!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поплава разори село во Велика Британија


Лондон, 19 јули, 2017 - 11:00 (META) 

Голема поплава вчера го опустоши Корнвол во Велика Британија. Уништени се куќи во селото Коврак, каде со хеликоптери се спасувало загрозеното население.

Локалните жители велат дека крајбрежното подрачје во попладневните часови било зафатено од силни дождови и од град. Невремето траело околу два часа, а нивото на водата во некои места достигнало и до метар и пол.

Брзаците ги поплавиле куќите и нанеле голема штета. Жителите на селото со хеликоптери биле вадени од своите домови.
Претставник на локалните власти за „Би-би-си“ изјави дека не можел да стигне до центарот на Коврак затоа што главната улица била под вода.

– Селото за неколку секунди беше поплавено. Не можеме да ја преминеме реката – изјави претставникот на властите.
Локална жителка за „Ај-ти-ви њуз“ изјави дека во селото нема објект кој не е поплавен или оштетен.

– Ова е ужасно. Куќа која се наоѓа спроти мојата за неколку секунди се наполни со вода – изјави таа.


Сиромаштијата во руралните подрачја е сериозен проблем за државата, покажуваат истражувањата


Скопје, 18 јули, 2017 - 16:12 (META) 

Околу 87 проценти од територијата на Македонија e рурално подрачје, а во него живее 45 отсто од вкупното население. Сиромаштија во руралните подрачја е сериозен проблем за државата.

Ова го покажува извештајот „Повеќедимензионална анализа за сиромаштија во РМ“, изработен од Федерацијата на фармерите на Македонија во партнерство со Факултетот за земјоделски науки и храна при УКИМ во Скопје и во консултација со Македонската платформа против сиромаштија.

– Руралните подрачја трпат опустошување, депопулација, поради внатрешната миграција која изнесува околу 34 отсто. Тоа значи дека 34 проценти од руралното население се преселило во урбаните центри. Ако се додаде и надворешната миграција, тоа е веќе сериозен голем проблем не само за руралните средини, туку и за државата воопшто – истакна Емељ Туна, еден од авторите на анализата.

Истражувањето покажува дека 63 проценти од руралните жени се неактивни, немаат пристап до едукација, многу малку се вработени, а ако се вработени, добиваат половина од платата што би ја зел маж.

Во анализата стои дека Македонија е една од најсиромашните земји во Европа. Од вкупните миграции, на внатрешни, од село во град, отпаѓаат 42,4 отсто во Североисточниот Регион и 61 процент во Полошко.


Мечка рика по мечето низ Шар Планина, цело Беловиште во страв


Беловиште, 10 јули, 2017 - 15:24 (META) 

Со денови кружи околу селото и рика, веројатно си го бара мечето. Најмногу кога ќе почне да се стемнува. Страшно е и да се слуша, а камоли да помислиш што би било кога така гневна би пресретнала човек. А можеби се и повеќе мечки, сепак сме на Шар Планина, објаснува жител на тетовското село Беловиште, кое неколку дена живее во страв.

Како што објаснува тој, според најприсутната верзија во селото, животното што ги застрашува беловиштани е мечка чие мече наводно било заробено во некоја плевна, а потоа однесено од селото, па таа го бара. Но има и друга верзија, дека не станува збор за мајка која трага по чедото, туку за мечка која привлечена од отпадоците од трите многупосетувани ресторани се приближила до селото и сега сее страв. Но, вели, и тоа мора да се прифати со резерва, оти како што раскажуваат овчарите, има поприличо мечки по Шар Планина, па можно е и да се „довикуваат“.

– Не можеш сигурно да знаеш, не сме научници, а и мечките не носат дресови. Знам само дека мечка рика околу селото и страшно е да се слуша тоа. Најмногу од луѓето зборуваат дека и е земено мечето, и си го бара. Неколкумина виделе мечка, ама нема како да утврдиш дали виделе една мечка, или повеќе различни мечки. Оти очевидците се поголем број постари луѓе, кај кои видот не е како што им бил некогаш  – вели соговорникот.

Беловиште е планинско село, во кое има многу издвоени, оддалечени куќи, и нивните станари се соочуваат со најголема опасност од животното, посебно оние што живеат сами.

