Арсовска: Искористувањето на фондовите од ЕУ ќе ја зајакнат економијата на регионот


Софија, 18 мај, 2018 - 10:19 (META) 

Претседателката на Сојуз на стопански комори на Македонија (ССК),  Данела Арсовска во обраќањето нa отворањето на Виенскиот економски форум во Софија, ја истакна важноста од спроведувањето на економските реформи во Македонија во процесот на приближување до Европската Унија.

Таа додаде дека потребно е искористување на достапните фондови за да се изгради силна економска мрежа со земјите од Западен Блакан, како обединет пазар кој ќе го зајакне регионот и ќе го приближи до ЕУ.

„Спроведувањето на економските реформи во земјата со приоритет на регулаторната реформа, реформи на енергетскиот и транспортниот пазар, намалување на неформалната економија и функционирањето на пазарот како и доследност на политиките, владеење на правото за привлекување и задржување на инвеститорите, се клучни за постигнување економски раст, конкурентност и подобар животен стандард“, додаде Арсовска.

Европската Унија во консултација со земјите од Западен Балкан ја усвои декларацијата од 17 точки на самитот на ЕУ-Западен Балкан. Меѓу другото, во декларацијата се вели дека ЕУ се обврзува значително да ја поттикне поврзаноста во транспортната, енергетската, дигиталната и економската сфера.

ЕУ исто така се согласува да промовира поволна пазарна и инвестициска средина во Западен Балкан, за регионот побргу да се придвижи кон дигиталната економија и кон одржливите општества што ги почитуваат одредбите за климата во согласност со Парискиот договор.


Заев – Меј: Опцијата за името која би можела да биде прифатлива, е комплетно решение


Скопје, 17 мај, 2018 - 22:25 (META) 

Тереза Меј, првата премиерка од Обединетото Кралство што доаѓа во Македонија по скоро 2 децении, рече дека Македонија е интегрален дел од Европа и вети подршка за македонските евроинтеграции.

Меј која со сите почести беше пречекана во Владата, во врска со спорот со името порача дека е значајно тоа што Македонија пружала рака кон својот сосед, но дека за решение ќе треба силна политичка волја за тешки одлуки.

– Знам дека конфликтите од минатото некогаш можат да бидат невозможни за надминување. Многу тешки прашања остануваат нерешени – како внатрешните конфликти во регионот, организираниот криминал и т.н. Мора да се соочиме со предизвиците од минатото, но да останеме амбициозни во обезбедувањето на мирна и просперитетна иднина која вашите граѓани ја заслужуваат – рече премиерката Меј.

Премиерот Зоран Заев посетата ја оцени како круна на долгогодишното партнерство меѓу двете земји, а на следниот самит во Лондон очекува европските лидери да верификуваат напредок на Македонија. Од Софија се враќа со оптимизам.

– Едно е сигурно, пријателството ќе расте меѓу Македонија и Грција и од тоа бегање нема. Довербата е изградена. Граѓаните соработуваат, институциите соработуваат и тоа ќе биде така. Јас искрено верувам дека можеме да најдеме решение, опцијата која би можела да биде прифатлива од двете страни е комплетно решение. Продолжуваат сега консултациите во двете држави – рече Заев.

Попладнево Меј се сретна со претседателот на Собранието, Талат Џафери, му изрази поддршка за реформите, нагласувајќи дека знае дека изминатава година зградата на македонскиот парламент беше сведок на тешки времиња. Меј исто така истакна дека е свесна и за промените кои се случија оттогаш.

– Горда сум што Обединетото Кралство ги поддржува овие реформи преку нашите програми за финансирање. Кога владее демократијата, придобивките ги чувствуваме сите – посилно Собрание значи посилна Македонија – истакна Меј, која имаше средба и со лидерот на опозициската ВМРО-ДПМНЕ, Христијан Мицкоски.


