Потпишани договори од 4,5 милиони евра за 98 проекти за развој на руралните средини


Скопје, 9 јули, 2018 - 16:32 (META) 

Денеска, во Владата беа потпишани договори за имплементација на 98 нови проекти за развој на планските региони, на селата и на подрачјата со специфични развојни потреби, информираа од таму.

Проектите се финансирани од буџетот на државата, конкретно од Програмите за рамномерен регионален развој на Министерството за локална самоуправа и на Бирото за регионален развој, во вкупна вредност од 280 милиони денари (4,5 милиони евра). Корисници на средствата и имплементатори на проектите се општините и Центрите за развој на планските региони.

„Владата за оваа година, средствата за рамномерен регионален развој ги зголеми за над 50 отсто. 4,5 милиони евра оваа година ќе бидат вложени во проекти кои што ги предложија општините и планските региони врз основа на нивните приоритети. Главно станува збор за инфраструктурни проекти или проектна документација за поголеми проекти, со цел да можат да се обезбедат дополнителни средства и од донаторски извори или од ИПА-програмата на Европската унија“, рече министерот за локална самоуправа, Сухејл Фазлиу.

Од вкупните средства, за проекти за развој на планските региони се издвоени 196 милиони денари. Проектите за развој на подрачјата со специфични развојни потреби се финансирани со 56 милиони денари, а проектите за развој на селата со 28 милиони денари.

Заменик-министерот Дејан Павлески ги повика градоначалниците на поефикасно искористување на средствата, на транспарентен начин. Тој истакна дека во иднина ќе се работи не само на зголемување на ресурсите за рамномерен регионален развој, туку и на решавање на прашањата преку иновативни проекти.


Изменувањето на Законот за акцизите денеска на владина седница


Скопје, 29 мај, 2018 - 11:37 (META) 

Владата денеска ќе ја одржи редовната, 70. седница со почеток во 12 часот, на која, на барање на Собранието, треба да даде и мислење за предлог – законот за изменување на Законот за акцизите.

На предлог на Министерството за локална самоуправа, на дневен ред се и предлог – одлуките за доделување на средства за финансирање на проекти од развој на села, како и за доделување на средства за финансирање на проекти од развој на плански региони.

На предлог на Министерството за економија на дневен ред на денешната седница се неколку предлог – закони, односно предлог – законите за изменување на Законите за безбедност на производите, за заштита на потрошувачите и на законот за контрола на предметите од скапоцени метали.


Пожарот околу Македонски Брод сè уште е активен, евакуирани неколку жители на Растеш


Македонски Брод, 2 август, 2017 - 22:22 (META) 

Пожарот кај селото Требовље, во близина на Македонски Брод, сè уште е активен и го гаснат хеликоптери на Армијата на Македонија, два „канадери“ од Дирекцијата за заштита и спасување (ДЗС), а на помош пристигнал и хеликоптер од Бугарија.

Пожарот попладнево се доближил до Лутоец и до селото Растеш, поради што биле евакуирани возрасна жена и болно дете.

Пожарот кај Требовље е активен две недели, а шумски пожари има во околината на повеќе села на територијата на целата земја, односно кај Девич, Грешница, Раштани, Сливник, Бузалково, Здуње, Таринци и кај Водовиште.


Двајца скопјани осомничени за серија кражби во цркви во Охридско


Охрид, 11 април, 2017 - 10:18 (META) 

Секторот за внатрешни работи Охрид поднесе кривични пријави против две лица од Скопје, кои се товарат за серија кражби во цркви во неколку охридски села.

Според полицијата, осомничените ги извршиле кражбите во периодот од минатото лето до средината на февруари оваа година.

Против нив е поднесена кривична пријава за пет тешки кражби и за два обида за тешки кражби.

Осомничените, според полицијата, ги извршиле кражабите во цркви во селата Лескоец, Старо Лескоец и Горно Лакоречеј, од каде одзеле околу 2.000 евра.

Полицијата не соопштува дали се одземени и икони или други црковни предмети и реликвии.


Могерини ги седна заедно Груевски, Заев, Ахмети, Касами и Села


Скопје, 2 март, 2017 - 17:55 (META) 

Првпат по Договорот од Пржино во јули 2016 година, политичките лидери седнаа во иста просторија.­ Високата претставничка за надворешна и за безбедносна политика на ЕУ, Федерика Могерини, денеска во Собранието имаше средба на која, со соработниците, присуствуваа претседателот на ВМРО-ДПМНЕ, Никола Груевски, лидерот на СДСМ, Зоран Заев, претседателот на ДУИ, Али Ахмети, лидерот на ДПА, Мендух Тачи, претседателот на Беса, Билал Касами, и Зијадин Села од Алијансата за Албанците.

