!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Жбогар: Договорот со Бугарија е пример како може да реши долгогодишен проблем


Скопје, 28 јули, 2017 - 11:33 (META) 

Евроамбасадорот Самуел Жбогар синоќа го поздрави договорот за добросоедство со Бугарија и истакна дека тоа е пример како две држави можат сами да решат проблем кој постоел многу години.

– Јас морам да го поздравам овој договор затоа што мислам дека е договор кој ќе ги промени односите не само меѓу двете земји, туку и во регионот. Тоа е пример како две држави можат да го решат проблемот што постоел многу години и како можат да го отворат патот за соработка во иднина – рече Жбогар во интервју за ТВ 21.

Во однос на владиниот реформски план „3-6-9“, евроамбасадорот вели дека тоа е само почетен чекор до новата реалност во државата.

– Луѓето мора да видат дека нешто е поинаку. Тие мора да видат промени и во судството. Сите ќе се чувствуваат дека се исти пред судот, дека законот важи еднакво за сите. Овие реформи или план се само почетен чекор кој ќе нè донесе до таа ситуација луѓето да сфатат дека има нова реалност во државата, подобра реалност – рече Жбогар и додаде дека во ЕУ постои оптимизам за евроинтеграцијата на Македонија.


Жбогар: Не сум загрижен за конкретната имплементација на планот „3-6-9“


Струга, 25 јули, 2017 - 18:43 (META) 

Евроамбасадорот Самуел Жбогар при денешната посета на Струга изрази оптимизам во однос на имплементацијата на реформскиот владин план „3-6-9“.

– Од сите страни слушаме заложби и посветеност, од страна на државните институции на Владата и од Собранието, дека тие се посветени да ги направат сите промени поврзани со законските решенија. Јас во моментот не сум загрижен за конкретната имплементација на планот „3-6-9“, особено затоа што проблемот никогаш не бил во врска со усвојување на новата легислативата, туку секогаш бил во имплементација на легислативата – изјави Жбогар, одговарајќи на новинарско прашање за владиниот реформски план.

Во врска со работата на Собранието, тој кратко одговори дека засега законодавниот дом добро си ја врши својата работа.

Жбогар, во однос на законот за јазиците, рече дека очекува сите политички партии да го поддржат, но исто така додаде дека очекува и албанската заедница да покаже разбирање за ставовите на другата страна.

– Што се однесува до употребата на јазиците и на албанскиот јазик, тоа е прашање кое е од огромна важност за албанската заедница во вашата земја бидејќи албанската заедница чувствува дека со усвојување на овој закон, имплементацијата на Охридскиот рамковен договор ќе биде целосна. Ако етничките заедници се обидат да се сослушаат меѓу себе, зошто некој има потреба или бара некои права да му се реализираат, истото важи и за албанската заедница да ја сослуша другата страна и нејзините стравови. Мислам дека ако се има ист приод од сите страни, на крај решението ќе биде поддржано од сите – рече Жбогар.


Заев и Жбогар разговарале за реформите во правосудството и во медиумите


Скопје, 21 јули, 2017 - 15:51 (META) 

Македонскиот премиер Зоран Заев и амбасадорот на ЕУ во Република Македонија, Самуел Жбогар, денеска имале средба на која се разговарало за претстојните реформи во правосудниот систем, медиумите и за воспоставувањето професионални државни институции, извести Владата.

„На состанокот е реафиримирана поддршката на Брисел за реформската Влада во Македонија, која изрази подготвеност за суштински промени во државата за подигнување на квалитетот на животот на граѓаните, демократизација на општеството и за отворање на евроатлантските перспективи на државата.
Ставот што го пренесе евроамбасадорот Жбогар е дека Брисел и земјите членки на Унијата сега гледаат можност за напредок на Македонија и се подготвени на принципиелно и експертско ниво да ѝ помогнат на Македонија во реформскиот процес“, се вели во соопштението од Владата.

Во однос на реформите предвидени со планот „3-6-9“, Заев го уверил евроамбасадорот дека владејачката коалиција останува на патот на негова реализација.