Ципрас: На чекор сме до договор, не чека тешка работа


Софија, 17 мај, 2018 - 16:36 (META) 

Синоќа, во малку поопуштена атмосфера, по вечерата и речиси до утринските часови имавме многу суштински разговори и постигнавме суштински напредок. Требаше само да преспиеме и денеска да го потврдиме тоа што сме го договарале. Не чека тешка работа. Сè уште не сме во позиција да зборуваме за договор, но ќе се сретнеме пак на почетокот на следниот месец и ќе се обидеме да постигнеме договор пред Самитот на 28 јуни – рече на прес-конференцијата во Софија грчкиот премиер Алексис Ципрас, по разговорите со неговиот макeдонски колега Зоран Заев.

Ципрас изјави дека имал три тет-а-тет средби: со францускиот претседател Емануел Макрон, со германската канцеларка Ангела Меркел и со Заев.

На прашањето, дали е оптимист дека ќе има конечен договор пред Самитот во јуни, Ципрас вели дека на чекор се до договор, но дека преговорите не се лесни, но и дека договорот, ако се постигне, ќе го издржи тестот на времето и ќе ги почитува чувствата на двата народа.

Ципрас потврди дека во оваа ситуација „клучна е позицијата на опозицијата и во двете земји“ и дека грчкиот став останува дека се неопходни „промени нa Уставот на соседот“.

– Нашата позиција е иста, бараме решенија за сите клучни точки без да ги поминеме црвените линии. Не е лесно прашањето, но има варијанти. Нема да ви дадам поединости. Грчката страна го нема притисокот на времето, но сепак, до крајот на јуни и нам ни треба разврска. Ако е позитивна  – добро, ако не, одиме понатаму. Остануваме добри соседи – рече Ципрас.

Тој потврди дека во следните денови, особено во Македонија, ќе има процес на информирање за постигнатото, како и дека Преспа, заради симболиката, е една од варијантите каде би се потпишал евентуалниот договор.

Сепак, за Грција една од големите вести од Самитот е исходот од средбите на Ципрас со Маркел и Макрон. Грчкиот премиер е оптимист дека тие ќе помогнат во решавање на проблемот со долгот на земјата.


Заев се сретна со Ципрас, Макрон зборува за реформи, а потоа приклучување кон ЕУ


Софија, 17 мај, 2018 - 11:53 (META) 

Во Софија, пред почетокот на самитот на ЕУ и земјите од Западен Балкан, во Националниот дворец на културата, се сретнаа премиерите на Македонија и Грција, Зоран Заев и Алексис Ципрас.

Според тоа што го објавија од македонската влада, а и од објавите на официјалната Фејсбук-страница на Заев, на денешната средба се разговара за спорот за името.

„Македонија и Грција го зајакнуваат пријателството. Со премиерот Ципрас веруваме дека можеме да најдеме решение кое го штити достоинството на граѓаните во двете држави“, напиша Заев, повторувајќи го и слоганот „Посветени на решенија, за иста Европа се бориме“.

Францускиот претседател Емануел Макрон, пристигнувајќи на самитот порача дека Франција го поддржува приближувањето на балканските земји кон ЕУ, но првин мора да се спроведат реформите.

– Го поддржувам балканското движење кон Европа и нивното пристапување како идни членки на ЕУ. Сепак, мислам дека треба да бидеме многу претпазливи и цврсти со процесот на проширување. Ние мора да им помогнеме на земјите што се реформираат и се движат кон Европа, тоа наш стратешки избор – рече Макрон, посочувајќи дека ЕУ не треба да брза да се прошири пред земјите-кандидати да ги спроведат реформите.

Во официјалниот дел од програмата, премиерот Зоран Заев денеска беше пречекан од страна на премиерот на бугарската влада Бојко Борисов, по што учествуваше во сесијата на отворањето на Самитот на ЕУ за Западен Балкан, со кој претседава претседателот на Европскиот совет, Доналд Туск, во име на ЕУ, заедно со претседателот на Европската комисија, Жан-Клод Јункер.

Заев ќе учествува во работната пленарна сесија на тема „Поврзување“ (Connectivity), а за време на работниот ручек на шефовите на владите и на држави, со највисоките претставници на телата на Европската Унија, е планирано да има свое обраќање на тема „Заедничко справување со заканите“.

