!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Дваесет и седум повредени во железничка несреќа во Швајцарија


Цирих, 11 септември, 2017 - 16:00 (META) 

Најмалку 27 лица се повредени во судир на два воза на станица во централниот дел на Швајцарија, соопшти полицијата.

Судирот се случил на станица во планинското место Андермат, при маневар за пренасочување. Во инцидентот учествувале локомотива и композиција со пет вагони, во кои имало околу 100 патници.

Железничката компанија „Матерхорн готард“ соопшти дека властите ја истражуваат причината за несреќата.


Осум лица исчезнати во свлечиште во Швајцарија


Цирих, 24 август, 2017 - 12:46 (META) 

Осум лица, меѓу кои и државјани на Германија, Австрија и Швајцарија се водат за исчезнати во свлечиштето кое се случи на југоистокот на Швајцарија.

Поради лизгањето за земјиштето се евакуирани неколку помали села.

Во соопштението на каталонската полицијата Граубинден се наведува дека лицата од вчера се водат за исчезнати.

Свлечиштето го погодило селото Бондо, во близина на границата со Италија. Евакуирани се околу 100 лица.

Потрагата по исчезнатите се интензивирала во текот на ноќта, а во неа се вклучени и швајцарски воени хеликоптери.

Свлечиштето уништило 12 објекти на фармите.


Швајцарската полиција уапси лице осомничено за нападот со моторна пила


Цирик, 26 јули, 2017 - 10:52 (META) 

Швајцарската полиција синоќа соопшти дека уапсила лице кое е осомничено за нападот со моторна пила во градот Шафхаузен.

Полицијата од кантонот Цирих, на „Твитер“ објави дека мажот е уапсен во градот Талвил, но не откри повеќе детали.
Најавено е дека полицијата од Шафхаузен, каде беше извршен нападот, денеска ќе одржи прес-конференција.

Педесетгодишниот Франц Вроусис е обвинет за напад со моторна пила на две лица вработени во канцеларијата за здравствено осигурување, како и на уште три други лица.
Засега не е познат мотивот за нападот.


Швајцарската полиција сè уште трага по напаѓачот од Шафхаузен


Цирих, 25 јули, 2017 - 15:36 (META) 

Мажот кој со моторна пила во швајцарскиот град Шафхаузен рани пет лица, од кои две потешко, и понатаму е во бегство, а полицијата интензивно трага по него.

Полициската потрага се врши во областа на границата на Швајцарија и на Германија, а во акцијата се вклучени хеликоптери и кучиња.

Швајцарската радио-телевизија јавува дека полицијата цела ноќ трага по 51-годишниот осомничен Франц Вруззис, кој ранил двајца вработени во канцеларија за здравствено осигурување и уште три лица.

Властите соопштија дека осомничениот двапати бил казнуван за злоупотреба на оружје.

Изминатите недели осомничениот честопати е гледан во близина на Шафхаузен, град со околу 36.000 жители, недалеку од Цирих.

Нападот се случи вчера, а полицијата веќе објави и фотографија од осомничениот.


Маж со моторна пила нападнал луѓе во Швајцарија


Шафхаузен, 24 јули, 2017 - 13:47 (META) 

Најмалку пет лица се повредени, од кои две потешко, откако маж со моторна пила нападна луѓе во северниот швајцарски град Шафхаузен.

Полицијата засега не открива детали за нападот, но локалните медиуми јавуваат дека полициските сили во центарот на градот спроведуваат операции за „специјални ситуации“.

Портпаролот на полицијата во Шафхаузен потврди дека операцијата е во тек, но одби да даде какви било детали, пренесува веб-страницата „Локал“.

Сопственик на продавници од тој дел на градот за швајцарски „Блиц“ изјавил дека маж со моторна пила се шетал по улиците и дека пешаците и жителите од тој дел биле замолени да ги напуштат продавниците и становите.

На социјалните медиуми се појавија слики на кои се гледа како лекари им пружаат помош на повредените.


Џафери се сретна со швајцарската амбасадорка Сибил Сутер Тејада


Скопје, 10 мај, 2017 - 17:05 (META) 

Талат Џафери, новоизбраниот претседател на Собранието, денеска се сретна со амбасадорката на Швајцарија, Сибил Сутер Тејада, која изразила надеж дека по политичката криза на демократски начин ќе се ретаблираат државните институции, како следна фаза во стабилизирањето на земјата.

„Амбасадорката ја подвлече понатамошната подготвеност на Швајцарската Конфедерација активно да продолжи со проектите во Македонија, особено со Собранието, бидејќи има директна финансиска и стручна улога во активностите на на Парламентарниот институт. Исто така, информираше за новиот проект кој ќе има цел да го опфати целото Собрание, за што дополнително ќе се разработат фазите, носителите и севкупните активности за реализација. Двајцата соговорници разменија согледувања и очекувања и за немилите случувања од 27 април во највисокиот дом на граѓаните, за актуелната политичка состојба во Република Македонија, за следните чекори поврзани со формирањето нова влада како израз на парламентарното мнозинство, за актуелната правна ситуација поврзана со распишување локални избори (и во контекст на веќе почнатите проекти на општините со швајцарската влада), како и за улогата на претседателот и на целото Собрание во оваа постапка согласно Уставот и законските одредби“, се вели во соопштението од кабинетот на Џафери.

Џафери и швајцарската амбасадорка изразиле очекување дека ќе продолжи соработката помеѓу двете држави.


