Анѓушев: Владата ќе направи напори за помош на „Југохром“ за поставување на филтрите


Скопје, 22 мај, 2018 - 13:36 (META) 

Вицепремиерот за економски прашања Кочо Анѓушев, како што известија од неговиот кабинет, на денешната средба со менаџментот и синдикатот на „Југохром Алзар“ и на Синдикатот за индустрија, енергетика и рударство (СИЕР) порачал дека комбинатот не може да почне со работа сè додека не се постават филтрите за отпрашување, а Владата е подготвена да помогне тоа да се реализира.

„Вицепремиерот истакна дека во интерес на граѓаните на Полошкиот регион, но и за економијата  е овој комбинат да функционира, а притоа да ги исполни сите еколошки стандарди. Тој потенцираше дека изградбата на систем за отпрашување е предуслов за рестартирање на комбинатот, за повисоко ниво на заштита на животната средина и заштита на здравјето на граѓаните кои живеат во околината“, се вели во соопштението.

На состанокот менаџментот порачал дека, поради финансиски проблеми на сопственикот, процесот на изградба на системот за отпрашување се одвива забавено и побарале поддршка од Владата.

Анѓушев порачал дека преку инструменти на Македонската банка за поддршка на развојот, Владата и ќе направи напори да се обезбеди заем со кој би се завршило поставувањето на филтрите, по што комбинатот одново би почнал со работа.

Во октомври 2017 година, Владата, синдикатот и менаџментот на „Југохром“ потпишаа меморандум со кој комбинатот ќе добие интегрирана А– еколошка дозвола со која ќе се овозможи рестартирање на печките 7 и 8.


Раководството на САСА и синдикатите постигнаа договор за зголемување на платите


Скопје, 11 мај, 2018 - 15:44 (META) 

Мултиетничкиот синдикат за образование (МЕСО), Сојузот на синдикати на Македонија и рудникот за олово и цинк Саса потпишаа спогодба, согласувајќи се на понудата за зголемување на платата, која што компанијата ја достави до синдикатот на 26 април.

„Рудникот Саса и неговите нови сопственици од Лондон, „Централ Азија металс“, веруваат дека со оваа прифатена понуда се решава суштинскиот од проблемите поврзани со наградувањето и исплатата на вработените, кои што беа наследени од претходните сопственици и се надеваат дека соработката со тимот ќе продолжи и во иднина со цел изградба на успешна иднина на рудникот.

Се надеваме дека ќе можеме да ја извршиме исплатата на зголемувањето за април и ретроактивно за месец март со исплаќањето на априлската плата, кое ќе се реализира во текот на денешниот ден. Дискусиите со МЕСО за други прашања во Саса ќе продолжат“, изјави Неил Стевенсон, генерален директор на Саса.

Со потпишаната спогодба завршуваат преговорите меѓу раководството на рудникот и овластените претставници на синдикатот започнати кон средината на минатиот месец. Истовремено, синдикатите се обрзуваат дека и формално ќе го прекинат штрајкот кој беше ставен во мирување кога започнаа преговорите.


Синдикатот на Југохром бара итна средба со премиерот, во спротивно ќе протестираат


Тетово, 7 мај, 2018 - 11:57 (META) 

Синдикатот на Југохром Алзар на 17 април доставил допис до владата за одржување на неодложна средба, поврзана со статусот на Југохром Јегуновце, информираат од таму.

Но, како што се додава во соопштението, средба немало.

„Затоа со овој допис повторно ви се обраќаме со барање за одржување на итна неодложна средба. Доколку до крајот на неделава не се одржи средбата, ние како Синдикат ќе бидеме принудени, поради огромниот притисок од напуштените работници, да организираме синдикални протести пред Владата“, се додава во соопштението.


Вработените во „Колска“ блокираа возови поради неисплатени плати


Велес, 16 април, 2018 - 12:22 (META) 

Вработените на фабриката за шински возила „Колска“ утрово од 7 до 9 часот ја блокираа Железничката станица во Велес, поради доцнењето на платите и тоа со месеци, јави СДК.

