!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Украдени 24 монитори од училиште во гостиварски Вруток


Тетово/Гостивар, 19 април, 2017 - 12:38 (META) 

Во основното училиште „Лирија“ во село Вруток, Гостиварско, украдени се 24 компјутерски монитори. Тешката кражба се случила во периодот од 14 до 18 овој месец.

Крадците во училиштето влегле преку необезбедениот сутерен на објектот, а потоа насилно ги отвориле вратите од двете училници на приземјето и одзеле 24 компјутерски монитори, откако ги пресекле сите кабли со кои тие биле поврзани на главниот компјутер.

Според полицијата, со кражбата на мониторите, сторителите стекнале имотна корист која се проценува на околу 40.000 денари, а причинетата материјална штета изнесува 15.000 денари. Полициска екипа извршила увид во училиштето и работи на откривање на сторителите.

Во Тетово, пак, е пријавен случај на оштетување на прозорци во основното училиште „Андреја Савески – Кикиш“. Таму непознати сторители скршиле шест прозорски стакла и предизвикале материјална штета која се проценува на околу 10.000 денари.

Од полицијата велат дека преземаат мерки за идентификување и за пронаоѓање на сторителите.


Закони за фискална и за амнестија на затворениците Албанци, најави лидерот на ДПА


Гостивар, 24 ноември, 2016 - 21:54 (META) 

Донесување на закон за фискална амнестија со кој сите Албанци ќе бидат ослободени од долговите кон државата и закон за амнестија на затворениците Албанци, најави лидерот на ДПА и носител на кандидатската листа за пратеници во шестата изборна единица, Мендух Тачи, на вечерашниот собир во гостиварското село Вруток.

– Ова е многу важно и затоа тоа ќе биде првото што ќе го направиме по изборите – рече Тачи.

Лидерот на ДПА истакна дека кандидатите за пратеници кои ги понудила неговата партија на овие избори се нови лица со исклучително образование и кои немаат дамки во своите биографии.

Тачи зборуваше и за политиката на нивниот конкурент ДУИ, за која истакна дека не ги исполнила барањата на Албанците и секогаш ги оставала настрана нивните барања за подобра инфраструктура и за подобар живот.