Се отвори Саем за мебел 2018 во „Борис Трајковски“


Скопје, 9 октомври, 2018 - 10:11 (META) 

Од денеска почна 44. издание на Саем на мебел 2018 кој се одржува на нова локација, комплексот ВИП арена „Борис Трајковски“ и ќе трае до 14. октомври. На Саемот има повеќе од 70 изложувачи, над 150 брендови и странски изложувачи на површина од 8.000 метри квадратни.

„Посетителите Саемот ќе го видат во целост, протоколот на движење е направен според системот на „Икеа“ каде сите потребни нешта за едно домаќинство ќе се продаваат по неверојатни саемски попусти”,  изјави проект-менаџерот на Саемот на книгата, Сања Кондарко.

Во рамките на Саемот, денеска од 12 до 14 часот ќе се одржува дебата наменета за стручната јавност, на тема „Копирањето е опасно – оригиналот е за восхит”. Билетите се веќе во продажба преку онлајн сервисот „мк тикетс“ и на билетарата на Саемот на мебел. Билетите купени онлајн се со приоритетна брза лента на движење.

Работното време на саемот е секој ден, вклучувајќи го и 11 октомври од 10 до 20 часот.


Саемот на книга го посетиле 44.300 посетители


Скопје, 9 мај, 2018 - 12:13 (META) 

Саемот на книга 2018 завршува денеска, а манифестацијата до вчера ја посетиле 44.300 посетители, информираа организаторите. На 30. јубилејно издание се претставиле 70-на издавачки куќи од Македонија, Србија, Црна Гора, Косово, Албанија.

„Соработката со Министерството за култура, како покровител на манифестацијата, Владата, Град Скопје заедно со ЈСП, со воведувањето на двете вонредни линии специјално за најголемата културна манифестација, придонесоа, покрај промената на локацијата, овој Саем уште повеќе да го зацврсне неговото постоење. Ова е голем напредок кој резултираше со инзвонредна бројка од 44.300 посетители, а Саемот уште не е завршен“, изјави проект-менаџерот на Саемот на книгата, Сања Кондарко.

Во рамките на програмата на Промотивниот центар, се доделија наградите во организација на Македонската асоцијација на издавачи (МАИ), а се доделија и наградите од страна на Здружението на издавачите и книжарите на Македонија (ЗИКМ).