!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Најавени протести во Белград по повод заклетвата на Вучиќ за нов шеф на државата


Белград, 30 мај, 2017 - 10:45 (META) 

Досегашниот премиер и избран претседател на Србија, Александар Вучиќ, утре ќе положи заклетва пред пратениците во собранието на Србија и ќе ја преземе должноста шеф на државата.

Според пишувањата на српските медиуми, Вучиќ ќе ја положи заклетвата над специјално изработен примерок на уставот на Србија, на кој заклетва ќе полагаат идните претседатели, а под уставот на говорницата ќе се наоѓа и реплика на Мирославовото евангелие. По церемонијата во собранието ќе биде објавено официјалното примопредавање на должноста помеѓу стариот и новиот претседател, со смотра на почесната гарда на српската војска.

По повод стапувањето на Вучиќ на должноста претседател на Србија, повеќе органиизации и здруженија за утре најавија мирни протести во центарот на Белград. На протест повика и Движењето на слободни граѓани, чиј водач е Саша Јанковиќ, кој му беше противкандидат на Вучиќ на претседателските избори. Јанковиќ изјави дека со полагањето на заклетвата на Вучиќ за претседател на Србија, ќе се случи „последниот чин од воведувањето диктатура и киднапирање на државата Србија“.

Вучиќ беше избран за претседател на Србија на изборите на 2 април, во првиот круг, освојувајќи 55,08 отсто од гласовите на излезените гласачи. Инаугуарцијата на Вучиќ, според неговите зборови, би требало да биде одржана на 23 јуни. Вучиќ изјави дека на свеченоста очекува да присуствуваат шефови на држави и на влади од регионот, односно од Унгарија, Романија, Хрватска, Босна и Херцеговина, Македонија, Албанија, Грција, Словенија и од Црна Гора.


Саша Јанковиќ ја формираше својата партија „Слободни граѓани на Србија“


Белград, 21 мај, 2017 - 18:15 (META) 

Второпласираниот кандидат на претседателските избори, поранешниот омбудсман Саша Јанковиќ денеска го официјализираше своето политичко движење „Слободни граѓани на Србија“.

На денешното основачко собрание, на кое Јанковиќ е избран за претседател, присуствуваат околу 60 основачи на движењето, меѓу кои актерот Никола Ѓуричко, музичарите Васил Хаџиманов и Владо Георгиев, режисерот Горан Марковиќ и други видни адвокати и личности од јавниот живот.

-0Движењето ќе ја врати насмевката на лицата на граѓаните… Се собравме за да го оправиме општетството кое е длабоко поделено – рече Јанковиќ, кој претходно најави дека неговото движење ќе биде отворено за сите кои „сакаат и веруваат дека во својата држава можат да живеат како граѓани, а не како поданици.

Саша Јанковиќ кон почетокот на февруари, поднесе оставка од функцијата народен правобранител на Србија, на која беше 10 години за да се кандидира на претседателските избори како независен кандидат.


Саша Јанковиќ ќе формира политичко движење како одговор на Вучиќ


Белград, 13 април, 2017 - 16:37 (META) 

Саша Јанковиќ, еден од кандидатите на неодамна одржаните претседателски избори во Србија, денеска најави дека во следните денови ќе формира движење во кое ќе влезат партии, организации и поединци што ја поддржаа неговата кандидатура и со кои ќе учествува на следните избори.

На конференција за медиумите, Јанковиќ рече дека тоа е „одговор на силата“ што ја применува Александар Вучиќ и дека новото движење на граѓаните ќе им понуди „вистина наместо лагите и држава наместо дружина“. Рече дека во движењето ќе влезе и Нова партија (Нова странка) на некогашниот премиер Зоран Живковиќ, која цело време го поддржуваше, додека Демократската партија ќе продолжи да дејствува паралелно и самостојно, но во истата насока и промовирајќи ги истите вредности.

Саша Јанковиќ рече и дека ги поддржува протестите на луѓето што велат „не“ на диктатурата, но и дека ја почитува желбата на организаторите да не им се приклучуваат политички партии и политички организации. Нагласи дека не е подготвен со сила да ја брани изборната волја на граѓаните и порача дека ќе ги повика пратениците да ја „заживеат“ работата на парламентот и да не го бојкотираат.