– Владата е цврсто определена за создавање услови за независно судство, објективни медиуми, ефикасни државни инстититуции, чија цел се единствено потребите на граѓаните. Реформите на кои се обврзавме во планот „3-6-9“ ќе продолжиме да ги реализираме инклузивно, со можност за вклученост на сите, поединци, групи, граѓанскиот сектор, опозицијата. Од големо значење е и поддршката и помошта што ја добиваме од нашите пријатели од Европа, кон која се стремиме како држава – порачал македонскиот премиер.


Османи го презентирал планот „3-6-9“ на амбасадорите од ЕУ и на Рот


Скопје, 11 јули, 2017 - 13:28 (META) 

Заменик-претседателот на Владата на Република Македонија задолжен за евроинтеграции, Бујар Османи, во просториите на Делегацијата на Европската Унија го презентирал планот „3-6-9“ пред амбасадорот на ЕУ, Самуел Жбогар, и амбасадорите на земјите-членки на ЕУ.

– Во овој план се опфатени реформите што Владата ќе ги спроведува во претстојниот период од три месеци, односно до одржувањето на локалните избори, а во меѓувреме паралелно се работи и на прецизирање на мерките кои треба да се реализираат во наредните шест и девет месеци – рекол Османи, нагласувајќи дека Владата се залага за обезбедување транспарентност и инклузивност, со вклучување на опозицијата.

Планот претходно тој го презентирал и на Државниот секретар за европски прашања во Министерството за надворешни работи на Германија, Михаел Рот.

– Германија е силен поддржувач на политиката за проширување на ЕУ и за зачленувањето на земјите од Западен Балкан, што го покажа со иницирањето на Берлинскиот процес, посветен на поврзаност, добрососедски односи, регионална соработка и европска интеграција. Тоа се потврди на последователните самити во Виена и во Париз, и ќе продолжи со самитот во Трст оваа недела – истакнал Османи.

„Двајцата соговорници се оптимисти дека процесот на европска интеграција на земјата е откочен и дека со посветеност ќе се надомести изгубеното време, за да продолжи земјата непречено да ги спроведува реформите за интеграција во ЕУ“, се вели во соопштението од Секретаријатот за европски прашања.


Жбогар: Што поскоро да се финализира договорот за добрососедство со Бугарија


Скопје, 10 јули, 2017 - 15:22 (META) 

Секогаш е добро да се има добри односи со соседните земји, изјави денеска евроамбасадорот Самуел Жбогар на заедничката прес-конференција со италијанскиот амбасадор Карло Ромео, посветена на самитот ЕУ – Западен Балкан, кој од 12 јуни ќе се одржи во Трст.

Жбогар рече дека Брисел очекува што поскоро да се финализира договорот за добрососедство меѓу Македонија и Бугарија и дека е потребно да се решат билатералните прашања со соседите и со земјите членки на ЕУ во регионот.

– Никогаш нема да погрешите ако инвестирате во пријателство со соседите. Мора да имате круг на пријатели околу вас. Првите чекори се навистина охрабрувачки. Ние не сме вклучени во договорот, но се надеваме дека ќе биде финализиран и потпишан до август. Тоа ќе покаже одлучност на самата влада за повторно да го гради овој круг на пријатели со соседите -рече Жбогар, додавајќи дека колку подобри односи земјата има со соседите кои се во ЕУ, толку поголема поддршка за евроинтеграција има.

Евроамбасадорот, исто така, изрази надеж дека договорот ќе се најде на дебата пред Собранието.

Италијанскиот амбасадор Ромео рече дека самитот во Трст ќе помогне во придвижувањето на регионот на патот кон евроинтеграциите и дека ќе придонесе за инфраструктурно и за економско поврзување на Западен Балкан.

Самиот во Трст е највисоко ниво, а на него покрај премиерите на шесте земји од Западен Балкан и министрите за економија и за транспорт, ќе учествуваат високата претставничка на ЕУ за надворешна политика и за безбедност, Федерика Могерини, еврокомесарот за добрососедство и за проширување, Јохане Хан, како и еврокомесарката за транспорт, Виолета Болц.


