Пуштена во употреба новата пречистителна станица во Радовиш


Радовиш, 18 јули, 2018 - 13:54 (META) 

Новата пречистителна станица за третман на отпадни води во Радовиш денеска и официјално беше пуштена во употреба. Во рамките на проектот поддржан од ЕУ, исто така е  ревитализирана и проширена е примарната канализациона мрежа во општината Радовиш, со што се решава проблемот со отпадните води, а се намалува и надземното и подземното загадување. Во рамките на проектот се изградени и колектори и нов пристапен пат. Пречистителната станица во Радовиш е со инсталиран капацитет за 25.000 жители.

На денешната церемонија присуствуваа премиерот Зоран Заев, ЕУ амбасадорот Самуел Жбогар, министерот за финансии Драган Тевдовски, министерот и заменик министерот за животна средина и просторно планирање, Садула Дураки и Јани Макрадули и градоначалникот на Радовиш, Герасим Конзулов.

– За само неколку месеци успеавме да комплетираме и пуштиме во употреба 4 пречистителни станици во градовите Струмица, Кичево, Прилеп, Радовиш, проекти финансирани од ИПА фондовите и дел од буџетски средства. Ме радува посветеноста и темпото на брза реализација со кои локалните самоуправи и државните институции пристапуваат во реализација на проектите финансирани со ИПА средствата. Тоа покажува дека Република Македонија решително и забрзано чекори на европскиот пат. Што би рекол амбасадорот Жбогар, „возот на Македонија веќе се движи кон ЕУ! – истакна Заев на почетокот на своето обраќање.

Тој порача дека сега наводнувањето на земјоделските површини во Радовишко ќе се врши со чиста и здрава вода, што е предуслов за производство на здрава храна.

– Во Радовишката река нема повеќе да се одлеваат отпадни води, туку пречистена вода од станицата – рече тој.

Шефот на Делегацијата на Европската Унија, амбасадорот Самуел Жбогар, порача дека ЕУ останува партнер на државата и дека ќе продолжи да работи на заштита на природните ресури.

– Заштитата на животната средина и создавањето услови за поквалитетен живот и одржлив развој е една од главните определби на ЕУ во поддршката што ја дава на различни проекти во земјава. Овој проект е дел од активностите финансирани од ЕУ, а паралелно, заедно со државата, работиме на реформи во секторот води, за да се обезбеди заштита на природните ресурси и одржливо водоснабдување за сите граѓани. Ние остануваме партнер на државата и ќе продолжиме да поддржуваме проекти во интерес на граѓаните – подвлече Жбогар.

За значењето на Пречисителната станица во Радовиш за локалните жители зборуваше и градоначалникот на општината Радовиш, Герасим Конзулов.

– Со овој проект решен е еден голем проблем во општината на долг рок. Освен еколошкиот аспект кој е многу значаен, за граѓаните од големо значење е и ревитализацијата и проширувањето на примарната канализациона мрежа, со што во голема мерка е подобрен и квалитетот на живот на граѓаните – истакна Конзулов.


Тевдовски: Работиме на подобрување на деловната клима и фискална консолидација


Скопје, 11 јуни, 2018 - 13:39 (META) 

Реформи во насока на подобрување на деловното окружување и постепена фискална консолидација, најави министерот за финансии Драган Тевдовски на конференцијата по повод започнување на изработка на Програмата за економски реформи 2019-2021.

На конференцијата присуствуваше амбасадорот на Европската унија во Македонија, Самуел Жбогар и сите инситуции кои се вклучени во подготовката на реформскиот документ кој се доставува до ЕУ.

-За првпат имаме јасна и кредибилна стратегија за реформи во јавните финансии, подготвена заедно со ЕУ. Таа содржи акционен план за подобрување на сите поважни елементи на системот на јавни финансии во следните три години. Значително е подобрена транспарентноста. Денес граѓаните имаат увид во тоа како се трошат државните пари. Се објавуваат граѓански буџети, како и низа извештаи за извршување на буџетот, кои порано не беа достапни на јавноста. Јавно се достапни и договорите за јавни набавки на институциите, а со новиот закон ќе бидат достапни и сите понуди доставени на тендерите – рече Тевдовски.

Жбогар посочи дека Македонија имала најдобро остварување во спроведувањето на реформите минатата година во однос на сите други земји, како и дека го подобрила сопствениот резултатот во однос на претходните години.

