!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Србија: Демократска странка ја поддржа кандидатурата на Саша Јанковиќ


Белград, 10 јануари, 2017 - 18:54 (META) 

Српската партија Демократска странка (ДС) ќе го поддржи актуелниот народен правобранител Саша Јанковиќ како кандидат на изборите за претседател на Србија, едногласно денеска одлучи претседателството на опозициската партија.

Претседателот на ДС, Драган Шутановиќ рече дека Јанковиќ е „персонификација на вредностите за кои се залага ДС“.

– Водени од интересите на граѓаните, убедени сме дека тој е најдобар кандидат и дека ќе победи – рече Шутановиќ по седницата на претседателството на ДС.

Оценувајќи дека ова е момент кога во Србија треба да се воспостави „сила на правото, а не правото на сила“, Шутановиќ рече дека одлуката е донесена едногласно, на негов предлог.

– Саша Јанковиќ покажа дека се залага за заштита на човековите и на правата на малцинствата, на работниците, дека се залага за почитување на институциите на системот. Во носењето на одлуката не калкулиравме, таа е базирана на тоа што Јанковиќ го прави во изминатиот период – рече лидерот на ДС.

Освен ДС, Јанковиќ досега го поддржаа неколку стотина јавни личности, кои по тој повод упатија отворено писмо до јавноста, а откако ја најави кандидатурата за претседател на Србија, омбудсманот доби поддршка и од Нова странка, на Зоран Живковиќ.


Омбудсманот Саша Јанковиќ потврди дека ќе се кандидира за претседател на Србија


Белград, 26 декември, 2016 - 11:04 (META) 

Српскиот народен правобранител, Саша Јанковиќ, денеска изјави дека ќе се кандидира за претседател на Србија, кога ќе бидат распишани изборите, јавува дописничката на „Мета“ од Белград.

– Ќе бидам кандидат на граѓаните. Како и досега, ќе си ја работам својата работа строго според законите и Уставот. Во Србија треба да постои ред, а не неизвесност и страв – изјави Јанковиќ.

Тој оцени дека Србија е држава на нефункционални институции, без владеење на правото и на социјалната правда, без слобода на медиумите, постои нетранспарентност и корупција.

Јанковиќ додаде дека во државата треба да се изградат европски вредности, законот да важи за сите и да биде посилен од чија било политичка волја, а фирмите да се отвораат поради добри услови за работење, а не поради тајни договори со државата.

Претседателските избори во Србија треба да се одржат напролет. Можни кандидати засега се досегашниот претседател Томислав Николиќ, лидерот на радикалите и поранешниот хашки затвореник Војислав Шешељ, поранешниот шеф на дипломатијата Вук Јеремиќ и лидерот на социјалистите Ивица Дачиќ.


Српскиот омбудсман бара да се утврди дали во земјата има илегална депортација на мигранти


Белград, 22 декември, 2016 - 18:28 (META) 

Српскиот народен правобранител, Саша Јанковиќ, побара да се спроведе истрага за случајот со седумчленото семејство бегалци од Сирија, за кое постојат сомневања дека е жртва на обид за илегална депортација. Официјално објаснување за случајот чекаат и УНХЦР и другите меѓународните организации кои се грижат за третманот на бегалците во Србија.

Семејството од Сирија минатиот викенд беше пронајдено во шума во близина на бугарската граница. Според Гордан Пауновиќ од белградскиот „Инфо парк“, седумчленото семејство било уредно регистрирано во Белград и тргнало кон прифатниот центар во Босилеград, кога по пат биле симнати од автобусот од страна на униформирани лица, кои ги одвеле и ги оставиле во шума во близина на границата со Бугарија.

Мигрантите сведочат дека биле уплашени и премрзнати и дека преку СОС-линијата успеале да го добијат белаградскиот „Инфо парк“ и да го пријават случајот. Акцијата за спасување на мигрантите траела цела ноќ, а кога екипите на итната помош стигнале до нив, три од женските лица во семејството биле во бесознание.

