!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Два филмски фестивали ќе се одржат во Штип неделава


Штип, 18 април, 2017 - 10:30 (META) 

Штип неделава ќе биде дoмаќин на два филмски фестивали. Вечерва во Домот на млади ќе гостува филмскиот планински фестивал „Ехо“, со програма која е селекција од најдобрите и наградувани филмови на фестивалот, што лани во октомври се одржа во Скопје.

Филмовите изобилуваат со убавините на планината, зборуваат за планинарите, искачувањата и за слободата. Фестивалот го организираат Дом на млади од Штип и Форумот за креативна авангарда.

В среда и в четврток, 19 и 20 април, ќе гостува Филозофскиот филмски фестивал и во мултимедијалниот центар на Универзитетот „Гоце Делчев“, ќе бидат прикажани вкупно шест филмови.


На огласот за 600 полицајци се пријавиле 3.972 кандидати, денеска почна селекцијата


Скопје, 3 август, 2016 - 15:41 (META) 

На конкурсот за вработување на нови 600 полицајци се пријавиле вкупно 3.972 кандидати. Конечната листа на тие што ќе бидат примени во МВР, треба да биде позната на почетокот на октомври, кога треба да завршат сите фази за селекција на кандидати.

Првата фаза од селекцијата почна денеска во касарните „Ѓорче Петров“ и „Илинден“ и во тренинг-центарот за обука во Идризово, каде се проверуваат физичките способности на пријавените кандидати.

Од пријавените, 3.063 се Македонци, додека другите 909 се припадници на другите етнички заедници. Повеќе од 800 од кандидати за нови полицајци се жени.

Инаку, на ланскиот конкурс за прием на 600 полицајци, пријавени беа 2.622 кандидати.

– Постапката за селекција на кандидатите ја спроведува комисија која е формирана од страна на министерот за внатрешни работи. Постапката се спроведува во повеќе фази – изјави помошникот на министерот од одделот за односи со јавноста и за стратешки прашања при МВР, Јордан Ламановски.

Во втората фаза ќе се проверуваат интелектуалните и моторичките способности, а во третата фаза ќе има писмено тестирање на кандидатите, кое ќе се состои од општообразовен тест.

Како што посочи Ламановски, за сите кандидати што ќе ги поминат фазите на селекција, ќе биде спроведено интервју.

Кандидатите кои ќе влезат на кончената листа, ќе одат на едногодишна обука за полициски службеник, која ќе се состои од девет месеци теорија и три месеци физичка обука.

Министерството за внатрешни работи го објави конкурсот за прием на нови полицајци на 15 јули и траеше до 30 јули.


Нови 125 професионални војници примени во АРМ


Скопје, 19 јули, 2016 - 13:06 (META) 

Нови 125 професионални војници денеска беа примени во Армијата на Република Македонија (АРМ), откако ги поминаа тестовите за селекција.

Министерот за одбрана, Зоран Јолевски, на свеченоста во касарната „Илинден“ истакна дека униформата на АРМ претставува гордост и престиж, а на новите војници им порача дека им претстои период исполнет со предизвици и со многу работа.

– Упорно и посветено градиме армија која ќе биде подготвена на национално ниво, но истовремено ќе ги извршува и обврските што произлегуваат од стратегиската цел на Република Македонија – полноправна интеграција во НАТО и во Европската Унија – рече Јолевски.

Тој посочи дека од новите 125 професионални војници, 48 го завршиле курсот и ќе бидат примени во специјалните единици на АРМ.

Министерот најави дека наскоро ќе биде објавен нов конкурс за прием на доплнителни 90 професионални војници и на 25 лица кои имаат завршено високо образование во одредени струки, како лекари, психолози, инженери итн.

Прашан за исплатата на војниците, Јолевски рече дека Министерството за обрана има доволно пари за плати на војската и дека војниците редовно примаат плата, а биле исплатени и сите дневници, заклучно со април и со почетокот на мај.


МВР со новите 600 полицајци продолжува со партизација на полицијата, сметаат експертите


Скопје, 15 јули, 2016 - 12:47 (META) 

Министерството за внатрешни работи денеска го распиша огласот за нови 600 вработувања во оваа институција. Како што може да се прочита во него, станува збор за прием на „600 извршители на работното место полицаец“.