Предвидени се средби на Заев со германската канцеларка Ангела Меркел, како и премиерите на Холандија, Марк Руте, на Австрија, Себастијан Курц и на Шведска, Стефан Лофвен.

Лидерите на земјите учеснички на Самитот на ЕУ за Западен Балкан се очекува да ја усвојат Софиската декларацијата за Западен Балкан на ЕУ, како и Софиската агенда на приоритети, која содржи конкретни проекти кои ќе бидат поддржани од ЕУ за да се исполнат зацртаните цели од декларацијата насочени кон зајакнување на владеењето на правото и демократските институции во земјите на Западен Балкан, борбата против организираниот криминал, доброто владеење и почитувањето на правата на малцинските заедници, како и на зајакнување на економските врски меѓу земјите од регионот, и на регионот со ЕУ.

 


Дигиталното поврзување на Западен Балкан ќе биде финансирано со 200 милиони евра од ЕУ


Софија, 17 мај, 2018 - 11:44 (META) 

Заклучоците од првиот Дигитален Самит, што пред еден месец се одржа во Скопје, веќе се дел од агендата на Европската Унија, информираат од министерството за информатичко општество и администрација.

„Еврокомесарот за проширување Јоханес Хан, од самитот на ЕУ и Западен Балкан, информираше дека иницијативите за дигитална агенда и поголема поврзаност во регионот ќе бидат финансирани со повеќе од 200 милиони евра. Во фокусот на овие мерки е намалување на трошоците за роаминг, подобрување на широкопојасниот интернет, развој на е-Влада како и дигитализација на индустријата“, се вели во соопштението на МИОА.

Од таму додаваат дека МИОА по повод 17 мај, Меѓународниот ден на телекомуникации и информатичко општество, уште еднаш се обврзува на реализација на сите најавени активности во областа на информатичкото општество.

„Во наредниот период ќе ги објавиме националните стратегии за широкопојасен интернет и за сајбер безбедност, а до крајот на годината ќе ја објавиме и долгорочната стратегија за ИКТ“, се додава во соопштението.

Во август, МИОА ќе ги пушти во употреба националниот портал за е-услуги, и новиот портал за отворени податоци.

„Тоа што е од особена важност за сите граѓани е дека конечно услугите ги носиме до нивните домови. Најчесто бараните докуметни, граѓаните ќе можат да ги добија по електронски пат, брзо, едноставно и ефтино. Преку дигитализација и професионализација на администрацијата, конечно граѓаните ќе добијат институции кои се нивен сервис и одговараат на нивните потреби и барања“, велат од МИОА.


На Самитот во Софија ќе се дискутура и за економскиoт развој на Западен Балкан


Софија, 17 мај, 2018 - 10:45 (META) 

Претседателката на Сојуз на стопански комори на Македонија (ССК),  Данела Арсовска ќе има обраќање за спроведувањето на економските реформи во Македонија во процесот на приближување до Европската унија, со што и официјално ќе започне економскиот форум на Самитот на Европска унија за Западен Балкан во Софија.

Арсовска заедно со министерот за економија на Бугарија, Емил Караниколов, претседателот на Винескиот економски форум, Гунтер Рабенштајнер, претседателот на Сојузот на економисти на Србија, Александар Влаховиќ, основачот и претседател на Дефли економски форум, Симеон Цомокс и директорот на Агенцијата за странски инвестиции на БиХ, Гордан Милинич ќе дискутираат на тема „Помеѓу политиката и економијата“.

„Oчекуваме да се отворат значајни прашања за реформските процеси на економиите од Западен Балкан и нивно приближување кон ЕУ. Големо внимание ќе привлечат заклучоците од економскиот форум каде и шефовите на држави на земјите на Западен Балкан ќе дискутираат за регионалната економска соработка како дел од европската интеграција, реалност и очекувања како и за улогата на инвестициите за раст и стабилност“, изјави Арсовска.

На овој значаен настан, премиерите на Западен Балкан имаа можност да разговараат за конкретни економски проекти со високи претставници на австриските, европските и меѓународните членови на Виенскиот економски форум, како и за нивно забрзано имплементирање.Целта на Виенскиот економски форум е да изгради мост помеѓу бугарското претседателство на Советот на ЕУ и следното австриско претседателство со Европскиот совет.

