!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Агенција за филм: Вратени 300.000 евра од „Јадран филм“ за неснимената „Македонија“


Скопје, 23 ноември, 2017 - 13:07 (META) 

Со правосилно извршно решение, Агенцијата за филм успеала да врати 300.000 евра државни пари од хрватската продукција „Јадран филм“, како последица на неисполнувањето на договорот за производство на играната серија „Македонија“.

Како што извести директорот на Агенцијата за филм, Горјан Тозија, сумата од 19 милиони денари, односно околу 300.000 евра, не е целосната сума што државата му ја исплатила на хрватскиот продуцент Винко Грубишиќ. Тој добил 1,1 милион евра со обврска до септември годинава да достави готови епизоди од првата сезона.

За наплатата на другите пари ќе се почека да заврши истрагата на Јавното обвинителство и на Финансиската полиција кои ја проверуваат документацијата за целиот период, од објавениот конкурс во декември 2015 година до 4 септември годинава, кога истече рокот за предавање на 14 епизоди од серијалот.

– Хрватската продукција „Јадран филм“ имаше обврска до септември годинава да ни достави готови 14 епизоди од серијалот „Македонија“. Тоа не беше сторено и договорот со нив беше раскинат затоа што во него постои извршна клаузула. Во недостиг од снимени материјали, односно непостоење на серија, „Јадран филм“ продолжува да манипулира со јавноста пласирајќи кратки видеозаписи снимени во Загреб кои имаат цел да остават впечаток во јавноста дека нешто се работи. Мојот апел е јавноста да не наседнува на овие трикови кои имаат цел на целата работа да ѝ дадат политичка заднина, наместо целата работа да се заврши правно – порачува Тозија.

Тој посочува дека на „Јадран филм“ во Хрватска сметката му е блокирана, а пред два дена хрватската државна телевизија му го раскинала договор за продукција на играната серија „Гричка вештица“. Во официјалниот одговор на ХТВ е наведено дека Винко Грубишиќ не ги исполнувал обврските од договорот. Исто така, во Хрватска се водат неколку судски спорови во последните 15 години во кои е вмешана „Јадран филм“, вели Тозија.


„Твин Пикс“ по 25 години се враќа на телевизија


Лос Анџелес, 9 октомври, 2015 - 10:54 (META) 

Култната телевизиска серија од 90-тите години на минатиот век, „Твин Пикс“, по 25 години од прикажувањето на последната епизода, повторно се враќа на ТВ-екраните.

Премиерата е најавена за 2016 година, а режисерот Дeјвид Линч и екипата се во полн ек на снимање. Серијата престана да се емитува во 1991 година, иако заврши со навестување за продолжение, моментот кога духот на Лора Палмер му шепнува на агентот на ФБИ, Дејли Купер, дека повторно ќе се сретнат за 25 години.

Новиот промотивен видеозапис, кој прави и ретроспектива на дејството во изминатите две сезони, најавува многу страст, алчност, љубомора и интриги во новите продолженија.


Софија Вергара во „Симпсонови“


Лос Анџелес, 11 август, 2015 - 15:15 (META) 

Глумицата Софија Вергара ќе го позајми својот глас во серијата „Симпсонови“.
Американско-колумбиската ѕвезда ќе ја игра професорката Барера во една епизода од 27. сезона на хит-серијата.

Во Барера ќе биде заљубен Барт Симпсон и неговиот учител Скинер.

Вергара е ѕвезда во серијата „Модерна фамилија“ и е најплатена ТВ-актерка во САД.

Серијата „Симпсонови“ се прикажува од 1989 година.


Ќе се снима детска авантура во дивина „Потрага по загубеното богатство“


Скопје, 12 јуни, 2015 - 16:13 (META) 

„Потрага по загубеното богатство“ е темата на филмската авантура што летово ќе се снима во рамки на филмскот детски камп во периодот од 26 јуни до 1 јули, а во организација на КЦ „Тинтири минтири“ и „Аурипигмент продукција“ од Скопје.

Група деца секојдневно ќе работат на снимање филм на тема „Потрага по загубеното богатство“, каде децата вистински ќе бараат богатство и ќе го најдат, а сето тоа ќе биде снимено со филмска камера. Во текот на снимањата, покрај усовршувањето на актерските вештини, децата ќе стекнат основни знаења за тоа што и како се режира, како се снима и се продуцира едно филмско дело, како се поставува природно и вештачко светло, работа со тон и уште многу други работи поврзани со филмот.

Воедно, со помош на инструкторот за техники на преживување во природа, децата ќе стекнат и основни вештини за снаоѓање во природа и напредни извиднички техники: палење оган, подготвување храна во природни услови и користење природни ресурси, поставување камп, прва помош и заштита и сл.

– Прашањето што ќе нè раководи при снимањето и другите активности е како ќе се снајдеш ако си изгубен на пуст остров, на место без цивилизација и без техника? Филмот што ќе се сними ќе биде првата македоска авантура во дивина, а сите заинтресирани ќе можат премиерно да го гледаат на големо платно – вели Кузман Кузмановски, режисер и раководител на КЦ „Тинтири минтири“.

Пријавувањето за кампот е во тек, а рокот е до 20 јуни 2015 година.

Снимениот филм ќе биде презентиран јавно, спакуван како адаптирано аудио-визуелно четиво за деца. Секое дете учесник во кампот ќе добие примерок од финалниот производ и дел од „пронајденото богатство“.