Раскинат договорот со „Бетон“ – Штип, Грците сами ќе ја градат штипската болница


Штип, 5 февруари, 2019 - 10:39 (META) 

Грчки „Интеркат“ кој го доби тендерот за изградба на новата Клиничка болница во Штип, еднострано го ракинал договорот со „Бетон“ – Штип, откако со месеци стагнираше градбата. Се пробија сите договорени рокови, по што, грчката компанија одлучила да работи без ангажираниот подизведувач.

Работниците на „Бетон“ си ги собираат машините и алатот од недовршената болница, а „Интеркат“ се соочи со тужба од штипската компанија за едностраното раскинување на договорот и предизвикана штета од 2,5 милиони евра.

Договорот бил раскинат во ноември минатата година, откако целосно застанаа градежните работи на болницата. Работниците веќе четири месеци немаат земено плата, а како што неодамна информиравме, во фирмата се влезени и извршители за долг од еден милион евра.

Од друга страна, завршувањето на Клиничката болница доцни со месеци. Од април минатата година, градежните работи се одвиваа со прекини, целосно забавени. Со цел надминување на застојот,  минатата недела Министерството за здравство со изведувачот, „Интеркат“  направило нов план.

– По интервенција на Министерството за здравство, со „Интеркат“ минатата недела е направен нов динамичен план за изведба на работите – потврди државниот секретар во ова министерство, Владимир Милошев.

Со новиот план, определен е нов рок за завршување на болницата, до средината на 2020-тата година. „Интеркат“ нема да ангажира подизведувач, туку самата компанија ќе ги води работите, преку директно ангажирање на работници. Во изминатиот период немаше ни плаќања од министерството, бидејќи исплатите се според реализираните позиции.

Грчката компанија најавила дека ќе ги преземе градежните работници на „Бетон“, барем тие што ќе сакаат да работат за новиот работодавач, а ќе вработи дополнително уште, со цел да се оствари договореното, а тоа е од почетокот на месецот да ги инетензивира работите.

Некогашниот градежен гигант, доминантен изведувач на проектот „Скопје 2014“ ги живее своите најтешки денови. Од друга страна, состојбите во „Бетон“, го доведоа во прашање проектот со штипската  Клиничката болница, која се гради со средства од Светската банка.


Општината Штип одобри поскапување на меѓуградскиот такси превоз


Штип, 3 јануари, 2019 - 14:45 (META) 

Општината Штип на последната седница на Советот на Општината, донесе одлука за поскапување на меѓуградскиот автотакси превоз во Штип. Според новиот ценовник, еден километар возење е поскап за пет денари и сега чини 25 денари.

Оливера Блажева од Општината Штип, тврди дека цената на такси превозот не се зголемува.

– Само се воведува втора тарифа, меѓуградска и до градот Скопје, според законските одредби. Има измени во законот за превоз на патници во патен сообраќај, каде се наложува да се воведе меѓуградска тарифа. Според овие измени, Општината усвојува меѓуградска тарифа, која подразбира различна цена од градската. По вториот изминат километар, ќе се наплаќа 25 денари од километар, за разлика од градската, која е 20 денари од километар, изјави Блажева.

Ова подразбира дека такси компаниите можат да ги зголемат цените за превозот за возењето надвор од Штип.

На терен е малку поинаку. Таксистите кои редовно возат до Скопје и други линии до околните градови, велат дека кај нив цените остануваат исти. До Скопје е 300 денари во еден правец, со тоа што се вози со полн автомобил со други патници. Таксистите сметаат дека можностите на граѓаните се во рамките на оваа цена.

Бидејќи најчесто меѓуградскиот сообраќај е на релација Штип – Скопје, поради секојдневното патување на вработени, лекари специјализанти и други граѓани, надежите се во скорешното пуштање во употреба на автопатот Штип – Миладиновци.

Изградбата на патот е при крај и пуштањето во употреба се најавуваше по Нова Година. Од возењето по патот во изградба, таксистите проценуваат дека до Скопје ќе се патува за 45 минути.