На Форумот ќе се разговара за интензивирање на регионалната економска соработка и заедно со поддршка на политиката да се изнајдат решенија за деловна соработка во различни сектори на регионалната економија.

На економските активности во рамките на Самитот, ќе присуствува и вицепремиерот за економски прашања, Кочо Анѓушев.


Утре се одржува четвртиот самит FMCG за професионалци од секторот за трговија


Скопје, 16 мај, 2018 - 15:22 (META) 

Четвртиот самит FMCG (Fast-moving consumer goods) ќе се одржи утре во хотелот „Александар Палас“ во организација на магазинот „InStore“.

Десет говорници, десет истакнати професионалци од секторот за трговија со стока за широка потрошувачка (FMCG) од Македонија, регионот, како и од Русија, ќе ги споделат своите знаења и искуства пред повеќе од 300 професионалци од средниот и топ менаџментот на македонските компании.

Самитот ќе го отвори Енвер Малиќи, сопственик на „Гемак“, една од водечките компании во FMCG индустријата во Македонија, кој со присутните ќе ја сподели својата инспиративна бизнис-приказна.

Главен говорник на самитот ќе биде Миодраг Боројевиќ, извршен директор на рускиот синџир маркети „Океј“, кој ќе ги презентира предностите на македонските производствени компании и можностите за пласман на рускиот пазар.

Џорџ Ангелакис, сениор консултант на Европската банка за обнова и развој, која воедно е и програмски поддржувач на самитот, пред присутните ќе ги претстави најуспешните менаџмент-практики од FMCG-индустријата.

Останатите говорници ќе дадат одговори на прашањата: Дали разбираме како иновациите, дигитализацијата и големите бази на податоци влијаат врз работењето? Како познавањето на трендовите да се претвори во предност на пазарот? Како да се пронајде формулата за успех на пазарот?

„Магазинот „InStore“ четврта година по ред го организира FMCG самитот, кој е уникатен настан за споделување знаење и искуство, за размена на идеи и за подигнување на културата на FMCG-секторот на едно повисоко ниво“, изјави Верица Мартиновска, директорка на магазинот „InStore“ во Македонија.


Набиена агенда на Заев во Софија, ќе се сретне со Ципрас, Макрон, Меркел, Курц, Руте


Скопје, 15 мај, 2018 - 10:44 (META) 

Премиерот Зоран Заев на 17 мај ќе учествува на Самитот на Европската унија за Западен Балкан што ќе се одржи во Бугарија, земја претседавач на Европскиот Совет. За време на Самитот, предвидена е и средба со премиерот на Грција, Алексис Ципрас.

„Премиерот ќе учествува во работната пленарна сесија на тема „Поврзување“ (Connectivity), а за време на работниот ручек на шефовите на владите и на држави, со највисоките претставници на телата на Европската унија, ќе зборува на темата „Заедничко справување со заканите“. Заев ќе има билатерални средби со повеќе премиери и шефови на држави. Планирани се билатерални средби со претседателот на Франција, Емануел Макрон, со канцеларката Ангела Меркел, како и со премиерот на Холандија, Марк Руте“, информираат од Владата.

Во агендата на премиерот Заев се испланирани и билатералните средби со премиерите на Австрија, Шведска и Естонија, Себастијан Курц, Стефан Лофвен и Јури Ратас.

Заев е поканет да учествува и да говори на конференции кои се одржуваат паралелно со Самитот на ЕУ во Софија.

На Самитот во Софија ќе учествуваат и вицепремиерот задолжен за европски прашања, Бујар Османи и министерот за надворешни работи, Никола Димитров.


Ким Џонг Ун се извини што им го пореметувал мирот на Јужнокорејците


Претседателот на Северна Кореја, Ким Џонг Ун на денешната средба со претседателот на Јужна Кореја, Мун Џе Ин се извини поради тоа што им го пореметувал сонот на Јужнокорејците со нуклеарните тестови минатата година.

