Анѓушев: Рударството е важно, треба да се смени перцепцијата на граѓаните


Скопје, 12 јуни, 2018 - 13:39 (META) 

Во Македонија кога ќе се спомне рударство се раѓаат негативни чувства, мора да отвориме дискусија зошто е тоа така рече денеска вицепремиерот за економски прашања, Кочо Анѓушев на отворањето на 3. Европски форум за рударство и истражување „Minex Europe 2018“  организиран од Стопанска комора на Македонија.

– Мој заклучок е дека таквата состојба е генерирана од неодговорниот однос на дел од концесионерите кои не ги запазувале критериумите на совесно работење и на совесни стопанственици, со цел да направат поголем профит. Иако профитот е основниот генератор на бизнисот од кој и државата има интерес преку собирање данок, исто така, мора да се води сметка и за заштита на човекот и на животната околина – рече Анѓушев.

Во своето обраќање, вицепремиерот ја истакна важноста што рударството ја има во целокупната индустрија, како сектор каде се вработени над 10.000 луѓе.

– Според последните податоци во април 2018 година во споредба со април 2017 регистрирано е  зголемување од 1,3 отсто на вработените во овој сектор . Рударството и вадењето камен учествува со 8,31 отсто во индустриското производство на земјата. Овие бројки покажуваат дека придонесот во индустријата е значаен, пред се преку рудниците кои се отворени пред многу години и денеска работат успешно – додаде тој.

Анѓушев ги повика компаниите од овој сектор поблиску да соработуваат со локалното население и да ги разјаснат сите отворени прашања и дилеми. Комуникацијата, според вицепремиерот, треба да се одвива во насока на едукација и информирање за стандардите и процесите што ги применуваат во експлоатацијата на минералите, како и непостоењето закана за животната околина и земјоделското производство.

Анѓушев најави усогласување на македонското законодавството со европското законодавство со цел заштита на интересите на државата.


Протестен марш за запирање на изградбата на рудникот Казандол пред Владата во 12 часот


Скопје, 8 декември, 2017 - 10:31 (META) 

Граѓаните од Југиосточниот Регион денеска ќе се соберат на протестен марш пред зградата на Владата во 12 часот, за да го искажат својот став дека се против изградбата на рудникот Казандол.

На настанот „Протестен собир за итно запирање на рудникот Казандол“, кој е објавен на „Фејсбук“, се вели дека „во Македонија место за рудници со отворен коп нема.“

„Иако живееме во Скопје, негативните последици од рудниците ќе ги чувствуваме и ние. Рудниците се проблем на целата земја. Да покажеме солидарност со нашите сограѓани, да покажеме став против, да побараме итно запирање на изградбата на рудникот.  Донесете ги своите транспаренти, пораки и одлучност за сопирање на рудниците на смртта“, се вели во апелот на „Фејсбук“.


Неуспешен референдумот за рудниците во Ново Село


Струмица, 17 септември, 2017 - 20:45 (META) 

Референдумот против отворањето рудници во општина Ново Село е неуспешен, бидејќи на гласачките места не излегоа потребните 50 отсто плус еден од вкупниот број граѓани на општината со право на глас.

Причина за неисполнувањето на цензусот, како што пренесуваат медиумите, е тоа што речиси половина од жителите на општината се во странство.

Според „Телевизија 24“, речиси сите жители на Ново Село кои денеска излегле на референдумот гласале против отворањето на рудникот за злато Иловица. Тие сметаат дека со отворањето на рудникот ќе се уништи земјоделството од кое егзистираат безмалку сите жители на општината.

По Валандово и Босилово, ова е трет референдумот за рудниците кој е неуспешен поради неизлезност.


Излезноста во Босилово до 13 часот била 7,78 отсто


Струмица, 3 септември, 2017 - 16:16 (META) 

Излезноста на референдумот во Општина Босилово во врска со рудникот Иловица и други рудници на територијата на општината до 13 часот изнесувала 7,78 отсто.

Општинската изборна комисија соопшти дека референдумот се одвива без проблеми.

Во 7 часот утрово навремено биле отворени гласачките кутии во 19 гласачки места во општина Босилово, каде што граѓаните на референдумот имаат можност да се изјаснат за две прашања: Дали се за или против работата на рудникот за бакар и за злато Иловица и дали се за или против отворање рудници за експлоатација на метални и металични суровини во нивната општина.

На единствениот гласачки список запишани се 12.301 полнолетно лице, а за референдумот да биде успешен, треба да гласаат 6.151 граѓанин или 50 отсто плус 1 гласач.

Во Струмичкиот Регион, на референдум за работата на рудниците, на 17 септември ќе се изјаснуваат и жителите на општина Ново Село.


Бектеши: Отворањето на рудници зависи од позитивното мислење на општините


Скопје, 25 август, 2017 - 16:21 (META) 

Доделувањето на концесија за отворање на рудник, освен од надлежните институции, најдиректно зависи од позитивното мислење дадено од општината каде се наоѓа, изјави денеска министерот за економија, Крешник Бектеши на доделувањето на признанијата на најуспешни рудари во Македонија.

Тој посочи дека во земјава има активни повеќе од 120 рудници и дека рударството претставува база за развој на индустријата во државата.