Груевски и Ахмети заминаа без да дадат изјави.

Заев по средбата истакна дека Иванов треба добро да размисли за иднината на Македонија и да се води според интересот на граѓаните.

– Платформата за која вчера зборуваше Иванов не му пречеше додека Никола Груевски преговараше за неа и од неговиот говор може да се види дека станува збор за политички оправдувања да не го додели мандатот – рече Заев.

Во невообичаено кусото партиско соопштение од ВМРО-ДПМНЕ по средбата со Могерини, се вели дека од страна на ВМРО-ДПМНЕ било изразено „незадоволство од платформата на премиерот на Албанија, Рама, од Тирана, негативните последици што се предизвикуваат од бруталното мешање во внатрешните работи на соседна држава, спротивно на принципите за добрососедство“, како и дека бил истакнат „актот за нарушување на принципот за коалицирање на „победник со победник“ по изборите“.

„Разговарајќи околу можните решенија, ВМРО-ДПМНЕ ја повтори оценката дека спроведувањето на брзи избори е најдобриот начин за стабилност и за надминување на политичката криза“, се заклучува во соопштението.

Касами по средбата оцени дека средбата со Могерини е исклучително значајна во овој момент.

– Пораката на Могерини беше јасна – дека во ваква ситуација нема да нè остават сами. Во ситуација кога се паднати институциите, ние имаме договор за стабилизација и за асоцијација и нивната поддршка ќе биде согласно тој договор да се вратиме на евроатланскиот пат – рече Касами.

Претседателот на ДПА, Мендух Тачи, рече дека сите пријатели на Македонија биле загрижени, а пораката на Могерини била дека вратите на Европската Унија се отворени за Македонија.

Зијадин Села од Алијансата на Албанците смета дека Иванов само ја втурнал Македонија во државна анархија.

Шефицата на европската дипломатија на почетокот на посетата се сретна со претставниците на невладините организации.

– Сакам да ве ислушам, знаејќи дека минувате низ тешки времиња кои се витални за вас – им порача таа на средбата зад затворени врати во седиштето на ЕУ.

Могерини во Македонија дојде среде ескалираната политичка криза, во која најнов елемент е одбивањето на престедателот Ѓорге Иванов да му го даде мандатот за формирање влада на лидерот на СДСМ, Зоран Заев, кој, пак, го обвини дека со тоа прави државен удар и создава државно-уставна криза во земјата.


Битолско Мариово три дена завеано во снег


Битола, 9 јануари, 2017 - 11:47 (META) 

Битолскиот дел на Мариово веќе неколку дена е отсечен од цивилизацијата со наноси од снег и по еден метар. Селото Гермијан, каде има околу стотина жители, веќе трет ден нема комуникација со градот, а иста е состојбата во уште дваесетина села во општина Новаци.

Отсечени се селата Гермијан, Бач, Живојно, Брод, Скочивир, Добровени, и од другата страна Градешница, Старавина и Зовиќ.

– Патот е исчистен само до селото Кременица до фармите на ЗК „Пелагонија“, а сите други села во Мариово се завеани со метар до метар и половина снег. Седиме дома, месиме леб и јадеме тоа што имаме во фрижидерите, чекаме расчистување на патот, бидејќи поради снегот не се знае каде е асфалтот, а каде се ендеците – вели во телефонски разговор жител на селото Гермијан.

И од Општина Новаци потврдуваат дека снегот и мразот направиле проблеми во комуникацијата со битилскиот дел на Мариово.

Градоначалникот на Општина Новаци, Лазе Котевски, вели дека битолскиот дел на Мариово е со големи наноси од снег. Според него, во најголем дел од селата има по пет-шест жители  и дека од утрово е ангажирана механизација за расчистување на патиштата.


Селата на Козјак се отсечени поради снегот


Куманово, 8 јануари, 2017 - 15:20 (META) 

Регионалниот центар за управување со кризи – Куманово соопшти дека во општина Липково во моментов на терен работи тешка механизација и дека сите патни правци кои се во надлежност на Општината се проодни, но сообраќајот се одвива отежнато во зимски услови. До крајот на денов или најдоцна до утре изутрина се очекува да се расчисти и макадамскиот пат Липково – Глажња -Гошинце.

