Заврши самитот во Лондон, Британија ја удвојува финансиската поддршка за Македонија


Лондон, 11 јули, 2018 - 10:44 (META) 

Премиерот Зоран Заев и владината делегација го завршија учеството на Самитот ЕУ – Западен Балкан (Берлински процес), што се одржа во Лондон, на кој учествуваа лидерите на земјите од регионот, премиерката на земјата-домаќин Тереза Меј, германската канцеларка Ангела Меркел, високата претставничка за надворешни работи и безбедност на ЕУ, Федерика Могерини и еврокомесарот Јоханес Хан.

Заев на маргините на Самитот, кратко се сретнал со германската канцеларка Ангела Меркел која ја запознал со подготовките за претстојниот референдум за реализација на одредбите од договорот за решение на македонско-грчкиот спор и за стратегиско партнерство.

„Премиерката на Обединетото Кралство на Велика Британија и Северна Ирска, Тереза Меј, како исклучително успешна приказна меѓу последните два самита ЕУ-Западен Балкан го истакна историскиот договор меѓу Македонија и Грција при што им честиташе на премиерите Заев и Ципрас, потенцирајќи дека прогресот е возможен. Меј најави удвојување на финансиска поддршка за проекти за јакнење на јавната администрација во Македонија, како и помош за обука за дигитални вештини на еден милион деца од основните училишта од регионот, со цел да ја спознаат својата моќ во модерниот свет“, информираат од Владата и додаваат дека за идните проекти е предвидена и нова финансиска поддршка од фондовите на ЕУ.

За време на својата работна посета во Лондон, премиерот Заев имал интервју за британскиот телевизиски сервис Би-би-си, за познатата емисија „Хард ток“ (Hard Talk).


Заев за Лондонскиот самит: Македонија имаше специјално место


Лондон, 11 јули, 2018 - 9:43 (META) 

Премиерот Зоран Заев во оценката за учеството на ова издание на Самитот ЕУ/Западен Балкан во Лондон вели дека Република Македонија имала специјално место на овој собир посветен на Регионалната економската соработка, потоа на надворешната политика и билатералните прашања и наследство од минатото, како и на безбедносните прашања и миграциите.

– Мора да се каже дека Република Македонија има специјално место на ова издание на Самитот на ЕУ за Западен Балкан. Со постигнатиот договор македонско-грчкиот спор за името и за стратегиско партнерство со Грција, како и со датумот за преговори со Европската Унија, нашата земја е препознаена како лидер во регионот од аспект на надворешната политика и билатералните прашања и наследство од минатото. Начинот на кој нашата земја ги затвори отворените прашања со сите соседи е модел за успешна приказна што ја поздрави целиот демократски свет, и посебно нашите соседи и нашите партнери во Европската Унија – изјави Заев по завршувањето на Лондонскиот самит.

Заев имаше средба и со Високата претставничка за безбедност и надворешна политика на ЕУ, Федерика Могерини, на која биле и вицепремиерот Бујар Османи и министерот за надворешни работи Никола Димитров.

Како што соопштија од Службата за односи со јавноста на Владата, Могерини лично му честитала на Заев за одлуката на Европскиот Совет да одреди датум за отворање на преговорите во делот за поглавјата за членство во ЕУ, како и за храбрата одлука за постигнување на договор со Грција.


Македонија на Самитот на НАТО очекува да добие покана за преговори за членство


Брисел, 11 јули, 2018 - 9:38 (META) 

Дваесет и деветте лидери од Североатланскиот совет денеска, на првиот ден од дводневниот Самитот на НАТО во Брисел, ќе постигнат согласност да и испратат на Македонија покана за почеток на преговори за членство.

Ова го најави генералниот секретар на НАТО, Јенс Столтенберг за време на вчерашната прес-конференција и додаде дека очекува по историскиот Договор со Грција за името, Македонија да добие покана за формално правно да и пристапи на Унијата откако целосно ќе ја имплементира спогодбата.

