!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ѓорчев ги поздрави актерите од МНТ кои се солидаризираа со Јовановски


Скопје, 2 декември, 2017 - 19:49 (META) 

Поддржувачи на ВМРО-ДПМНЕ, предводени од лидерот на партијата, Никола Груевски, вечерва протестираа пред истражниот затвор во Шуто Оризари.

Учесниците на протестот, кој почна во 18 часот, побараа запирање на, како што рекоа, „политичкиот прогон, малтретирање и терор“ и побараа „ослободување на сите лица кои се цел на тој политички прогон“.

На протестот, Владимир Ѓорчев ги поздрави актерите од МНТ затоа што покажале солидарност со својот колега, Владо Јовановски.

– Тоа е театарот на Ристо Шишков, а денеска Владо Јовановски стана новиот Ристо Шишков. Зарем актер кој никого не нападнал, не удрил, не раскрварил треба да биде суден за тероризам, за дела против државата и уставниот поредок – праша Ѓорчев.

Тој најави дека протестот утре ќе се одржи во 16.30 часот пред Владата, но исто така и пред Министерството за правда, кај споменикот на Христо Узунов.


ВМРО-ДПМНЕ: Судството под политички притисок ослободи лица обвинети за тероризам


Скопје, 2 декември, 2017 - 10:35 (META) 

Судството под политички притисок вчера ослободи лица обвинети за тероризам, се вели во реакцијата на ВМРО-ДПМНЕ на ослободувањето на обвинетите во случајот „Монструм“.

Во партиското соопштение се додава дека „истото тоа судство ги преиначи мерките домашен притвор за актерот Владо Јовановски и режисерот Борис Дамовски и одлучи да ги испрати во истражниот затвор во Шуто Оризари“.

„Зоран Заев и органите на прогонот под негова команда, не само што им измислија, конструираа и процесираа обвинение за тероризам, туку повеќе им веруваат на убијците од Смиљковско Езеро, дека редовно ќе се јавувале на суд и дека нема да ја напуштат Македонија, отколку што им веруваат на македонските патриоти“, се вели во соопштението.

Од партијата најавуваат дека и денеска  во 18 часот,  ќе организираат протест пред истражниот затвор во Шуто Оризари, каде ќе има повеќе обраќања пред присутните.


Обвинетите во „Монструм“ излегуваат од затвор


Скопје, 1 декември, 2017 - 21:03 (META) 

Сами Љута вечерва излезе од затворот во населбата Шуто Оризари, како прв од четворицата осудени во случајот „Монструм“, за кој Врховниот суд денеска ја укина пресудата и го врати предметот повторно во скопскиот Кривичен суд, јави „Порталб“.

При излегувањето бил поздравен со аплаузи од најблиските.

По него од затворот во Шуто Оризари и од „Идризово“ треба да излезат и Агим Исмаиловиќ, Фејзи Азири и Хаки Азири.

Врховниот суд денеска донесе решение со кое обвинетите во случајот „Монструм“, кои беа осудени на доживотни затворски казни, се пуштени на слобода.

На обвинетите Агим Исмаиловиќ, Фејзи Азири, Хаки Азири и Сами Љута им се определени други мерки за претпазливост, односно забрана за напуштање на живеалиште, односно престојувалиште, како и двапати неделно јавување пред Основниот суд Скопје 1.

Врховниот суд ги укина шесте доживотни казни и со пресуда го врати предметот во нов судски процес.


„Мост“ регистрирала нефункционирање на УВ-ламбата на неколку избирачки места


Скопје, 29 октомври, 2017 - 17:44 (META) 

Семејно гласање во општина Шуто Оризари, нефункционирање на УВ-ламбата на неколку избирачки места, како и фотографирање на избирачките ливчиња, забележале набљудувачите на граѓанската асицијација „Мост“ до 17 часот.

Во општина Шуто Оризари имало три случаи во кои членовите на избирачките одбори им помагале на лица да гласаат и им укажувале за кого да гласаат.

