!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Американците го поставиле системот „Патриот“ во Јужна Кореја


Вашингтон, 16 август, 2017 - 13:00 (META) 

Американската војска го поставила во Јужна Кореја противвоздушниот систем „Патриот“ за да одговори на заканите за ракетен напад од Северна Кореја.

Како што се наведува, 35-та бригада на американската војска во моментов ја обучува јужнокорејската војска како да ракува со системот.

Покрај „Патриот“, бригадата веќе поседува 13 ракетни системи, меѓу кои ПАК-2 со четири ракети и ПАК-3 со 16 ракети и тоа во Осана, Сувони, Кунсани и Кванџо.

Севернокорејските власти минатата недела соопштија дека разгледале план за ракетен напад на американската база на Гвам. Веднаш потоа, американскиот претседател Доналд Трамп рекол дека неговата земја е подготвена за економски, дипломатски, како и воени мерки против Северна Кореја.


Кина го прекинува увозот од Северна Кореја


Пекинг, 14 август, 2017 - 16:59 (META) 

За три недели Кина ќе престане да увезува севернокорејски јаглен, риба и друга стока предвидена со санкциите кои Обединетите нации ги воведено кон Северна Кореја поради нејзината нуклеарна програма.

Царинската служба на Кина најави дека од 5 септември на полноќ ќе престанат процедурите што се однесуваат на увоз на стока од Северна Кореја.

„После тоа, увозот на стока ќе биде забранет“, стои во соопштението.

Одлуката на Кина доаѓа во екот на тензиите меѓу Вашингтон и Пјонгјанг, чии лидери изминатите денови разменија закани.

Северна Кореја предупреди дека би можела да испука ракети во насока на американскиот остров Гуам, додека претседателот на САД вети дека Пјонгјанг ќе се соочи со „оган и бес“.

Советот за безбедност на ОН на 5 август усвои резолуција која предвидува воведување нови поостри санкции кон Северна Кореја, откако оваа земја во јули ја лансираше втората интерконтинентална балистичка ракета.

Текстот на документот, кој го предложија САД е усвоен едногласно, а резолуцијата ја поддржа и Кина.

Сепак, кинеските лидери се противат на целосното запирање на трговијата со Северна Кореја, наведувајќи дека тоа би можело да распространување на гладот.


Кина бара од Вашингтон и од Пјонгјанг да се воздржат од запалива реторика и акции


Пекинг, 12 август, 2017 - 15:19 (META) 

Кинескиот претседател Кси Џинпинг денеска ги повика Вашингтон и Пјонгјанг да се воздржат од „запаливата реторика и акции“ кои можат да ги зголемат тензиите на Корејскиот полуостров, јавуваат светските медиумите.

Кси Џинпинг во телефонски разговор со американскиот претседател Доналд Трамп рекол дека Пекинг и Вашингтон се заинтересирани за запирање на нуклеарната програма на Северна Кореја.

„Релеватните страни мора да се воздржат и да избегнуваат зборови и дела кои водат кон засилување на тензиите на Корејскиот полуостров“, навел кинескиот претседател.

Трамп, како што јавуваат агенциите, барал од Кина да изврши притисок на Пјонјанг поради нуклеарната програма која би можела да биде насочена кон САД.

Кина е најголемиот трговски партнер и извор на помош на Северна Кореја, но кинеските официјални претставници тврдат дека не можат да ги натераат властите во Пјонгјанг да прекинат со нуклеарните и ракетни програми.

Американскиот претседател Доналд Трамп синоќа најавил дека ќе го прекине својот одмор во Њу Џерси и дека в понеделник ќе одржи прес-конференција во Вашингтон во врска со тензиите со Северна Кореја.


Повеќе од три милиони севернокорејци се пријавиле во војска, тврди Пјонгјанг


Пјонгјанг, 12 август, 2017 - 11:24 (META) 

Северна Кореја денеска соопштила дека речиси три и пол милиони работници, членови на партијата и војници доброволно се пријавиле во народната војска за да пружат отпор на новите санкции на Обединетите нации и за да се борат против САД, како резултат на актуелните тензии помеѓу Пјонгјанг и Вашингтон, јавуваат светските агенции.

Официјалниот весник на Северна Кореја, „Родонг Синмун“ пишува дека волонтерите се пријавиле да се приклучат или повторно да се вклучат во народната војска откако севернокорејската централна новинска агенција (КЦНА) на почетокот на оваа недела соопшти дека Пјонгјанг ги осудува новите санкции поради ракетните проби.

Северна Кореја оваа недела се закани и дека ќе изврши ракетен напад на американскиот остров Гуам во Пацификот.

КЦНА во средата објави дека во Пјонгјанг се одржани масовни демонстрации во знак на поддршка на властите.

Во август 2015 година еден милион севернокорејци се пријавија во војска по експлозијата на мина во демилитаризираната зона помеѓу Северна и Јужна Кореја, што ги подигна тензиите меѓу двете земји.

Северна Кореја и во 2013 година се закануваше дека ќе ги нападне американските воени бази во Гуам и на Хаваи.