НАТО ќе го чека исходот од референдумот за Преспанскиот договор закажан за септември или октомври. Доколку тој биде успешен и Договорот прифатен од граѓаните на Македонија, НАТО ќе го чека завршувањето на целата процедура за ратификација на Договорот од сите 29 земји членки, по што Македонија ќе стане формално полноправна членка. До тогаш Македонија ќе може да учествува во сите постапки и да дискутира, но не ќе може да гласа.

Американската амбасадорка во НАТО, Кеј Бејли Хачинсон вчера потврди дека САД сака да ја види Македонија како членка на Алијансата, но порача дека за тоа е неопходно граѓаните да го потврдат Договорот со Грција на референдум.

Во Брисел денеска пристигна македонскиот премиер Зоран Заев придружуван од министерот за надворешни работи Никола Димитров, министерката за одбрана Радмила Шекеринска и вицепремиерот за евроинтеграции Бујар Османи.

Премиерот ќе има обраќање на конференцијата „NATO-engages” што се одржува на маргините на Самитот, а потоа е поканет на вечерата на сите 55 лидери на земји членки и земји партнери кои учествуваат на Самитот.

Во текот на вториот ден од Самитот, во раните попладневни часови, е предвидена церемонија со која ќе се означи поканата за Македонија, а се очекува и заедничка прес-конференција на првиот човек на НАТО Столтенберг и премиерот Заев.


Заев во Лондон се сретна со претставници на Охридската група


Лондон, 10 јули, 2018 - 10:44 (META) 

Премиерот Зоран Заев, на маргините на Самитот на ЕУ за Западен Балкан, што денеска се одржува во Лондон, имаше средби со претставници на Охридската група, пријатели и поддржувачи на Македонија, предводени од сер Џорџ Робертсон.

Од владиниот кабинет велат дека на средбите, искусните дипломати и политичари, претставници на повеќе меѓународни организации, го истакнале исклучителниот напредок на Република Македонија и ја нагласиле историската важност за постигнатиот договор со Република Грција кој ги отвара вратите за членство во НАТО и датум за преговори со ЕУ.

„Соговорниците на работните состаноци се согласија дека од огромна важност е што мнозинството од граѓаните го поддржуваат членството во ЕУ и НАТО и дека тоа е аргумент за оптимистички очекувања за исходот од референдумот. Лорд Робертсон, поранешниот Генерален секретар на НАТО, информираше на средбите дека сите членови на групата Охрид и пријатели на Република Македонија го поддржале писмото кое во име на групата било испратено до шефовите на државите и на владите на земјите членки на ЕУ и НАТО, за позитивна одлука на Европскиот Совет и за најавеното активирање поканата за членство во НАТО“, информираат од владината прес-служба.


„Катимерини“: НАТО ќе го повтори условот за Македонија


Атина, 9 јули, 2018 - 11:33 (META) 

Електронското издание на грчкиот весник, „Катимерини“, повикувајќи се на нацрт верзијата на декларацијата на НАТО, до која се тврди дека дошол весникот, пишува оти на претстојниот самит на Алијансата, на 11 и 12 јули оваа недела, Македонија повторно ќе добие само порака дека пристапувањето кон Северноатлантската алијанса ќе зависи од спроведување на договорот за името со Атина. Наводно, условноста ќе се забележела во членовите 59 и 60 од декларацијата.

Владините извори од Атина велат Грција и нејзините партнери се на истата линија по ова прашање, а за него било дискутирано и за време на одделни телефонски разговори минатата недела меѓу американскиот потпретседател, Мајк Пенс и премиерите Алексис Ципрас и Зоран Заев.


Заев денеска и утре ќе учествува на Самитот ЕУ-Западен Балкан во Лондон


Лондон, 9 јули, 2018 - 9:45 (META) 

Премиерот Зоран Заев, вицепремиерот за европски прашања, Бујар Османи и министерот за надворешни работи Никола денеска и утре учествуваат на Самитот ЕУ-Западен Балкан (Берлински процес), што се одржува во Лондон, информираат од владината прес-служба.

