Просечната нето-плата во април изнесувала 23.942 денари


Скопје, 22 јуни, 2018 - 15:41 (META) 

Просечната месечна исплатена нето-плата по вработен, во април изнесувала 23.942 денари и е зголемена за 5,6 проценти во однос на истиот месец лани, објави Државниот завод за статистика. Бруто-платата за април изнесувала 35.117 денари.

Ваквото зголемување се должи, пред се на зголемувањето на просечната месечна исплатена нето-плата по вработен во секторите рударство и вадење на камен (32,2 отсто), преработувачка индустрија (13 отсто) и објекти за сместување и сервисни дејности со храна (11,4 отсто).

Зголемување на просечната месечна исплатена нето-плата по вработен, во однос на претходниот месец, е забележано и во секторите административни и помошни услужни дејности (4 отсто) и трговија на големо и трговија на мало, поправка на моторни возила и мотоцикли (3,7 отсто).


Анѓушев: Рударството е важно, треба да се смени перцепцијата на граѓаните


Скопје, 12 јуни, 2018 - 13:39 (META) 

Во Македонија кога ќе се спомне рударство се раѓаат негативни чувства, мора да отвориме дискусија зошто е тоа така рече денеска вицепремиерот за економски прашања, Кочо Анѓушев на отворањето на 3. Европски форум за рударство и истражување „Minex Europe 2018“  организиран од Стопанска комора на Македонија.

– Мој заклучок е дека таквата состојба е генерирана од неодговорниот однос на дел од концесионерите кои не ги запазувале критериумите на совесно работење и на совесни стопанственици, со цел да направат поголем профит. Иако профитот е основниот генератор на бизнисот од кој и државата има интерес преку собирање данок, исто така, мора да се води сметка и за заштита на човекот и на животната околина – рече Анѓушев.

Во своето обраќање, вицепремиерот ја истакна важноста што рударството ја има во целокупната индустрија, како сектор каде се вработени над 10.000 луѓе.

– Според последните податоци во април 2018 година во споредба со април 2017 регистрирано е  зголемување од 1,3 отсто на вработените во овој сектор . Рударството и вадењето камен учествува со 8,31 отсто во индустриското производство на земјата. Овие бројки покажуваат дека придонесот во индустријата е значаен, пред се преку рудниците кои се отворени пред многу години и денеска работат успешно – додаде тој.

Анѓушев ги повика компаниите од овој сектор поблиску да соработуваат со локалното население и да ги разјаснат сите отворени прашања и дилеми. Комуникацијата, според вицепремиерот, треба да се одвива во насока на едукација и информирање за стандардите и процесите што ги применуваат во експлоатацијата на минералите, како и непостоењето закана за животната околина и земјоделското производство.

Анѓушев најави усогласување на македонското законодавството со европското законодавство со цел заштита на интересите на државата.


Бектеши: Отворањето на рудници зависи од позитивното мислење на општините


Скопје, 25 август, 2017 - 16:21 (META) 

Доделувањето на концесија за отворање на рудник, освен од надлежните институции, најдиректно зависи од позитивното мислење дадено од општината каде се наоѓа, изјави денеска министерот за економија, Крешник Бектеши на доделувањето на признанијата на најуспешни рудари во Македонија.

Тој посочи дека во земјава има активни повеќе од 120 рудници и дека рударството претставува база за развој на индустријата во државата.

„Ова е важен стопански сектор, што заедно со придружните, брои повеќе од 10.000 вработени. Индустриското производство во секторот рударство во јуни, во однос на истиот месец лани бележи пораст од 7,5 проценти, а прометот за истиот период, пораст од 1,2 отсто. Затоа овој сектор се смета за еден од водечките сектори од индустриското производство и е од големо значење за македонската економија“, изјави Бектеши.

Претседателот на Македонската асоцијација за рударство, Николајчо Николов рече дека добро е што во Македонија се буди еколошката свест, но потенцираше дека во рударството работат околу 13.000 луѓе и луѓето да внимаваат кога за рудниците даваат квалификации како „рудници на смртта“.


Просечната нето-плата во ноември била 22.380 денари


Скопје, 24 јануари, 2017 - 14:18 (META) 

Просечната месечна нето-плата во ноември лани изнесувала 22.380 денари, додека просечната бруто-плата била 32.877 денари, покажуваат податоците на Државниот завод за статистика.

Зголемувањето на просечната месечна исплатена нето-плата во ноември 2016 година, во однос на ноември 2015 година за 1,8 отсто се должи, пред сè, на повисоката исплатена нето-плата по вработен во секторите рударство и вадење камен за 10,5 проценти, уметност, забава и рекреација за 8 проценти и градежништво за 7,3 проценти.

Во ноември 2016 година, 1,4 отсто од вработените не примиле плата.

 

 


Намален бројот на работници во индустријата во октомври во однос на лани


Скопје, 30 ноември, 2016 - 14:09 (META) 

Бројот на работниците во индустријата во октомври во однос на истиот месец лани е намален за 1,4 отсто, објави Државниот завод за статистика.

