Ким Џонг Ун се извини што им го пореметувал мирот на Јужнокорејците


Претседателот на Северна Кореја, Ким Џонг Ун на денешната средба со претседателот на Јужна Кореја, Мун Џе Ин се извини поради тоа што им го пореметувал сонот на Јужнокорејците со нуклеарните тестови минатата година.

– Повеќе нема да ви го пореметуваме сонот во раните утрински часови – рече изјави Ким, мислејќи на ветувањето кое го даде дека ќе прекине со изведување на нуклеарни тестови.

После историското преминување на границите на лидерите на Северна и Јужна Кореја, Ким Џонг Ун ја посети Куќата на мирот во Панмунџом каде се запиша во книгата за гости. Во книгата тој напиша: Новата историја почнува сега. Време на мирот, почеток на нова историја“.

Разговорите траеја речиси часа зад затворени врати во редизајнираната сала за состаноци во демилитаризираната зона на границата. Во изјавата за медиумите пред состанокот, Ким, изјави дека сака да ја потсети претседателската Сина куќа во Сеул.

– Мун му кажа на Ким дека, ако дојде во Сеул, воената почесна гарда ќе биде многу поголема од денешната. Ким изјави дека е подготвен да дојде било кога – изјави гласноговорник на јужнокорејскиот претседател.

За време на ракувањето новинарите успеале да слушнат дел од разговорот кој се одвивал. Двајцата лидери рекоа дека им е многу драго што се запознале.

– Моето срце не престанува да трепери поради средбата на оваа историска локација. Почестен сум што дојдовте до воена демократска линија за да се поздравите со мене – рекол Ким Џонг Ун.

Помладата сестра на Ким, Јо Џонг, беше единствената жена помеѓу шесте делегати кои седеа на преговарачката маса.

Разговорите траеле 100 минути и биле искрени и љубезни, а се однесувале за денуклеаризација на корејскиот полуостров. Се дискутирало и за траен мир и за изнаоѓање на начини за унапредување на односите, јавуваат јужнокорејските медиуми.

По заминувањето од свечената сала, Ким Џонг Ун замина со луксузниот продолжен „мерцедес пулман“, додека покрај лимузината трчаа неговите телохранители.



Трамп ја прифати поканата да се сретне со Ким Јонг-ун


Вашингтон, 9 март, 2018 - 9:52 (META) 

Севернокорејскиот лидер, Ким Јонг-ун и американскиот претседател, Доналд Трамп ќе се сретнат лично во мај откако Трамп ја прифати поканата за средба но напомена дека санкциите за Северна Кореја ќе останат.

Чунг Еуи-Јонг, специјалниот советник за национална безбедност на претседателот на Јужна Кореја, кој пред неколку дена имаше средба со Ким во Пјонгјанг, на Белата куќа ѝ ја пренесол пораката на Ким дека Северна Кореја е посветена на денуклеаризација и дека ќе ги замрзне нуклеарните тестирања.

-Доколку Трамп и Ким се сретнат по меѓукорејскиот самит, целосна денуклеаризација на Корејскиот Полуостров ќе може да почне да се остварува – изјави претседателот на Јужна Кореја, Мун Џае-Ин.

Трамп на „Твитер“ го опиша развојот на настаните како голем напредок, додавајќи дека санкциите кон Северна Кореја ќе останат на сила додека не се постигне цврст договор.

Досега ниту еден американски претседател се нема сретнато со лидер на Северна Кореја, а односите меѓу двете земји со години се толку лоши, што немаат ни дипломатски претставништва.


Северна Кореја побрза да одржи воена парада пред Олимписките игри


Сеул, 8 февруари, 2018 - 10:33 (META) 

Северна Кореја ненајавено денеска, пред самиот почеток на Олимписките игри во Јужна Кореја, ја одржала својата воена парада што вообичаено ја одржува во април. На севернокорејската телевизија била емитувана дури отпосле.

Официјален Пјонгјанг вообичаено многу се фали со своите воени паради и ги најавува, но за најновата се дозна откако се одржала, јавија јужнокорејски медиуми. Во Јужна Кореја овој потег се смета за враќање назад по неодамнешното затоплување на односите. Сеедно, претседателот на Јужна Кореја објави дека сепак ќе се сретне со севернокорејската олимписка делегација в сабота. Во делегацијата од 22 членови е и церемонијалниот шеф на државата Ким Јонг-нам, како и Ким Јо-џонг, влијателната сестра на севернокорејскиот лидер Ким Џонг-ун.

Годинашната парада што е одржана ненајавено и речиси без помпа, ја одбележува 70-годишнината од формирање на Корејската народна армија, која е формирана на 8 февруари 1948 година.

Зимските Олимписки игри ќе бидат одржани во Пјонгчанг, Јужна Кореја, од утре до 25 февруари 2018 година.


Северна Кореја ќе испрати 22 спортисти на ЗОИ во Јужна Кореја


Пјонгјанг, 21 јануари, 2018 - 18:10 (META) 

Меѓународниот олимписки комитет соопшти дека спортистите од Јужна и од Северна Кореја заедно ќе маршираат на свечената церемонија на отворањето на претстојната Зимска Олимпијада во Пјонгјанг.

ИОК, по денешниот состанок во Лозана со олимпските и државните претставници од двете земји, наведе и дека Северна Кореја на Зимските олимписки игри во соседната Јужна Кореја ќе ја претставуваат 22 натпреварувачи во 5 дисциплини.


Северна и Јужна Кореја постигнаа напредок во преговорите


Сеул, 9 јануари, 2018 - 18:56 (META) 

Северна и Јужна Кореја постигнаа договор во преговорите чија цел е смирување на тензиите, соопштија двете страни после првата средба на официјални лица по две години. Двете земји се сложиле да ги стивнат сегашните воени тензии и да одржат воени преговори.