Јанковиќ обвини за кражба, Вучиќ повика гласовите да се бројат пред камери


Белград, 9 април, 2017 - 12:28 (META) 

Победникот на претседателските избори во Србија, актуелниот премиер Александар Вучиќ повика Републичката изборна комисија јавно да ги отвори вреќите со гласачките ливчиња од избирачките места за кои неговиот противкандидат Саша Јанковиќ рече дека се „украдени“.

Од изборниот штаб на Јанковиќ, поранешен народен правобранител, порачаа дека Александар Вучиќ украл 319.000 гласа за време на изборите на 2 април. Вучиќ освои уште во првиот круг на претседателските избори со 55 отсто од гласовите.

„При проверката на вреќите со гласачки ливчиња во 25 избирачки места кои ги отворивме во Републичката изборна комисија (РИК) откривме дополнително тешки нарушувања на изборниот процес. Има огромна разлика помеѓу физичкото пребројување на гласовите и бројот на гласовите внесени во избирачките протоколи. Вучиќ потенцијално украл цели 319.000 гласа. Изборниот штаб на Саша Јанковиќ вчера побара од РИК да добие пристап до вреќите со билтени од 25 избирачки места по случаен избор. Стигнавме до скандалозни неправилности при пребројувањето на гласовите. Само во Нови Пазар од две избирачки места Вучиќ „добива“ 543 гласа, за 250 повеќе од преброените гласачки ливчиња во вреќите. Слични неправилности има и во останатите избирачки места“, се вели во официјалното соопштение од штабот на Јанковиќ.

Вучиќ реагираше остро – рече оти некои политичари знаат дека самите се крадци, па мислат дека и другите крадат како нив.

– Тоа е ноторна глупост – одговори Вучиќ на прашањето на новинарите како реагира на обвинувањата за кражба на 319.000 гласови.


Вучиќ победи во првиот круг на претседателските избори во Србија


Белград, 2 април, 2017 - 22:21 (META) 

Претседателскиот кандидат на владејачката коалиција и лидер на Српската народна странка, Александар Вучиќ, победи на претседателските избори во Србија во првиот круг, соопштија вечерва агенцијата „Ипсос“ и Центарот за слободни избори и демократија (ЦСИД), јавува дописничката на „Мета“ од Белград.

Според ЦСИД, на примерок од 72,2 отсто од обработените податоци, Вучиќ освоил 56,1 отсто од гласовите.

На второ место е поранешниот омбудсман Саша Јанковиќ со 15,2 отсто од поддршката, а на трето Лука Максимовиќ (Љубиша Прелетачевиќ – Бели), со 9,5 проценти од гласовите, додека поранешниот шеф на дипломатијата Вук Јеремиќ е четврти со 5,8 проценти од освоените гласови.

И според агенцијата „Ипсос“, врз основа на 73,6 проценти од обработените податоци, Вучиќ победил во првиот круг со 55,2 отсто од освоените гласови.

Според оваа агенција, на второ место е кандидатот Саша Јанковиќ, кој освоил 16,1 отсто од гласовите.

На трето место е Лука Максимовиќ (Љубиша Прелетачевиќ – Бели) со 9,4 отсто, а на четврто Вук Јеремиќ со 5,7 проценти поддршка од избирачите.


Јанковиќ и Јеремиќ веруваат во промени што можат да ги донесат изборите


Белград, 2 април, 2017 - 12:44 (META) 

Претседателските кандидати и главни политички ривали на Александар Вучиќ, поранешниот омбудсман Саша Јанковиќ и поранешниот шеф на дипломатијата Вук Јеремиќ, се надеваат дека денешните избори во Србија можат да донесат важни промени, јавува дописничката на „Мета“ од Белград.

Јанковиќ, кој е поддржан од интелектуалната и граѓански ориентирана елита, посака Србија да има „среќни и успешни демократски избори“ и вети дека на граѓаните ќе им ги врати достоинството и насмевката, а на институциите смислата на постоењето.

„По ова, ништо во Србија нема да биде исто. По долго време ќе ги поставиме работите на вистинското место“, изјави Јанковиќ кој на гласањето беше со сопругата и со синот.

Кандидатот Вук Јеремиќ, кој според предизборните анкети има помеѓу 8 и 12 отсто поддршка, се надева дека денешните избори ќе бидат празник на демократијата и важен чекор кон остварувањето на промени во Србија.

„Се надевам дека луѓето ќе излезат во голем број и ќе гласаат за промени. И додека гласаат, ќе размислуваат и за втор круг и кој е тој што најлесно може да им донесе промени“, изјави Јеремиќ, кој гласаше со сопругата.