Во првите десет месеци годинава во однос на истиот период лани бројот е зголемен за 0,3 отсто.

Бројот на работниците во секторот рударство и вадење камен во октомври во однос на истиот месец лани, бележи зголемување од 3,2 проценти, во секторот преработувачка индустрија бележи опаѓање од 1,8 отсто, а во секторот снабдување со електрична енергија, гас, пареа и климатизација се забележува пораст од 0,6 отсто.

 


Прометот во индустријата до август зголемен за 10,8 отсто во однос на лани


Скопје, 14 октомври, 2016 - 13:49 (META) 

Во првите осум месеци од годинава, прометот во индустријата во однос на истиот период лани е поголем за 10,8 проценти, објави Државниот завод за статистика.

Прометот во индустријата во август годинава во однос на истиот месец лани е поголем за 4,1 отсто.

Прометот во индустријата остварен на домашниот пазар за истиот период бележи зголемување од 8,4 проценти, а прометот остварен на странските пазари бележи пораст од 15,8 проценти.

Гледано по сектори, прометот во индустријата во секторот рударство и вадење камен во август годинава, во однос на истиот месец лани, бележи зголемување од 8,3 проценти, а во секторот преработувачка индустрија бележи пораст од 14,3 проценти.


Индустријата со пораст од 10,4 отсто во првите 7 месеци годинава во споредба со лани


Скопје, 15 септември, 2016 - 15:13 (META) 

Во јули годинава во споредба со истиот месец лани, прометот во индустријата на домашниот пазар бележи зголемување од 3,5 проценти, а прометот остварен на странските пазари бележи пораст од 16,1 отсто, објави Државниот завод за статистика.

Прометот од јануари до јули е зголемен за 10,4 проценти во однос на истиот период лани.

Гледано по сектори, прометот во индустријата во секторот рударство и вадење камен во јули во однос на истиот месец лани, бележи пораст од 13,5 проценти, а во секторот преработувачка индустрија бележи пораст од 13,1 отсто.


Во рударскиот сектор не се издаваат концесии за истражување и за експлоатација


Скопје, 16 мај, 2016 - 15:56 (META) 

Запирање на добивањето концесии како за истражување така и за експлоатација на минерални суровини е состојба со која се соочува рударскиот сектор, а е последица на моменталната политичка состојба во земјата, оценуваат од Македонската асоцијација на рударството (МАР) при Стопанската комора.

Според претседателот на МАР, Николајчо Николов, индустриското производство кај рударството и вадење камен, за првите три месеци од оваа година споредено со истиот период лани, бележи опаѓање од 1,2 отсто.

Тој истакна дека намалувањето на индустриското производство во рударството, особено кај металите, е последица и на затворањето на двата рудника, Тораница и Злетово.

Недостигот од стручна квалификувана работна сила беше истакнат како дополнителен проблем во оваа индустрија. Проблемот, како што истаканаа од МАР, е во средното образование, кое не продуцира соодветен образовен и квалификуван кадар, кој би бил подготвен веднаш да се вклучи на пазарот на трудот.

Вкупниот извоз на рударството и на производството на неметални минерали изнесува околу 40 милиони долари, додека увозот изнесува околу 90 милиони долари.

Извозот најчесто се остварува во Грција, Бугарија и многу мал дел во Хрватска и во Словенија.

Според податоците, домашниот бруто-производ (БДП) во рударскиот сектор се движи приближно до 1 отсто, со нaдеж дека во иднина ова учество ќе се зголеми, пред сè со најавувањето и за отворање на нови рудници за метали.


Пониски цени на индустриските производи


Скопје, 15 април, 2016 - 14:10 (META) 

Продажните цени на производителите на индустриски производи се пониски за 0,5 отсто на месечно ниво, а за 4,4 отсто на годишно ниво, објави Државниот завод за статистика.

Во февруари во споредба со претходниот месец, продажните цени на производителите на индустриски производи, вкупно, се пониски во секторот рударство и вадење камен за 5,8 отсто, во секторот преработувачка индустрија за 0,2 отсто, а во секторот снабдување со електрична енергија, гас, пареа и климатизација се повисоки за 0,8 отсто.

 


Прометот во индустријата на домашниот пазар бележи пад


Скопје, 16 декември, 2015 - 10:09 (META) 

Прометот во индустријата остварен на домашниот пазар во октомври годинава, во однос на истиот период лани, бележи опаѓање од 3,4 проценти, а прометот остварен на странски пазари бележи пораст од 11,3 проценти, објави Државниот завод за статистика.

Гледано по сектори, прометот во индустријата во секторот рударство и вадење камен во октомври 2015 година, во однос на истиот месец лани, бележи пораст од 4,4 проценти, а во секторот преработувачка индустрија бележи пораст од 8,3 проценти.