!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Владата утре ќе расправа за евроатлантските интеграции и за користењето на ЕУ фондовите


Скопје, 14 ноември, 2017 - 18:59 (META) 

Разгледување на состојбата и напредокот во процесот на европската интеграција, користењето и имплементацијата на фондовите на ЕУ, статусот на реализација на приоритетите за влез во НАТО, се едни од најбитните точки што утре ќе бидат на дневниот ред на 38. седница на Владата.

Министрите ќе расправаат и за информациите за модели за подобрување на функционирањето на проектот „Отворање на народни кујни“, како и за книгите од проектот за превод и печатење на 50 универзитетски учебници кои се употребуваат на првите 10 рангирани универзитети согласно Шангајската листа за 2015 година.

На седницата ќе се разгледа и информацијата за потребата од склучување анекс на Договорот за доделување на државна помош склучен со Владата на Република Македонија и компанијата корисник на ТИРЗ Штип „Џонсон Контролс ДООЕЛ Штип“, извести владината служба за информирање.

Исто така, ќе се разгледува и информацијата за изменување и дополнување на Спогодбата помеѓу Владата и Европската комисија за финансирање во однос на повеќегодишната оперативна програма „Регионален развој“.


Зошто Македонија пак ја нема на Шангајската листа на 500 најдобри универзитети


Скопје, 17 август, 2016 - 10:05 (META) 

Ниту еден македонски универзитет и оваа година не се најде на светската Шангајска листа на 500 најдобри универзитети.

Првите десет универзитети од минатата година го задржаа своето место и покрај некои мали промени. Резултатите од најновото рангирање потврдуваат дека Универзитетот „Харвард“ е најдобриот веќе 14 години по ред. „Стенфорд“, исто така, го задржа второто место, додека „Беркли“ и „Кембриџ“ паднаа едно место подолу.

Деканот на Правниот факултет „Јустинијан Први“, Борче Давитковски, смета дека ниту еден универзитет од Македонија не е на Шангајската листа, затоа што воопшто не се вложува во науката.

– Колку се одвојува за науката и универзитетите толку и ќе се најдеме на Шангајската листа. Се отворија премногу јавни универзитети, на постоечките 5 сега се подготвуваат уште два нови. Студиските програми се дуплираа, триплираа, а средствата остануваат исти. Во Македонија, за наука не се одвојува речиси ништо, од тие причини не сум изненаден што ниту еден наш универзитет не е на Шангајската листа. Ако продолжи вака да се одвива состојбата, јас очекувам дека уште повеќе ќе одиме назад. Се знае кои се стандардите, а освен ние на УКИМ, ретко кој друг ги почитува стандардите – вели Давитковски.

Професорката на Правниот факултет Тања Каракамишева-Јовановска вели дека Шангајската листа може да се „заработи“ исклучиво и само ако се исполнат прецизно предвидените квалитативни и квантитативни индикатори добро познати на секого што работи во високообразовната сфера.

– Станува збор за шест квалитативно-квантитативни индикатори врз основа на кои се врши универзитетското рангирање во светот. Секако, се смета дека најважен од сите индикатори е квалитетот на професорскиот кадар кој работи на универзитетот, што се оценува и евалуира според индексот на т.н. индивидуален/колективен истражувачки излезен елемент. Ако универзитетите од Република Македонија сакаат да се најдат на Шангајската листа треба сериозно да ги унапредат сите наведени вредносни индикатори според кои се цени квалитетот на високото образование во светот – вели Каракамишева Јовановска.

Од регионот, најдобро се рангирани Универзитетот во Белград, кој се најде на 261-то место, Универзитетот во Љубљана на 464 место и Универзитетот во Загреб на 491-то место.

Вкупно 500 универзитети се рангирани од целиот свет врз основа на шест индикатори кои го вклучуваат бројот на наградувани вработени и алумни како и број на објавени статии во престижните списанија „Nature“ и „Science“.