Според Пауновиќ, станува збор за обид за илегална депортација, за што во Србија веќе неколку месеци се зборува дека постои, но досега немало конкренти докази.

Српскиот омбудсман, Саша Јанковиќ, изјави дека издал налог да се изврши контрола за да се утврди дали навистина станува збор за обид за илегална депортација и ако е така, дали во неа учествувале некои од државните органи.

Семејството од Сирија сега е сместено во прифатниот центар во Прешево и никому не му е дозволено да контактира со членовите, со образложение дека се во карантин додека не се завршат сите потребни прегледи и истрагата за случајот.


Вучиќ: Немам намера да одговорам на бесмислиците на омбудсманот


Белград, 15 декември, 2016 - 13:59 (META) 

Премиерот на Србија, Александар Вучиќ, денеска изјави дека нема потреба да одговара на отвореното писмо што до него го упати народниот правобранител Саша Јанковиќ, со образложение дека „не сака да се осврнува на бесмислиците кои ги говорат политичарите“, алудирајќи притоа на српскиот омбудсман.

„Јанковиќ е политичар, добар или лош, тоа ќе каже народот. Мислам дека лошото е во тоа што, она што го говори го кажува од функцијата на која се наоѓа сега“, рече Вучиќ пред новинарите во собранието на Србија, каде учествуваше на економска конференција.

Вучиќ рече и дека му „честита на Јанковиќ за неговата популарност во Хрватска“, додавајќи дека од друга страна, како што видел, тој (Вучиќ) е најнепопуларната личност таму.

Српскиот народен правобранител Саша Јанковиќ денеска го обвини премиерот Александар Вучиќ за „поттикнување омраза и нетрпеливост“ поради вчерашната изјава на премиерот во која тој за омбудсманот и за уште неколку луѓе рече дека се „априори против државата и својот народ“.

Во отвореното писмо на Јанковиќ до Вучиќ, народниот правобранител наведе дека Србија „заслужува повеќе и подобро од ваквиот начин на извршување на власта“ и посочувајќи дека речникот на Вучиќ е знак за тоталитарно, а не за демократско уредување.


Српскиот народен правобранител го обвини премиерот Вучиќ за поттикнување омраза


Белград, 14 декември, 2016 - 20:08 (META) 

Српскиот народен правобранител Саша Јанковиќ денеска го обвини премиерот Александар Вучиќ за „поттикнување омраза и нетрпеливост“ поради вчерашната изјава на премиерот во која тој за омбудсманот и за уште неколку луѓе рече дека се „априори против државата и својот народ“.

Во отвореното писмо на Јанковиќ до Вучиќ, народниот правобранител наведува дека Србија „заслужува повеќе и подобро од ваквиот начин на извршување на власта“.

Јанковиќ во писмото посочува дека речникот на Вучиќ е знак за тоталитарно, а не за демократско уредување, додавајќи дека премиерот е должен да води сметка дека за ниту еден граѓанин на Србија нема право каже такво нешто.

„Никој нема такво право, а Вие последен. Јас или некој од друг од наведените, и да сум ги менувал во минатото своите ставови за 180 степени, и да сум ги пребројувал граѓаните по етничка основа, и да сум добивал станови од државата додека таа беше бомбардирана, и да сум бил министер за информирање додека сопственици на весници беа убивани или денес да газам и да ја преземам надлежноста над сите државни органи и институции, како што е случајот со Вас (Александар Вучиќ, н.з.), не смеете да кажете дека сме противници на државата и на народот“, вели во писмото Јанковиќ.

Инаку, Јанковиќ се споменува како можен кандидат за претседател на Србија на изборите кои треба да се одржат следната година.

Кон крајот на ноември, 100 јавни личности во Србија, меѓу кои истакнати книжевници, новинари, глумци и професори, се потпишаа на апелот со кој од Јанковиќ бараат да се кандидира на претседателските избори како независен кандидат.