Утре премиерката на Обединетото Кралство на Велика Британија и Северна Ирска, Тереза Меј ќе има прием за шефовите на делегациите на земјите членки на Берлинскиот процес, и на земјите членки на ЕУ присутни на самитот, како и за претставниците на Европската Комисија.

Премиерот Заев во текот на првиот работен ден ќе присуствува и на работниот ручек за шефовите на делегациите и на директорите на Европската инвестициона банка, на Европската банка за обнова и развој, на претставниците на Регионалниот совет за соработка на земјите од Западен Балкан, како и на претставниците на Регионалната канцеларија за соработка меѓу младите.

Темата на работната сесија на ручекот, под раководство на Меј е економијата и регионалната соработка, со воведно излагање на еврокомесарот за соседска политика и за проширување на ЕУ, Јоханес Хан.

Заев ќе се обрати на панелот на тема „Надворешна политика, билатерални прашања и наследство од минатото“, со кој ќе претседава британскиот министер за надворешни работи Борис Џонсон и ќе учествува во работата на пленарната сесија водена од премиерка Меј, на која ќе бидат презентирани плановите за Самитот во Варшава во 2019 година.

На оваа пленарна сесија пред присутните ќе се обратат полскиот премиер Матеуш Моравјецки, како и Канцеларката на СР Германија Ангела Меркел и еврокомесарот Јоханес Хан, кои ќе говорат на темата „Иднината на Берлинскиот процес“.

За време на самитот планирана е и средба на премиерот Заев и владината делегација со Високата претставничка за безбедност и надворешна политика на ЕУ Федерика Могерини.

Официјалната програма на Самитот ЕУ-Западен Балкан (Берлински процес) ќе заврши со прием за сите делегации во палатата Сејнт Џејмс, кој ќе го приреди принцот Чарлс.

Кабинетот на премиерот информира дека по Лондон, Заев ќе замине за Брисел каде што ќе учествува на Самитот на шефови на држави и влади на НАТО.


Бизнисот во фокус на седмиот Самит на шефовите на Влади на Кина и земјите од ЦИЕ


Софија, 6 јули, 2018 - 9:46 (META) 

Бизнис делегација на највисоко ниво предводена од претседателката на Сојузот на стопански комори, Данела Арсовска традиционално учествува на 7. Самит и бизнис-форум на шефовите на Влади на Кина и 16. земји од Централна и Источна Европа (ЦИЕ), кој официјално ќе се одржи на 7 јули во Бугарија.

„Минатата година во Унгарија остваривме успех со потпишување на седум договори за трговски партнерства меѓу Македонија и НР Кина. Традиционално, како резултат на одличната соработка на Сојузот со НР Кина, очекуваме делегатите да отпочнат нови партнерства, да осознаат за можностите за вклучување во проектите кои годинава ќе бидат во фокусот и се значајни за Иницијативата 16 + 1 и за целиот регион. Интересот од страна на компаниите од сите сектори за учество на годинешниот самит е голем и веруваме дека ќе ги надминеме успесите од минатата година од самитот во Будимпешта“, изјави Арсовска.

Претседателката на ССК, е потписник на единствениот договор на Балканот за економска соработка со Кина со што за македонските компании се отвори пат за директен пристап на најголемиот азиски пазар.

Годинава, акцент ќе се на високи технологии, инвестиции, индустриско партнерство, заедничко вложување, инфраструктура (вклучувајќи и транспортна и патна инфраструктура, енергетика), земјоделство и туризам, а ќе се промовира и кинескиот мега-проект „Еден појас, еден пат” за инфраструктурно и економско поврзување на Азија, Европа, Африка и Блискиот Исток.

