Свилановиќ: Ромките се најранлива група во регионот


Белград, 31 октомври, 2018 - 14:01 (META) 

Најранилва група во регионот на Западен Балкан се Ромките, беше истакнато на регионалната конференција што започна денеска во Белград, Србија, во организација на Регионалниот совет за соработка (РСС), а под покровителство на Владата на Србија и CARE Интеренешнл Балканс.

„Девет од десет млади Ромки на возраст од 18 до 24 години во целиот регион не се школуваат, не проаѓаат никакви обуки, ниту се вработени“, изјави Горан Свилановиќ, генералниот секретар на РСС, повикувајќи се на истражување за положбата на Ромите.

Тој додаде дека поради тоа постои голема потреба да се вложува во нивното образовние, вработување, економска самостојност и зацврстување.

„Интеграцијата на Ромите не само што е еден од важните приоритети за регионот во врска со проширувањето кон ЕУ, туку тоа е и потреба на нашите општества“, изјави Свилановиќ.

Потпретседателката на Владата на Србија, Зорана Михајловиќ го потенцираше регионалниот пристап кон решавање на ова прашање за полесно надминување на положбата во која се наоѓа ромската заедница и посебно Ромките.

На Конференцијата под име „Економската (не)зависност на Ромските жени, предизвици и рани причинители“ учествуваат преку 130 владини службеници, претставници на цивилното општество и на меѓународни организации од регионот.

Еден од говорниците е и Аксел Ахмедовски, министер во Владата задолжен за спроведување на Стратегијата за подобрување на позицијата на Ромите во државата.


Основана Интерпартиска парламентарна група за правата на Ромите


Скопје, 4 јуни, 2018 - 16:58 (META) 

Во Собранието денеска беше основана и промовирана интерпартиска парламентарна група за правата на Ромите во Pепублика Македонија.

Иницијатори на оваа идеја се пратениците Самка Ибраимоски, Диме Велковски, Ирена Стефоска, Маја Морачанин, Лилјана Поповска, Енес Ибрахим, Агим Муртезанов, Мирсада Емини-Асани, Ивана Туфегџиќ, Ѓулумсер Касапи, Павле Богоевски, Славица Шуманска-Митева, Соња Мираковска и Јулиана Николова.

Претседателот на Собранието, Талат Џафери рече дека интерпартиски групи не се новина во Собранието, меѓутоа се доказ пратениците созреваат и се издигнуваат над партиските интереси и без оглед на политичката провиниенција од која доаѓаат, се здружуваат, соработуваат и прават нешто што е за општото добро, во овој случај, за доброто на граѓаните од ромската етничка заедница.

– На сите ни е добро позната генералната состојба на овие наши сограѓани, односно фактот дека се маргинализирани, недоволно интегрирани во општеството, со низок степен на вклученост во образовниот процес, со недоволна покриеност од страна на здравствениот сектор и ред други неповолности кои негативно влијаат врз нивната економска и општа благосостојба. Се прават напори за колку-толку подобрување на ситуацијата, притоа мислам на Декадата на Ромите, чијшто потписник е и Република Македонија, а не е мал ниту придонесот на невладиниот сектор, меѓутоа, не смееме да заборавиме дека ние сме претставници на народот, ние сме избрани од народот, ова е дом на народот и тука е местото каде што треба да се донесат, изменат и дополнат законите со кои ќе се санкционира оваа област. Сепак, не смееме да останеме само на донесување на квалитетни закони, туку, треба да се ангажираме во насока на вршење надзор врз имплементацијата, односно спроведувањето на тие закони – рече Џафери.


Западен Балкан бара начин за решавање на тешката материјална положба на Ромите


Бар, 31 мај, 2018 - 15:42 (META) 

Од 83 до 94 отсто од загрозените Роми што живеат во регионот на Западен Балкан не можат да си дозволат основни материјални работи за нормален живот, а многу домаќинства се уште немаат пристап до вода од чешма и до јавен канализациски систем, ниту пак нивниот отпад некој го собира и го складира.

Ова се дел од прелиминарните податоци на Регионалното истражување за Ромите на УНДП и на Светска банка, што денеска ги презентираше Орхан Усеин, координатор на акциониот тим на Проектот Интеграција на Ромите 2020, на Регионалниот совет за соработка (РСС), зборувајќи на дводневната меѓународна конференција за Ромите што се одржува во Бар, Црна Гора.

