


Во турските воздушни напади уништен древниот храм Аин Дара во Сирија


Дамаск, 28 јануари, 2018 - 19:36 (META) 

Во воздушните напади на Турција на регионот Африн на северот на Сирија оштетени се 60 отсто од древниот храм Аин Дара кој датира од арамејската ера (1300 – 700 година пред новата ера), соопшти сириската опсерваторија за човекови права, пренесува „ХРТ“.

Храмот е откриен во 1982 година, а се простира на површина од околу 50 хектари и е познат по остатоците од големи резбани блокови базалт и по ѕидните релјефи.

Сириската управа за антиквитети и музеи ги осуди турските напади на археолошките наоѓалишта, потврдувајќи ја информацијата за „уништувањето на храмот Аин Дара, една од археолошки највредните градби на Арамејците во Сирија“.

– Три илјади години цивилизација е уништено во само еден воздушен напад – изјавил директорот на управата Мамун Абделкарим.

Од управата ја повикуваат меѓународната заедница да изврши притисок на Турција за да се спречи гранатирањето и бомбардирањето на археолошките и културните локации.

Операцијата на турската војска против единиците на сириските Курди во Африн почна пред една недела со силно гранатирање и бомбардирање на курдската милиција во регионот.

Сириската влада на претседателот Башар ал-Асад го осуди нападот на Турција, но се противи и на курдските аспирации за автономија во северните делови на Сирија.

Сириската граѓанска војна, која почна во 2011 година, досега резултираше со огромни штети на многу историски градби, меѓу кои се древната Палмира и стариот дел на Алепо, кои се на списокот на УНЕСКО на светско културно наследство.


Турција бара од САД веднаш да се повлечат од Манбиџ во Сирија


Анкара, 27 јануари, 2018 - 17:19 (META) 

Министерот за надворешни работи на Турција, Мавлут Чавушоглу денеска побара од Соединетите Американски Држави „веднаш“ да се повлечат од градот Манбиџ на северот на Сирија, кој е под контрола на курдските борци, против кои Анкара поведе воена офанзива, јавуваат светските агенции.

Манбиџ се наоѓа на околу 100 километри од енклавата Африн, каде турската војска веќе една недела води офанзива против Курдите.

Турскиот претседател Реџеп Таип Ердоган вчера изјави дека турската војска ќе ја продолжи и ќе ја прошири офанзивата на северот на Сирија, чија цел е да се елиминира курдската милиција, која Анкара ја смета за терористичка организација.

Во говорот кој го пренесуваше турската државна телевизија, Ердоган вети дека „ќе го исчисти Манбиџ од терористите“.

Турската војска почна со офанзивата откако меѓународната коалиција предводена од САД најави формирање на погранични сили во Сирија, во кои би биле вклучени и курдските борци.


Ракети од Сирија паднале во Турција, еден загинат


Анкара, 24 јануари, 2018 - 19:48 (META) 

Едно лице загинало, а 13 се повредени во ракетен напад од северот на Сирија на пограничниот турски град Килис, соопштија турските власти.

Една ракета погодила џамија, а друга ракета погодила куќа. Набрзо потоа се слушнала повратна турска артилериска акција во правец на Сирија.

Во тек е пети ден на големата турска офанзива против курдската милиција во енклавата Африн на северот на Сирија.

Турските медиуми лансирањето на ракетите им го препишаа на курдските борци од Единицата за заштита на народите која Турција ја смета за терористичка.


Ердоган: Нема прекин на акцијата против Курдите во Сирија


Анкара, 22 јануари, 2018 - 18:20 (META) 

Турскиот претседател, Реџеп Таип Ердоган изјави дека нема да ја прекине операцијата против Курдите во Африн на северот на Сирија, што предизвика загриженост помеѓу сојузниците на Анкара. Toj рече дека, операцијата позната како „маслиново гранче“ ќе биде завршена кога ќе биде постигната посакуваната цел.

Турција ја обвинува курдската полиција за поврзаност со Курдистанската работничка партија која се смета за терористичка група, како во Турција така и во ЕУ и САД.

Претходно и трускиот премиер, Бинали Јилдрим изјави дека во операцијата се вклучени копнени и воздушни сили и дека целта е формирање на сигурносна зона од 30 километри длабоко во сириската територија.

При посетата на Лондон, американскиот државен секретар, Рекс Тилерсон изјави дека, САД се загрижени поради акцијата на Турција и ги повика двете страни на воздржаност.

НАТО соопшти дека Анкара има право на самоодбрана, но дека тоа мора да го прави на „соодветен начин“.

