Вработените во „Колска“ блокираа возови поради неисплатени плати


Велес, 16 април, 2018 - 12:22 (META) 

Вработените на фабриката за шински возила „Колска“ утрово од 7 до 9 часот ја блокираа Железничката станица во Велес, поради доцнењето на платите и тоа со месеци, јави СДК.

За време на двочасовниот штрајк беше блокиран патничкиот воз од Скопје за Битола, кој поради тоа доцнеше 90 минути. Работниците велат дека штрајкуваат и поради тоа што неодамна им било соопштено дека „Колска“ ќе се продава.

– Немаме плата за сите месеци од оваа 2018 година, како и за септември и октомври лани – вели Слободан Димитриевски претседател на синдикатот во „Колска“.


Околу 70.000 работници од 80 компании во Германија штрајкуваат за повисоки плати


Берлин, 1 февруари, 2018 - 12:22 (META) 

Околу 70.000 работници во Германија од 80 компании, помеѓу кои и „Фолксваген“, „Форд“, „МАН“ штрајкуваат, а до утре, бројката на компании во кои работниците ќе прекинат со работа ќе се зголеми на 260, јавуваат германските медиуми.

Синдикатот на работниците „ИГ метал“ бара зголемување на платите од осум проценти за 3,9 милиони работници во металскиот и инженерскиот сектор.

Штрајковите, компаниите би можеле да ги чинат 62 милиони евра загуба во приходите, дневно. Работодавачите понудија зголемување на платите од 6,8 проценти, но го одбија барањето за намалување на бројот на работни часови.


Железничарите го откажаа штрајкот, ќе почекаат на ноемвриската плата


Скопје, 25 декември, 2017 - 15:49 (META) 

Вработените во Македонски железници – Транспорт, се договориле да го одложат штрајкот кој претходно го договорија за утре, поради најавата од раководството на претпријатието и на Владата дека неделава ќе им биде исплатена целата плата за ноември.

Пред извесно време, со штрајкот кој траеше три дена, вработените во МЖ – Транспорт издејствуваа да им биде исплатена втората половина од платата за октомври, а тогаш најавија дека повторно ќе стапат во штрајк ако до 25 декември не им биде исплатена целата плата за ноември.

На седницата во петокот владата прифатила одлуки на двете државни енергетски претпријатија, ЕЛЕМ и МЕПСО, со кои му позајмуваат пари на АД Македонски железници – Транспорт, за исплата на ноемвриската плата.


ЕЛЕМ и МЕПСО ќе дадат заем за исплата на заостанатите плати во Македонски железници


Скопје, 22 декември, 2017 - 22:54 (META) 

На својата 44 седница вечерва, Владата меѓу другите точки направила подготовки за проект за транспортно и трговско поврзување на Западен Балкан, како и прифатила одлуки на двете државни енергетски претпријатија, ЕЛЕМ и МЕПСО, со кои му позајмуваат пари на АД Македонски железници – Транспорт, соопшти секторот за информирање на Владата.

Со тие позајмици, се обезбедени пари за неисплатените плати за ноември на вработените во МЖ Транспорт.

Исто така, владата ја разгледала и информацијата за предлог проектот „Трговијата и транспортот на Западен Балкан“ од Светска Банка, како и потребните идни активности за негова реализација. Проектот предвидува полесно прекугранично движење на стоки со усвојување на Национален Единствен Прозорец (National Single Window), и со подобрување на граничните премини во одбрани трговски коридори.

На 44-та седница, Владата го разгледала Извештајот за процена и утврдување на висината на штетата во скопскиот и тетовскиот регион од невремето и поплавите во август 2016 година и го проследила до Министерството за финансии.


Железничкиот сообраќај е нормализиран, вработените го прекинаа штрајкот


Скопје, 13 декември, 2017 - 20:00 (META) 

Патничкиот и товарниот железнички сообраќај е нормализиран, откако попладнево, на вработените во „МЖ-Транспорт“, им беше исплатена платата  за октомври.

Денеска, со менаџерскиот тим на компанијата се сретнаа вицепремиерот за економски прашања, Кочо Анѓушев и министерот за транспорт и врски, Горан Сугарески.

Од Министерството за транспорт и врски информираа дека денеска, најдоцна до утрешниот ден, ќе се обезбеди дел од потребните пари за покривање на загубите за патнички сообраќај во „Македонски Железници – Транспорт“, а вработените треба во најбрз рок да овозможат повторно да профункционира железничкиот сообраќај.

Вработените, два дена штрајкуваа поради неисплаќање на вториот дел од платата за октомври.


