Курц: Беше многу важно да се реши спорот за името на Македонија


Стразбур, 15 јануари, 2019 - 13:34 (META) 

Австрискиот канцелар, Себастијан Курц, од говорницата на Европскиот парламент, утрово го поздрави враќањето на Западниот Балкан во центарот на европските преокупации и ја истакна важноста од решавањето на спорот за името во овој контекст.

Себастијан Курц утрово се обрати пред европските пратеници во Стразбур во рамки на дебатата за австриското претседателство на ЕУ. Канцеларот ги наброја постигнувањата и приоритетите на неговото претседавање и им се заблагодари на сите европски институции.

Говорејќи за третиот приоритет на австриското претседателство – соседската политика, Курц рече дека „како Австриец сум многу благодарен што Западниот Балкан се врати во центарот на преокупациите на ЕУ“.

-Многу е важно да имаме силни држави на Западниот Балкан, беше многу важно да се реши спорот за името на Македонија, како и спорот меѓу Србија и Црна Гора, тоа е многу важно за европската перспектива – рече Курц.

Канцеларот се заблагодари за бугарското претседателство кое, како што рече, „отвори нова ера на давање поголема важност на Западниот Балкан“.


Анѓушев место Заев на работниот појадок кај Курц со премиерите од Западен Балкан


Виена, 19 ноември, 2018 - 13:19 (META) 

Вицепремиерот задолжен за економски прашања, Кочо Анѓушев, денеска присуствуваше на работниот појадок кој го организираше канцеларот на Австрија, Себастијан Курц за премиерите од Западен Балкан.

Анѓушев присуствуваше на појадокот наместо премиерот Зоран Заев откако тој го откажа неговото учество поради внатрешните политички случувања во земјата.

Од Владата информираат дека главна тема била регионалната соработка која има важна улога во процесот на интеграција на земјите од Западен Балкан во Европската Унија, начините за нејзино унапредување преку процеси на дигитализација, поврзување и економската соработка.

По завршувањето на официјалниот дел од работниот појадок се одржа заедничка прес-конференција на којашто се обратија канцеларот на Австрија, Себастијан Курц, еврокомесарот за соседска политика и проширување, Јоханес Хан, еврокомесарката за дигитална економија и општество, Марија Габриел, премиерите од Западен Балкан и вицепремиерот Кочо Анѓушев.

Канцеларот Курц изрази голема поддршка за земјите од Западен Балкан за процесот на ЕУ интеграција посочувајќи ја регионалната соработка како клучен сегмент кој ќе го забрза зачленувањето на земјите од Западен Балкан во ЕУ и еден од приоритетите на австриското претседавање со Европската Унија.

Тој ја посочи важноста од продолжување на иницијативата за формирање на регионална економска област како прв чекор во понатамошното интегрирање во единствениот европски пазар.

Вицепремиерот Анѓушев потенцираше дека подобар животен стандард за граѓаните може да се обезбеди само преку подобрување на економијата, што подразбира обезбедување државна финансиска помош, владеење на правото и законите, како и стабилност во земјата.

-Стабилна држава, особено за мала земја како Македонија, значи интеграција во подобар безбедносен и европски систем. Токму поради оваа причина, нашата земја ќе биде посветена на овој процес, ќе ги вложиме нашите најдобри напори за да ја завршиме нашата домашна задача, но и за да обезбедиме подобар живот за нашите граѓани. Да покажеме повеќе капацитет за регионална соработка, меѓу нашите држави, особено ако сакаме да имаме подобра соработка во Европската Унија во иднина – рече Анѓушев.


Премиерите на Западен Балкан на појадок кај Курц, Заев го откажа учеството


Виена, 19 ноември, 2018 - 9:45 (META) 

Премиерите на Западен Балкан денеска во Виена ќе имаат работен појадок со австрискиот канцелар Себастијан Курц, на кој ќе присуствуваат и европскиот комесар за проширување и соседска политика, Јоханес Хан и за дигитална економија и дигитално општество, Марија Габриел.

Македонскиот премиер Зоран Заев, го откажа учеството поради внатрешно политички случувања во земјата.

Според информациите од кабинетот на Курц, на појадокот ќе присуствуваат шефицата на српската влада, Ана Брнабиќ, премиерот на Албанија, Еди Рама, на Црна Гора, Душко Марковиќ, претставникот на Советот на министри на Босна и Херцеговина, Денис Ѕвиздиќ и шефот на косовската влада, Рамуш Харадинај.

Најавено е дека ќе се зборува на три теми.

„Најпрво за европската перспектива на Западен Балкан, што е и едно од главните цели на австриското претседавање со ЕУ. Потоа ќе се разговара за регионалната соработка и за билатералните конфликти“, стои во соопштението од кабинетот на Курц.