Лажна вест за ширење зараза ги вознемири штипјани


Штип, 31 декември, 2018 - 19:40 (META) 

Веста објавена денеска од некои медиуми, дека 65-годишна жена од Штип починала од опасна заразна болест што се шири, презвика вознемиреност меѓу граѓаните на Штип. Всушност, веста е од септември годинава, кога жената почина како последица на лајшманиоза, болест која се шири преку инсекти, а изворот на заразата се заболени кучиња. Но, во очи на дочекот на Нова Година, оваа информација го крена алармот во градот.

Од Центарот за јавно здравје соопштија потврдија дека имало смртен исход од оваа болест, но пред четири месеци. Во меѓувреме, од лајшманиоза заболеле уште тројца, од кои две се деца.

Од Центарот апелираат дека надлежните треба редовно да вршат дезинсекција или да се справат со кучињата, кои се резервоар на предизвикувачот. Паразитот, кој ја предизивкува болеста, остава тешка клиничка слика.

Дијагностцирањето и лекувањето треба да биде навремено.


Амнестираниот Борис Дамовски на новогодишен коктел на ВМРО-ДПМНЕ во Штип


Штип, 31 декември, 2018 - 19:27 (META) 

Борис Дамовски, неодамна амнестираниот водач на движењето „За заедничка Македонија“, заедно со членката на Извршниот комитет, Иванка Василевска, изминатиот викенд беше почесен гостин на Општинскиот комитет на ВМРО ДПМНЕ во Штип.

Дамовски дојде во Штип на предновогодишниот коктел за членовите на штипскиот огранок на опозициската партија. На средбата во седиштото на партијата, покрај членовите, присуствува и пратениците и раководството на огранокот во Штип.

Дамовски, заедно со Владимир Јовановски и Богдан Илиевски – Бетмен, лидерите на „За заедичка Макеоднија“ беше амнестиран со новоусвоениот закон во Собранието.


Истрагата „Империја“ на СЈО ја сопре градбата на Клиничката болница во Штип


Штип, 6 декември, 2018 - 16:32 (META) 

Штипски „Бетон“, кој ја гради Клиничката болница во Штип, е дел од фирмите, каде удел до пред некој месец имаше и бизнисменот Орце Камчев и фирмата „Ексико“. Истрагата на Специјалното јавно обвинителство под името „Империја“,  ја стопираше работaта на болницата. И пред истрагата на СЈО, работите на Клиничката болница се одвива со забавено темпо, по информациите дека „Бетон – Штип“ има ненаплатени обврски за завршени работи за проектот „Скопје 2014“. Неодамна во фирмата влегоа извршители, кои во име на неколку македонски банки треба да наплатат долг од близу еден милион евра.

За да се увери во текот на градежните работи на Клиничката болница, кои ги изведува „Бетон“ денеска во Штип дојде министерот за здравство, Венко Филипче. При тоа, министерот уверуваше дека министерството добило потврда од грчката компанија, носител на тендерот и која го ангажирала „Бетон – Штип“, дека првичните проблеми со градбата се надминати.

– Во секојдневен контакт сме со луѓето со кои имаме потпишано договор, фирмата „Интеркат“ од Грција, кои што имаат одредени проблеми во соработката со подизведувачот „Бетон – Штип“. Меѓутоа, според последните информации, нашле соодветно решение и токму затоа, сега сакаме да се увериме на терен како е, кои работници се тука и во текот на следната недела ги синхронизираме работите согласно новиот динамички план – рече министерот Филипче.

Најавите на министерот се дека болницата комплетно би требало да биде завршена кон средината на 2020-та година. На поставувањето на камен темелникот, тогашниот премиер Никола Груевски, најави дека болницата ќе биде предадена во употреба во 2018 година. Вредноста на овој проект, на почетокот изнесуваше 30 милиони евра. Пред два месеци имаше реструктуирање на буџетот, но, за тоа колкави се пресметките и колку ќе чини изградбата на болницата, засега никој не кажува.

