Пронајдена и третата црна кутија од урнатиот руски авион


Москва, 29 декември, 2016 - 11:04 (META) 

Истражните тимови ја пронашле и третата црна кутија од рускиот авион „ту-154“, кој се урна во Црно Море. Полициски извори за агенцијата ТАСС рекле дека записот од црната кутија бил оштетен, но дека постои можност дел од податоците да бидат симнати.

Претходните два дена беа пронајдени уште две црни кутии од авионот, а дешифрирањето на податоците, како што пренесуваат агенциите, би можело да трае неколку недели.

Авионот на руското министерство за одбрана се урна во неделата, на 25 декември, кратко време по полетувањето од аеродромот во Сочи. Во несреќата животите ги загубија сите 92 патници и членови на екипажот, меѓу кои и 64 членови на познатиот ансамбл „Александров“ и девет новинари.


Извлечено телото на пилотот на рускиот авион кој се урна во Црно Море


Сочи, 26 декември, 2016 - 19:21 (META) 

Нуркачите го извлекоа на површина телото на Роман Волков, пилотот на авионот „ту-154“, кој вчера падна во Црно Море две минути по полетувањето, при што загинаа 92 лица.

Според извори од местото на акцијата, нуркачите што учествувале во операцијата за извлекување на телата на жртвите и на деловите на авионот, пронашле уште едно тело, а кога го извлекле на површина, врз основа на униформата заклучиле дека се работи за Волков.

Истиот извор наведува дека претходно на површина извлечени биле уште 70 посмртни остатоци на жртвите на несреќата.

Во Москва утринава пристигна првиот авион со телата на загинатите и почна процесот на нивна идентификација.


Телата на жртвите од падот на рускиот авион ги бараат 27 бродови


Сочи, 25 декември, 2016 - 14:35 (META) 

Руското министерство за одбрана соопшти дека 27 бродови и чамци, како и повеќе од 3.000 луѓе и 100 нуркачи ги бараат телата на жртвите од авионската несреќа која се случи во близина на Сочи.

„Вкупно 27 бродови и чамци, 37 возачи, четири хеликоптери и дронови, како и подморница ја пребаруваат областа во која се урна рускиот воен авион“, се наведува во соопштението.

Авионот на руското министерство за одбрана „ту-154“ се урна во Црно Море во близина на Сочи, непосредно по полетувањето за Сирија, при што загинаа 93 лица.

Сè уште се истражуваат причините за несреќата.


Понеделник ќе биде ден на жалост во Русија, соопшти Путин


Москва, 25 декември, 2016 - 12:55 (META) 

Рускиот претседател Владимир Путин го прогласи понеделник за ден на жалост поради падот на рускиот авион на министерството за одбрана, во кој загинаа 92 лица. Авионот падна во Црното Море во близина на Сочи, две минути по полетувањето.

– Утре ќе биде ден на национална жалост во Русија – им рече Путин на новинарите.

Рускиот претседател претходно изрази сочувство до семејствата на загинатите и му наложи на премиерот Димитри Медведев да застане на чело на државната комисија што ќе го истражува падот на авионот.

Премиерот Медведев соопшти дека Русија детално ќе ги истражи сите околности поврзани со падот на авионот.

– Оваа страшна трагедија однесе животи на луѓе кои беа енергични и имаа планови. Помеѓу загинатите има новинари, војници и музичари на познатиот „Ансамбл Александров“. Тие летаа во Сирија во мировна мисија на добрата волја – соопшти Медведев.

Рускиот премиер наведе дека сите погодени од оваа трагедија ќе примат неопходна помош и им испрати сочувство на семејствата на жртвите.

Портпаролот на руското министерство за одбрана, Игор Конашенков, соопшти дека кон падот на авионот се упатиле четири бродови, пет хеликоптери и неколку дронови.


Во падот на рускиот авион загинаа хористите од „Ансамбл Александров“


Сочи, 25 декември, 2016 - 10:46 (META) 

Руското министерство за одбрана ја објави листата на патници на авионот „ту-154“ кој со 92 патници и членови на екипажот се урна во Црното Море откако од Сочи полета кон Сирија.

Во леталото имало 64 членови на официјалниот воен хор на руските вооружени сили „Ансамбл Александров“, кој требало во руската воена база Хмеимин да учествува во прославата за Нова година. Во авионот се наоѓала и извршната директорка на хуманитарниот фонд „Праведна помош“, Јелисавета Глинка.

Воените истражувачи на истражувачкиот комитет на Русија отворија кривична истрага, а портпаролот на Кремљ, Димитриј Песков, истакна дека претседателот на Русија, Владимир Путин, ги добил информациите за падот на авионот и дека е навремено брифиран за ситуацијата.