– Повеќе нема да ви го пореметуваме сонот во раните утрински часови – рече изјави Ким, мислејќи на ветувањето кое го даде дека ќе прекине со изведување на нуклеарни тестови.

После историското преминување на границите на лидерите на Северна и Јужна Кореја, Ким Џонг Ун ја посети Куќата на мирот во Панмунџом каде се запиша во книгата за гости. Во книгата тој напиша: Новата историја почнува сега. Време на мирот, почеток на нова историја“.

Разговорите траеја речиси часа зад затворени врати во редизајнираната сала за состаноци во демилитаризираната зона на границата. Во изјавата за медиумите пред состанокот, Ким, изјави дека сака да ја потсети претседателската Сина куќа во Сеул.

– Мун му кажа на Ким дека, ако дојде во Сеул, воената почесна гарда ќе биде многу поголема од денешната. Ким изјави дека е подготвен да дојде било кога – изјави гласноговорник на јужнокорејскиот претседател.

За време на ракувањето новинарите успеале да слушнат дел од разговорот кој се одвивал. Двајцата лидери рекоа дека им е многу драго што се запознале.

– Моето срце не престанува да трепери поради средбата на оваа историска локација. Почестен сум што дојдовте до воена демократска линија за да се поздравите со мене – рекол Ким Џонг Ун.

Помладата сестра на Ким, Јо Џонг, беше единствената жена помеѓу шесте делегати кои седеа на преговарачката маса.

Разговорите траеле 100 минути и биле искрени и љубезни, а се однесувале за денуклеаризација на корејскиот полуостров. Се дискутирало и за траен мир и за изнаоѓање на начини за унапредување на односите, јавуваат јужнокорејските медиуми.

По заминувањето од свечената сала, Ким Џонг Ун замина со луксузниот продолжен „мерцедес пулман“, додека покрај лимузината трчаа неговите телохранители.



Балканската политичка елита и Доналд Туск на самитот Брдо-Бриони во Скопје


Скопје, 27 април, 2018 - 10:02 (META) 

Претседателот на Европскиот Совет, Доналд Туск, седум претседатели и еден премиер ќе бидат гости на претседателот Ѓорге Иванов, кој е домаќин на самитот на шефовите на држави во Процесот Брдо-Бриони, што ќе се одржи попладнево и вечерва во хотелот „Александар Палас“ во Скопје.

Официјално присуство на самитот го потврдија претседателите на Хрватска, Колинда Грабар Ќитаровиќ, која е во Скопје од вчера, претседателот на Словенија, Борут Пахор, како и неговите колеги од Србија, Црна Гора, Албанија и Косово – Александар Вучиќ, Филип Вујановиќ, Илир Мета, Хашим Тачи, и претседавачот со претседателството на Босна и Херцеговина, Бакир Изетбеговиќ.

Специјален гостин на состанокот, покрај Туск, е и бугарскиот премиер Бојко Борисов.
Претпладнево претседателот на Европскиот Совет, Туск, во Владата ќе има средба со премиерот Зоран Заев.

Поради странските државници, безбедносната состојба во Скопје е од прв степен на готовност, со хеликоптерски надлетувања, посебен сообраќаен режим на неколку булевари и силни полициски контроли.

Главната цел на Процесот Брдо-Бриони е европска интеграција на земјите од регионот и стабилизирање на состојбите во Западен Балкан преку јакнење на регионалната соработка и решавање на отворените прашања.

Во фокусот на годинешниот состанок на лидерите на земјите учеснички е потребата за подобрување на меѓусебната поврзаност во политичка, економска, инфраструктурна и безбедносна смисла, а во контекст на новата стратегија на Европската Унија за Западен Балкан.

Процесот Брдо-Бриони прв пат се одржа во 2013 година на заедничка иницијатива на претседателите на Република Словенија и Република Хрватска, во Брдо кај Крањ, Словенија.

На состанокот на лидерите на земјите учеснички од Процесот Брдо-Бриони, кој ќе се одржи во хотелот „Александар Палас“ во Скопје, се акредитирани 156 претставници на медиумите, 116 од Македонија и 40 од странство.