„Ова е важен стопански сектор, што заедно со придружните, брои повеќе од 10.000 вработени. Индустриското производство во секторот рударство во јуни, во однос на истиот месец лани бележи пораст од 7,5 проценти, а прометот за истиот период, пораст од 1,2 отсто. Затоа овој сектор се смета за еден од водечките сектори од индустриското производство и е од големо значење за македонската економија“, изјави Бектеши.

Претседателот на Македонската асоцијација за рударство, Николајчо Николов рече дека добро е што во Македонија се буди еколошката свест, но потенцираше дека во рударството работат околу 13.000 луѓе и луѓето да внимаваат кога за рудниците даваат квалификации како „рудници на смртта“.


Во Валандово утре ќе се одржи референдум за рудникот Казандол


Валандово, 19 август, 2017 - 12:17 (META) 

Во Валандово утре ќе се одржи референдум на кој жителите од оваа општина треба да се изјаснат дали се „за“ или „против“ продолжување или стопирање на работата на рударскиот комплекс Казандол, но и дали да се отворат или не нови рудници за метални минерални суровини.

За референдумот да биде успешен, утре треба да излезат најмалку 5.200 граѓани со право на глас.

Валандово е четвртиот град каде што ќе се одржи референдум. Жителите на Гевгелија, Богданци и Дојран веќе се изјаснија против отворање рудници.


Во Дојран утре ќе се одржи референдум за рудниците Казандол и Башибоз


Дојран, 22 јули, 2017 - 12:12 (META) 

Дојранчани утре ќе излезат на референдум на кој ќе гласаат дали се „за“ или „против“ отворање рудници на територијата на нивната општина.

Тие стравуваат дека рудникот Казандол, но и потенцијалното отворање на Башибоз на планината Беласица, се еколошка закана по земјоделството, туризмот и за Дојранско Езеро.

Досега, референдуми се одржаа во Гевгелија и во Богданци, каде што жителите се изјаснија против отворање рудници, а референдум ќе се одржи и во Валандово на 20 август.


Градоначалникот на Дојран не ја потпишал одлуката за одржување референдум


Дојран, 12 јуни, 2017 - 22:26 (META) 

Градоначалникот на Општина Дојран, Борче Стамов, не ја потпишал одлуката што едногласно ја донеле советниците на општината за одржување референдум за рудникот Казандол, кој требаше да се одржи на 18 јуни.

„Откако на 15 мај заврши мандатот на локалната власт, јас немав право да потпишам никаква одлука за референдум затоа што роковите за одржување на референдумското изјаснување на граѓаните на Дојран едноставно не можеа да се исполнат“, изјавил Стамов за „МКД“.

Одлуката повторно ќе биде вратена на разгледување на 19 јуни.

Вчера, на референдум во Општина Богданци повеќе од 98 проценти од граѓаните се изјасниле против работата на рудникот Казандол, но и против отворање други рудници на територијата на нивната општина.


Референдумот во Богданци е успешен, гласале 61 отсто од запишаните гласачи


Гевгелија, 11 јуни, 2017 - 20:22 (META) 

Излезноста на референдумот во Општина Богданци е 61 процент, велат од Општинската изборна комисија. Неофицијално, најголемиот број од гласачите гласале против отворање на рудници на територијата на општината и за стопирање на изградбата на рудникот за бакар Казандол.

Право на глас имаа околу 7.000 жители, кои гласаа на 12 избирачки места.

На референдум за рудникот Казандол ќе излезат и жителите на Дојран на 18 јуни, а постапка за организирање референдум во тек е и во Валандово.


Активистите собра 2.213 потписи за референдум во Валандово, се закануваат со блокади


Валандово, 9 јуни, 2017 - 13:26 (META) 

Граѓанската иницијатива „Спас за Валандово“ извести дека ги собрала потребните потписи за распишување на референдум на локално ниво во општина Валандово и денеска, во име на сите 2.213 потпишани граѓани на Општина Валандово, до Советот на општина Валандово ќе поднесе предлог за распишување референдум. На ова изјаснување, граѓаните ќе треба да кажат дали се за или против продолжување со работа на рудникот и рударскиот комплекс „Казандол” и дали се за или против изградба на рудници на металични суровини на територија на Општина Валандово сега и во иднина.

„Спас за Валандово“ ќе побара, согласно законските рокови и Статутот на општината, референдумот да се одржи за точно еден месец, односно на 9 јули, и очекува до понеделник, 12 јуни, Советот на општината да донесе одлука за одржување на референдумот. Во спротивно, ќе се организираат протести и блокади на патиштата.

„Доколку градоначалникот на општина Валандово, претседателот на Советот и Советот на општина Валандово не ги донесат горенаведените одлуки заклучно со 12 јуни 2017, како граѓани на Општина Валандово сплотени во граѓанската иницијатива Спас за Валандово, почнувајќи од 13 јуни ќе пристапиме кон радикални чекори користејќи ги сите демократски облици за изразување незадоволство: секојдневни блокади и протести на крстосница Валандово-Пирава-Марвинци, сè додека нашите барања не бидат исполнети од страна на Советот на општина Валандово“, порачуваа граѓанските активисти.