Швајцарците на референдум гласаат за олеснување на процедурите за државјанство


Берн, 12 февруари, 2017 - 11:06 (META) 

Гласачите во Швајцарија денеска излегуваат на референдум на кој треба да одлучат дали земјата треба да ги олесни строгите правила за добивање на државјанство за третата генерација имигранти.

Швајцарските закони, како што принесува „Би-би-си“, не гаранираат доколку некој е роден во земјата дека по автоматизам ќе добие швајцарско државјанство, а имигрантите мора да чекаат 12 години за да аплицираат за државјанство.

Исто така се бараат тестови и интервјуа, што може да биде многу скапа инвестиција.

Новиот предлог за чие прифаќање или отфрлање Швајцарците денеска ќе гласаат им овозможува на имигрантите од третата генерација во земјата да избегнат дел од бирократијата за добивање на државјанство.

Поддржувачите на овој план за поедноставување на процедурите велат дека е „смешно“ на луѓето родени и кои цел живот живеат во Швајцарија да им се бара да докажат дека се интегрирани во општеството.

Противниците пак наведуваат дека мерките за олеснување на процедурите ќе им овозможат на имигрантите, кои сочуваат 25 отсто од популацијата, на многу лесен начин да добијат државјанство.


Истражување: Во Македонија германската плата вреди двојно повеќе


Диселдорф, 4 јануари, 2017 - 12:41 (META) 

Македонија и другите земји долж балканската магистрала (Србија, Босна и Херцеговина, Албанија и Црна Гора) се најевтини за живот и во нив германски државјанин за истите пари што во својата земја ги троши за основни работи, може да добие двојно повеќе. Ова го покажува обемното истражување на Институтот за економски и општествени науки од Диселдорф, кој ги анализирал статиските на Европскиот завод за статистика (Евростат), националните заводи за статистика за да ги спореди трошоците за живот во 37 европски земји, САД и во Јапонија, пренесува „Дојче веле“.

Целта на истражувањето била да одговори на прашањата на германските граѓани како што се: Колку моите пари вредат во странство?; Каде се најевтини подароците за празници?; Во која земја можам да одам на одмор за најмалку пари?

Кога станува збор за трошоците за живот – станарина, сметки, храна, облека, трошоци за автомобил, образование, забава, според истражувањето, германската плата најмалку вреди во Швајцарија, а нејзината вредност е двојно поголема во Македонија, Србија…

Според методологијата, ако на германското евро му се даде индекс 100, тогаш Швајцарија има индекс 158,5, што значи дека оваа земја е за 58,5 отсто поскапа во однос на Германија. Покрај Швајцарија, меѓу најскапите се Исланд (со индекс 147,8), Норвешка (141,8), Данска (136,7), Ирска (121,4), Финска (119,7), Луксембург (119,2) итн.

Македонија спаѓа меѓу најевтините земји, каде германската заработувачка има вредност повеќе од половина од својата вредност. Македонското „евро“, според диселдорфскиот институт, има индекс 45,3, односно Македонија е за 54,7 отсто поевтина земја од Германија. Србија има индекс 48,5, Словенија – 79,9, Хрватска – 65,6, Црна Гора – 55,4, Босна и Херцеговина – 50, Албанија – 48,2 и Бугарија 46,1.

Во истражувањето нема податоци за можеби најсиромашните земји во Европа – Косово и Молдавија.

Нордиските земји и Швајцарија се најскапи и кога станува збор за цените во хотелите и во рестораните, додека од балканските земји, овие услуги се најевтини во Македонија и во Албанија, кои имаат идентичен индекс – 41,8.

Според достапните податоци, што ги пренесува „Дојче веле“, просечната заработувачка на вработен во Германија, кој работи со полно работно време е околу 2.200 евра, со одбиени даноци, здравствено и социјално осигурување.

Во Македонија просечната месечна нето-плата, според последните пресметки на Дражавниот завод за статистика за октомври е 22.460 денари, односно 365 евра.


Ранети двајца полицајци во Швајцарија, напаѓачот е во бегство


Цирих, 3 јануари, 2017 - 13:35 (META) 

Швајцарската полиција трага по 33-годишен маж кој утринава рани двајца полицајци во местото Рехетобел, јавуваат швајцарските медиуми.

Инцидентот се случил нешто по девет часот, кога полицијата се обидела да ја претресе куќата на осомничениот. Тој отворил оган и ранил двајца полицајци, кои веднаш се хоспитализирани.

Осомничениот е во бегство и веројатно е вооружен, предупредува полицијата.


Заев во посета на Швајцарија, на средби со дијаспората


Берн, 12 ноември, 2016 - 19:56 (META) 

Претседателот на СДСМ, Зоран Заев, придружуван од членовите на извршниот одбор на СДСМ, Едмонд Адеми и Тања Ковачев, е во дводневна работна посета на Швајцарија.

За време на посетата на Швајцарија, Заев ќе има средби со граѓаните од дијаспората од Македонија.
Вечерва, во Ешалон, во близина на швајцарскиот град Лозана, Заев има средба со градоначалникот на Ешалон, по што ќе се сретне и со високи претставници и пратеници од Социјалистичката партија на Швајцарија.

Тој ќе има и трибина со граѓаните од Македонија кои живеат и работат во Швајцарија, а утре ја продолжува посетата на Швајцарија со средби со дијаспората во Берн, како и во Локарно, каде што СДСМ веќе има формирано своја партиска организација.

За почетокот на посетата на претседателот Заев на Швајцарија и за договорените средби, веќе известија медиумите во таа земја.