– Достигнат е видлив прогрес во управувањето со јавните финансии. Земјата започна со имплементирање на реформската програма која ја усвои, а и драстично е подобрена фискалната транспарентност. Народната банка во континуитет спроведува стабилна монетарна политика, одржувајќи го нивото на денарот и ценовната стабилност. Владата го лимитираше носењето на закони по скратена постапка. Исто така, сега сите министри се обврзани да ги објавуваат законите на ЕНЕР за јавна консултација. усвојувањето на стратегијата за образование содржи чекори за подобрување на квалификациите на наставниците- рече Жбогар.

Програмата за економски реформи е сеопфатен документ за економското управување, кој земјите аспиранти за членство се обврзани да го поднесуваат до Европската комисија секоја година. Програмата 2019-2021 треба да се достави до Европската комисија до 31 јануари 2019 година.


Жбогар: Решението освен за Македонија и Грција ќе биде добро за регионот и за Европа


Битола, 8 јуни, 2018 - 14:24 (META) 

Решението на долгогодишниот спор помеѓу Македонија и Грција ќе биде добро за двете држави, но и за регионот и за цела Европа, изјави денеска амбасадорот на Делегацијата на ЕУ, Самуел Жбогар за време на посетата на Националниот парк „Пелистер” во Битола.

Според амбасадорот Жбогар, потребни се трпение и доверба за да тоа се случи.

-Сите тука со нетрпение ги очекуваме резултатите од многу интензивните преговори и разговори што се во тек. Мислам дека двете страни ќе може да изнајдат решение кое што освен за двете држави ќе биде добро за целиот регион и Европа. За тоа да се случи, ние мора да имаме трпение и доверба дека тоа ќе се случи – изјави Жбогар.


Османи му го презентирал планот „18“ на евроамбасадорот Жбогар


Скопје, 31 мај, 2018 - 15:21 (META) 

Вицепремиерот за европски прашања Бујар Османи пред евроамбасадорот Самуел Жбогар и претставници на Делегацијата на ЕУ во Македонија го презентирал новиот реформски план на Владата, наречен план „18“, со кој, според Секретаријатот за европски прашања (СЕП), јавноста ќе биде запознаена откакона  следната седмица ќе се најде на седница на Владата.

На почетокот, Османи изразил задоволство од „имплементацијата на планот „3-6-9“, особено неговата валоризација во еден од најпозитивните извештаи за Република Македонија, кој беше придружен со чиста и безусловна препорака за преговори од страна на Европската Комисија“, се вели во соопштението на СЕП.

– Владата има цврста определба да ја задржи реформската агенда на врвот на листата приоритети и по завршувањето на имплементацијата на планот „3-6-9“, за што, Секретаријатот за европски прашања  презеде обврска да изготви нов реформски план за 2018 година, чија реализација треба да заврши со излегувањето на новиот извештај на Европската Комисија на почетокот од следната година – рекол Османи.

Тој нагласил дека планот „18“, кој сѐ уште е во фаза на усогласување, се очекува да помине на Влада следната недела, по што ќе биде ставен на увид и на експертската јавност и граѓанскиот сектор, кои би требало да учествуваат во неговата финализација.

Вицепремиерот Османи нагласил дека во планот влегуваат сите забелешки и сугестии нотирани во Извештајот на Европската Комисија, а истовремено, ги повикал евроамбасадорот Жбогар и Делегацијата на ЕУ во Македонија да придонесат со свои забелешки, сугестии и коментари.

По усвојувањето на планот, Османи во Брисел ќе го презентира новиот документ пред администрацијата на ЕУ.


Османи предупреди за ризици ако не почнат преговори за зачленување со ЕУ


Скопје, 9 мај, 2018 - 13:15 (META) 

Вицепремиерот за европски прашања Бујар Османи на денешниот традиционален појадок што го организираше во Клубот на пратеници во Скопје, предупреди на ризици од раслојување и екстремизам во Македонија, ако наскоро не почнат преговори со ЕУ за зачленување.

– Губењето на надежта за ЕУ и НАТО членство ќе придонесе младите луѓе и натаму да продолжат да ја напуштаат земјата намалувајќи ја работната сила и можностите за развој и раст. Загубата на надежта, исто така, ќе предизвика силен замор од ЕУ и евроскептицизам и ќе ги зголеми анти-НАТО чувствата. Поделеноста на населението по етничка, религиозна и социјална основа ќе се продлабочи што ќе предизвика ранливост на демократските институции и нивниот капацитет да владеат, ќе го намали нивото на отпорност и ќе создаде плодна почва за вмешување и поголемо влијание на трети земји. Ќе отвори простор за навлегување на потенцијални насилни групи зголемувајќи го со тоа ризикот од тероризам, екстремизам и национализам – предупреди тој.