Изминатите две години, по однос на вкупната надворешно-трговска размена, Кина е седми трговски партнер на Македонија. Вкупната трговска размена лани изнесувала, 506 милиони долари. При тоа, остварен е извоз во вредност од 62,2 милиони долари, а увоз од 444 милиони долари.


Заев и Ципрас ќе се сретнат во Лондон на 10 јули


Лондон, 4 јули, 2018 - 10:45 (META) 

Премиерите на Македонија и на Грција, Зоран Заев и Алексис Ципрас ќе се сретнат во Лондон, на маргините од Самитот на Западен Балкан што ќе се одржи во вторник (10 јули), дознава „Независен весник“.

Двајцата премиери ќе разговараат за развојот на настаните по потпишувањето на Преспанскиот договор и ќе ги координираат своите активности.

Премиерката на Велика Британија, Тереза Мај, ќе биде домаќин на Самитот за Западен Балкан во Лондон, покажувајќи ја долгогодишната заложба на Велика Британија во регионот и европската безбедност. Таа ги покани шефовите на владите на шесте земји од Западен Балкан: Албанија, Босна и Херцеговина, Косово, Македонија, Црна Гора и Србија.

Самитот во 2018 година ќе биде петти што ќе се одржи под Берлинскиот процес по Берлин (2014), Виена (2015), Париз (2016) и Трст (2017 година). Берлинскиот процес е дипломатска иницијатива што германската канцеларка Ангела Меркел ја започна во 2014 година. Секоја година ги обединува шесте земји од Западен Балкан, партнерите на ЕУ, како и претставниците на институциите на ЕУ, да работат заедно за поддршка на безбедноста, стабилноста и просперитетот во регионот.

Другите земји кои Велика Британија ги покани да присуствуваат се партнери од ЕУ, вклучувајќи ги Австрија, Хрватска, Франција, Германија, Италија и Словенија, Бугарија и Полска која ќе биде домаќин на Самитот за Западен Балкан во 2019 година.


Анѓушев и Манчевски учествуваат на Самитот за Западен Балкан во Виена


Виена, 4 јули, 2018 - 10:10 (META) 

Вицепремиерот за економски прашања, Кочо Анѓушев и министерот за информатичко општество и администрација, Дамјан Манчевски учествуваат на работен состанок на министри за економски ресори, што се одржува во Виена, како активност во рамки на Петтиот самит за Западен Балкан, информираат од Влада.

Анѓушев ќе се обрати на сесија на која ќе се дискутира за регионалната економска област, а обраќање на таа сесија ќе има и еврокомесарот Јоханес Хан, како и други министри од регионот. Манчевски, ќе учествува на сесијата насловена „Колективни пристапи кон дигитализиран Западен Балкан“, каде што ќе даде осврт на активностите кои Владата ги спроведува во оваа насока.

Самитот за Западен Балкан, се организира во рамки на таканаречениот „Берлински процес“, инициран од Сојузна Република Германија, а поддржан од Обединетото Кралство, Франција, Австрија и Италија.

За разлика од досегашниот концепт на еднодневна конференција, годинава официјалниот дел  ќе се одвива во три дена, денеска е сесијата на министрите за економија во Виена, на 9 јули ќе има паралелни сесии на министрите за надворешни и за внатрешни работи, а ден потоа се состануваат претседателите на Влади во Лондон.


Заев задутре на средба со Столтенберг


Скопје, 27 јуни, 2018 - 11:38 (META) 

Премиерот Зоран Заев в петок наутро ќе има средба со генералниот секретар на НАТО, Јенс Столтенберг, најави тој за време на семинарот Рос-Рот што се одржува во Собранието.

По средбата предвидена е заедничка прес-конференција на која тој очекува дека ќе биде објавено дека Македонија ќе добие покана за полноправно членство во НАТО на самитот.

Заев рече дека очекува сите земји членки на НАТО да го ратификуваат договорот за членство на Македонија.