– Ако е така како што најмногу се слуша, ако навистина е мечка на која и е земено мечето, ако некој го најде и го врати, мечката ќе се смири. Инаку, не верувам дека и таа и ние ќе имаме мир. Ако е пак нешто друго во прашање, опасноста останува отприлика иста – вели жителот на Беловиште, село со голем број иселеници, главно во САД, од кои голем дел сега во селото ги минуваат летните одмори, кои се исто така загрижени поради опасноста да бидат нападнати од мечка.

Како што гласи најпрекажуваната верзија, пред неколку денови мечката се симнала до селото со двете мечиња, при што едното влегло во плевна и еден селанец го затворил. По ден или два мечето било однесено од селото. Како што се шпекулира, наводно било однесено во скопската Зоолошка градина.

Но во скопската Зоолошка градина велат дека кај нив не е донесено мече. Истото го кажаа и од битолската Зоолошка градина.

Александар Стојанов од Македонското еколошко друштво, за „Мета“ објаснува дека ако навистина било така заробено, мечето е најверојатно продадено на диво на некој одгледувач.

– Ги има многу на Балканот и најверојатно е продадено на диво на некоја дива „зоолошка“ градина – вели тој.

Стојанов вели дека сега е неопходно да се преземат сите чекори за мечето да се пронајде и да се врати на неговата мајка. За случајот го алармирале и Државниот инспекторат за животна средина, за и официјално да се отпочне потрага по мечето.

Инаку, во селото сега главниот разговор на таа тема e за мечето кое пред некој ден прескокнувајќи ја оградата упаднало во двор на постара жена, која живее сама. Таа првин помислила дека е некое куче, но потоа кога му се приближила видела дека е мече, и му ја отворила портата за да излезе. Мечето не излегло, туку пак се прекачило преку оградата.

Дури и ако се покаже дека тоа што се случува во Беловиште не е гнев поради одземено мече, туку дека мечки, кои сепак на Шар Планина ги има во значителен број, се приближиле до селото во потрага по храна, опасноста за Беловиште останува. Посебно за жителите на издвоените куќи, поприлично далеку од главното јадро на селото, од кои голем број се самци.


Жители на Волковија протестираа поради загадувањето на селските извори


Тетово, 26 февруари, 2017 - 16:35 (META) 

Со мирен протест, жителите од тетовското село Волковија го искажаа своето незадоволство поради, како што рекоа, загадувањето на селските извори од кои се снабдуваат со вода за пиење.

Тие посочијa дека изворите се загадуваат поради градежни работи кои ги врши приватна фирма, ангажирана за изградба на воспитно-поправен дом, кој се гради во близина на изворите и во атарот на нивното село.

Според нив, фирмата врши нестручни ископи околу изворите за водоводниот систем на домот да се приклучи и да се снабдува со вода за пиење од селските извори.

– Деновиве почнаа да копаат околу изворите. Отворија пат и, како што гледате, тој пат се спушти до самите извори. Земјениот материјал од дупките кои ги ископаа, се спушта директно во изворите кои веќе се заматени, а и вреќи од цемент има тука. Ова од чист селски извор стана депонија – вели Русе Михајловски, жител на Волковија.

Жителите велат дека случајот го пријавиле во полиција и бараат негово целосно расветлување. Тие не се согласуваат водоводниот систем од воспитно-поправниот дом да се приклучи на селските извори, затоа што ќе се доведе во прашање снабдувањето со вода за пиење за селото.

Веќе неколку години мештаните од Волковија протестираат поради изградбата домот, кој, според нив, ќе доведе до појава на криминални дејства во нивното село, со оглед на тоа каква категорија на луѓе треба да престојуваат во оваа установа.

Домот сè уште се гради, а според најавите на надлежните, требаше да профункционира минатата година.


На патот кон гостиварско Куново има половина метар снег, селото е отсечено


Гостивар, 11 јануари, 2017 - 13:46 (META) 

Гостиварско Куново е отсечено од градот бидејќи на патот кој води до нивното село има 50 сантиметри снег. Жителите велат дека се обратиле до сите институции надлежни за расчистување на патиштата, но не добиле позитивен одговор.