Конференцијата, на која присуствуваат преку 80 претставници на земјите од Западен Балкан и од Турција, има за цел министерствата од овие земји што се задолжени за интеграција на Ромите, да се запознаат со начините за најдобро решавање на проблемот со подобрување на станбеното прашање на Ромите. Како што соопшти РСС, посебен фокус на Конференцијата е ставен врз легализација на дивите ромски населби и на социјалните станови, како и заземање на целосен и одржлив пристап за создавање на трајни услови за живот.

„За да се реши прашањето за станбено згрижување на Ромите на најадекватен начин, сите земји од регионот треба бараат начини за одржливо финансирање на станбени фондови, не само преку нови модели на финасирање, туку и преку користење на празни станбени згради и намалување на долгорочните трошоци на станбеното згрижување“, подвлече Усеин.

Проектот „Интеграција на Ромите 2020 од 2016 година“ е поддржан и од Фондацијата Отворено Општество и од Европската Унија, која прашањето на интеграцијата го наведе како еден од условите за пристапниот процес на земјите кандидати за членство.


Регионална балканска средба во Берлин за дискриминацијата на Ромите


Берлин, 14 февруари, 2018 - 10:05 (META) 

Повеќе од 80 претставници на министерства на земјите од Западен Балкан и Турција, се собраа во Берлин на средба посветена на дискриминацијата на Ромите, со цел да се осигура препознавање на оваа дискриминација во регионот.

Дводневната средба е под покровителство на Регионалниот совет за соработка (РСС) и во организација на германските власти, а во рамките на проектот „Интеграција на Ромите 2020“.

– За нас е многу важно да се формулираат соодветни политики што водат во интеграција, а не натамошно исклучување на Ромите. Тука не станува збор за пронаоѓање на виновникот, туку за унапредување на нашите капацитети и резултати од работата – изјави заменикот генерален секретар на РСС, Газменд Турдиу.

Кристина Лудерс, директорка на германската Сојузна агенција за борба против дискриминацијата, потсети дека Ромите и Синтите се најгoлемите малцинства во Европа и дека омразата и расизмот против нив е проблем на цела Европа.

– Најважна работа што можеме да сториме, е да покажеме солидарност и да не носиме одлуки во име на малцинствата, туку наместо тоа да се погрижиме да ги засилиме и да ги слушнеме гласовите на Синтите и на Ромите – изјави Лудерс.

На собирот се одржуваат низа панели на кои се прави преглед на практиката на европските политики за борба против дискриминацијата на Ромите, соопшти РСС.

Интеграцијата на Ромите и прекинување со дискриминаторските политики и практики, од средината на 2016-тата година е составен дел од условите за прилкучување на земјите кандидати за членство во ЕУ.


Ибраимовски: Со законот за јазици не е оштетена ниту една етничка заедница


Скопје, 18 ноември, 2017 - 14:35 (META) 

Министерот без ресор задолжен за имплементација на Стратегијата за подобрување на состојбата на Ромите во Република Македонија, Самка Ибраимовски, смета дека со предлог-законот за употреба на јазиците не е оштетена ниту една етничка заедница во земјава.

– Сметам дека сè е во ред со предлог-законот. Ниедна заедница не е оштетена во тој дел и што е многу битно, сметам дека нема промени ниту на Уставот на Република Македонија – рече Ибраимовски, одговарајќи на новинарско прашање по прес-конференцијата за објавениот конкурс за стипендии за ученици Роми.

Тој смета дека предложеното законско решение произлегува од Рамковниот договор, кое, според него, никој немал храброст да го спроведе.

Ибраимовски информираше дека вчера е објавен конкурсот за доделување стипендии во пет категории за ученици Роми запишани во прва, втора, трета и четврта година во јавните и во приватните средни училишта за учебната 2017/2018 година.

Станува збор за 752 стипендии што ги доделува Министерството за образование и наука со финансиска поддршка од Ромскиот образовен фонд од Будимпешта за учебната 2017/2018 година.


Пари за проблемите на Ромите на Балканот ќе се бараат и во државните буџети и од донатори


Тирана, 10 ноември, 2017 - 13:48 (META) 

Министрите кои ја покриваат социјалната сфера во повеќе балкански држави, вклучително и на Турција, на конференција во Тирана денеска се договорија за решавање на проблемите на Ромите да се издвојуваат дополнителни средства од националните буџети, но и од други донатори.

На регионалната министерска конференција во организација на Регионалниот совет за соработка (РCC) и албанските власти, се зборуваше пред се за мерки за решавање на станбеното прашање и вработувањето на Ромите.