За време на двочасовниот штрајк беше блокиран патничкиот воз од Скопје за Битола, кој поради тоа доцнеше 90 минути. Работниците велат дека штрајкуваат и поради тоа што неодамна им било соопштено дека „Колска“ ќе се продава.

– Немаме плата за сите месеци од оваа 2018 година, како и за септември и октомври лани – вели Слободан Димитриевски претседател на синдикатот во „Колска“.


Синдикатот на културата и Алаѓозовски се жалат на лошите закони на претходната власт


Скопје, 7 март, 2018 - 15:10 (META) 

На две прес-конференции денеска, Синдикатот на културата и министерот за култура Роберт Алаѓозовски, се пожалија на „лошите закони од претходната власт“. Синдикатот на културата се пожали и дека новата власт во изминативе месеци се уште не променила ништо во однос на тие закони, а нејзината намера да спроведува некои законски одредби само ќе ги продлабочи проблемите на вработените во културата.

Претставниците на синдикатот побараа Министерството за култура посилно да се ангажира во подготвување нов закон за култура, а во неговото пишување да бидат вклучени и и претставници на синдикати и носителите на дејност. Сегашниот, велат тие, уметниците и културни работници ги става во ригидна административна рамка, кој ја ограничила слободата на творење и претставува пример за легална закана од страна на работодавецот и отвора простор за партиски притисок и манипулација.

Беше побарано и Министерство за информатичко општество и администрација да го пролонгира рокот, кој сега е крајот на март, за изготвување на систематизации и за доделувања решенија за распределување на вработените, а Министерството за финансии да одобри средства за порамнување на платите во различните дејности на културата.

Министерот Алаѓозовски изјавувајќи дека е свесен оти формулацијата „даватели на услуги“ е понижувачка, рече дека законот мора да се почитува, но Министерството за култура е подготвено да изнајде решение.

– Предложивме да се употребува терминот „носител на дејност“ наместо „давател на услуги“,  како времено, техничко решение за издавање на решенијата и нивно евидентирање во електронскиот систем на МИОА – рече Алаѓозовски.


СОНК: Државните пари се трошат нефукционално


Скопје, 13 февруари, 2018 - 14:04 (META) 

Самостојниот синдикат за образование, наука и култура на Република Македонија (СОНК), се огласи со реакција на распределба на буџетските пари во културата на граѓанските организации. Велат дека станува збор за нефукционално трошење државни пари во дел од проектите.

„Всушност со ништо не ја отсликуваат, презентираат или воздигнуваат културата во Република Македонија, особено не преку финансирање на проекти кои во најмала рака се сомнителни во оправданоста да бидат одобрени преку ова Министерство, како и проекти кои се поднесени од членови на комисии и кои одлучуваат за доделување на средства за туѓи, но и за свои апликации“, се вели во реакцијата.

Во писмото од Синдикатот се вели дека има огромно разочарување кај „културните работници кои се вработени во установите од културата, а кои реално се едни од најслабо платените работници во Јавниот сектор и очигледно се заборавени од страна на државата“.

СОНК апелира до Министерството за култура итно да продолжат преговорите за потпишување на колективниот договор, како и обезбедување на пари за негова реализација.

„Се чини дека Министерството за култура не е заинтересирано да го потпише и имплементира колективниот договор за култура, со тоа и да се надмине проблемот со различните плати во оваа дејност, воедно и да се подигне висината на платите на ниво со кое што на културните работници ќе им се врати достоинството на нивната професијата“, порачува Синдикатот.


СНП: Барањата на СОНК се легитимни, СОНК нe


Скопје, 15 јануари, 2018 - 9:28 (META) 

Иницијативниот одбор за формирање на Синдикат на Наставнички пленум (СНП) реагира на најавата на Синдикатот на вработените во образованието, науката и културата (СОНК) да организира штрајк пред Министерството за образование и наука, велејќи дека иако барањата на штрајкот под патронат на Конфедерацијата на слободни синдикати (КСС) се легитимни, но СОНК не е.

