!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Почина славниот актер Љубиша Самарџиќ


Белград, 9 септември, 2017 - 15:28 (META) 

Љубиша Самарџиќ, еден од најславните актери во Србија, но и во поранешна СФРЈ, починал во Белград во 81. година од животот, објавија утрово српските медиуми.

Тој починал по едномесечно лечење од леукемија на одделот за хематологија во клиничкиот центар во Србија. Љубиша Самарџиќ во декември минатата година имаше тешка операција на тумор на мозокот.

Неговото последно појавување во јавноста беше на 30 март годинава во Домот на младите во Белград, на отворањето на 64. Мартовски фестивал на документарниот и краткометражниот филм.

Тој беше ѕвезда на голем број филмови во СФРЈ, а потоа и во Србија, а во последните децении на кариератата работеше и како режисер.

Љубиша Самарџиќ беше оженет со Мирјана Самарџиќ, со која беа во брак повеќе од 50 години. Роден е на 19 ноември 1936 година во Скопје, во рударско семејство.


Србија: Штедачите од поранешна СФРЈ да ги пријават побарувањата


Белград, 23 февруари, 2017 - 16:34 (META) 

Министерството за финансии на Србија денеска ги повика сите штедачи кои до 27 април 1992 година имале девизни заштеди во банките на територија на поранешна СФРЈ да ги пријават своите побарувања.

Повикот е упатен до државјаните на поранешните републики на СФРЈ кои чувале девизни заштеди во банки со седиште во Србија или нивни филијали на територија на поранешните југословенски републики.

Повикот, исто така, важи и за државјаните на Србија кои имале девизни заштеди кај филијали на банки од некои поранешни југословенски републики во Србија.

Пријавата за побарување може да се испрати по пошта, на адреса на Министерството за финансии на Србија, Управа за јавен долг (Сремска 3-5), а од 6 март и непосредно да се предадат на шалтерите на српската управа. Заедно со пријавата, девизниот штедач треба да поднесе заверена копија од лична карта, оригинално уверение од надлежните органи за промена на живеалиштето, оригиналната штедна книшка, изјава дека својата заштеда не ја пренел на друго лице, потврда од надлежните органи на поранешните републики на СФРЈ за тоа дека штедачот не го остварил своето право на основа на девизното штедење.

Долгот на штедачите ќе им биде испатен на 10 еднакви рати, а првата рата ќе биде исплатена на 3 август 2018 година.


Борците на НОБ и здружението „Титоисти“ го одбележуваат 29 ноември


Охрид, 29 ноември, 2016 - 9:41 (META) 

Членовите на охридското здружение „Титоисти“, заедно со членовите на Сојузот на борци од Народно ослободителната војна во Македонија 1941 – 1945 и граѓаните продолжувачи од општините Охрид и Дебрца, го одбележуваат 29 ноември, денот на поранешната Југословенската заедница – СФРЈ.

Покрај другото, на јавна трибина, ќе дебатираат на тема „Кога Македонија стана држава со сите белези за државност, благодарение на АВНОЈ – АСНОМ“.

Здружението „Титоисти“, во своите простории, ќе организира мини-изложба за посетителите, посветена на ликот и на делото на Јосип Броз Тито.

Изложбата е посветена, како што соопштуваат, на заслугите за признавањето на македонската држава.

Десет нови членови на здружението, добија членски книшки.

Здружение „Титоисти“ од Охрид, истовремено, соопшти дека јавно се оградува од коалицирањето на политичката партија Сојуз на Титови леви сили со ВМРО-ДПМНЕ.


Наследниците на СФРЈ го продаваат имотот на меѓународен тендер


Белград, 24 октомври, 2016 - 11:58 (META) 

Македонија, Србија, Босна и Херцеговина, Хрватска, Словенија и Црна Гора постигнаа договор за продажба на дипломатско-конзуларните имоти на поранешна СФРЈ што се наоѓаат во Токио, Бон, Берн и во Њујорк, вклучувајќи го и шестсобниот апартман на Менхетен.

Недвижностите на поранешна Југославија, чија вредност пред 10 години била проценета на 42 милиони долари, ќе бидат продадени на меѓународни тендери.

Од вкупно 123 недвижности, земјите наследнички досега поделиле 72, а нераспределени останале уште 51. Поголемиот дел од овие недвижности ги користи Србија.

Наредниот состанок за продажба на недвижности треба да се одржи во март следната година во Белград.


Косово бара дел од наследството на СФРЈ и воена отштета


Приштина, 2 декември, 2014 - 13:51 (META) 

Новата косовска влада бара воена отштета и дел од златото од поранешната заедничка држава и воени објекти, пишува „Коха диторе“.

Како што јавуваат приштинските медиуми, новата влада на Косово нема да го условува дијалогот со признавање на суверенитетот, но ќе бара поделба на имотот и воена отштета.

Владата, како што пренесува „Коха диторе“, наместо залагање за признавање на независноста, ќе остане ангажирана на целосно нормализирање на односите со Србија и на продолжување на дијалогот.

Во програмата на владата се наведува обврската за враќање на експонентите и на документите на културното наследство, кое Србија го зеде од Косово, како и враќање на филмовите на „Косовофилм“, но и пензинско-инвалидскиот фонд на жителите. Програмата, исто така, се занимава и со прашања од сукцесијата, каде се бара дел од „богатството“ на поранешна Југославија и меѓународниот долг на Косово, но и одредување на бројот на дипломатско-конзуларните претставништва на поранешна Југославија, воени објекти на поранешна Југославија, како и дел од архивата на некогашната земја.