Република Македонија смета дека инклузијата на Ромите е дополнителна вредност во општеството и дека во таа насока има простор за дополнителни буџетски планирања – рече на конференцијата министерката за труд и социјална политика, Мила Царовска.

Таа појасни дека Министерството со Светска банка во 2018 година ќе работи на реформа на системот на социјална заштита и подобро распоредување на средствата за намалување на сиромаштијата, не само на малцинствата, туку и за сите граѓани на Република Македонија.

Генералниот секретар на РCC, Горан Свилановиќ, потсети на мега истражувањето „Балкански барометар 2017 година“, според кое 16 отсто од анкетираните големи бизнисмени на Балканот не би ги вработиле Ромите без оглед на нивната стручност, а 19 отсто не се сигурни. Освен тоа, 55 отсто од бизнисмените сметаат дека вработувањето на Ромите негативно ќе се одрази на продажбата на стоки и услуги и на работната атмосфера во претпријатието. Вакавите гледишта и ставови треба да бидат променети, истакна Свилановиќ.


Министерска конференција посветена на интеграција на Ромите утре во Тирана


Тирана, 9 ноември, 2017 - 16:35 (META) 

Регионална министерска конференција посветена на проектот „Интеграција на Ромите 2020“ ќе се одржи утре во Тирана, на која ќе учествува и Република Македонија.

Главна цел на Конференцијата е да создаде соодветен форум во рамките на кој земјите од Западен Балкан и донаторите ќе разговараат за потребите и приоритетите поврзани со пополнување на буџетските дупки за спроведување на политиките на интеграцијата на Ромите на Западен Балкан и Турција.

Дискусијата, како што соопшти Регионалниот совет за соработка, особено ќе биде фокусирана на средствата кои се неопходни за подобрување на вработеноста и станбеното згрижување на Ромите.

Инклузијата на Ромите од минатата година е подигнато на ниво на неопходен услов за земјите аспиранти за пристапување кон Европската Унија.

Конференцијата ја организира Регионалниот совет за соработка, оперативно тело на земјите членки на Процесот за соработка во Југоисточна Европа (SEECP), а Република Македонија ќе ја претставува министерката за труд и социјални работи Мила Царовска.


ААВМУ бара ТВ „Алфа“ да им се извини на Pомите за направена дискриминација


Скопје, 8 ноември, 2017 - 16:05 (META) 

Телевизијата „Алфа“ ќе мора да им се извини на граѓаните од ромска националност поради констатирана дискриминаторска содржина во прилог емитуван во информативните изданија, соопшти ААВМУ.

Комисијата за заштита од дискриминација утврди елементи со навредлива содржина на основа на етничка припадност и припадност на маргинализирана група, во јавното информирање на телевизијата.

Според Агенцијата, телевизијата со прилогот „Сè побројни и понасилни се Циганите на раскрсниците“, поттикнала и ширела дискриминација кон Ромите, врз основа на етничка припадност и на припадност на маргинализирана група.

„Имајќи предвид дека се конкретизира и се наведува на одредена група дека шири насилство на раскрсниците на улиците, постои повреда на Законот за спречување и заштита од дискриминација, во смисла на ширење на омраза и нетрпеливост“, стои во одлуката на Комисијата.

Оттаму бараат од „Алфа“ во рок од 30 дена од приемот на препораката јавно да им се извини на Ромите, како маргинализирана група која е идентификувана во прилогот како насилничка и посочена дека шири насилство на раскрсниците по улиците.

Од „Алфа“ во одговор до Комисијата напишале дека не постоела намера да се направи дискриминација и дека со одлука на уредувачкиот колегиум, новинарот и уредникот на вестите биле казнети со 20 отсто од платата во текот на три месеци.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Хелсиншки комитет: Расизам и ксенофобија на прилепскиот базен „Маркови кули“


Скопје, 14 септември, 2017 - 15:43 (META) 

Повеќе од 400 лица од Прилеп и од Прилепско од 1 јули годинава на градскиот базен „Маркови кули“ во Прилеп се соочиле со расизам, односно не им било дозволено да го користат базенот поради бојата на кожата.

Според Хелсиншкиот комитет за човекови права (ХКЧП), до Комитетот и до здружението „Ромска солза“ од Прилеп, се обратиле повеќе од 400 лица од ромска етничка припадност, наведувајќи дека повеќепати во изминатиот месец и половина, биле спречени да го посетат Градскиот базен „Маркови кули“ во Прилеп.