„Протестира СОНК, под патронат на КСС. Ние, Иницијативниот одбор на СНП, сметаме дека протестот е невиден сарказам и обид за нова манипулација со нашата фела. Имено, сите ние многу убаво знаеме и паметиме каква беше улогата на СОНК претходната деценија. СОНК, на чело со актуелното раководство, без да ги праша наставниците, без да го чуе нивниот глас, го аминуваше срамното екстерно проверување, наводно на знаења, реално како инструмент за пресметка со неистомислениците. СОНК потпиша Колективен договор и ниту еднаш не побара истиот да биде почитуван. СОНК ги премолча заменските наставници! СОНК го аминуваше укинувањето надомест за патни трошоци. Голем е бројот злодела против фелата од страна на СОНК. Затоа ние, наставниците, масовно почнавме да истапуваме од неговите редови. Затоа покренавме иницијатива за формирање синдикат“, се вели во реакцијата.


Независниот синдикат на полицијата протестираше за повисоки плати


Скопје, 4 ноември, 2017 - 16:38 (META) 

Независниот синдикат на полицијата (НСП) одржа мирен протест со колона автомобили низ улиците на Скопје и прес-конференција пред Влада на РМ. Мото-маршот почна од Министерството за земјоделството, покрај Министерството за правда за да заврши пред Владата, каде прес-конференција одржа претседателот на НСП, Гоце Делчев-Тодев.

„Како Синдикат кој се грижи за своите членови, како и за другите вработени во МВР, сметаме и должни сме да Ве потсетиме како премиер и министер за внатрешни работи дека во согласност со планот за усогласување на платите за 2017 година во Буџетот на РМ беа предвидени две зголемувања на платите по 5 отсто и тоа во мај 2017 година првото и 5 отсто во последното тримесечје на годината. До ден-денес ниту едното ниту другото не се исплатени, а да биде трагедијата поголема, од досегашните изјави и увиди во предлог-буџетот за 2018 година, заклучуваме дека не се споменуваат ниту зголемување на платите, ниту усогласување“,  порачаа од синдикатот.


Синдикатот на „Фени“ не прифаќа стечај


Кавадарци, 31 октомври, 2017 - 10:07 (META) 

Синдикатот на „Фени“ не прифаќа стечај и најави дека со штрајкови ќе ги блокира и судот и банките ако дојде до тоа, јавува „Сакам да кажам“.

Вчера трите најголеми доверители на металуршкиот гигант, „Комерцијална банка“, „Стопанска банка“ – АД Скопје и „Силк роуд банка“ до надлежниот суд во Велес поднеле предлог за почнување стечајна постапка за компанијата за фероникел од Кавадарци, „Фени индустри“, бидејќи вкупниот долг што го има кавадаречката фирма кон трите банки не може да го сервисира.

– Ако за нас нема работа, нема да има ниту за нив – изјавил Ѓоре Палитов, претседател на синдикалната организација во „Фени“.

Тој вели дека стечај не е прифатлив, бидејќи во таков случај треба да седат дома и да не земаат плата. Најавува дека работниците и синдикатот нема да молчат.


Војниците се сретнаа и со Заев и од него побараа подобрување на нивниот статус


Скопје, 23 август, 2017 - 18:22 (META) 

Премиерот Зоран Заев денеска се сретнал со Независниот синдикат на професионалните војници, при што тие го информирале за стандардот на вработените професионалци во Армијата на Република Македонија и побарале поддршка од владата за подобрување на социјалниот статус на професионалните војници.

На средбата било разговарано и за законската обврска, според која, државата е обврзана да обезбеди вработување на професионалните војници на неопределено време во други државни органи, по навршената 45 годишна возраст.

Претходно, професионалните војници се сретнаа и со министерот за внатрешни работи, Оливер Спасовски.