После состанокот соопштија дека спортисти и севернокорејски официјални лица ќе отпатуваат на Зимските олимписки игри кои ќе се одржат во Јужна Кореја во февруари.

Северна Кореја ќе испрати во Јужна Кореја делегација која ќе биде составена од претставници на Националниот олимписки комитет, спортисти, навивачи и новинари.

До затоплување на односите дојде откако лидерот на Северна Кореја, Ким Џонг Ун на први јануари во новогодишното обраќање најави можност за учество на севернокорејските спортисти на олимписките игри во Јужна Кореја и покрај тензиите помеѓу двете тензии поради нуклеарната и балистичката програма на Пјонгјанг.

Јужна Кореја ќе биде домаќин на ЗОИ од 9 до 15 февруари, а Параолимписките игри почнуваат на 9 март.


Северна Кореја сепак ќе учествува на Зимските олимписки игри


Сеул, 9 јануари, 2018 - 11:26 (META) 

Северна Кореја ќе испрати свои спортисти на претстојните Зимски олимписки игри во Пјонгjанг, соопштија јужнокорејски функционери.

Покрај натпреварувачите, на Игрите ќе присуствуваат и навивачи, беше соопштено по првата средба на високо ниво по повеќе од две години. Средбата се одржа во Панмунџон во демилитаризираната зона.

Со цел да се овозможи настапот на Северна Кореја на Олимпијадата, Јужна Кореја ќе ја разгледа можноста за привремено укинување на санкциите кон својот сосед.


Папата предупредува дека нуклеарниот пожар може случајно да почне


Ватикан, 8 јануари, 2018 - 17:17 (META) 

Папата Франциск во обраќањето познато како „Состојба во светот“ апелираше до сите нации да го поддржат дијалогот со цел да се намалат тензиите на Корејскиот Полуостров и да се работи на правно обврзувачката забрана на нуклеарното оружје.

– Нуклеарното оружје мора да биде забрането – изјави поглаварот на Римокатоличката црква, цитирајќи документ објавен од папата Јован Дваесет и трети за време на Студената војна.

Папата Франциск потенцираше дека „не може да се негира дека пожарот може да почне случајно или во непредвидени услови“.

Апелот на папата до дипломатите е еден ден пред разговорите помеѓу Северна и Јужна Кореја, кои ќе бидат насочени на учеството на севернокорејските спортисти на Зимските олимписки игри во Јужна Кореја.

Папата упати повик и за зачувување на статус кво на Ерусалим, откако претседателот на САД, Доналд Трамп кон крајот на минатата година донесе одлука за признавање за главен град на Израел.

Тој се осврна и на климатските промени, повикувајќи ги државите да го почитуваат Парискиот договор за намалување на емисиите на јаглерод диоксид.


Јужна Кореја ѝ предложи преговори на Северна Кореја за учество на ЗОИ 2018


Сеул, 2 јануари, 2018 - 12:41 (META) 

Јужна Кореја денеска ѝ предложи на Северна Кореја на 9 јануари да одржат преговори на кои делегациите на двете земји ќе разговараат за можно учество на Северна Кореја на Зимските олимписки игри (ЗОИ) оваа година.

Ваквиот предлог доаѓа откако севернокорејскиот лидер Ким Џонг-ун изјави дека ја разгледува можноста за испраќање на екипи на Зимските олимписки игри во Пјонгчанг во Јужна Кореја во февруари.

Тој рекол дека двете страни треба итно да се состанат и да разговараат за ваквата можност, пренесува „Би-би-си“.

Јужнокорејскиот претседател Мун Џае-ин дека ваквата понуда ја смета како „шанса за кршење на мразот“ за подобрување на односите.

На состанокот на Владата денеска, Мун Џае-ин, исто така навел дека нуклеарната програма на Северна Кореја ќе биде во позадината на било какви преговори кои се однесуваат на спортот.


Трамп ја критикуваше Кина поради наводите дека ѝ дава нафта на Северна Кореја


Вашингтон, 28 декември, 2017 - 21:00 (META) 

Претседателот на САД, Доналд Трамп денеска ја критикуваше Кина во врска со објавените информации во медиумите дека нафта од кинеските бродови незаконски била префрлана во севернокорејски бродови на море, јавуваат светските агенции.

Трамп на „Твитер“ наведе дека Кина е „фатена во прекршок“ и дека е „многу разочаран што Кина дозволува нафтата да стигне во Северна Кореја“.

Американскиот претседател додаде дека „никогаш нема да има пријателско решение за севернокорејскиот проблем“, ако продолжи ваквата практика.

Министерството за надворешни работи на Кина вчера соопшти дека Пекинг ги применува санкциите на Обединетите нации кон Северна Кореја и дека нема информации за префрлање на нафта.


Лавров ги повика Вашингтон и Пјонгјанг да почнат преговори


Москва, 25 декември, 2017 - 10:08 (META) 

Рускиот министер за надворешни работи Сергеј Лавров денеска ги повика САД и Северна Кореја да почнат преговори, јавува руската новинска агенција РИА.

Лавров, како што пренесува „РИА“ изјавил дека Русија е подготвена да ги организира преговорите.

Официјална Москва веќе подолго време ги повикува Вашингтон и Пјонгјанг да одржат разговори за намалување на тензиите поради севернокорејската нуклеарна и ракетна програма.

Севернокорејското Министерство за надворешни работи вчера соопшти дека последните санкции на Обединетите Нации против Северна Кореја претставува објава на војна и потполна економска блокада на земјата.