!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Македонската етно-група „Чалгија саунд систем“ настапи во Солун


Солун, 26 февруари, 2017 - 11:22 (META) 

Публиката во Солун имаше нова можност да запознае дел од македонската современа и традиционална култура преку концертот на етно-составот „Чалгија саунд систем“.

Македонската група, која ја одржува во живот традицијата на старите чалгиски песни, првпат настапи во Солун на фестивалот за балканска музика „Балкан фест“ (Balkan Fest).

Пред преполната концертна сала, групата претстави дел од својот репертоар на македонски чалгиски песни.

За време на настапот на „Чалгија саунд систем“, музиката преовлада и ги премости сите разлики и несогласувања кои постојат на политичко ниво, овозможувајќи им поинакво ниво на поврзување на грчкиот народ со македонската традиција и култура.

Покрај „Чалгија саунд систем“, на фестивалот со својата традиционална музика се претставија и групи од Грција и од Романија. Ова е седма година како се одржува овој фестивал.

Ова е втор настап на „Чалгија саунд систем“ во Грција за неполна година.


Владата набавува опрема за да ги подобрила условите за работа на новинарите


Скопје, 28 мај, 2016 - 17:17 (META) 

Владата на Република Македонија започна со постапка за набавка на нова аудио-визуелна опрема за потребите на владиниот прес-центар, информираат оттаму.

Како што се вели во нивното соопштение до јавноста, „со ваквата набавка на техничката опрема првенствено ќе се излезе во пресрет на потребите на новинарите и квалитативно унапредување на условите за работа, запазувајќи ги високите стандарди на оперативност и функционалност.“

– Тоа ќе овозможи подобри услови за презентација на владините политики и проекти, за инклузија на поголем број мислења во креирањето на истите, како и поголеми можности за дебата и подобра информираност на граѓаните и субјектите за можностите кои се обезбедуваат и ќе продолжат да се обезбедуваат преку реформите – се вели во соопштението од Влада.

Денеска медиумите објавија дека оваа опрема, Владата ќе ја чини еден милион и 46 илјади евра.

– Во набавката освен предметната опрема е вклучена нејзина монтажа, и ставањето во функција. Дополнително со ваквата набавка ќе се опремат и три сали за состаноци. Значајно е да се истакне дека запазени се сите законски процедури и избрана е најповолната и најевтината понуда која одговара на пропишаните критериуми, притоа со одличен квалитет. Постапката е спроведена низ транспарентна процедура запазувајќи ги пропишаните правила во Законот за јавни набавки – се додава во соопштението.


Одбележана годишнина од смртта на Трајковски пред спортскиот центар


Скопје, 26 февруари, 2016 - 12:26 (META) 

По повод 12-годишнината од трагичната смрт на претседателот на Република Македонија, Борис Трајковски, денеска пред споменикот поставен во негова чест, пред платото на Спортскиот центар „Борис Трајковски“ се оддржа пригодно чествување.

Свежо цвеќе пред спомен-обележјето положи директорот на Агенцијата за млади и спорт Марјан Спасески и претставникот на Сојузот на спортски федерации на Македонија, Борче Боев.

Исто така, со положување свежо цвеќе почит му оддадоа и претставници од спортскиот центар „Борис Трајковски“, делегација од Општина Карпош и претставници на спортските клубови и на спортските медиуми.

Поранешниот pретседател на Република Македонија Борис Трајковски беше голем поддржувач на македонскиот спорт, а во младоста се занимаваше и со одбојка. Тој трагично загина во авионска несреќа кај Ротимље во близина на Мостар во 2004 година.


Салата „Борис Трајковски“ и стадионот „Филип Втори“ добија нови имиња


Скопје, 22 февруари, 2016 - 12:15 (META) 

Најголемиот македонски стадион, Националната арена „Филип Втори“, и Спортскиот центар „Борис Трајковски“ ќе добијат нови брендирани имиња и тоа „Телеком арена“ и „Вип арена“.

Договорот помеѓу Спортскиот центар „Борис Трајковски“ и „Оне Вип“ е веќе потпишан, а деновиве се очекува параф да стават и првите луѓе на скопскиот стадион и на „Телеком“.

Спортскиот центар кој го носеше името на поранешниот претседател на Република Македонија, Борис Трајковски, е изграден во 2008 година од Владата на Република Македонија. Во состав на спортскиот центар се наоѓа мултифункционална спортска сала која е еден од најголемите репрезентативни спортски објекти на Република Македонија.

