ЕБОР и „Шпаркасе банка Македонија“ ќе го зголемат финансирањето на МСП


Скопје, 8 ноември, 2018 - 13:00 (META) 

„Шпаркасе банка Македонија“ е втората македонска банка која ќе и се приклучи на иницијативата на Европската банка за обнова и развој (ЕБОР) за поттикнување на кредитирањето на малите и средни претпријатија (МСП) во земјата.

ЕБПР обезбедува 10 милиони евра на „Шпаркасе банка Македонија“, од Програмата за поддршка на конкурентноста за Западен Балкан, која заедно со Европската унија (ЕУ), обезбедува среднорочно и долгорочно финансирање на малите и средни претпријатија (МСП) и им помага да ги достигнат ЕУ стандардите.

„Кредитот на ЕБОР е поддржан со 1,5 милиони евра грант од ЕУ, од Инструментот за пред-пристапна помош (ИПА). Финансирањето на ЕБОР за „Шпаркасе банка Македонија“ ќе биде насочено кон надградба на производните капацитети за подобрување на конкурентноста на локалните компании, а најмалку 60 проценти од фондовите ќе бидат насочени кон намалување на потрошувачката на енергија и ресурси, и поврзаните трошоци“, информираат од ЕБОР.

МСП, кои ќе користат кредити преку „Шпаркасе банка Македонија“, доколку успешно ги завршат проектите на модернизација до одредени ЕУ-стандарди, ќе добијат ИПА- грант финансиран од ЕУ.

МСП се главен двигател на македонската економија. Според податоците на ЕУ, тие придонесуваат со скоро 65 проценти во вкупната додадена вредност и околу 80 проценти во сите работни места во земјата, што е далеку над просекот во ЕУ каде овие проценти изнесуваат 57 проценти и 66 проценти соодветно. На почетокот на годинава, сличен финансиски пакет, од истата програма, беше доделен и на „Охридска банка“.

Програмата за поддршка на конкурентноста за Западен Балкан се стреми да обезбеди вкупно 30 милиони евра за кредитирање на македонските комерцијални банки, во наредниве години, придружувани од грант од ЕУ во вкупен износ од шест милиони евра.

Програмата е надградба на претходната поддршка на конкурентноста во износ од 20 милиони евра, која беше пласирана од 2010 до 2015 и беше поддржана од Европската унија која обезбеди четири милиони евра грант.

ЕБОР инвестира во Македонската економија од 1993 година и до денес банката има потпишано над 110 проекти во земјата, со нето кумулативен бизнис обем од над 1,75 милијарди евра.


Разбојник однел 6.500 евра од „Шпаркасе банка“ во Кичево


Кичево, 13 декември, 2017 - 11:41 (META) 

Вооружен разбојник вчера ја ограбил експозитурата на „Шпаркасе банка“ во Кичево, од каде одзел поголема сума денари и девизи, информира МВР.

Грабежот се случил околу 12.30 часот, а разбојникот, со закана со пиштол од вработената одзел 100.000 денари, 2.500 евра и околу 2.800 американски долари, по што побегнал.

Од МВР велат дека е извршен увид на местото и дека се трага по сторителот.

Инаку, Обвинителството и полицијата сè уште ја истражуваат кражбата на пари и вредни предмети од сефови на „Шпаркасе банка“ во Скопје изнајмени од неколкумина граѓани.


„Шпаркасе“ спроведува истрага заедно со МВР за кражбата од сефовите на банката


Скопје, 5 декември, 2017 - 16:30 (META) 

„Шпаркасе банка“ – Македонија попладнево испрати соопштение до јавноста дека продолжува со редовно работење со сефовите, откако МВР соопшти дека пет граѓани пријавиле исчезнување на предмети и на пари од сефовите во објект на банката.

Како што извести „Нова ТВ“, откако беше објавена информацијата за исчезнувањето вредни предмети и пари од сефовите, пред банката се создал метеж од клиенти кои сакале да проверат дали нешто недостига и во нивните сефови.

Од банката велат и дека спроведуваат истрага заедно со МВР и оти ги преземaат сите мерки за да ги заштитат интересите на клиентите.

– „Шпаркасе банка“ – Македонија во соработка со Министерството за внатрешни работи, во согласност со законските прописи спроведува истражна постапка во однос на изолираните пријавени инциденти во сефовското работење. „Шпаркасе“ продолжува регуларно да ги извршува активностите во доменот на сефовското работење, во согласност со поставените интерни процедури и законските прописи – стои во соопштението.


Им ги испразниле сефовите на пет граѓани во „Шпаркасе банка“


Скопје, 5 декември, 2017 - 14:06 (META) 

Пет граѓани пријавиле во СВР Скопје дека од сефови што ги изнајмиле во „Шпаркасе банка“ им биле одземени пари и предмети.

Како што извести полицијата, за настанот бил известен и јавен обвинител и се спроведува истрага.


Шпаркасе банка се претвора во „финансиски супермаркет“


Скопје, 9 јули, 2015 - 15:16 (META) 

Шпаркасе банка Македонија со нејзината подружница „С-лизинг“ денеска објави стратегиско партнерство со „Винер осигурување“ и со „Винер лајф осигурување“.

Ова партнерство ќе придонесе Шпаркасе банка Македонија да се претвори во „финансиски супермаркет“, каде што граѓаните и компаниите ќе можат на едно место да ги добијат сите услуги од банкарското работење, лизингот и од осигурувањето. Новите производи што ќе се пласираат од овие четири финансиски институции ќе се лансираат како платформа ГО4.

– Партнерството што постои помеѓу „Винер“ и „Штаермеркише шпаркасе“, како дел од „Ерсте групација“ на глобално ниво, денеска го промовираме во Македонија. Со ова партнерство на економските субјекти, сакаме на ефикасен и брз начин да им ги понудиме сите финансиски услуги во рамките на мрежата на Шпаркасе банка. Со тоа клиентите на банката ќе заштедат време, ќе добијат најкорисен совет и најдобра комбинација на финансиски производи, што ним најмногу ќе им одговара – изјави Глигор Бишев, претседател на управниот одбор на Шпаркасе банка Македонија.

Првиот производ што се промовира во рамките на платформата ГО4 е лизинг-пакетот ГО4, вклучувајќи низа поволности за сите заинтересирани клиенти. Пакетот претставува комбинација на поволна лизинг-понуда со каматна стапка од 6,75 проценти, рок на отплата до пет години, финансиран износ без ограничување и поволно каско-осигурување и осигурување од авто-одговорност.

Во рамките на лизинг-пакетот ГО4, корисниците добиваат можност за финансирање и на возила со поголем износ, како и набавка на потребниот возен парк за малите и за средни компании, бидејќи понудата на лизинг-пакетот ГО4 се однесува и на физичките и на правните лица, вклучувајќи ги и корпоративните клиенти на банката, што за нив ќе биде дополнителна предност.