!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Во штабот на ДУИ, македонското знаме го пречека Билт поттурнато во заднината


Тетово, 18 април, 2017 - 16:40 (META) 

Поранешниот премиер и шеф на шведската дипломатија, Карл Билт, кој денеска има серија средби со политички лидери во Македонија, веројатно ненамерно, сакајќи да твитне фотографија дека пристигнал во штабот на ДУИ во Мала Речица во Тетово, илустрираше каде ДУИ го држи македонското знаме.

На подиумот кој е во рамките на салата за средби ги има сите други знамиња – на ЕУ, на САД, албанското, на ДУИ, па и косовското – само македонското срамежливо ѕирка од заднината.

На прашањето на „Мета“ зошто македонскот знаме е поставено таму, порптаролот на ДУИ, Бујар Османи, одговори со контрапрашање: „Како мислите зошто е поставено?“.

На дополнителното прашање за појаснување „зошто е поставено во ќош, зад сите други знамиња“, Османи одговори кусо и двосмислено „останало“.


ДУИ размислува за повлекување на своите министри од Владата


Тетово, 31 март, 2017 - 16:33 (META) 

На денешниот состанок на централно претседателство на ДУИ, кое веќе е во тек во седиштето на партијата во Мала Речица, ќе се расправа за повлекување на министрите на ДУИ од Владата, велат партиски извори за „Мета“.

Доколку централното претседателство донесе ваква одлука, актуелната Влада ќе остане без една третина од министрите.

Тоа, според нивните пресметки, би значело дека треба да се формира нова влада под итна постапка.

Лидерот на ДУИ, Али Ахмети, денеска свика итен состанок на централното претседателство на кој ќе се бара излез од блокадата во Собранието, но ќе се расправа и за однесувањето на Беса.


Централниот одбор на СДСМ напладне ќе одржи состанок


Скопје, 25 февруари, 2017 - 10:35 (META) 

Централниот одбор на СДСМ денеска ќе одржи состанок во седиштето на партијата со почеток во 12 часот, информираат оттаму.

На состанокот ќе одлучуваат кој ќе биде мандаторот за составување на новата влада, откако партијата синоќа ги доби потписите од ДУИ.

Синоќа, портпаролот на ДУИ, Бујар Османи, информираше дека ДУИ ќе им ги даде потписите на СДСМ за состав на нова влада, но дека тие потписи не значат дека партијата ќе коалицира со СДСМ.


ВМРО-ДПМНЕ ја дала партиската зграда под хипотека


Скопје, 16 февруари, 2017 - 10:20 (META) 

ВМРО-ДПМНЕ неколку дена пред изборите зела кредит од три милиони евра од Комерцијална банка и за таа цел го заложила под хипотека новото седиште, палатата „Христо Татарчев“, објави „Призма“.

Како што пишува во Службен весник, партијата зела „рамковен риволвинг кредит“, што значи дека не морала да ги подигнe сите три милиони евра одеднаш.

Освен својот дел од објектот, ВМРО-ДПМНЕ во банката заложила и подвижен имот и опрема.

„Призма“ се обратила и до партијата и прашале за што им требаат парите, колку години ќе го враќаат кредитот и дали под хипотека го ставиле целото седиште, a од таму рекле дека ќе одговорат во наредните неколку дена.

Зградата во период од 2013 до 2015 година ја изгради скопски „Бетон“ на Минчо Јорданов, врз земјиштето во центарот на Скопје што е сопственост на партијата и каде што се наоѓаше нивното седиште, т.н. „жолта куќа“.


Непознати лица пукале во полициската стража пред седиштето на ПАСОК


Атина, 10 јануари, 2017 - 11:01 (META) 

Вооружени лица утрово го нападнаа седиштето на грчката политичка партија ПАСОК и полициската патрола пред зградата. Во 6.20 часот по локално време, непознати напаѓачи пукаа кон полицискиот автобус кој редовно стои и патролира пред седиштето на ПАСОК во атинскиот анархистички кварт Ексархија.

Во нападот е повреден еден специјалец, кој е пренесен на лекување во една од атинските болници. Пред седиштето се најдени три фишеци од куршуми, а полицијата и антитерористичката единица вршат истрага на местото на настанот за да се најдат и да се уапсат сторителите.

Според изјави на очевидци, нападот се случил кратко по смената на полициската патрола.

Грчките политички партии го осудија настанот и испратија пораки за поддршка за повредениот полицаец.

Седиштето на ПАСОК, кое се наоѓа во срцето на Ексархија, населба позната по својот бунтовен дух и место кое е дом на грчките анархисти, многу често е мета на напади на анархистите, најчесто со молотови коктели.


Новинарите премиерно влегоа во новото барокно седиште на ВМРО-ДПМНЕ


Скопје, 11 декември, 2016 - 19:31 (META) 

Новинарите кои известуваат за предвремените парламентарни избори, вечерва имаа можност првпат да влезат во новото седиште на ВМРО-ДПМНЕ. Со тоа и јавноста имаше можност официјално да ја види внатрешноста на штабот на партијата која беше на власт во последниве 10 години.

Според истражувањето на „Скуп“, ВМРО- ДПМНЕ со имот од околу 60 милиони евра и 93 имотни листови е најбогата политичка партија во Европа. Истражувањето покажува дека седиштето на партијата чини 40 милиони евра. Пред неколку дека во јавноста излегоа фотографии од луксузно опремениот простор.