„На гласачкото место 0440, село Неготино, општина Врапчиште, УВ-ламбата не функционира од 13 часот. Општинската изборна комисија не била известена за ова, а гласањето не било прекинато. На гласачкото место 2960, во општина Шуто Оризари, гласањето било прекинато во период од половина час поради тоа што УВ-ламбата не функционирала. Направен бил записник, а гласањето продолжило. Прекин на гласањето имало и на гласачкото место 2949 во општина Бутел поради нефункционирање на УВ-ламбата“, велат од „Мост“.

На гласачкото место 2928, во општина Чаир, гласач го фотографирал глсачкото ливче, повикана била полиција и гласањето било на кратко прекинато. Избирачкиот одбор направил записник за случајот.


„Мост“: Забележано e групно гласање и фотографирање гласачки ливчиња


Скопје, 29 октомври, 2017 - 13:45 (META) 

Семејно и групно гласање, проблеми предизвикани од неовластени лица, фотографирање гласачки ливчиња биле забележани на неколку избирачки места до 13 часот, од страна на набљудувачите на граѓанската асоцијација „Мост“.

„На гласачко место 1471, село Дебреште, општина Долнени, забележани се девет случаи на семејно гласање, при што се злоупотребени 27 гласа. Дополнително, на ова место се забележани два случаи во кои лицата кои им асистирале на гласачите, кои не можеле да гласаат сами, не биле заведени во дневникот од избирачкото место. Во истата општина, но на гласачко место 1472, забележани се девет случаи на групно гласање, во кои се злоупотребени 20 гласови“, известија од „Мост“.

Во општина Шуто Оризари, неовластено лице агитирало на гласачко место, а имало и фотографирање на гласачко ливче.


Дудуш: Го осудувам насилството и порачувам да не се подгреваат тензии


Скопје, 4 октомври, 2017 - 10:52 (META) 

Секое насилство, особено во изборен период е недозволиво, вели кандидатот за градоначалник на Шуто Оризари од СДСМ, Курто Дудуш, за физичката пресметка во која повреден беше актуелниот градоначалник на општината, Елвис Бајрам.

– Јавно го осудувам насилството како метод за да се надминат недоразбирањата и разликите. Овој изборен процес Шуто Оризари ќе го помине во фер и демократска атмосфера, недозволувајќи настанот кој се случи да поттикне понатамошни тензии и инциденти. Бидејќи не бев присутен на настанот, не сум во можност да дадам објективна слика и детали за настанот, но верувам во работата на институциите и во интерес на истрагата, нема да откривам детали што ги имам слушнато од сведоци. Да оставиме институциите да си ја завршат професионално работата и за крајниот исход по завршување на истрагата ќе биде известена и целата јавност – вели Дудуш.

Во понеделникот Елвис Бајрам и Аднан Мемет, шеф на неговиот изборен штаб, биле физички нападнати во населбата Шуто Оризари. Според нивните изјави, четири непознати лица физички го нападнале прво Мемет, а потоа и Бајрам. Насилниците побегнале, а екипа на брзата помош констатирала тешки повреди кај Бајрам, кој беше хоспитализиран во скопската градска болница „8 Септември“.

Пратеникот Амди Бајрам тврди дека напаѓачите што го истепале син му Елвис се поврзани со кандидатот за градоначалник на оваа општина од редовите на СДСМ, Курто Дудуш.


МВР: Девет лица повикани на разговор за тепањето на Елвис Бајрам


Скопје, 3 октомври, 2017 - 17:08 (META) 

Досега се идентификувани и повикани на разговор девет лица кои учествувале во тепачката вчеравечер во населбата Шуто Оризари, во која тешки телесни повреди доби Елвис Бајрам, досегашен градоначалник на општина Шуто Оризари и кандидат за таа функција на локалните избори на 15 октомври, рече портпаролот на МВР, Тони Ангеловски.

Тој рече дека откако полицијата добила пријава за нарушување на јавниот ред и мир, веднаш се преземени мерки за расчистување на случајот. Ангеловски порача дека МВР ги осудува сите облици на насилство и нема да има толеранција за никого.

– Нагласуваме дека ниту еден инцидент нема да се толерира. Секаков обид за нарушување на демократскиот изборен процес и загрозување на безбедноста на граѓаните ќе биде соодветно санкциониран – рече Ангеловски.


