Владата ќе држи седница за поддршка на овоштарите


Скопје, 22 јуни, 2017 - 16:16 (META) 

Владата на Република Македонија денеска од 18 часот ќе ја одржи својата осма седница, на која се очекува да се донесе одлука за поддршка на овоштарите. Поточно, на дневен ред е уредбата за поблиските критериуми за директните плаќања, корисниците на средствата, максималните износи и начинот на директните плаќања за 2017 година, за одлуката за интервентен увоз на производ за заштита на растенијата.

Оваа седница на Владата уследи откако беше речиси попречен извозот на праските, а производителите протестираа, па и истураа товари праски на патот Прилеп – Градско.


СДСМ: Тренов да објасни зошто ја попречува исплатата на субвенции


Скопје, 16 јуни, 2017 - 18:20 (META) 

Владата предводена од СДСМ веднаш пристапи кон решавање на проблемите што ВМРО-ДПМНЕ ги остави во земјоделството, порача владејачката партија денеска, реагирајќи на прес-конференцијата на Ромео Тренов од ВМРО-ДПМНЕ. СДСМ побара Тренов да докаже дека навистина мисли добро за земјоделците така што ќе им овозможи, како државен функционер, да си ги земат субвенциите.

„Наместо да држи партиски прес-конференции, директорот на АД „Водостопанство“, Ромео Тренов, треба да објасни зошто во софтверот на платежна агенција сè уште ги нема внесено податоците за земјоделците кои не се должници за надомест за вода, со што директно им го спречува правото да си ги земат субвенциите“, се вели во реакцијата.


ВМРО-ДПМНЕ бара итна владина седница за обесштетување на овоштарите


Скопје, 16 јуни, 2017 - 15:23 (META) 

„Министерот на СДС, Љупчо Николовски, со денови се крие и ги одбегнува овоштарите кои се соочуваат со реални проблеми. Николовски го нема да се појави во Росоман каде што состојбата со производството на праски е алармантна, исто како и со речиси целокупното овоштарство во Македонија“, обвини денеска Ромео Тренов на прес-конференција во седиштето на ВМРО-ДПМНЕ.

– Владата на СДС покажа колку не го цени земјоделството и трудот на земјоделците. Владата на СДС покажа дека е глува на апелите за помош кои доаѓаа директно од земјоделците и од нивните здруженија. Оттука бараме министерот за земјоделство Љупчо Николовски да побара итна и вонредна владина седница со точка на дневен ред – стопроцентно обесштетување на овоштарите чиј род настрада од временските непогоди и дополнителна поддршка за да може да ја преживеат годината – рече Тренов.


Патничка загина во директен судир на две возила кај Росоман


Кавадарци, 3 април, 2016 - 17:32 (META) 

Едно лице го загубило животот, а две биле повредени во сообраќајна несреќа што денеска околу 12.30 часот се случила во близина на Росоман, соопшти попладнево Јавното обвинителство.

Како што информираат оттаму до несреќата дошло при директен судир на автомобил „форд фиеста“ и возило марка „мерцедес“.

„Патничко моторно возило ‘форд фиеста’ со скопски регистарски таблички, движејќи се на патот, кај местото викано Камендолска спирка во близина на Росоман се исклучило од колоната возила, сакајќи од левата коловозна лента да сврти лево на спротивната страна на патот. При тоа, возилото го пресекло патот на друго патничко возило марка ‘мерцедес’, кое доаѓајќи од спротивната насока директно удрило во ‘форд фиестата’. Од ударот на самото место починало едно лице, патничка на ‘форд фиестата’, а повредени се возачот и совозачот“, стои во соопштението на Обвинителството.

Јавен обвинител од Основното јавно обвинителство Кавадарци извршил увид на местото на несреќата и издал наредба за обдукција на телото на почината патничка, за прибирање на траги од местото и за сообраќајно-техничко вештачење.


Полицијата трага по 78-годишен жител на Росоман, пријавен за исчезнат


Кавадарци, 18 февруари, 2016 - 13:13 (META) 

Жителка на Росоман, вчера во полициската станица во Кавадарци го пријавила за исчезнат својот 78-годишен свекор Б.А., кој пред четири дена со такси-возило заминал кон болницата во Велес и оттогаш му се губи секаква трага.

Според досегашните сознанија на полицијата, во Градско, Б.А., на свое барање, се симнал од возилото и му кажал на таксистот дека ќе оди на гости во Градско, кај неговата внука. Оттогаш му се губи трагата.

Од полицијата велат дека преземаат мерки за пронаѓање на лицето.


Пожар во две куќи во Кавадарци


Кавадарци, 7 февруари, 2016 - 17:40 (META) 

Две куќи се запалија денеска во центарот на Кавадарци. Според првичните информации на територијалната противпожарна единица од овој град, причината за првиот пожар е неисправната електрична инсталација. Во вториот случај, пак, најверојатно се работи за неправилно изведен оџак кој се запалил.

На двете локации интервенирале по две возила и по четворица пожарникари. Илчо Богевски, командир на територијалната противпожарна единица, апелираше до кавадарчани и до росоманци да бидат повнимателни, а за сите информации и за помош, да се обратат до територијалната противпожарна единица.