„Бетон – Штип“ работеше на седум објекти од „Скопје 2014“. Според податоците, има ненаплатени обврски од 14 милиони евра. Фирмата беше преземена од четири други компании, кои влегоа со удели и освен „Ексико“ удел има и фирмата „Пелистерка“, чиј сопственик е исто така предмет на истрагата за „Империја“. На оваа листа е и актуелниот директор на „Бетон “ Ванче Мијалчев. Осомничени се за сторени кривични дела „злосторничко здружување, оштетување или повластување на доверители, злоупотреба на службената положба и овластување, измама и перење пари и други приноси од казниво дело“.


Нова група на стечајци од Штип пред добивање на стечаен надоместок


Штип, 5 ноември, 2018 - 14:42 (META) 

Нови 180 стечајци од Штип може да побараат стечаен надоместок од државата, според усвоените измени на Законот за стечајци. Толкав е бројат на работници без решен статус кои ги исполнија законските услови. Тоа се граѓани кои останале без работа со затворањето или приватизација на некогашните државни фирми. Во оваа бројка влегуваат и неколку десетина граѓани, кои до сега беа одбивани поради неисполнувањето на законските услови. Меѓу нив и некогашни работници кои добиле отказ од работодавачот или спогодбено го напуштиле работното место.

Здружението на стечајци „Унит“ ги повика своите членови утре да ги поднесат своите барања во Агенцијата за вработување, од каде почнува постапката за парично обезбедување.

Претседателот на „Унит“ од Штип, Камаладин Арсланов вели дека незгрижени остануваат некогашните работници на фирми кои останале да работат по приватизацијата, но го смениле матичниот број.

-Фирмата се приватизирала, дошле нови газди, кои ги смениле матичните броеви и тоа сега е проблемот за нас – изјави Арсланов.

Некогашните работници од Штип, кои до сега не беа опфатени со измените, реагираат дека останале без работа понекогаш со фалсификуван потпис на спогодбеното отказно решение, понекогаш потпишувале отказ под принуда, со образложение на газдите дека нема работа за нив или од незнаење.

Со последните измените на Законот за материјално обезбедување на невработени лица поради приватизација на претпријатија со доминантна сопственост на државата, ќе бидат обезбедени околу 3.000 луѓе. Опфатени се граѓани кои останале без работа во периодот од 1 јануари 1995 година до 31 декември 1996 година.

Граѓаните ќе добиваат по 7.596 денари месечно, пари обезбедени од Буџетот на РМ.


По лекарите, и медицинските сестри од Штип се селат во странство


Штип, 2 ноември, 2018 - 9:31 (META) 

Над десетина медицински сестри и техичари во Клиничката болница во Штип во моментов зеле оправдано неплатено отсуство во законскот рок до три месеци и работат некаде по здравствените институции на европските земји.

Зачестен е трендот медицински персонал со средно образование со над дваесетгодишен работен стаж да поминува по неколку месеци во странство во неколку наврати, а потоа некои од нив и сосема се иселуваат во земјите каде привремено работеле. Ова се информации што последните месеци се почесто се слушаат меѓу медицинскиот кадар, а делумна потврда стигнува и од Клиничката болница од Штип.

Директорот Ален Ѓеоргијев потврдува дека опаѓа бројката на среден медицински персонал кој се пријавува на отворените огласи за вработување.

-Најдрастично е со медицинските сестри. На последниот оглас за вработување на 27 медицински сестри се пријавија 60 кандидати, за разлика од порано каде на огласите се пријавуваа и по 150 до 200 кандидати и за помал број отворени работни места – објаснува Ѓеоргијев.

Заминувањето на вработените лекари – специјалисти е во помал број, бидејќи државната специјализација ги врзува за одреден број години што треба да ги поминат во институцијата што ги праќа на дообука.

Германија е земјата каде најчесто се сели средниот медицински персонал, но не ретко работа наоѓаат и во Велика Британија, Швајцарија,а во последно време и во земјите од регионот.

Во Штип, каде работи средно медицинско училиште засега нема изразен недостаток на среден медицински персонал, за разлика од Свети Николе и Виница, каде дел од матичните лекари останаа без медицински сестри, па сами ги пишуваат рецептите. Според информациите од професионалните здруженија, некои од нив заминале во странство, а други во јавното здравство, поради подобрите услови за работа.

