Руска амбасада: Изјавата на Заев е политички неодговорна и русофобна алатка


Скопје, 16 јули, 2018 - 17:19 (META) 

Руската амбасада во Скопје порача дека денешната изјава на премиерот Зоран Заев за „комити“ потплатени од руски бизнисмени да протестираат против договорот со Грција и зачленување на Македонија во НАТО и ЕУ, е политички неодоговорна и русофобна.

Заев прашан за своите тврдења дека руски бизнисмени ги потпалувале протестите во Македонија, посочи на добиените извештаи од разговорите во полицијата со дел од демонстрантите.

– Зборувам од тоа што го слушам во извештаите што ги добиваме. Знаете, тие млади момчиња „комити“ кога нападнаа полицајци беа повикани во полицијата на исказ, па спомнуваа бизнисмени од Русија дека давале пари, заради тоа се тука и оти немаат ништо против или слично – рече Заев.

Амбасадата на Руската Федерација преку својот Твитер-профил порача дека денешната изјава на македонскиот премиер ја става под прашалник искреноста на заложбите на македонската влада за градење добри односи со Русија, како и дека русофобијата е се повеќе алатка во надворешната, но и во внатрешната политика на Македонија.

 

 


Руска амбасада: Намерно или не, Заев е погрешно информиран


Скопје, 16 април, 2018 - 14:03 (META) 

Од Руската амбасада во Скопје на нивниот „Твитер“ профил реагираат на изјавата на премиерот Зоран Заев во интервјуто за „Телевизија 24“, каде вели дека „протераниот руски дипломат недозволиво се однесувал во Македонија, дека бил предупредуван неколку пати, но и натаму вршел активности за кои не бил акредитиран и оти доказите и биле презентирани на амбасадата на Русија“.

Од амбасадата велат дека Заев е погрешно информиран и дека протерувањето на нивниот дипломат било изненадување.

„Намерно или не, Зоран Заев е погрешно информиран. Протерувањето на нашиот дипломат беше изненадување. Никогаш не сме добиле никакви предупредувања ниту „докази“ за кои зборува премиерот. И понатаму сметаме дека овој чин е неоснован и нанесува штета на руско-македонските односи“ напишаа од Руската амбасада во Скопје.

Македонското министерство за надворешни работи го протера рускиот дипломат на 26 март, а министерот Никола Димитров рече дека протерувањето се направило во координација со западните сојузници и како чин на солидарност со Велика Британија.


Руската амбасада шеговито најави засилено влијание во Македонија за празниците


Скопје, 29 декември, 2017 - 13:25 (META) 

Амбасадата на Русија во Македонија „предупреди“ дека земјава за време на новогодишните празници ќе биде под зголемено „руско влијание“, шеговито алудирајќи на „руската салата“ како традиоционална храна на трпезите за новогодишните празници.

„Внимание! Во претстојните денови се прогнозира забележително зголемување на #РускоВлијание на целата територија на #Македонија и пошироко. #РускаСалата“, напишаа на „Твитер“ од руската амбасада во Македонија.

Во коментарите под твитер-објавата, од руската амбасада објаснуваат дека, руската салата на овие простори доаѓа пред речиси еден век, најверојатно, заедно со првите руски доселеници, околу 1920 година.


Бејли: Нема твитер-војна, но уште еден руски цевковод нема да донесе чист воздух


Скопје, 15 декември, 2017 - 20:48 (META) 

Откако претседателот на Обединета македонска дијаспора, Мето Колоски денеска на својот Твитер профил ги предизвика Амбасадата на САД во Македонија и Амбасадорот Џес Бејли, наведувајќи дека се случува „Твитер војна меѓу амбасадите на САД и Русија поради загадувањето на воздухот во Македонија, набргу доби одговор од Бејли.

Амбасадорот на САД одговори опширно. „Не е Твитер војна. Ние им поставивме на македонските граѓани прашање за краткорочни мерки за чист воздух. Уште еден руски цевковод тоа нема да го направи. САД ја поддржуваат желбата на Македонија да донесе гас во македонските градови и разноликоста во снабдувањето со гас за Македонија и Европа“, напиша амбасадорот на САД во одговор на Колоски.   

Препирката почна завчера, кога амбасадата на САД во Македонија во објава на социјалните мрежи „Фејсбук“ и „Твитер“ праша „кои се вашите идеи за почист воздух во Македонија“.

„Загадувањето на воздухот во Скопје денеска беше толку големо што едвај можеше да се види амбасадата! Кои се вашите идеи за почист воздух во Македонија?“ напишаа од Амбасадата на САД на „Фејсбук“ и на „Твитер“.

Набргу стаса одговор од амбасадата на Руската федерација во Македонија: „Бидејќи нашите пријатели од амбасадата на САД бараат идеи за аерозагадувањето во Македонија, ние сакаме да помогнеме со решение. #Турски тек“, порачаа од руската амбасада на „Твитер“.


Руската амбасада и одговори на амбасадата на САД: „Турски тек“ е решение за загадувањето


Скопје, 15 декември, 2017 - 9:44 (META) 

„Турски тек“ е одговорот на Руската амбасада во Македонија на прашањето што амбасадата на САД го постави вчера на „Твитер“ и „Фејсбук“ во кое бара идеи за решавање за големото загадување во државата.