Анѓушев – Жбогар: Новиот закон за енергетика ќе биде донесен до крајот на годинава


Скопје, 7 јули, 2017 - 12:52 (META) 

Вицепремиерот задолжен за економски прашања, Кочо Анѓушев, денеска имал средба со евроамбасадорот Самуел Жбогар, на која на шефот на Делегацијата на Европската Унија во земјава му ја презентирал економската програма на Владата.

Анѓушев, како што соопшти неговиот кабинет, на средбата нагласил дека Владата ќе работи на создавање добра бизнис-клима и на овозможување исти услови за инвеститорите.

„Владата ќе работи на реализација на капитални проекти, важни за подигнување на конкурентноста на компаниите во земјата. Ќе ја стимулираме соработката помеѓу домашните и странските компании и ќе воведеме нов концепт за привлекување инвестиции, што ќе биде транспарентен и со исти услови и за странските и за домашните инвеститори“, рекол Анѓушев, стои во соопштението.

Тој додал дека реформите во енергетскиот сектор ќе бидат во фокусот на Владата и дека до крајот на 2017 година ќе биде донесен новиот закон за енергетика, во согласност со договорот со Енергетска заедница и со препораките на Европската комисија.

„Во новиот закон за енергетика ќе ги имплементираме третиот енергетски пакет на Европската Унија и мерките препорачани од Енергетската заедница. Ќе работиме на искористување на сите постојни капацитети за производство на енергија во земјата, но ќе поддржуваме и изградба на нови капацитети, особено од обновливи извори на енергија“, нагласил вицепремиерот за економски прашања.

Жбогар на средбата порачал дека ако се исполнат поставените цели, македонската економија ќе забележи пораст со посилно темпо, што е во интерес и на земјата, но и на регионот и на Европската Унија.


Жбогар: Следните три месеци се клучни за планот „3 – 6 – 9“


Тетово, 6 јули, 2017 - 19:56 (META) 

Евроамбасадорот Самуел Жбогар денеска изјави дека е оптимист и дека очекува Владата да го спроведе реформскиот план „3-6-9“ за забрзување на евроатлантските интеграции.

Тој нагласи дека е добро што реформите се ставени на хартија и има рокови за нивно реализирање, додавајќи дека во наредните неколку месеци ќе се следи колку Владата ќе може да испорача.

– Она што е добро е што Владата излезе до план. Се премина од зборување за реформи на реформи кои се ставени конкретно на хартија. Мислам дека тоа што е потребно е во следните три месеци да се направат чекори во тој контекст. Се разбира дека ние, како Европска Унија, ќе ги поддржиме, меѓутоа да почекаме чекор по чекор да се реализираат овие работи – изјави Жбогар, кој денеска беше во посета на Желино и na Брвеница, во рамките на проектот „ЕУ за тебе“.

Планот „3-6-9“ вчера беше презентиран од премиерот Зоран Заев, кој посочи дека со новите реформи треба да се обезбеди демократски парламент, да се направат реформи во судството, безбедносните струкутруи, да се обезбеди кохабитација со претседателот, реформи во медиумите и соработка со граѓанскиот сектор, преку што ќе се обезбеди континуирана транспарентност и инклузивност.

Тој посочи дека бројките во името ги означувааат временските точки, односно бројот на месеци во кои треба да бидат спроведени реформите.


„ЕУ за тебе“ утре во Желино и во Брвеница


Желино, 5 јули, 2017 - 10:52 (META) 

Шефот на Делегацијата на Европската Унија во Македонија, Самуел Жбогар, утре ќе биде во општините Желино и Брвеница, во рамки на кампањата „ЕУ за тебе“.

Тој ќе се сретне со градоначалниците на Желино, Фатмир Измир, и на Брвеница, Енвер Пајазити, и ќе направи увид во некои проекти во овие општини што се финансирани од Проектот на ЕУ за инвестиции во рурални општини.

Со 260.000 евра што ЕУ ги подарува во рамките на овој проект, треба да се обезбеди пивка вода за селата Палатица, Требош, Узурмиште, Желино, Добарце, Чифлик, Ларце, Копачин Дол, Рогле, Ново Село, Групчин, Долна Лешница и Церово, сите во општина Желино, а 40.000 евра од планираните пари ќе ги обезбеди Општината.