Австрискиот канцелар кој деновиве престојуваше во Белград и Приштина изјави дека Европската Унија ќе биде комплетна дури откако државите од Западен Балкан ќе станат членки на Унијата.


Курц: Позитивно ќе биде да излезете на референдумот и да гласате за перспектива


Скопје, 7 септември, 2018 - 11:11 (META) 

Австрија е пријател на Македонија и на целиот регион и би сакале да живееме и во заедничка иднина. Како претседавач со Европската Унија, можам да кажам дека ЕУ ќе биде комплетна кога во неа ќе биде интегриран и Западен Балкан. За Македонија решението за спорот за името ќе донесе динамика. Најпрво сакам срдечно да го поздравам тоа што е постигнат компромис на ова поле, и би сакал да ги поканам граѓаните на Македонија да учествуваат на референдумот и да се изјаснат за решавање на спорот со името и за европската перспектива на земјата.

Со таква порака до македонските граѓани се обрати канцеларот на Австрија, Себастијан Курц, од заедничката прес-конференција со премиерот Зоран Заев во Владата. Курц стаса утрово во Скопје, по што имаше средба со Заев, а потоа ја одржаа прес-конференцијата.

Одговарајќи на новинарско прашање рече дека ќе се сретне и со македонската опозиција и истото ќе го побара од нив.

– Истата порака ќе ја упатам до опозицијата. Независно со кого разговарам, мојот став е секогаш ист – рече Курц.

Заев повтори оти верува во успешноста на референдумот и дека посетата на високи државници деновиве на Македонија јасно кажува дека Македонија е добродојдена во ЕУ.

– Посетата на господинот Курц ни дава до знаење дека сме на вистинскиот европски пат. Светот го препозна отвореното чувство на оптимизам. Сигурен сум дека зад поканата за членство во Европската Унија стои и австриското претседателство со Унијата. На крајот дозволете ми да ја изразам благодарноста што Австрија ја вбројуваме во најзначајните економски партнери – рече Заев.


Курц дојде во Скопје со поддршка за Договорот


Скопје, 7 септември, 2018 - 9:15 (META) 

Македонија е на историска пресвртница на патот кон ЕУ. Во пресрет на референдумот, закажан за 30 септември, решението за прашањето за името ја има нашата целосна поддршка, порача во видео порака австрискиот канцелар Себастијан Курц,  кој претпладнево пристигна во посета на Скопје.

Курц заедно со австриската делегација претпладнево беше свечено пречекан на платото пред Владата на Република Македонија, а подоцна ќе има и заедничка прес-конференција со премиерот Заев.

Австрискиот канцелар во Македонија доаѓа на покана на премиерот Зоран Заев. Утре на Денот на независноста, доаѓа германската канцеларка Ангела Меркел.


Во пресрет на референдумот, покрај Меркел неделава доаѓаат Курц и Столтенберг


Скопје, 4 септември, 2018 - 9:59 (META) 

Премиерот Зоран Заев синоќа најави дека оваа недела ќе дојдат канцеларите на Германија, Ангела Меркел и на Австрија, Себастијан Курц како и генералниот секретар на НАТО, Јенс Столтенберг.

На трибината во Берово, тој истакна дека „тоа што тројца светски државници неделава ќе го посетат Скопје е уште еден позитивен сигнал, признание и поддршка за Македонија“.

– Во среда вечер доаѓа Столтенберг, вторпат во шест месеци, во петок австрискиот канцелар Курц, а во сабота Меркел. Доаѓањето на тројцата светски државници е признание за Македонија, позитивен сигнал. Тие ни подаваат рака за да одиме напред – истакна Заев.

Тој додаде дека „ова е моментот кога заедно со опозицијата треба да се обединиме за европска Македонија“. Заев уште еднаш изрази уверување дека македонските граѓани нема да ја пропуштат оваа историска можност.


Курц ќе ја посети Македонија на 7 септември за поддршка на референдумот


Виена, 6 август, 2018 - 10:43 (META) 

Австрискиот канцелар Себастијан Курц, чија земја во моментов претседава со ЕУ, на 7 септември ќе ја посети Македонија, на три недели пред закажаниот референдум за промена на името, со кој треба да се реши спорот со Грција.

Курц во Македонија доаѓа на покана на премиерот Зоран Заев, кој пред референдумот има покането и неколку други европски лидери.

При последната посета на Заев на Виена, на крајот на јуни, Курц упати апел до граѓаните на Македонија на референдумот да гласаат за новото име „Северна Македонија˝.

– Договорот околу името на државата со Грција е одлучувачки напредок во процесот на приближување на Македонија до ЕУ – истакна Курц.

Според него, постигнувањето напредок за европската перспектива е еден од приоритетите на австриското претседавање со ЕУ.