Амбасадата на САД во Македонија вчера во објава на социјалните мрежи „Фејсбук“ и „Твитер“ праша „кои се вашите идеи за почист воздух во Македонија“.

„Загадувањето на воздухот во Скопје денеска беше толку големо што едвај можеше да се види амбасадата! Кои се вашите идеи за почист воздух во Македонија?“ напишаа од Амбасадата на САД на „Фејсбук“ и на „Твитер“.

По неколку часа одговор стигна од Руската амбасада велејќи дека решението за загадувањето е „Турски тек“.

„Бидејќи нашите пријатели од амбасадата на САД бараат идеи за аерозагадувањето во Македонија, ние сакаме да помогнеме со решение. #Турски тек“, велат од Руската амбасада на „Твитер“.


Москва: Изјавите на Заев се манијакални конструкции и обид за себепромоција


Скопје, Москва, 9 ноември, 2017 - 16:52 (META) 

Oбидот Русија да се претстави како вмешана во обиди за ликвидација на Зоран Заев е неоснован и штети на односите меѓу двете земји, се вели во реакцијата на амбасадата на Руската Федерација во Македонија на делот од интервјуто на македонскиот премиер Зоран Заев емитувано во неделата на црногорското радио „Антена-М“.

Изјавите на Заев во интервјуто за црногорското радио денеска беа и дел од редовниот неделен брифинг на портпаролката на Руското министерството за надворешни работи, Марија Захарова, која рече дека „ваквите изјави не само што претставуваат неосновани инсинуации и манијакални конструкции, туку во сушитната наликуваат на обиди за само-прикажување како жртва.

Соопштението на амбасадата во Скопје е за нијанса поблаго и подипломатско.

„Со зачуденост и загриженост истакнуваме дека во тоа интервју, во контекстот на минатогодишните настани во Црна Гора, шефот на македонската влада, повикувајќи се на некои „репорти“ и „аналитичари“, намерно или не, ја претстави ситуацијата на тој начин дека Руската Федерација наводно била вмешана во обиди за „ликвидација“ и подготвувала такви акции против самиот господин Зоран Заев. Категорично изјавуваме дека ваквите тврдења се неосновани и ги сметаме за недозволиви. Со жалење констатираме дека истите ја уриваат атмосферата на доверба меѓу нашите две земји, и нанесуваат штета на повеќегодишната заемно полезна соработка и се косат со декларираната од страна на Скопје подготвеност за градење конструктивна соработка со Русија, желба за развој на пријателските односи меѓу две нашите земји“, стои во соопштението од амбасадата на Руската Федерација во Македонија.

За разлика од амбасадата, Захарова е подиректна и користи многу силни изрази.

„Сметаме дека ваквите изјави не само што претставуваат неосновани инсинуации и манијакални конструкции, туку во суштината наликуваат на обиди за само-прикажување како жртва. Суштината е што ваквите изјави им нанесуваат шетат на руско – македонските односи и се во спротивост со декалрираната подготвеност на Скопје за градење на конструктивна соработка со нашата земја. Ужасите искажани на овој начин единствено служат како оправдување за забрзаното втурнување на балканските земји во Северноатланската алијанса иако тие остануваат надвор од структурите на НАТО. Поради ова, во голем дел беше испровоцирана и неодамнешната политичка криза во Македонија. Русија никогаш не се мешала во внатрешните работи на Македонија“, вели Захарова.


Руска амбасада: Владата не информираше точно за средбата на Заев и на амбасадорот Шчербак


Скопје, 20 октомври, 2017 - 13:31 (META) 

Руската амбасада писмено реагираше на вчерашното соопштение на македонската влада за средбата на премиерот Зоран Заев со рускиот амбасадор Олег Шчербак. Од Амбасадата на Руската Федерација во земјава тврдат дека соопштението на Владата не ги пренело точно пораките од рускиот амбасадор упатени до премиерот.

„Амбасадата информира дека текстот на посоченото соопштение не е усогласен со руската страна и не претставува сосема коректен одраз на одделни оценки што беа изнесени за време на разговорот од страна на амбасадорот на Русија. Во исто време, руската страна ја потврдува својата посветеност на сестрано и конструктивно унапредување на традиционално пријателските односи меѓу Руската Федерација и Република Македонија“, стои во соопштението.

Во соопштението од владината прес-служба стои дека заедничката оценка на Заев и Шчербак била дека евроатланските стремежи на земјава не се и не треба да бидат пречка за развој на билатералните односи меѓу Македонија и Русија, особено зашто и кај двете држави постои став за одржлив систем на безбедност во светот. Ова, соред владината прес-служба, била заедничката оценка од денешната средба на премиерот Зоран Заев со амбасадорот на Руската Федерација во Македонија, Олег Шчербак.

Рускиот амбасадор, како што стои во владиното соопштение за средбата, ја поздравил енергичната посветеност на премиерот Заев и неговиот придонес за демократските процеси што ја движат Македонија напред и изразил почитување за политиките кои водат кон евроатлански интеграции на Македонија, но и унапредување на односите со другите држави.