Во Брвеница, со 260.000 евра што ЕУ ги подарува, треба да се реконструираат локалните патишта меѓу селата Милетино и Челопек, како и да се изгради ново училиште за 168 ученици во селото Гургурница. Другите 420.000 евра Општина Брвеница ќе ги обезбеди со заеми од Проектот на ЕУ за инвестиции во рурални општини.


Жбогар: Има напредок, но треба да се работи на реализирање на итните реформи


Скопје, 28 јуни, 2017 - 15:37 (META) 

Собраниската Комисијата за европски прашања денеска ја одржа својата прав седница, на која беше разговарано за унапредувањето на европската реформска агенда.

Претседателот на комисијата, Артан Груби, побара комисијата да усвои заклучок за Собранието да донесе декларација за забрзување на реформските и на интегративните процеси за зачленување на Република Македонија во Европската Унија. Ваквиот предлог беше едногласно прифатен од членовите на комисијата.

Тој истакна дека Комисијата за европски прашања ќе работи посветено и транспарентно, но и дека постојано ќе врши парламентарен надзор над работата на Владата, во делот кој се однесува на евроинтегративните процеси во земјата.

Вицепремиерот за европски прашања, Бујар Османи, истакна дека Владата е подготвена во претстојните три месеци да ги направи потребните ЕУ-реформи, пред одржувањето на локалните избори наесен. Тој потсети дека е подготвена нацрт-верзија на акцискиот план, во кој се адресирани реформските приоритети.

Евроамбасадорот Самуел Жбогар оцени дека е направен напредок по изборите и по формирањето на новата влада, но дека е потребно да се работи на реализирање на реформските приоритети, како и на забелешките од годишниот извештај за напредокот на земјата во 2016 година.


Поповски: Владини реклами нема да има, а МРТВ ќе се финансира само од буџет


Скопје, 23 јуни, 2017 - 16:30 (META) 

Една од клучните мерки на Владата е јавниот сервис МРТВ да не биде дел од комерцијалниот пазар и да биде финансирана од буџетот на државата, рече министерот за комуникации, отчетност и транспарентност, Роберт Поповски, на денешната конференција на тема „Иднината на комерцијалните ТВ-канали на национално ниво: Која е формулата за успех?“, во организација на Македонскиот институт за медиуми (МИМ).

Попоски најави дека Владата наскоро ќе ги достави во Собранието предлозите за измени на законите за реформи во медумската сфера, кои, меѓу другото, предвидуваат и укинување на радиодифузната такса.

– Потребна е регулација, односно реформи, кои ќе значат вистинско регулирање на медиумската сфера. Ако ги поставиме основите на функционирање, амбиентот многу ќе се промени. Кога Агенцијата за медиуми ќе си ја врши својата улога и јавниот сервис ќе биде поставен на вистинска основа, тогаш пазарот ќе функционира. Една од клучните мерки е МРТВ да не биде дел од комерцијалниот пазар и да биде финансирана од буџетот – рече Поповски.

Тој истакна дека Владата повеќе нема да троши пари од буџетот за реклами, бидејќи сè што ќе има потреба да го презентира пред јавноста ќе го направи на јавниот сервис бесплатно.

Евроамбасадорот Самуел Жбогар, на отворањето на конференцијата, рече дека медиумскиот бизнис има две цели – да обезбеди профит и да обезбеди слобода на изразување и на информации, додека државата преку своите независни и професионални регулаторни тела треба на транспарентен начин да ги следи нивните операции.

– Ова е релативно мал медиумски пазар и медиумските бизниси и регулатори имаат конкретен предизвик, бидејќи често нудат можност за влијание. Важно е сопственоста и финансирањето на медиумите да бидат транспарентни, а регулаторот да ја задржи својата непристрасност и независност – рече Жбогар.

Инаку, конференцијата е дел од проектот “Реформедиа МКД – Унапредување на соработката меѓу граѓанското општество, институциите и граѓаните за спроведување реформи во медиумската сфера“, кој е финансиран од Европската Унија.

На конференцијата учествуваа и претставници на една од најголемите телевизиски куќи во Хрватска, РТЛ, како и медиумски експерти од Словенија и од Хрватска.