„Во изминатите години никогаш не се случило ниту едно лице, од ниту една етничка припадност да биде вратено од градскиот базен и да не му се дозволи влез. Лицата кои ги пријавија овие случаи се на различна возраст и од различен пол и секој од нив поединечно го наведе своето искуство од обидот да го посети градскиот базен. Од изјавите може да се заклучи дека лицата се обиделе да влезат на базенот во различни денови, поединечно и во групи, со семејството, со пријатели од различна етничка припадност, еднаш или повеќепати. При обидот за влез во базенот лицата биле враќани од обезбедувањето, со образложение дека од оваа година, по налог на сопственикот на базенот, нема да се примаат Роми. На дел од нив им било кажано дека оваа одлука на сопственикот треба да ја пренесат и на другите Роми кои ги познаваат бидејќи нема да бидат примени ниту тие. Дел од нив кои пристигнувале на базенот со лица кои немаат темна боја на кожата, биле спречувани да влезат, додека нивните пријатели кои имале светла боја на кожата биле пуштани“, наведува ХКЧП во својот месечен извештај за човековите права во Република Македонија за август.

Во извештајот се споменува и одлуката на Народниот правобранител за поднесена претставка од Мрежата за заштита од дискриминација во врска со дискриминаторски содржини во учебникот „Граѓанско образование“ за осмо одделение, како и говор кој промовира и поттикнува омраза насочен кон бегалците и мигрантите кои како дел од светската бегалска криза, транзитираат низ Република Македонија, во врска со предложената стратегија за интеграција на бегалци и на странци во Република Македонија од страна на Министерството за труд и социјална политика, предвидена за 2017 – 2027 година.

Комитетот одбележува и насилство врз медиумски работници, односно напад на новинарската екипа на „Нова ТВ“, како и инцидентот со екипата на интернет-порталот „Курир.“

„Во првиот случај, при нападот на новинарската екипа на „Нова ТВ“, повторно се работи за таргетирање „политички непријателски“ медиум и пружање отпор кон новинарските работници кои работат во правец на информирање на јавноста. Во вториот случај се работи за отстранување на снимателот на „Курир“ за време на јавна седница на Државната изборна комисија. Покрај осудата за случајот на напад врз новинарската екипа на „Нова ТВ“ од страна на Здружението на новинари на Македонија, осуда и за овој и за инцидентот со снимателот на „Курир“ дојде и од Агенцијата за аудио и аудио-визуелни медиумски услуги (АВМУ)“, се вели во соопштението.


Хелсиншки комитет: Средното училиште во Шуто Оризари е продолжување на гетоизацијата


Скопје, 8 април, 2017 - 14:10 (META) 

Потсетувајќи дека не само што и понатаму продолжува потребата за поддршка на Ромите, туку и се прават чекори назад, Хелсиншкиот комитет за човекови права на Република Македонија го честита Меѓународниот ден на Ромите, но истовремено алармира дека работите не стојат најдобро во поглед на понатамошна интеграција на Ромите и на решавање на нивните проблеми.

Од комитетот велат дека изградбата на базен и отворањето на новото средно училиште во скопската населба Шуто Оризари се продолжување на гетоизацијата. Доказ повеќе за тоа е фактот што во населбата не е решен целосно проблемот со водоводна и со канализациска мрежа, што е приоритет.

„Би сакале во духот на одбележувањето на овој ден, да ја истакнеме нашата загриженост за статусот на Ромите во државата и нивната континуирана системска дискриминација и гетоизација. Особено сме загрижени за најновите планови кои се прават во ромската населба Шуто Оризари, меѓу кои се новоотвореното средно училиште „Шаип Јусуф“, во кое продолжуваат да се одлеваат цели ромски паралелки од другите средни училишта во Скопје. Понатаму, најавата за изградба на базен во истата населба и за вложување на повеќе од 6.000 евра за негова изградба, наспроти недостигот од функционална канализациска и водоводна мрежа во населбата. Жителите во општината и понатаму се соочуваат со проблеми во пристап до квалитетна, достапна и навремена здравствена заштита, а немаат ни пристап до матичен гинеколог“, се вели во соопштението.

Од Хелсиншки комитет порачуваат дека постои и друга системска сегрегација на децата Роми во образовниот процес – тие се распределувани во посебни паралелки во редовните училишта, наместо да бидат вклучени и интегрирани во редовните паралелки.