Договорот за соработка помеѓу „Оне Вип“ и Спортскиот центар „Борис Трајковски“ се потпиша во времетраење од две години, со можност за продолжување на уште две години, а почнува да важи од 15 февруари 2016 година.

„Условите и сумата на договорот остануваат во рамки на деловни информации“, стои во соопштението на страницата на овој центар.

Преименувањето на стадионот, пак, е во тренд со европската и со светската практика. Во Германија има „Алијанц арена“, потоа „Сигнал Идуна парк“, „Фрапорт стадион“…

Договорот со „Телеком“ треба да биде потпишан деновиве, а пред подготвката за најголемиот настан досега, домаќинството на Европскиот супер-куп во 2017 година.


ВИДЕО: Првите пукотници во салата „Батаклан“


Париз, 15 ноември, 2015 - 11:04 (META) 

Кратка снимка на која се слуша самиот почеток на пукањето во концертната сала „Батаклан“, се појави на „Јутјуб“.

Во првите мигови, членовите на бендот, кои ја прекинуваат свирката, но и публиката во првите редови, не знаат што се случува.


Дуке Бојаџиев за 2016 година најави концерт во Скопје


Скопје, 2 ноември, 2015 - 11:07 (META) 

На 20 февруари во арената „Метрополис“ во Скопје, ќе се одржи концерт на композиторот, пијанист и продуцент Дуке Бојаџиев, насловен „Дуке и пријателите“.

На својот најголем концерт во досегашната кариера, Дуке ќе настапи заедно со своите пријатели и соработници: пејачките Каролина Гочева и Тања Царовска, актерот Никола Ристановски, кларинетистот Исмаил Лумановски и перкусионистот Матијас Кунзли – сите придружувани од камерен оркестар.

Ова ќе биде прв концерт на Дуке Бојаџиев по успешното претставување во престижната концертна сала „Карнеги хол“ во Њујорк, каде настапи со Камерниот оркестар на Македонската филхармонија, а на кој специјална гостинка беше Каролина.

Дуке Бојаџиев веќе долго време живее и твори во центарот на светската култура, Њујорк, меѓутоа своите најнови проекти континуирано ги промовира и на домашната музичка сцена, пред својата публика.

Автор е на филмска, електронска и на акустична музика во која може да се почувствува духот на македонската традиција, иако принципите во кои е врамен неговиот музички израз и стил се строго западноевропски. Низ неговата интернационална кариера, Бојаџиев има соработувано со оскаровците Џонатан Деми и Денис Танович, како и со македонскиот режисер Столе Попов за неговото последно филмско остварување. Музиката на Дуке е користена за светски кампањи на познатите брендови „Пежо“, „Ланком“ и „Лореал“, но и на разни светски музички компилации како „Буда бар“ и „Маракеш експрес“.


Спортската сала во Битола ќе го носи името на Боро Чурлевски


Битола, 27 јануари, 2015 - 10:39 (META) 

Советот на Општина Битола на 29 јануари ќе одлучува дали спорстаката сала „Младост“ ќе се преименува и ќе го носи името на ракометниот виртуоз Боро Чурлевски, кој почина пред еден месец. Иницијативата за преименување на спортската сала во Битола ја поднесе советничката Габриела Илиевска од ВМРО-НП.

Во иницијативата пишува дека името на Чурлевски е синоним за младоста на ракометниот дух на Битола, но и поим за спортист, кој со својата посветеност остави трајна трага на спортската историја на Битола.

– Запаметен по најголемите успеси што некој битолчанец ги постигнал во светот на ракометот, со својата улога во спортот придонесе Битола да биде афирмирана и позната. Ваквото постхумно признание би било уште еден доказ дека Битола никогаш не ги заборава своите големи луѓе – наведува советничката Илиевска.

Инаку, пред седум години, по трагичната смрт на Тоше Проески, кој беше ученик на средното музичко училиште во Битола, битолчани, и особено неговите обожаватели, поведоа иницијатива музичкото училиште да го носи името на Тоше, но тоа досега не се случи.

А.Б.


Советниците на СДСМ во Град Скопје бараат „Универзална сала“ да се прекрсти во „Тоше Проески“


Скопје, 21 јануари, 2015 - 12:44 (META) 

Советничката група на СДСМ и на коалицијата во Советот на Град Скопје, поднесе барање со иницијатива за намалување на цената на водата по кубен метар.

Советничката група поднесе и барање за покренување постапка за измена на Статутот на Конгресен центар „Александар Македонски“ со што бараат промена на името во „Тоше Проески“.