!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

САД од остатоците на ИД формира „Нова сириска војска“, обвинува Москва


Москва, 16 декември, 2017 - 10:53 (META) 

САД од преостанатите терористи на Исламска држава формира „Нова сириска војска“ во провинцијата Хасека, тврди рускиот Центар за примирје, кој е дел од Министерство за одбрана на Русија.

Центарот наведува дека припадници на меѓународната антитерористичка коалиција, предводена од САД, врбуваат бегалци кои се вратиле во своите домови да формираат единици за борба против владините сили во јужна Сирија. Од центарот истакнуваат дека обуките на единиците се вршат во бегалски камп, кој се наоѓа на 20 километри североисточно од градот Џизр ел Шададија.

„Тоа докажува дека Американците продолжуваат да кокетираат со терористите и покрај изјавите кои пристигнуваат од Вашингтон дека САД се насочени кон тотално уништување на ИД на Блиски Исток“, се наведува во соопштението на Центарот и се додава дека 400 од 750 борци кои се обучуваат се поранешни припадници на ИД кои побегнале од Рака.


Путин нареди повлекување на руските сили од Сирија


Москва, 11 декември, 2017 - 13:55 (META) 

Рускиот претседател Владимир Путин им наредил на руските сили да почнат повлекување од Сирија.

– Им наредувам на министерот за одбрана и на шефот на Генералштабот да почнат со повлекување на руските сили во нивните бази – рече Путин за време на денешната најавена посета на базата Хмеимим во сириската провинција Латакија, прв пат по нејзиното формирање.

Путин се сретнал со сирискиот претседател Башар ал Асад и рускиот министер за одбрана, Сергеј Шојгун, по што заминал за Каиро, на разговори со египетскиот колега, Абдел Фатах ал Сиси за проширување билатералните односи и за регионалните прашања.

Русија воено го поддржуваше Асад во војната во која загинаа стотина илјади лица, а милиони се раселени откако почна конфликтот во 2011 година.


Ирак објави победа во војната против Исламска држава


Багдар, 9 декември, 2017 - 20:02 (META) 

Ирак денеска објави дека војната против Исламска држава (ИД) е завршена, по повеќе од три години воени операции со кои припадниците на терористичката ораганизација се изгонети од териториите во Ирак што ги беа окупирале.

Ирачкиот премиер Хајдер ал Абади прогласи дека ирачките вооружени сили целосно ја контролираат границата со Сирија, а владиниот портпарол појасни дека овој развој на настаните значи и крај на воените операции против ИД.

Тоа го потврди и високиот заповедник на ирачката армија, генерал потполковник Рашид Јар Алах.

– Сите ирачки територии се ослободени од терористичките банди на Даеш (арапската кратенка за ИД) и нашите сили во целост ја контролираат меѓудржавната граница на Ирак и Сирија – рече генералот.

Терористите од ИД во летото 2014 година освоија речиси една третина од територијата на Ирак, вклучувајќи го тука и Мосул, вториот по големина град во земјата.


Свилановиќ: За пет години 1.000 борци од Западен Балкан заминале во Сирија и во Ирак


Крањ, 30 ноември, 2017 - 14:24 (META) 

Околу 1.000 лица од земјите од Западен Балкан заминале да се борат во Сирија и во Ирак од 2012 до 2017 година, од кои 300 се вратени, околу 200 се убиени, а околу 400 сè уште се на боиштата, изјави денеска генералниот секретар на Регионалниот совет за соработка (РСС), Горан Свилановиќ.

Тој, како што соопшти РСС, изјави дека темпото на заминување на граѓаните од регионот се намалило во 2015 година, а речиси во целост е запрено во средината на 2016 година.

Study Infographics

Инфографик за движењето на странските борци од Западен Балкан кои заминале на боиштата во Сирија и во Ирак во периодот од 2012 до 2017 година

– Истовремено, од цела Европска Унија околу 5.000 граѓани заминале да се борат во Сирија и во Ирак – рече Свилановиќ во обраќањето на Втората меѓународна конференција за борба против тероризмот и насилниот екстремизам во Југоисточна Европа, што се одржува денеска во Брдо кај Крањ во Словенија.

Свилановиќ додаде дека овие податоци, кои поттекнуваат од студија што наменски ја порача РСС, „нè доведуваат чекор поблиску да осмислиме што треба да се направи од училиштата до затворите за да се победат насилните идеологии кои доведуваат до ужасите на тероризмот“.

Учесниците на Конференцијата, на која има претставници на влади од Западен Балкан и на повеќе меѓународни и регионални организации и инцијативи што се занимаваат со овој проблем, ќе разговараат за моменталните трендови и предизвици во активностите на европско, регионално и на национално ниво, како и за начините на спроведување на порано договорениот принцип – „цела влада, цело општество“, во сузбивање на насилниот екстремизам.

Конференцијата ја организира Регионалниот совет за соработка заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа.

Првата конференција за овој проблем е одржана во ноември во Тирана. Република Македонија, како основач и активен член на Процесот за соработка во Југоисточна Европа, активно партиципира на овие собири.


Нова рунда од мировните преговори за Сирија следната недела во Женева


Ријад, 25 ноември, 2017 - 10:44 (META) 

Новиот круг од мировните преговори за решавање на ситуацијата во Сирија под покровителство на Обединетите нации (ОН) ќе се одржи во Женева на 28 ноември. Ова било потврдено на состанокот на членовите на сириската опозција во Саудиска Арабија, јавуваат светските агенции.