И Советот за безбедност на ОН денеска ќе расправа за ситуацијата во Сирија.


Турски авиони денеска нападнаа 45 цели во Африн


Дамаск, 21 јануари, 2018 - 17:33 (META) 

Турски воени авиони денеска нападнале 45 цели во северниот сириски реон Африн, соопшти армијата и додаде дека копнените сили навлегуваат во зоната која е под контрола на курдската милиција поддржана од САД.

Во соопштението се информира дека 32 авиони нанеле удари против засолништа, скривници, магацини за оружје и борбени позиции на курдските Сили за заштита на народот, во вториот ден од операцијата „Маслиново гранче“. Сите авиони по нападите се вратиле во базата, истакна генералштабот на турската армија.

Во исто време, турските медиуми јавија дека турската армија и Слободната сириска армија навлегле пет километри внатре на територијата на сириската област Африн.

Почетокот на копнената операција „Маслиново гранче“ за чистење на Африн од борците на сириските Сили за заштита на народот и ПКК, кои се сметаат за терористички групи кои и се закануваат на територијалната целост на Турција, беше означен денеска во 11 часот по локално време, еден ден по воздушните напади на турски воени авиони врз позиции на противникот.

Турската армија заедно со силите на опозициската Слободна сириска армија извршија масовен напад врз Африн, навлегувајќи од точката Ѓулбаба, во граничната област Килис.

Според турски известувачи од областа, каде што е формиран прес центар за новинари, во операцијата учествуваат тенкови, оклопни возила, пешадија и командоси од специјални сили. Во операцијата учествувале и 72 турски воени авиони Ф-16, а поразени биле 153 цели на противникот.


Турција почна со гранатирање на курдската енклава Африн во Сирија


Анкара, 19 јануари, 2018 - 16:42 (META) 

Турската артилерија денеска почна со гранатирање на регионот Африн во северозападна Сирија, со што Анкара и официјално ја почна кампањата против курдската милиција во ова подрачје, јавуваат светските агенции.

Курдската команда соопшти дека турските сили истрелале околу 70 гранати на курдските села.

Прекуграничниот напад следи по неколкудневните закани на турскиот претседател Реџеп Таип Ердоган дека ќе ја „скрши“ курдската милиција како одговор на, како што тврди Анкара, зголеменото влијание на Курдите во северна Сирија.

Турција ги смета паравоените групи на сириските Курди како продолжена рака на курдските бунтовници кои се борат против Турција и веќе најави дека ќе ја нападне енклавата Африн.

– Операцијата де факто почна со гранатирање на цели преку границата, а сите терористи и нивните мрежи во енклавата ќе бидат елиминирани. Нема друг пат – изјави турскиот министер за одбрана Нуретин Чаникли.

Ројхат Рој, портпарол на курдската милиција во Африн изјавил дека станува збор за најтежок напад на Турција, но дека курдските единици ќе одговорат со сите расположливи сили.

– Засега нема жртви, само материјална штета – додал Рој.

Воената операција на Турција против Курдите се заканува дополнително да ги наруши односите со САД кои ги поддржуваат Сириските демократски сили (СДФ), во кои курдските единици имаат клучна улога. Сириските демократски сили пред неколку месеци ги поразија милитантите на Исламска држава и ги истераа од нивната престолнина во Рака.

Американскиот Стејт департмент ја повика Турција да се фокусира на борбата против Исламска држава и да се воздржи од воени операции во Африн.


САД од остатоците на ИД формира „Нова сириска војска“, обвинува Москва


Москва, 16 декември, 2017 - 10:53 (META) 

САД од преостанатите терористи на Исламска држава формира „Нова сириска војска“ во провинцијата Хасека, тврди рускиот Центар за примирје, кој е дел од Министерство за одбрана на Русија.

Центарот наведува дека припадници на меѓународната антитерористичка коалиција, предводена од САД, врбуваат бегалци кои се вратиле во своите домови да формираат единици за борба против владините сили во јужна Сирија. Од центарот истакнуваат дека обуките на единиците се вршат во бегалски камп, кој се наоѓа на 20 километри североисточно од градот Џизр ел Шададија.

„Тоа докажува дека Американците продолжуваат да кокетираат со терористите и покрај изјавите кои пристигнуваат од Вашингтон дека САД се насочени кон тотално уништување на ИД на Блиски Исток“, се наведува во соопштението на Центарот и се додава дека 400 од 750 борци кои се обучуваат се поранешни припадници на ИД кои побегнале од Рака.