Амди Бајрам тврди дека напаѓачите на син му се поврзани со Курто Дудуш


Скопје, 2 октомври, 2017 - 21:22 (META) 

Пратеникот Амди Бајрам тврди дека напаѓачите што попладнево го истепале син му, Елвис Бајрам, кој е градоначалник на Шуто Оризари, се поврзани со кандидатот за градоначалник на оваа општина од редовите на СДСМ, Курто Дудуш.

– Пред четири-пет дена местевме банери и тие почнаа расправија. Му се јавивме на министерот за внатрешни работи, Оливер Спасовски, и му рековме да не правиме провокации, да одиме на фер и демократски избори и подобриот да победи. Тој ни рече дека нема да има привилегии за оној кој ќе погреши, без разлика дали е од наша страна или од страната на СДСМ. За секој според законот ќе бидат преземени мерки. Градоначалникот е во кампања и одел од врата на врата. Одеднаш му излегле со секири, со шипки и го удриле. Ми кажаа дека прво бил удрен шефот на кабинетот, а потоа и мојот син. Таа фамилија е позната, го држеа пазарот „Матекс“ во Шуто Оризари со рекет и со сила. Тие сега се во партијата на СДСМ и кандидатот Курто Дудуш е со нив. Барам министерот да го спроведе тоа што треба. Ако вината е наша, нека притвори некој од кај нас. Знаат дека народот е со нас и затоа одат со сила – рече Бајрам.

Градоначалникот на Шуто Оризари, Елвис Бајрам, попладнево беше физички нападнат заедно со Аднан Мемет, кој е дел од неговиот изборен штаб.

Четири непознати лица физички го нападнале прво Мемет, а потоа и Бајрам. Откако со тупаници ги собориле на земја, почнале да ги удираат со клоци и со метални и дрвени прачки.


СДСМ го осуди нападот на Елвис Бајрам, МВР го истражува случајот


Скопје, 2 октомври, 2017 - 21:00 (META) 

СДСМ преку писмено соопштение најостро го осуди насилството и денешниот инцидент што се случил во скопската општина Шуто Оризари, при кој повреден беше актуелниот градоначалник и кандидат за истата функција, Елвис Бајрам.

„Очекуваме Министерството за внатрешни работи и надлежните институции докрај да го расчистат случајот, а виновниците да бидат изнесени пред лицето на правдата согласно законите. Ги повикуваме сите граѓани и политички субјекти да не подлегнуваат на провокации и да останат посветени на спроведувањето фер, слободни и демократски избори“, велат од партијата.

Од МВР го потврдија инцидентот и нагласија дека работат на негово расчистување.

„Денеска околу 18 часот на улица Гвадалахара, во скопската општина Шуто Оризари, настанала меѓусебна тепачка меѓу две групи граѓани. Екипи на СВР Скопје веднаш се упатиле на местото на настанот. Се работи на расчистување на случајот“, информираа од МВР.


Физички нападнат градоначалникот на Шуто Оризари, Елвис Бајрам


Скопје, 2 октомври, 2017 - 19:39 (META) 

Актуелниот градоначалник на скопската општина Шуто Орузари, кој е и кандидат за истата функција на претстојните локални избори, Елвис Бајрам, и уште едно лице кое било со него, попладневно биле физички нападнати, објави „Нетпрес“.

Бајрам бил во друштво со лицето Аднан Мемет, кое е дел од неговиот изборен штаб. Двајцата оделе во посета на жители на населбата Шуто Оризари, како дел од предизборната кампања.

Околу 17.50 часот, четири непознати лица физички го нападнале прво Мемет, а потоа и Бајрам. Откако со тупаници ги собориле на земја, почнале да ги удираат со клоци и со метални и дрвени прачки.

Насилниците побегнале, а екипа на брзата помош констатирала тешки повреди кај Бајрам. Веднаш бил однесен во скопската градска болница „8 Септември“, каде поради сериозноста на повредите бил хоспитализиран и е критична состојба.

Директорот на болницата, Христијан Костов информираше дека на Бајрам санирана му е една рана, дека е сошениен е со 5-6 конци и дека е надвор од животна опасност.

Мемет во изјава за медиумите пред болницата апелираше до ДИК и до МВР да преземат мерки да се расчисти случајот.