– Дваесетина жители во ова село се целосно отсечени од Гостивар, патот е прооден само за движење пеш или со теренски возила и со синџири за снег. Покрај овие жители, во селото има и животни и некои непостојани жители на селото ги чуваат и патуваат пеш до Гоствар за да ги нахранат. Ние сме свесни дека не може сите патишта да имаат ист приоритет, на тоа се спремни и жителите, па имаат резерви од продукти, но тоа не значи нашиот пат воопшто да не се се чисти – велат од месната заедница од Куново.

Републичкиот центар за управување со кризи Тетово (РЦУК) известува дека сообраќајот се одвива во зимски услови и отежнато, особено на повисоките планински села каде е неопходна употреба на зимска опрема.

– Има одредени забелешки од граѓани кои се жалат на несоодветно исчистени патни правци од страна на „Македонија пат“ – Тетово, а особено за патниот правец од село Калник до Палчишка Река и стариот пат Желино – Групчин. По разговорот со раководителот на „Македонија пат“ – Тетово, добиена е информација дека при првата можност посочените правци повторно ќе бидат исчистени и проширени од нивна страна – велат од РЦУК  Тетово.

Оттаму додаваат дека магистралниот пат Гостивар – Стража е прооден и проширен и има фрлено сол. На кракот Маврово – Дебар, има забрана за движење за тешки товарни моторни возила.

Кружниот тек околу Мавровското Езеро е исчистен и прооден во еден правец. Се очекува машина за целосно расчистување на патниот правец околу езерото во двата правца.

За Лазарополе и за Галичник засега не е планирано чистење на патот од наносите од снег, информираат Центарот за управување со кризи.


Љубчо Георгиевски предлага секое село да стане општина


Скопје, 30 септември, 2016 - 14:17 (META) 

Лидерот на ВМРО-НП, Љубчо Георгиевски, предлага секое село да стане општина и со тоа да добие политички и економски влог. Тој на денешната прес-конференција рече дека ако има избори, оваа идеја ќе биде дел од партиската програма.

– Секој ден ги слушам ВМРО-ДПМНЕ и СДСМ како се натпреваруваат со решенија за микропроблеми. Ние сакаме да пласираме системско политичко решение кое ќе донесе промени на многу нешта во Македонија. Секое село може да стане општина, да се направи целосна децентрализација. Верувам дека оваа провокација ќе биде прифатена од многу структури – изјави Георгиевски.

Според него, така ќе се реши проблемот со иселувањето на луѓето од селата во градовите и во странство, а ќе се реши и голема неправда.

– Сега сите општини во Македонија работат за Општина Центар, која не сака да ѝ се прави тоа што ѝ се прави – рече Георгиевски.

Ако сакате во некое село да направите нешто, дададе тој, таму нема со кого да комуницирате.

– Македонија е веројатно единствената земја што функционира на овој начин. Ако влеземе во ЕУ, селата, бидејќи немаат ниту жиро-сметки, нема да може да аплицираат за проекти. Ако оваа децентрализација не се направи сега, ќе мора тогаш. Ова ќе треба да биде проследено и со финансиска децентрализација – рече Георгиевски.

Со ова, смета лидерот на ВМРО-НП, ќе се релаксираат и меѓуетничките односи.

Во однос на предизборните коалиции, тој вели дека во најблиска соработка се со партиите од десниот блок. Контакт имаат и со СДСМ, но, како што вели, има чувство дека Социјадемократскиот сојуз се откажал од идејата за една голема коалиција.

На прашањето дали ќе има избори на 11 декември, Георгиевски вели дека се подготвува како да ќе има, иако последнава недела и до него стасуваат повеќе шпекулации дека изборите повторно ќе се одложат.


Нова фабрика за вода во Гари


Дебар, 19 септември, 2016 - 16:38 (META) 

Во близина на дебарското село Гари, денеска беше отворена фабриката за вода „Маја“.

Почетната инвестиција на хрватскиот инвеститор, компанијата „Мали Лошињ“, изнесуваше 300.000 евра, а проценетите 7,7 милиони евра инвестиција, достигнаа 14 милиони евра за овие три и пол години, колку што траеше процесот на реализација.

Моменталниот број на вработени е 25, а според најавите на инвеститорот, тој наскоро ќе се зголеми. Дневното производство на амбалажирана вода може да достигне и до 200.000 литри.

Произведената вода во оваа фабрика е првенствено наменета за извоз во соседните земји, арапските земји, Хрватска и во Русија.