-ЕУ не е целосна без државите од Западен Балкан – подвлече Курц.

Тој за австриските медиуми најави дека со премиерот Заев сака да разговара за напредокот во скрининг процесот.


Курц: Балканот ни е приоритет, ЕУ да ги прекине преговорите со Турција


Виена, 16 јули, 2018 - 10:05 (META) 

Договорот меѓу Скопје и Атина покажува дека упорните преговори и дипломатијата носат резултат, вели канцеларот на Австрија, Себастијан Курц во интервју за грчкиот весник „Катимерини“ и ја потенцира австриската поддршка за европската перспектива на земјите од Западен Балкан.

– Топло го поздравуваме договорот меѓу двете страни. Тој покажува дека упорните преговори и дипломатијата носат резултат. За Австрија, регионот на Западен Балкан е основен приоритет во нашата надворешна и европска политика, но и на нашето претседателство со ЕУ. Ја поддржуваме линијата на комесарот за проширување, Јоханес Хан. Обезбедувањето чесен и веродостоен пат кон ЕУ за земјите од Западен Балкан им служи на нашите интереси на безбедносно, политичко и економско ниво – вели Курц.

Австрискиот канцелар за „Катимерини“ коментира дека треба веднаш да запрат преговорите меѓу ЕУ и Турција, бидејќи „Турција во изминатите години се оддалечува од Европа и од европските вредности“.


Курц: Западен Балкан заслужува членство во ЕУ


Виена, 3 јули, 2018 - 11:31 (META) 

Австрискиот канцелар Себастијан Курц, на пленарната седница на Европскиот Парламент ги презентираше приоритетите на австриското претседавање со ЕУ, кое започна на 1 јули и ќе трае до 31 декември 2018 година, нагласувајќи дека Западен Балкан ќе фигурира на врвот на оваа листа.

– Европскиот проект ќе биде целосен само кога Западен Балкан ќе и припаѓа на нашата заедница на нации – изјави Курц.

Тој посочи дека земјите од Западниот Балкан „не само што имаат европска перспектива која ја заслужија, туку заслужија и членство во ЕУ, и затоа го поддржуваме процесот на пристапување“.

– Воодушевен сум што спорот за името конечно се реши и што Албанија и Македонија се сега во позиција да отворат преговори, иако сакавме побрз процес – вели Курц.

Тој додаде дека е потребен постојан прогрес на патот кон членство во ЕУ и дека само така Унијата ќе успее да им се спротивстави на другите земји кои го зголемуваат своето влијание во регионот.

– Мораме да се осигуриме дека ќе го комплетираме проектот на ЕУ и да ги внесеме овие земји во ЕУ – рече австрискиот канцелар.


Заев и Курц ја повикаа Франција да не ја блокира Македонија за влез во ЕУ


Виена, 26 јуни, 2018 - 16:36 (META) 

Премиерот Зоран Заев денеска во Виена имаше средба со австрискиот канцелар Себастијан Курц по што двајцата лидери одржаа прес-конференција на која Курц потенцираше дека Австрија и дава силна поддршка на Македонија за отворање на претпристапни преговори со ЕУ.

Курц рече дека Македонија заслужува од ЕУ отворање претпристапни преговори и најави дека Австрија ќе направи се што може ЕУ Советот да донесе позитивна одлука за Македонија.

Тој ги повика граѓаните на Република Македонија на претстојниот референдум во нашата земја да го поддржат договорот со Грција.

Заев му се заблагодари на австрискиот канцелар за отворената поддршка за Македонија и додаде дека Австрија е вистински, голем и искрен пријател.

– Важно е охрабрувањето што го слушнавме денес од вас како прв човек на Владата на Австрија, на два дена пред Советот на министри на ЕУ, дека вашата држава поддржува отпочнување преговори на Македонија со ЕУ. Очекуваме позитивна вест за Македонија и одлука со датум за отворање на пристапните преговори од Советот на министри, по силната реформска ориентираност и добрососедските политики на коишто се посветивме и за што добивме силни охрабрувања и од првите луѓе на Европската Унија – рече Заев.

Тој потенцираше дека очекува Македонија да биде 30-та земја членка на НАТО и порача дека на регионот му се потребни евро-атлантски интеграции поради политичка стабилност и безбедност, но и поради економски развој.

На новинарско прашање за ставот на Франција за датум за почеток на преговори на Македонија со ЕУ, Заев рече дека ја разбира внатрешната дебата во Франција околу проширувањето, но додаде дека Македонија не бара веднаш да стане членка на ЕУ, туку да продолжи мотивацијата од ЕУ.

– Верувам дека претседателот Макрон ќе донесе одлука за продолжување на мотивацијата – рече Заев, на што се надоврза Курц кој изрази надеж дека Макрон ќе донесе проевропска одлука за да нема застој на регионот.