Утре се одржуваат претседателски избори во Србија


Белград, 1 април, 2017 - 13:48 (META) 

Граѓаните на Србија утре избираат претседател, а најголеми шанси за победа има кандидатот на владејачката коалиција, актуелниот премиер Александар Вучиќ, јави дописничката на „Мета“ од Белград.

Според предизборните анкети, Вучиќ има реални шанси да победи веќе во првиот круг, особено ако излезноста на гласачите не биде голема.

Втор, според најголемиот број истражувања, е поранешниот омбудсман, Саша Јанковиќ, со околу 15 проценти поддршка, а трет е поранешниот министер за надворешни работи, Вук Јеремиќ.

Ако никој од 11-те кандидати не освои повеќе од 50 отсто од гласовите на излезените гласачи, претседателот ќе биде избран во вториот круг на 16 април.

Право на глас имаат околу 6,7 милиони граѓани, а најголемиот број се во Белград, околу 1,6 милиони. На Косово има 106.000 гласачи.


Последен ден за изборната кампања во Србија


Белград, 30 март, 2017 - 11:32 (META) 

Во Србија на полноќ почнува предизборниот молк за претседателските избори на 2 април, на кои фаворит е кандидатот на владејачката коалиција, актуелниот премиер Александар Вучиќ.

Предизборните анкети покажуваат дека Вучиќ со поддршка од околу 50 проценти има реални шанси да победи во првиот круг, ако на изборите излезат помалку од четири милиони избирачи.

Втор, според истражувањата, е поранешниот омбудсман Саша Јанковиќ, со околу 15 проценти поддршка, а трет е поранешниот министер за надворешни работи, Вук Јеремиќ.

Ако во првиот круг никој не освои повеќе од 50 проценти од гласовите, вториот круг ќе биде одржан на 16 април.

Право на глас во Србија имаат околу 6,6 милиони граѓани, а во трката за наследник на Томислав Николиќ учествуваат вкупно 11 кандидати, меѓу кои и лидерот на радикалите, Војислав Шешељ.

На последниот ден од кампањата, шест од вкупно осум белградски дневни весници излегоа со иста насловна страница на која е изборниот слоган на Вучиќ и лого со кое се повикуваат граѓаните в недела да гласаат за него.


Завршен митинг на претседателскиот кандидат Саша Јанковиќ вечерва во Белград


Белград, 29 март, 2017 - 21:40 (META) 

Околу 20.000 граѓани се собраа вечерва во центарот на Белград на завршниот предизборен митинг на претседателскиот кандидат Саша Јанковиќ, од кој е порачано дека на Србија не ѝ треба лидер, туку претседател, јавува дописничката на „Мета“ од Белград.

Митингот го отворил српскиот пејач Владо Георгиев, а покрај него зборувале бројни јавни личности, меѓу кои актерите Никола Ѓуричко, Никола Којо и Сергеј Трифуновиќ.

На собирот немало ниту еден претставник од политичките партии. Граѓаните носеле знамиња со ликот на Јанковиќ и транспаренти со порака „За Србија без страв“, како и знамиња со ликот на премиерот Александар Вучиќ со натпис „Готов е“.

Преносот на предизборниот митинг на Саша Јанковиќ во Белград во живо го следеле 220.000 луѓе преку неговата страница на „Фејсбук“.


Закани за претседателскиот кандидат Саша Јанковиќ


Белград, 29 март, 2017 - 11:39 (META) 

Саша Јанковиќ, кандидатот на граѓанската проевропска опозиција на претседателските избори во Србија, вели дека пријател од Безбедносно-информативната агенција (БИА) му рекол дека нема да биде безбедно за него да влезе во вториот круг на претседателските избори, оти може да се случи „сешто“.

Во интервјуто објавено денеска на порталот „Инсајдер“, кандидатот на групата граѓани „За Србија без страв“ вели дека не е исклучено ни насилство и додава дека такви сознанија имаат и БИА и српското МВР и обвинителството. Јанковиќ вели дека прашањето сега е дали институциите ќе дејствуваат, односно што ќе се направи во врска со сознанијата.

Првиот круг на изборите за нов претседател на Србија се одржува в недела, на 2 април. Според сегашните анкети, Јанковиќ е втор по рејтинг на листата на 11 кандидати, а на врвот е актуелниот српски премиер Александар Вучиќ, кој е кандидат на владејачката коалиција.