Во Куманово, според РЦУК, улиците се проодни, а што се однесува до селата, во текот на денот се расчистува кон Пчиња, Студена бара, Никуљски пат и приградските населби. Оттаму велат дека повторно поради наноси од снег ќе се расчистуваат патиштата кон Горно Којнаре, Долно Којнаре, Четирце, Табановце, а од утре ќе се чистат патиштата кон Орашац, Скачковце, Градиште…

Градоначалникот на општина Младо Нагоричане, Милован Стојковски, денеска соопшти дека се расчистува патот од Старо Нагоричане кон Младо Нагоричане.

– Имаме повеќе кризни ситуации. Некои села, особено планинските се отсечени. Сепак, Општината зафаќа голема територија. Ќе побараме помош од Дирекцијата за заштита и спасување – изјави Стојковски, додавајќи дека сите планински села на Козјак се отсечени, меѓу кои се и селата Жегљане, Арбанашко, Дејловце, Малотино, Канарево, Бајловце, Жељувиново, Цветишница.

Од РЦУК информираа дека утре ќе се расчистува патот кон Дргоманце, Кокино и кон Арбанашко. Дел од селата немаат снабдување со електрична енергија, бидејќи екипите на ЕВН не можат да отидат до местото поради неисчистените патишта и да го отстранат дефектот.


Блокиран патот Тетово – Јажинце, отсечени неколку села од Мавровско-реканскиот крај


Тетово, 6 јануари, 2017 - 11:06 (META) 

Голем снежен нанос синоќа по полноќ го затрупа патот Тетово – Јажинце, на само 200 метри од граничниот премин Јажинце. Повеќе возила на ова место се заглавени, а патниците се згрижени на граничниот премин и во селото Јажинце, информира портпаролот на СВР Тетово, Марјан Јосифоски.

Од Јавното претпријатите „Македонија пат“ – секција Тетово, велат дека нивни екипи со специјална механизација се тргнати кон граничниот премин, заради расчистување на патот и слободен протек на возила. Оттаму се надеваат дека во текот на денот, целиот снежен нанос кој се спуштил од Шар Планина на патот, ќе биде остранет.

Поголеми проблеми од големите снежни врнежи во Западна Македонија се јавија во Мавровско-реканскиот крај. Дел од селата од овој регион ноќеска снемаа струја, но сега состојбата со напојување на електрична енргија е стабилизирана.

Од Секторот за внатрешни работи Тетово информираат дека селата Сенце, Нистрофо и Дуф се отсечени поради блокираните патишта што водат до нив.

Автопатиштата и регионалните патни правци во Западна Макеодонија се проодни. Забраната за тешки товарни возила кон скијачкиот центар Попова Шапка и кон планинскиот превој Стража сè уште е на сила.


Ирачката војска зазела четири села североисточно од Мосул


Мосул, 3 декември, 2016 - 17:25 (META) 

Ирачката војска денеска зазела четири села од милитантите на Исламска држава (ИД), североисточно од градот Мосул, соопшти ирачкиот центар за координација на воените операции, јавуваат светските агенции.

На овој начин ирачката војска почна да се приближува кон Мосул од север, додека неколку стотини воени единици влегуваат во градот од источната страна.

Најголем дел од борбите во Мосул се одвиваат во источниот сектор на градот, каде ирачката војска напредува бавно поради претпазливост околу безбедноста на цивилното населениe, но и поради силниот отпор од страна на ИД.

Исламска држава го зазеде Мосул, кој е втор по големина град во Ирак, во јуни 2014 година, во ненадејна операција во која нејзините милитанти окупираа речиси една третина од територијата на Ирак.

Ирачката војска на 17 октомври годинава почна голема офанзива за преземање на контролата над Мосул.


Голем пожар на грчкиот остров Хиос


Атина, 25 јули, 2016 - 10:06 (META) 

На грчкиот остров Хиос рано утрово, околу 3.30 часот, избувна силен пожар. Пожарот избувна во јужниот дел на островот, а грчките противпожарни служби се обидуваат да го стават под контрола огнот, но гаснењето е отежнато поради силнот ветар.

Во гаснењето на пожарот се вклучени шест хеликоптери, 16 противпожарни возила, 40 волонтери и 40 камиони со вода.

Хеликоптерите имаат проблеми со фрлање вода поради ветрот. Засега во пожарот изгорени се две куќи и евакуирани се три помали села на островот. Од Атина се испратени дополнителни противпожарни авиони за да помогнат во борбата со огнената стихија.