– Прерано е што било да се каже, претседателот чека сликата да биде целосна – рече Песков, кој додаде дека рускиот министер за одбрана, Серфеј Шојгу, е на постојана телефонска врска со Путин.

Засега е пронајдено тело на една од жртвите, како и документи на новинар од рускиот „Канал 1“.

Портпаролот на руското министерство за одбрана, Игор Конашенков, изјави дека во авионот имало осум членови на екипажот и 84 патници. Освен музичарите, помеѓу патниците имало војници и новинари.

Руската воена телевизија „Звезда“ соопшти дека помеѓу новинарите имало тројца нивни колеги, а дека тројца од новинарите се од „Канал 1“.


Руски воен авион со 92 патника падна во Црно Море


Сочи, 25 декември, 2016 - 9:35 (META) 

Руски воен авион со 92 патника и членови на екипажот се урна на пат од Сочи кон Сирија, пренесуваат руските медиуми.

Истражниот комитет на Русија веднаш отвори кривична истрага за трагедијата, а портпаролката Светлана Петренко вели дека нема информација за бројот на загинатите или преживеаните.

Таа наведе дека кривична истрага е отворено поради „кршење на правилата на летачката безбедност или подготовката за нив“. Наведено е дека запленети се документи и се испрашуваат лицата кои го подготвувале авионот за лет.

Авионот исчезнал од радарот околу 5 часот и 40 минути по московско време, кратко по полетувањето од Сочи.

Дел од руските медиуми наведуваат дека спасувачките екипи ги лоцирале остатоците од леталото на околу 1,5 километар од брегот, на длабочина од 50 до 70 метри.

Најголемиот дел од патниците биле музичари на рускиот воен хор кои тргнале во руската база Хмеимин каде требало да учествуваат во прославата за Нова година. Со нив биле и девет претставници на медиумите, шест војници и осум членови на екипажот.


Уште еден руски авион падна во Средоземно Море


Москва, 5 декември, 2016 - 16:52 (META) 

Министерство за одбрана на Русија соопшти дека руски ловец „су-33“ се урнал во Средоземно Море откако излетал од бродот носач.

Руските медиуми јавуваат дека причина за падот на авионот е кинење на една од сајлите што служат за сопирање на авионот. Пилотот успешно се катапултирал пред паѓањето.

За неполн месец ова е втор случај руски авион да падне од палубата на носачот „Адмирал Кузњецов“. Кон средината на ноември падна и еден „миг 29“.


Турција: Пилоти кои го соборија рускиот авион уапсени за учество во пучот


Анкара, 10 август, 2016 - 14:46 (META) 

Шефот на турската дипломатијата Мевлут Чавушоглу соопшти дека пилотите кои минатата година во ноември го соборија рускиот воен авион во Сирија се уапсени поради учество во обидот за воен удар во Турција, изведен на 15 јули.

– Пилотите се приведени заради нивното претпоставено учество во обидот за преврат од 15 јули, а не за инцидентот со соборувањето на авионот, изјави Чавушоглу.


Ердоган, сепак, му се извини на Путин за уривањето на рускиот авион


Москва, 27 јуни, 2016 - 16:20 (META) 

Турскиот претседател Реџеп Таип Ердоган денеска упати извинување до рускиот колега, Владимир Путин, поради погубувањето на рускиот пилот.

Ердоган во писмото, кое го пратил до Путин, искажал и подготвеност да се обноват односите меѓу Анкара и Москва, рече портпаролот на Кремљ, Димитриј Песков.

Ердоган ја нарече Русија „пријател и стратешки партнер“ на Анкара, со која турските претставници не сакаат да си ги расипат односите.

За потсетување, турски авиони во ноември минатата година собори руски „су-24“ над Сирија, во близина на границата со Турција.

Рускиот претседател, еден ден по соборувањето на авионот, рече дека турскиот авион го урнал рускиот авион додека летал четири километри во внатрешноста на Сирија и оти во ниту еден момент не претставувал закана за турската безбедност.

Ердоган во ноември минатата година за „Си-ен-ен“ изјави дека неговата земја на планира да се извини и додаде дека рускиот борбен авион го нарушил турскиот воздушен простор.


Руски воен авион се урна на Далечниот Исток


Москва, 30 март, 2016 - 10:17 (META) 

Руски борбен авион „сухој су-25“ се урна денеска на Далечниот Исток, на 70 километри од руската граница со Кина, јавуваат руските медиуми, наведувајќи дека нема повредени.

Авионот паднал во близина на населено место, односно во двор, а при падот уништил два дрвени објекта.

– Авионот падна во градина, а не врз куќа – изјави неименуван безбедносен извор.

Руското Министерство за одбрана потврди дека авионот се урнал додека се обидувал да слета на воениот аеродром Черниговка.

Пилотот се катапултирал и не е повреден. Авионот за време на летот не бил вооружен, а причина за падот најверојатно е дефект на моторот.