Министерството за транспорт и врски до утре исплати дел од платите во МЖ-Транспорт


Скопје, 13 декември, 2017 - 13:31 (META) 

Министерството за транспорт и врски (МТВ) денеска, најдоцна до утрешниот ден, ќе обезбеди дел од потребните пари за покривање на загубите за патнички сообраќај во Македонски Железници – Транспорт, но вработените треба во најбрз рок да овозможат повторно да профункционира железничкиот сообраќај.

Ова го соопштиле вицепремиерот за економски прашања Кочо Анѓушев и министерот за транспорт и врски Горан Сугарески  на денешната средба со менаџерскиот тим на МЖ Транспорт и со претставници на штрајкувачкиот одбор. Вработените втор ден штрајкуваат поради неисплаќање на вториот дел од платата за октомври.

„Министерството за транспорт и врски во рамките на своите надлежности и понатаму ќе продолжи со исплата на средства на име на трансфери и субвенции кон Железница, но потребно е да се создадат услови за нормално функционирање на железничкиот систем. Во случај на продолжување на блокада на железничкиот сообраќај ќе се доведе во прашање исплатата на заостанатите плати за сите вработени во железничките претпријатија“, стои во соопштението од МТВ.


Патничкиот и товарниот железнички сообраќај се во прекин, поради штрајк на работниците


Скопје, 12 декември, 2017 - 10:51 (META) 

Железничкиот товарен и патнички сообраќај се во целосен прекин, бидејќи вработените штрајкуваат и си го бараат вториот дел од платите за октомври.

Вчера, од „МЖ-Транспорт“ информираа дека најпрво беше прекинат товарниот сообраќај, а патничкиот, од синоќа на полноќ.

Нема информација до кога возовите нема да сообраќаат и дали барањето на вработените ќе биде исполнето, што е услов за прекин на штрајкот.


Сообраќајот кон Грција денеска во прекин поради штрајк на грчките цариници


Скопје, 19 октомври, 2017 - 10:17 (META) 

Денеска ќе биде во прекин сообраќајот за сите видови возила на границата помеѓу Македонија и Грција, освен за пешаци, поради штрајк на грчките царински служби, информираат од Министерство за внатрешни работи.

„Прекинот на сообраќајот на граничниот премин Богородица ќе биде од 6 часот утре до 6 часот, на Меџитлија од 6.30 часот до истиот термин на 20 октомври, а на преминот Дојран од 5 часот до 23 часот утре“, се вели во соопштението на МВР.


Грчките новинари стапија во 24-часовен штрајк


Атина, 3 октомври, 2017 - 14:09 (META) 

Грчките новинари стапија во 24-часовен штрајк поради недоволното кофинансирање на нивното здравствено, пензиско и социјално осигурување, што е резултат на мерките на штедење што кредиторите ги побараа од грчката влада.

Поради штрајкот, сите радио и телевизиски станици утринава во шест часот го прекинаа емитувањето програма, порталите не се ажурираат, а весниците утре нема да излезат.

Најголемото грчко здружение на новинари, ЕСИЕА, ја повика владата со закон да обезбеди фондот за социјално осигурување да може финансиски да ги задоволи барањата на новинарите за здравствено и за пензиско осигурување.

Таквите фондови во Грција е финансираат од три, претходно рамноправни извори: од придонесите на самите осигуреници, од придонесите на работодавците и од придонесите на државата.

Во последните години, придонесите на осигурениците се зголемуваат и тоа со законски измени, плаќаат придонеси, а државата поради длабоката финансиска криза е обврзана да штеди.


Анѓушев: Обезбедени се средства за плати и за нормално работење на „Колска“


Скопје, 29 септември, 2017 - 13:01 (META) 

Вицепремиерот за економски прашања, Кочо Анѓушев, на новинарското прашање во врска со штрајкот на работниците во фабриката за шински возила „Колска“ од Велес, извести дека проблемот е надминат и дека е најдено подолготрајно решение за функционирање на компанијата.

– По вчерашниот штрајк на работниците од „Колска“, утринава лично бев во фабриката за да се видам со работниците и да им потврдам дека Владата има решение за нивниот проблем, бидејќи очигледно дека некој манипулира и пренесува погрешни информации на работниците. Владата донесе заклучок со кој се обезбедени 15 милиони денари за „Колска“, со кои не само што ќе се исплатат плати, туку ќе се искористат и за набавка на репроматеријал, за фабриката да продолжи да работи. Многу важно за работниците е фабриката да има иднина и да продолжи да работи и да функционира, а сето тоа ќе се изведе во рок од седум до десет дена, во согласност со законските процедури – рече Анѓушев.

Работниците во „Колска“ се сретнаа со Анѓушев на 11 септември и го информираа за долгогодишните проблеми во работењето. На 12 септември, Владата одлучи финансиски да ја поддржи фабриката за да се воспостави редовен тек на работите и грижа за работниците.