На настанот организиран од Секретаријатот за европски прашања по повод 9 мај, Денот на Европа, присуствуваа амбасадорите на земјите- членки на ЕУ во Македонија, поранешните вицепремиери за европски прашања, како и други претставници на странските претставништва во Македонија.

Османи исто така порача дека Македонија, иако тоа не е формализирано, е веќе дел од Европа.

– Ако ја земеме предвид нашата заедничка историја, заедничка географија, и најважно, нашите заеднички вредности и заеднички стратешки интереси, во политичка и економска смисла, заклучокот е едноставен: Ние веќе сме важен дел од Европа – рече вицепремиерот за европски прашања.

На крајот, Османи, посочувајќи го напредокот на Македонија, ги образложи пред амбасадорите и бројните причините зошто Македонија треба да добие поддршка во своите евроатлански аспирации, повикувајќи ги притоа амбасадорите на земјите членки да ги пренесат овие пораки онаму каде се носат одлуките, во нивните главни градови.

– На состанокот на Советот во јуни, нашето очекување е официјално да слушнеме датум за почеток на пристапните преговори, потврден од Европскиот совет. Ве уверувам дека Владата и администрацијата се подготвени да се справат со предизвиците на преговарачкиот процес – изјави Османи.


Денот на Европа и 68-годишнината на Унијата ќе се слават во повеќе градови


Скопје, 7 мај, 2018 - 11:36 (META) 

Денот на Европа, 9 мај, годинава, како 68-ми роденден на ЕУ, Делегацијата на ЕУ во Македонија ќе го одбележи со настани во неколку градови во земјава.

На 9 мај ќе се слави во Куманово, Крива Паланка, Дебар, Кавадарци, Кочани, Гевгелија, Охрид, Гостивар, Тетово, Велес, Струмица и Битола. Инфо точките на ЕУ на универзитетот „Св. Кирил и Методиј” во Скопје, Универзитетот на ЈИЕ во Тетово и Битолскиот универзитет ќе ги вклучат студентите во дискусии за европската иднина на земјата. Амбасадорот на ЕУ, Самуел Жбогар и други амбасадори на земји-членки на ЕУ ќе учествуваат на прославите и ќе ја пренесат пораката за заедничка иднина.

Централен настан на програмата за Денот на Европа е „ЕУ паркот“, што ќе се одржи во Штип на 12 мај, во присуство на премиерот Зоран Заев, градоначалникот на Штип, Благој Бочварски и амбасадорот на ЕУ, Самуел Жбогар. На настанот ќе се одржат презентации на сите земји-членки на ЕУ од страна на студентите на универзитетот во Штип, спортски активности, како и музички изведби на популарни уметници.

За одбележување на Европската година на културно наследство, ќе се одржи изложба на фотографии од локации на културата во земјата и ЕУ, за што повеќе информации може да се најдат тука.

Делегацијата на Европската Унија поддржува и други настани за Денот на Европа, како што се Скопскиот маратон, годишната матурска парада, дебати и натпревари за деца и студенти организирани од Европското движење во Скопје, Велес, и Куманово, како и бројни културни настани.

Денот на Европа е одбележување на годишнината од историскиот говор одржан во Париз во 1950 година кога Роберт Шуман, тогашен француски министер за надворешни работи, ја претставил идејата за нова форма на политичка соработка во Европа, со која војните помеѓу народите во Европа ќе станат незамисливи.


Жбогар: Македонија ја очекува многу работа


Скопје, 24 април, 2018 - 16:15 (META) 

Македонија ја заслужи безусловената препорака, но ја очекува многу работа, рече евроамбасадорот Самуел Жбогар на седницата на собраниската Комисија за европски прашања на која го претстави извештајот.

– Препораката од извештајот е кристално јасна, процесот на евроинтеграција не е техничка работа на штиклирање на задачите. Се работи за прифаќање и споделување на европските основни вредности. Потребно е да се одржат и продлабочат реформите. Одлуката за отпочнување на преговорите бара едногласно решение од сите 28 земји членки – рече Жбогар.

Според пратениците од ВМРО-ДПМНЕ, нивната партија е најзаслужна за остварување на условите за позитивното во извештајот, а сегашната власт на СДСМ „тоне во корупција“.

– Денес благодарение на Владата предводена од ВМРО-ДПМНЕ Македонија го изгради потребниот капацитет и е подготвена да започне преговори за членство со ЕУ. Наместо да продолжат по нашиот пат, денес ние ја имаме обратната слика. СДСМ ветуваше дека РМ ќе ја внесат во ЕУ и НАТО само за шест месеци од доаѓањето на власт. Но сега сме сведоци на растечка корупција наведени и во Извештајот. РМ е најкорумпирана земја во Европа, а тоа е нотирано и од Транспанси интернешнел –  рече Невенка Стаменковска од ВМРО-ДПМНЕ.