За нов предводник на делегацијата на сириската опозиција е избран Насер ал Харири, кој го замени радикалниот Ријад Хиџаб, кој во понеделникот оваа недела поднесе оставка на функцијата.

Харири ги повикал ОН да иницираат директни преговори за политичка транзиција во Сирија и порачал дека фокусот треба да биде ставен на мировните преговори со поддршка на ОН.

Околу 150 претставници на различните опозициски групи во Сирија одлучиле да испратат заедничка делегација на преговорите следната недела. Тие, решението за ставање крај на војната во Сирија, која трае веќе седум години, го гледаат исклучиво во заминувањето на сирискиот претседател Башар ал Асад, кој ја има поддршката на Русија, додека на страна на опозицијата се Турција и други регионални сили, како и Соединетите Американски Држави.


Руските сили ќе се повлечат од Сирија пред крајот на годинава


Москва, 23 ноември, 2017 - 20:17 (META) 

Началникот на Генералштабот на вооружените сили на Руската Федерација, Валериј Герасимов, соопшти дека е можно значително да се намали бројот на руските сили во Сирија.

Повлекувањето на руските сили, како што рече Герасимов, би можело да почне пред крајот на годинава.

– Очигледно, по целосното исполнување на воените задачи, а останаа уште неколку, врховниот командант ќе донесе одлука за намалување на силите – рече Герасимов.


Решението за Сирија ќе бара отстапки од сите страни, изјави Путин


Сочи, 22 ноември, 2017 - 17:46 (META) 

Рускиот претседател, Владимир Путин, денеска изјави дека постои вистинска шанса за ставање крај на судирите во Сирија, додавајќи дека решението ќе бара отстапки од сите учесници во судирите, вклучително и од сириските власти на претседателот Башар ал Асад, јавуваат светските агенции.

Путин ова го истакна во своето обраќање во Сочи, на отворањето на мини-самитот посветен на Сирија, на кој учествуваа претседателите на Турција и на Иран, Реџеп Таип Ердоган и Хасан Рохани.

– Сирискиот народ треба сам да ја одреди својата иднина… Очигледно е дека тој процес нема да биде едноставен и ќе бара компромиси и отстапки од сите учесници, вклучувајќи ја и сириската влада – рекол Путин.

Тој додал дека Москва, Техеран и Анкара ќе преземат најактивни напори овој процес да биде што е можно попродуктивен.

Судирите меѓу сириските владини сили и опозициските бунтовници траат од 2011 година.


ИД повторно го контролира сирискиот град Букамал


Дамаск, 12 ноември, 2017 - 10:32 (META) 

Исламска држава ја вратила контролата над Букамал, град на истокот на Сирија соопшти денеска Сириската опсерваторија за човекови права со седиште во Лондон.

„Исламска држава во целост ја вратила контролата над Букамал. Силите на режимот и нивните сојузници се држат на километар или два од предградијата – соопшти директорот на Опсерваторијата, Рами Абдел Рахман.

Пред два дена беше објавено дека екстремистите се повлекле од градот пред сириските сили целосно д го заземат.


Трамп-Путин: Нема воено решение за конфликтот во Сирија


Москва, 11 ноември, 2017 - 11:15 (META) 

Американскиот претседател, Доналд Трамп и неговиот руски колега, Владимир Путин во заедничко соопштение се согласиле да ги продолжат напорите во борбата против Исламска држава се додека терористичката организација не биде целосно поразена, соопшти Кремљ.

Двајцата лидери исто така ја потврдиле својата посветеност на суверенитетот, независноста и територијалниот интегритет на Сирија и ги повикаа сите страни во судирот да земат активно учество во политичкиот процес во Женева.

Според текстот од заедничкото соопштение, Москва и Вашингтон се согласиле дека нема да има воено решение за конфликтот во Сирија.

Соопштението од Кремљ е објавено на маргините на состанокот на членките на Азиско-пацифичката економска соработка во Виетнам.

Путин и Трамп се ракуваа вчера непосредно пред почетокот на самитот, а од Белата куќа соопштија дека нема да има официјална средба на двајцата лидери.


Нова рунда преговори за Сирија во Астана


Астана, 30 октомври, 2017 - 11:47 (META) 

Во Астана денеска почнува нова рунда преговори за Сирија, а на дневен ред ќе биде загрижувачката хуманитарна состојба во завојуваната земја, соопштија денеска казахстанските власти.

Преговорите во Казахстан, прес сè, се однесуваат на војната и на техничките прашања и паралелно се одвиваат со преговорите во европското седиште на ОН во Женева.

Станува збор за седма рунда преговори под закрила на Русија, Иран и на Турција.

За денеска се планирани разговори зад затворени врати, а соопштението од дводневниот состанок ќе биде објавено утре.

Портпаролот на казахстанското министерство за надворешни работи, Анвар Јаинаков, потврди дека во Астана допатувала делегација на сирискиот режим, на опозицијата и претставници на земјите што посредуваат во преговорите.

Последната рунда преговори во ОН заврши на средината на јули, без значаен напредок, откако делегацијата на сириската влада и и претставниците на опозицијата не успеаја да ги усогласат ставовите за борбата против тероризмот и за политичката транзиција.
Од почетокот на војната во Сирија во 2011 година загинаа повеќе од 330.000 лица, додека милиони се раселени.