Војната со Северна Кореја би била катастрофална, смета Матис


Вашингтон, 11 август, 2017 - 10:40 (META) 

Министерот за одбрана на САД, Џејмс Матис, предупреди дека војната со Северна Кореја би била катастрофална.
Тој наведе дека односот на двете држави треба да се реши по дипломатски пат.

Матис изјави дека трудот на САД се канализира по дипломатски пат и акција и дека на тој начин се добиваат резултати.

– Трагедијата на војната на сите им е позната – рече Матис и додаде дека на војна не ѝ е потребна уште една карактеристика освен дека е катастрофална.


ЕУ ги прошири санкциите кон Северна Кореја


Брисел, 10 август, 2017 - 20:17 (META) 

Европската Унија денеска ги прошири сакнциите кон Северна Кореја, додавјќи на црната листа неколкумина севернокорејски функционери и фирми, јавуваат светските агенции. Ваквата одлука на ЕУ следи по заострувањето на реториката меѓу Северна Кореја и САД поради нуклеарните проби и тестирањата на балистички ракети што ги врши Пјонгјанг.

На списокот, како што пренесуваат агенциите, се додадени девет лица и четири фирми. Со ова, на црната листа на ЕУ сега се наоѓаат 103 лица и 57 фирми.

Северна Кореја вчера предупреди дека би можела да истрела ракета во правец на американскиот остров Гуам во Пацификот, на што претседателот на САД, Доналд Трамп, им порача на властите во Пјонгјанг дека ќе се соочат со „оган и гнев“.

Советот за безбедност на Обединетите нации на 5 август донесе резолуција која предвидува воведување нови, поостри санкции кон Северна Кореја, откако во јули властите во Пјонгјанг тестираа нова интерконтинентална балистичка ракета, која, како што изјави севернокорејскиот лидер, Ким Џонг-ун, може да го погоди копното на САД.


Тилерсон: Нема непосредна опасност од Северна Кореја


Вашингтон, 9 август, 2017 - 15:24 (META) 

Американскиот државен секретар, Рекс Тилерсон, непосредно пред слетувањето во Гуам, изјави дека не верува дека постои непосредна закана од Северна Кореја и дека Американците не треба да бидат загрижени.

– Претседателот испрати силна порака и тоа на јазикот што Ким Јонг-ун единствено го разбира – рече Тилерсон.

Претходно Пјонгјанг предупреди дека може да испука ракети во насока кон американскиот остров Гуам во Тихиот Океан, а претседателот на САД, Доналд Трамп, вети дека севернокорејскиот режим ќе се соочи со „оган и бес“.


Трамп бара цврста и одлучна реакција кон Северна Кореја


Вашингтон, 8 август, 2017 - 15:12 (META) 

Американскиот претседател Доналд Трамп им заблагодари на државите што се приклучија кон санкциите за Северна Кореја поради нејзината нуклеарна програма.

Пјонгјанг во јули тестираше две интерконтинентални балистички ракети.

„По многу неуспех, конечно одлучивме заедно да реагираме на опасноста што ја претставува Северна Кореја. Мораме да бидеме цврсти и одлучни“, напиша Трамп на „Твитер“.

Советот за безбедност на ОН во саботата донесе нова резолуција за Северна Кореја.


Доналд Трамп стави потпис на санкциите за Русија


Вашингтон, 3 август, 2017 - 11:14 (META) 

Американскиот претседател Доналд Трамп го потпиша законот со кој се воведуваат санкции за Русија поради мешање во минатогодишните американски избори, а санкции се предвидени и за Иран и за Северна Кореја.

Членовите на Конгресот речиси едногласно се изјаснија за легислативата, што им овозможи да отстранат секаква шанса за вето од претседателот.

Законот поставува нови ограничувања за американските компании што работат со руски енергетски компании и ги кодифицира санкциите поставени од поранешниот претседател Барак Обама.

Законот што Трамп го потпиша беше карактеризиран во една од изјавите на претседателот како испраќање јасна порака до Иран и до Северна Кореја дека американскиот народ нема да толерира опасно и дестабилизирачко однесување.


Трамп е подготвен за војна со Северна Кореја, тврди сенаторот Грејем


Вашингтон, 1 август, 2017 - 19:57 (META) 

Американскиот сенатор Линдзи Грејем изјави дека претседателот Доналд Трамп е подготвен за војна со Северна Кореја доколку Пјонгјанг продолжи да се обидува да ги погоди САД со нуклеарни проектили.

– Претседателот Трамп рече: „Нема да ви дозволам да направите интерконтинентална балистичка ракета со боева глава за да ја погодите Америка“. Тие се движат во една насока и нема да ја напуштат ако не мислат дека на маса има веродостојна воена опција – рече републиканскиот сенатор за телевизијата „Ен-би-си“.

Грејем рече дека постои воена опција, а тоа е уништување на севернокорејската програма и на самата Северна Кореја.

Северна Кореја во петокот лансираше интерконтинентална ракета за која тврди дека би можела да досегна до територијата на САД.

Поради тоа, Трамп изрази незадоволство кон Кина и во саботата изјави дека нема да му дозволи на Пекинг да не прави ништо во врска со Северна Кореја.

– Да сум Кина, би се обидел да направам нешто. Северна Кореја ќе биде запрена, или воено или дипломатски – рече Трамп.