За експертите, вработувањето на нови 600 полицајци во МВР е со цел да се пополнат полициски редови со кадри, за чија селекција најважниот критериум ќе биде партиската припадност на кандидатите.

Според пратеникот и претседател на Демократскиот сојуз, Павле Трајанов, станува збор за целосна партизација на полицијата, процес кој владејачката гарнитура го спроведува во континуитет. Трајанов вели дека во изминатите неколку години, околу 3.000 полициски службеници, користејќи ги новите услови за пензионирање, го напуштиле министерството, а сега на нивно место се вработуваат кадри чија селекција оди под партиски клуч.

Тој вели дека опозициските партии што се дел од преговарачкиот процес во Пржино, треба да го блокираат огласот и да не се дозволи понатамошна партизација на полицијата.

– Практично, пред неколку години се сменија условите за пензионирање на полициските службеници, што овозможуваа пензионирање пет години порано и со добри услови. Повеќе припадници на полицијата, поради притисоци, партиското мешање во МВР, одлучија да ги искористат овие услови и да заминат во пензија. Сега се одлучи на нивно место да се регрутираат партиски кадри, чија селекција оди преку партиските штабови на ВМРО-ДПМНЕ и на ДУИ. Од МВР оглаот ќе го правдаат со тоа дека имаат потреба од луѓе, поради состојбите во државата, мигрантската криза, протестите, но се работи за процес на целосна партизација на полицијата, која се одвива во континуитет – вели Трајнов.

Идентичен е ставот и на универзитетскиот професор Владимир Пивоваров, кој вели дека МВР е претворено во партиско-социјална установа „за прием на кадри кои треба да носат гласови на избори“.

– Не знам до каде ќе води ова проширување на администрацијата и од кои средства таа ќе се плаќа. Овде не се прави полиција на државата, туку полиција на партијата, односно партиска војска. Во извештајот на Прибе јасно е нотирано дека мора да се работи на процесот на одвојување на партијата од државата, но продолжува да се прави токму спротивното и се оди во крајност – вели Пивоваров.

Со огласот од пред една година и овој сега, за една година во МВР се примаат 1.200 нови полицајци. За ланскиот конкурс, Пивоваров вели дека бил обележан со нерегуларности при изборот на кандидати, кои оделе до манипулација со законската регулатива.

– Јас барав да се поништи тој конкурс бидејќи имаше многу неправилности. На кандидатите кои не беа примени, не им беше дозволен увид во извештаите за нивните постигнати резулати, а тоа беше вметнато во подзаконските акти. Таму имаше кандидати кои имаа далеку повисоки резултати од оние 600 кои беа примени – вели Пивоваров.

Според податоци кои „Блумберг“ ги објави во 2008 година, во Македонија имало 9.905 полицајци.

Во 2014 година, поранешниот помошник-министер за односи со јавноста на МВР, Иво Котевски, изјави дека имаме околу 8.500 полицијаци, а според буџетот за плати, во МВР (вклучувајќи ја и администрацијата) имало 10.925 вработени.

За денеска во 13 часот, МВР најави прес-конференција на министерот за внатрешни работи Митко Чавков во врска со огласот за вработување на нови полицајци.


На конкурсот на МВР за вработување 600 полицајци, се пријавиле 2.622 кандидати


Скопје, 4 август, 2015 - 15:34 (META) 

Министерството за внатрешни работи денеска почнало со првата фаза на селекција на кандидатите за полициски службеници. На конкурсот за вработување 600 полицајци, според МВР, се пријавиле вкупно 2.622 кандидати.

Првата фаза на селекција на кандидатите опфаќа проверка на моторичките способности.

„Во Центарот за обука во Идризово и во касарните „Илинден“ и „Ѓорче Петров“, во согласност со подготвениот план и агенда за спроведување на постапката, до петок ќе се врши проверка на вкупно 2.622 кандидати, кои се пријавија на конкурсот за вработување на 600 полицајци. Според полот, на овој конкурс се пријавија 2.091 мажи и 531 жена, а според етничката припадност, 2.080 кандидати се Македонци, додека останатите 542 кадидати се припадници на другите етнички заедници“, стои во соопштението на МВР.