Српскиот омбудсман се уште не одлучил дали ќе кандидира за претседател на Србија


Белград, 25 ноември, 2016 - 18:45 (META) 

Народниот правобранител на Србија, Саша Јанковиќ се уште не одлучил дали ќе ја прифати иницијативата на 100 јавни личности да се кандидира за претседател на земјата, јави дописникот на „Мета“ од Белград.

Заблагодарувајќи им се на потписниците на апелот за поддршката и за довербата, Јанковиќ соопшти дека со соработниците ќе продолжи да работи како што досега работел, се додека не дојде времето за нови одлуки.

Сто јавни личности, меѓу кои угледни книжевници, новинари, актери и професори денеска апелираа Јанковиќ да се кандидира за претседател на Србија како независен пратеник и ги повикаа демократски ориентираните граѓани и партии да ја поддржат иницијативата.

Тие оценуваат дека Србија веќе неколку години се соочува со длабока и тешка криза, дека институциите се разорени или под притисок, како и дека сиромаштијата е реалност за мнозинството граѓани и додаваат дека граѓаните имаат можност да почнат да ги менуваат работите на претседателските избори кои треба да се одржат следната година.

Меѓу потписниците на апелот се и писателот Драган Великиќ, режисерот Горан Марковиќ, глумците Небојша Глоговац, Бранко Цвејиќ, Воја Брајовиќ, Никола Којо, Никола Ѓуричко, Предраг Ејдус и Радослав Миленковиќ, универзитетските професори Илија Вујачиќ, Ратко Божовиќ и Миодраг Зец, правниците Вида Петровиќ-Шкеро и Зоран Ивошевиќ и други јавни личности.


Сто јавни личности побараа од српскиот омбудсман да се кандидира за претседател на државата


Белград, 25 ноември, 2016 - 16:53 (META) 

Стотина јавни личности во Србија, меѓу кои угледни книжевници, новинари, глумци и професори, денеска упатија апел до народниот правобранител, Саша Јанковиќ, да се кандидира за претседател на Србија како непартиски кандидат и ги повикаа демократски ориентираните граѓани и партии да ја поддржат оваа иницијатива.

Тие оценуваат дека Србија веќе неколку години се соочува со длабока и тешка криза, дека институциите се разорени или под притисок, како и дека сиромаштијата е реалност за мнозинството граѓани и додаваат дека граѓаните имаат можност да почнат да ги менуваат работите на претседателските избори кои треба да се одржат следната година.

Меѓу потписниците на апелот се и писателот Драган Великиќ, режисерот Горан Марковиќ, глумците Небојша Глоговац, Бранко Цвејиќ, Воја Брајовиќ, Никола Којо, Никола Ѓуричко, Предраг Ејдус и Радослав Миленковиќ, универзитетските професори Илија Вујачиќ, Ратко Божовиќ и Миодраг Зец, правниците Вида Петровиќ-Шкеро и Зоран Ивошевиќ и други јавни личности.

Јанковиќ, кој од позицијата омбудсман често ја критикува власта и кого медиумите подолго време го споменуваат како можен заеднички кандидат на опозицијата на претседателските избори, сè уште не реагирал на овој апел.

Апелот го поддржаа претседателот на опозициската Нова партија, Зоран Живковиќ, кој на „Твитер“ напиша „поддршка“, додека поранешниот претседател на Демократската партија, Бојан Пајтиќ, исто така на „Твитер“ напиша дека апелот „покажува дека има надеж за Србија“.

Како можен претседателски кандидат медиумите го споменуваат и поранешниот шеф на дипломатијата и кандидат на Србија за генерален секретар на Обединетите нации, Вук Јеремиќ.

Исто така, се очекува на изборите да се кандидира и лидерот на Српската радикална партија и поранешен обвинет од Хашкиот трибунал, Воислав Шешељ.

Кандидатот на владејачката Српска напредна партија засега сè уште не е официјално соопштен, но се верува дека тоа ќе биде актуелниот претседател Томислав Николиќ, и покрај тоа што одредени аналитичари веруваат дека на кандидатура во последен момент може да се одлучи и актуелниот премиер, Александар Вучиќ, кој засега ја негира таквата можност.