Повратник од затвор пукал во братот


Штип, 4 јуни, 2016 - 15:49 (META) 

Синоќа во штипската болница со прострелна рана е донесен Ќ.М. (31), жител на јуручкото село Ебиплија. Во него со пушка пукал родениот брат Ш.М.(35), кој во март 2000 година, ладнокравно, без причина, уби тројца жители на карбинското село Црвулево, а рани двајца.

Еден од ранетите тогаш беше неговиот брат, истиот од синоќешниот инцидент. Првпат беше ранет во ногата, а синоќа братот му ја прострелал раката. Според полицијата, се работи за нарушени семејни односи.

– Ш.М. од огнено оружје, кое го поседувал без одобрение, испукал неколку истрели кон својот брат Ќ.М.(31), при што му нанел прострелна рана во пределот на десната надлактица. Истиот со возило на брза помош бил префрлен во болницата во Штип, каде бил задржан на лекување – велат од СВР Штип.

Пукањето ги крена на нозе жителите на подплачковичките села во општината Карбинци. Меѓу нив проструи веста дека на слобода сега е 40-годишниот Мустафа, кој во црно зави три семејства. Со ловечка пушка в раце, прво убил овчар, па потоа влегол во дворот на жител на селото, го повикал и откако тој се појавил, пукал во него и го убил. На ист начин убил уште еден жител на селото, а неговата сопруга беше ранета. По пукањето жителите на Црвуљево ја каменуваа куќата на неговото семејство, им го запалија трлото и побараа да се иселат. Мустафа прво доби 20-годишна казна затвор, што потоа му беше намалена на 15 години. Во затворот Идризово, каде ја издржуваше затворската казна, со нож од приборот за јадење трипати прободе затвореник.

Синот на еден од убиените по судењето изјави дека судот бил преблаг со досудувањето на казната и не знае за каков тип убиец се работи.

По синоќешниот инцидент, непознато е како Мустафа дошол до пушка. Тоа треба да го откријат истражните органи.


Реакција на Општина Велес: Вложуваме напори да ги исполниме барањата на жителите


Велес, 28 декември, 2015 - 15:54 (META) 

Агенцијата „Мета“ објави видеосторија со наслов „Велес: Десет села отсечени од цивилизацијата и од буџетот“ за проблемите и за тешките услови за живеење на жителите од околните села поради лошата патна инфраструктура.

Во сторијата прашавме каде се трошат парите на жителите и зошто локалната власт секоја година ги ветува, но не ги гради патиштата до нивните села.

Во времето на подготовката на прилогот, од Општината не одговорија на поставените прашања.

По објавувањето на сторијата, реагираа од Општината Велес.

Во реакцијата, испратена до локалните медиуми, се вели дека сторијата претставува „обид за презентирање на локалната самоуправа во негативно светло, игнорирајќи го сето она што е направено во досегашниот период за споменатите населени места“.

Од Општината велат дека „во село Сливник досега биле реализирани неколку крупни проекти, како што се изградбата на новото училиште и поставување на водоводната мрежа, реконструкција на улично осветлување и редовно тампонирање на патот до селото“.

Што се однесува до селото Рлевци, пак, во реакцијата стои дека „Општината вложува напори да ги исполнува барањата на жителите“.

Сепак, нема одговор на клучните прашања и за проблемите што беа третирани во сторијата.

Градоначалникот Славчо Чадиев не одговори на прашањата зошто патиштата до овие села не се изградени, иако со години се ветуваа и беа предвидени во програмите и во буџетите за реализација на Општината и каде се парите за нивната изградба.


Велес: Десет села отсечени од цивилизацијата и од буџетот


Велес, 25 декември, 2015 - 9:20 (META) 

Илјада жители од десетина велешки села и во 21 век живеат отсечени од цивилизацијата. Со години бараат да им се асфалтираат полските патишта што се планираат во буџетите на Општината.

Тие беа планирани и во годинешниот буџет.

Наместо 16.800.000 денари за изградба и за реконструкција на локални патишта и на улици, локалните власти, за деветте месеци од годинава, за тоа потрошиле само четири милиони денари.

Зошто не ги исполниле ветувањата што им ги дале на граѓаните и каде се парите предвидени за изградба на овие патишта?