ЕК ќе го објави извештајот за Македонија, се очекува препорака за отворање на преговорите


Стразбур, 17 април, 2018 - 10:04 (META) 

Европската комисија денеска во Стразбур ќе го објави Извештајот за состојбите и напредокот на Македонија на евроинтегративниот пат.

ЕК повторно препорачува отворање на пристапните преговори со Македонија, а извештајот за напредокот на земјата е меѓу попозитивните во овој пакет на Брисел, кој, како што стои во извештајот, „јасно ја препознал политичката волја за напредок“, јавија вчера дописниците на Радио Слободна Европа (РСЕ) од Брисел, кои имаа увид во документот.

Во него се предупредува дека „штетата која се правела години наназад, не може да се среди преку ноќ“, но дека земјава ја надминала длабоката политичка криза и дека структурните реформи се долг процес кој може да потрае.

Денеска, заедно со објавувањето на Извештајот на ЕК истече и периодот за имплементација на „Планот 3-6-9“, а деталниот фактографски извештај за неговата имплементација, вицепремиерот задолжен за европски прашања, Бујар Османи, вчера му го предаде на евроамбасадорот Самуел Жбогар.

– Реализиравме преку 90 отсто од предвидените реформи во „Планот 3-6-9 “и 100 проценти од неговата суштина. Планот ја постигна неговата цел и ја врати земјата на евроатланскиот пат – рече Османи, кој како што кажа, денеска очекува убави вести од Брисел за Македонија.

Од Секретаријатот за европски прашања потсетуваат дека „Планот 3-6-9“ беше усвоен во јули минатата година и дека неговата цел била да се одмрзне реформскиот процес и враќање на државата на евроатланскиот пат.


Османи му го предаде извештајот за реализацијата на планот „3-6-9“ на Жбогар


Скопје, 16 април, 2018 - 16:15 (META) 

Вицепремиерот задолжен за европски прашања, Бујар Османи, во пресрет на утрешното излегување на Извештајот за состојбите и напредокот на Република Македонија, му го предаде на Евроамбасадорот Самуел Жбогар, финалниот фактографски извештај за реализација и имплементацијата на реформите од Планот „3-6-9“.

– Реализиравме преку 90 отсто од предвидените реформи во Планот „3-6-9 “и 100 проценти од неговата суштина. Планот ја постигна неговата цел и ја врати земјата на евроатланскиот пат – рече Османи и додаде дека очекува убави вести утре од Брисел за Македонија, при претставувањето на Извештајот на Европската Комисија за земјава.

Од Секретаријатот за европски прашања потсетуваат дека Планот „3-6-9“ беше усвоен во јули минатата година и дека неговата цел била да се одмрзне реформскиот процес во Република Македонија и враќање на државата на евроатланскиот пат.

„Делот „3“ беше финализиран со одржувањето на фер, слободни и кредибилни избори во ноември минатата година, додека делот „6“ заврши со излегувањето на Стратегијата на Европската Комисија за проширување со земјите од Западниот Балкан 2025. Периодот за имплементација на делот девет, т.е. на целиот План 3-6-9 истекува утре, 17 април, со објавувањето на Извештајот на Европската Комисија за состојбите и напредокот на земјава“, велат од СЕП.


Мицкоски на амбасадорите на земјите-членки од ЕУ им се пожалил на злоупотреби од власта


Скопје, 10 април, 2018 - 16:15 (META) 

Претседателот на ВМРО-ДПМНЕ, Христијан Мицкоски, во просториите на
Делегацијата на ЕУ, имал работна средба со шефот на мисијата на ЕУ во Македонија, Самуел Жбогар и амбасадорите на земјите-членки на ЕУ, на која изнел бројни обвинувања кон власта, информираше ВМРО-ДПМНЕ.

„Мицкоски ги информираше амбасадорите за бројните системски злоупотреби кои се извршуваат од страна на претставници на владејачката коалиција. Недостатокот на демократскиот капацитет, креирањето на поделби, како и нереализацијата на реформите државата ја оддалечува од европската агенда и нè сврстува во редот на најкорумпираните држави“, рекол Мицкоски.

Претседателот на најголемата опозициска партија нагласил дека „ВМРО-ДПМНЕ е политичка партија која што верува дека е стратешки интерес државата што поскоро да стане дел од Европската унија и ќе го поддржи секој процес кој што е во таа насока“.