Наспроти преполнетите паралелки со ученици во средните медицински училишта, болниците и другите здравствени установи полека се празнат со персонал. Здруженијата го истакнуваат податокот дека светските стандарди се 600 медицински сестри на 100.000 жители, додека  тој број кај нас е паднат на 350.


Музејот на ВМРО во Штип само со повремени посетители


Штип, 25 октомври, 2018 - 11:50 (META) 

Восочните фигури на 11 дејци на ВМРО, чија изработка чинеше околу 100.000 евра, се предмет на интерес главно на ученици и по некој турист. Музејот на дејците на ВМРО од Штип овој декември ќе наврши четири години откако е отворен за посетители. Но, редовните трошоци за работа и одржување, го прават музејот тежок за одржување за НУ Заводот и музеј, во чии рамки работи. Реновираната куќа на Андонци, која прерасна во Музеј на ВМРО освен 11-те восочни фигури има документи, фотографии, автентични предмети на револуционерите и воена опрема што ја користеле, како сведоштво на периодот од формирањето на ВМРО.

Главна атракција се восочните фигури на револуционери кои се родени во Ново Село или поминале таму дел од својот живот, како Гоце Делчев и Даме Груев. За да се влезе во музејот се плаќа влезница од 60 денари. Но, парите од ретките посетители не се доволно за одржување на музејот. Само одржувањето чини еден милион денари годишно. Има двајца постојано вработени, а само одржувањето на восочните фигури бара посебни услови.

-Посебен предизвик ни се топлите летни месеци, кога треба да одржуваме температура, бидејќи восокот се топи. Ни се случи од топлото да паднат рацете на фигурите, па моравме повторно да ги лепиме – вели директорот на Завод и музеј, Мите Штерјов.

На восочните фигури само главата и рацете им се од восок, додека останатите делови се направени од дрво. Штерјов кажа дека размислуваат да ја преземат етнолошката збирка таму, па да ги спојат постановките во рамките на една зграда. Вака, останува на иницијативноста на туристичките агенции, кои ретките тури ги спојуваат во посета на Галеријата на икони во блиската црква Света Богородица, со Музејот на ВМРО.

Овој музеј веќе неколку години е предмет на судски спор. Министерството за култура, кој е инвеститор на објектот, и’ нема платено на градежната фирма „Маклус” за дел од градежните работи. На суд се за долг од 6 милиони денари.

На отворањето во декември 2014 година, тогашниот премиер Никола Груевски рече дека со музејот „се оддолжуваме на војводите и револуционерите кои гинеле за Македонија“.


Стартуваат шест проекти за медиумска писменост и критичко мислење


Скопје, 19 октомври, 2018 - 15:17 (META) 

Во организација на Фондацијата за интернет и општество „Метаморфозис“ и „Евротинк – центар за европски стратегии“, шест граѓански организации денеска во Граѓанскиот ресурсен центар во Скопје ги презентираа своите замисли со кои во рамките на проектот „Со критичко мислење до граѓани со медиумска умешност – КриТинк“ во неколку градови во земјава ќе работат на развојот на критичкото мислење и зголемување на медиумската писменост и сузбивање на дезинформациите кои се шират и преку социјалните мрежи и преку медиуми.

Како што истакна Филип Стојановски, програмски директор во „Метаморфозис“, целта на проектот, со финансиска поддршка на Европската Унија преку ИПА Програмата за граѓанско општество и медиуми, е да се работи повеќе со граѓаните, наместо со новинарите, за да се крене нивото на критичко размислување кај граѓаните, оти дезинформациите и другите негативни појави се насочени кон нив, а не толку кон новинарите.

– Младите се авангардата и нивната едукација за критичко размислување е нешто што, се надеваме, ќе има долгорочни ефекти, и овие проекти и нивниот ефект ќе имаат еден свој живот кој ќе продолжи долго – порача Стојановски.