Кaменувaнo седиштетo нa КУЦ „Текстил“ вo Штип


Штип, 26 ноември, 2016 - 14:23 (META) 

Скршенo стaклo и некoлку кaмењa вo и пред пристoриите изутринaтa прoнaшле членoвите нa незaвиснaтa иницијaтивa зa бoрбa зa прaвaтa нa рaбoтниците вo текстилнaтa и кoжaрскaтa индустријa КУЦ „Текстил“ oд Штип. Oвa е трет нaпaд нa седиштетo вo периoд oд некoлку месеци, a се случува вo пресрет нa нaјaвениoт региoнaлен сoбир нa кoнфекциските рaбoтници нa 8 декември.

– Oвa е нaпaд врз рaбoтниците и пoрaкaтa е јaснa. Ги прaшувaм вaндaлите – знaете ли декa фрлате кaмењa пo рaбoтниците и тoа пo oние кoи се нaјексплoатирaни – изјaви Гoрaн Трaјкoв oд рaкoвoдствoтo нa КУЦ „Текстил“.

Oргaнизaцијaтa aктивнo рaбoти пoвеќе oд еднa гoдинa вo oбид синдикaлнo дa ги oргaнизирa рaбoтниците oд региoнoт. Неoдaмнa пoмoгнa вo oргaнизирaње нa штрaјк вo текстилнa кoмпaнијa вo Мaкедoнскa Кaменицa.


Авион на „Туркиш ерлајнс“ не полета од Скопје поради безбедносни причини


Скопје, 23 ноември, 2016 - 22:34 (META) 

Летот од Скопје за Истанбул со број ТК1006 на компанијата „Туркиш ерлајнс“ е одложен, пишува на веб-страницата на аеродромот „Александар Велики“.

Наводно, летот во 20 часот и 40 минути бил одложен поради безбедносни причини, бидејќи, според информации од патниците, во авионот бил пронајден телефон што никој не го пријавил за загубен, а во согласност со безбедносните правила, патниците биле евакуирани.

Во авионот била и делегација предводена од претседателот Ѓорге Иванов, која требало да патува за Истанбул, па оттаму за Мадагаскар.

Според сведочењето на новинарката на телевизија „Нова“, поради безбедносни причини, делегацијата со претседателот нема да го продолжи патувањето, а по извршената проверка, другите патниците ќе го продолжат летот.

Засега нема официјални информации за причините за одложувањето на летот од страна на МВР и „ТАВ аеродроми“.


Отворено седиштето на Балканските медицински наменски сили во Скопје


Скопје, 5 октомври, 2016 - 17:56 (META) 

Министрите за одбрана на Македонија, Србија, Албанија, Црна Гора, Босна и Херцеговина и на Словенија денеска се состанаа во Скопје по повод свеченото отворање на седиштето на Балканските медицински наменски сили во касарната „Илинден“. Станува збор за регионална организација, составена од шесте балкански земји, а поддржана од Норвешка и од Соединетите Американски Држави.

Целта на проектот, како што посочи министерот за одбрана, Зоран Јолевски, е да се изградат регионални медицински капацитети што ќе бидат способни да дадат брз одговор во кризни ситуации, како што се природните непогоди.

„Станува збор за проект во духот на концептот „паметна одбрана“ на НАТО, кој ќе создаде мала, мобилна, брза организација која секаде и секогаш ќе биде таму каде што им е потребна на граѓаните“, додаде Јолевски.

Неговите колеги од другите земји-членки на регионалната организација истакнаа дека се работи за исклучително корисен проект бидејќи сите земји од регионот се соочуваат со природни непогоди, особено со поплави од големи размери, како пред неколку години во Србија и во Босна и Херцеговина, а неодамна во Македонија.

Амбасадорот на Норвешка, Арне Санес Бјорнстад, посочи дека формирањето на Балканските медицински наменски сили ќе ги зголеми капацитетите во регионот, но и националните капацитети за заеднички операции во рамки на Европската Унија и на Обединетите нации.

Полковник Кевин Хил, претставник од Пентагон, САД, истакна дека не станува збор за обична воена, туку уникатна мултинационална единица, според НАТО-стандардите и е конкретен пример за регионална соработка.

Србија ќе биде првата држава што ќе командува со 86-те припадници на Балканските медицински наменски сили. Командата е на ротирачка основа, на секои две години.


ВМРО-ДПМНЕ: Наследниците на Сојузот на комунисти се луксузираат на државен имот


Скопје, 29 септември, 2016 - 15:02 (META) 

Наследниците на поранешниот Сојуз на комунисти се луксузираат на државен имот, додека илјадници граѓани секојдневно се борат да обезбедат покрив над глава, се вели во реакцијата на ВМРО-ДПМНЕ на соопштението на СДСМ за имотот на владејачката партија.

Во него, исто така, се додава дека „малку им било на СДСМ што исфрлиле 200.000 луѓе на улица, туку имале потреба да украдат државен имот за своите партиски потреби“.

„Најпрво претседателот на СДСМ, Бранко Црвенковски, на претседателот на владата Бранко Црвенковски му го отстапил објектот во кој денес е Владата, а е некогашно седиште на Сојузот на комунисти – исто така граден со народни пари, а присвоен од идолите на Црвенковски, Заев и од другите функционери на СДСМ. Воодушевен од овој галантен потег на Црвенковски, претседателот на владата Бранко Црвенковски на претседателот на СДСМ, Бранко Црвенковски, благодарно му подарил имот на улицата Павел Шатев, имот на кој денес се наоѓа седиштето на СДСМ, а кој претходно му припаѓал на Министерството за образование“, се вели во реакцијата на ВМРО-ДПМНЕ.