Горан Лазаров од „Евротинк“, кој е еден од координаторите на проектот, рече оти денешниот координативен настан е со цел да се создаде мрежа на соработка меѓу организациите-добитници на грантови, која на локално ниво ќе ги спроведува целите на главниот проект.

– Целта е темата околу критичкото мислење, медиумската писменост да ја спуштиме и на локално ниво. Голем дел од активностите на суб-грантистите се поврзани со создавање на медиумски производи, одржување јавни настани, и целта е да се направи некакво вмрежување на сите активности и преку тоа на национално ниво да се влијае околу целата работа. Секако, очекуваме да се создаде мрежа што ќе се гради и понатаму и ќе ги реализира целите – вели Лазаров.

Проектите, кои ќе наскоро ќе почнат да ги реализираат „Диверзити Медиа“ заедно со „Алсат-М“, ДРОМ од Куманово со телевизијата „Плус“, Фондацијата „Фокус“ од Велес со „Дума“ и телевизијата КТВ, „Ганимед“ од Битола со ТВ „21“, потоа Македонскиот институт за европски студии заедно со „Студентско радио“, но и „Медиа плус“ од Штип заедно со „Канал 77“, ќе бидат насочени претежно кон младите, односно средношколците и бруцоши на факултетите од областа на општествените науки на скопскиот универзитет „Свети Кирил и Методиј“.


Штипската Клиничка болница плати над 346.000 евра долг кон вработените


Штип, 18 октомври, 2018 - 14:04 (META) 

Со аванс од Фондот за здравствено осигурување, Клиничката болница од Штип им го плати долгот на болничарите, медицинските сестри и докторите, кои во периодот 2015-2017 година не добивале надоместок за дежурство. Над 80% од персоналот ангажиран во дежурствата имаше извршни решенија за наплата, со што на болницата и се закануваше блокада на сметката. Покрај основниот долг од 364.000 евра, болницата платила уште дополнителни околу 80.000 евра за извршување.

Директорот Ален Ѓеоргијев вели дека парите што ги позајмиле, сега Фондот за здравствено осигурување ги сопира на неколку рати. Веќе се минусирани 8 милиони денари од парите што ФЗОМ ги префрла на болницата за редовно работење.

-Ќе го стегнеме ременот, ќе се трудиме и натаму да останаме ликвидни како што сме до сега, бидејќи сè уште не сме навлегле во должничка криза. Можеби овие месец- два ќе имаме некои доцнења во исплатата, меѓутоа, јас сум оптимист дека ќе успееме да го пребродиме овој економски удар – изјави Ѓеоргијев.

Проблемот со неплатените дежурства се провлекуваше со години, за да кулминира кога вработените тужеа на суд, по што се наталожија над 450 извршни решенија.

Директорот Ѓеоргијев вели дека ако имало волја, претходното раководство на болницата лесно можело да го реши проблемот.

-Јасно е кој не ги исплаќал парите. Во законот јасно си пишува како треба да одат исплатите. Гледате колку сето ова нè чини. Некој друг, не знам од кои причини, не плаќал. На крај, по сумирањето на бројките, може ќе побараме одговорност – рече Ѓеоргијев.

Тој се заблагодари на поголемиот дел од вработените, кои по серија преговори, сепак одлучиле да почекаат и не ги активираат извршните решенија, кои, според директорот Ѓеоргијев, сигурно ќе им ја блокирале сметката.

Дежурствата ја чинат Клиничката болница во Штип значаен дел од месечните издатоци, особено со зголемувањата кои ги добија лекарите и средниот персонал. Сепак, повисоките плати не го решаваат проблемот со недостиг на лекари с- пецијалисти, кои акутно, штипската Клиничка болница го решава со позајмици.

Во моментов во Штип секоја недела дежураат специјалисти од Клиничкиот центар од Скопје и од Општата болница од Кочани. Во Штип доаѓаат 5 неврохирурзи од Клиниката за неврохирургија од Скоје, кои освен дежурство преземаат и редовни операции, а има договор за еден детски хирург. Од Општата болница од Кочани дежураат по еден  невролог и еден анестезиолог.