Ако Иванов не го потпише за седум дена, законот за јазиците ќе почека уште еден месец


Скопје, 11 јануари, 2018 - 19:31 (META) 

По денешното усвојување во Собранието, Законот за употреба на јазиците во следните седум дена е во рацете на претседателот на државата Ѓорге Иванов кој треба да го потпише указот за негово прогласување за да може законот да биде објавен во Службен весник и официјално да стапи на сила.

Надлежностите на претседателот на државата и роковите за попишување на указите за прогласување на законите се регулирани во Уставот, Деловникот на Собранието и во Законот за Собрание.

Според Законот за Собранието, претседателот на законодавниот дом, во случајов Талат Џафери уште денеска треба да го достави законот кај Иванов заради потпишување на указот.

Иванов, според истиот закон, има рок од седум дена да го потпише указот за негово прогласување.

Претседателот на државата има право да не го потпише законот, освен во случај кога е донесен со двотретинско мнозинство, за што треба писмено да го извести собранискиот спикер.

Во таков случај Собранието повторно го разгледува законот и доколку го усвои со мнозинство гласови од вкупниот број пратеници, претседателот на Републиката е должен да го потпише указот, стои во членот 75 од Уставот.

Постапката за повторно разгледување на законот е пропишана во Деловникот и во Законот за Собрание.

„Ако претседателот на Републиката одлучи да не го потпише указот за прогласување на законот, Собранието повторно го разгледува законот согласно со Деловникот, во рок од 30 дена од денот на донесувањето на законот. По повторното разгледување на законот, амандмани можат да се поднесуваат само во врска со укажувањето на претседателот на Републиката“, стои во ставовите 3 и 4 од членот 38 од Законот за Собрание, како и во членот 173 од Деловникот на Собранието.


Фетаи: Ако има добра волја ќе се најде решение за подигање обвиненија и за новите истраги


Скопје, 30 декември, 2017 - 12:25 (META) 

Обвинителката на СЈО, Фатиме Фетаи во интервју за емисијата „360 степени“ на „Алсат-М“, изјави дека „несреќниот член 22“ од Законот за СЈО го ограничува ова обвинителство во овој момент да подига обвиненија, но, формално правно не го ограничува да отвора нови истраги.

Таа најави дека е можно некои од отворените истраги, кога ќе стигнат до фаза за подигање на обвиненија, да бидат предадени на работа во редовното Јавно обвинителство.

Станува збор за случаите „Странски служби“, „Друмарина“, „Рентген“, „Продуцент“, „Лидери“, „Тарифа 2“, „Транспортер 2“, што СЈО ги отвори на 19 декември, како и истрагата за случајот „Талир“ за финансирањето на ВМРО-ДПМНЕ, што беше отворена во мај, која не го фати рокот од 18 месеци за подигање на обвиненија.

– Наша должност е ние да гониме кога постојат докази дека е сторено кривично дело кое се гони по службена должност. Самата кривична постапка е составена од повеќе фази. Имаме предистрага, после истрага, фаза на прибирање на докази, односно кога постои основано сомнение дека е сторено кривично дело кое се гони по службена должност, и фаза на подигање на обвинение. Тоа е оној момент кога јавниот обвинител ќе собере доволно докази од коишто основано може да се очекува донесување осудителна пресуда. Во таква ситуација, можно е таков предмет да биде предаден на работа на редовното Јавно обвинителство, и на тој начин би биле и законски покриени – изјави Фетаи.

Прашана околу дилемата дали би било законски спорно тоа што предмет на СЈО ќе биде предаден на потпишување на некој од редовното обвинителство, со оглед дека Специјалното јавно обвинителство е исклучиво надлежно за гонење на кривичните дела поврзани и кои произлегуваат од незаконското прислушување, Фетаи вели дека „ако има добра волја може да се најде и некое законско решение тие предмети да преминат во редовното обвинителство“.

– Сè уште не сме дојдени во таква ситуација, да имаме некоја наша истрага којашто би била дојдена во фаза да биде поднесено обвиниение, меѓутоа во тој момент кога ќе имаме некој таков предмет, ќе се изнајде решение за се. Доколку постои добра волја, особено кога е во прашање остварувањето на правдата, може да се најде решение – вели Фетаи.

Обвинителката на СЈО појаснува дека за случаите „Актор“ и „Скопје 2014“, кои што во изминатиот период се преземени од другите обвинителства, СЈО има нов рок од 18 месеци, којшто е различен од оној рок што измина, за подигање обвиненија.


Два месеци ќе трае подготовката на измените на Законот за судовите


Скопје, 31 октомври, 2017 - 15:15 (META) 

Основите за разрешување судија и редефинирањето на условите за избор на судија ќе бидат дел од новиот закон за судовите, чија подготовка Министерството за правда ја почнало вчера.

Измените и дополнувањата на законот треба да бидат готови до 30 декември.

„Со предлог-законот за изменување и за дополнување на законот за судовите се врши негово усогласување со препораките дадени во мислењето на Венецијанската комисија, кое, главно, се однесува на основите за разрешување судија, основите за утврдување одговорност на судија и за изрекување дисциплинска мерка, редефинирање на условите за избор на судија, зајакнување на надзорната функција на Министерството за правда во поглед на примената на одредбите од Судскиот деловник“, стои во известувањето.

Основна цел на законот, како што се наведува, е зајакнување на независноста и на интегритетот на судиите и на нивната специјализација по области, утврдување на јасни критериуми за одговорност во вршењето на судиската функција, како и внесување на квалитативни критериуми при подготвувањето на оценката за работа.

Според Уставот, за измени и за дополнувања на Законот за судовите е потребно двотретинско мнозинство во Собранието.


СДСМ на 19. место, ВМРО-ДПМНЕ седма на гласачкото ливче за локалните избори


Скопје, 19 септември, 2017 - 15:17 (META) 

Денеска, со жрепка, во Државната изборна комисија (ДИК) беше утврден редоследот на кандидатите за градочалници и за советници на гласачките ливчиња за претстојните локални избори закажани за 15 октомври.

Листи со кандидати за градоначалници и за советници имаат поднесено 19 партии и коалиции.

Како што одреди жрепката, прва на гласачкото ливче ќе биде СДПМ, втора – Коалицијата Алијанса на Албанците и НДП, трета – ДУИ, четврта – Коалицијата за Битола (ДУИ, Беса и Алијанса на Албанците), петта – Коалиција „Заедно за Гази Баба“ предводена од Беса, шеста – НДМ, седма – ВМРО-ДПМНЕ, осма – Народно движење на Турците, деветта – Алијанса на Албанците, под број 10 е ТМРО, на 11. место е Демократската партија на Турците, под број 12 е ГРОМ, Коалицијата предводена од ВМРО-ДПМНЕ е на 13. позиција, Беса е под број 14, ДПА е 15, Левица е под број 16, ПДП е на 17. позиција, Сојузот на Ромите е на 18. место и СДСМ е под бројот 19.

Листите на кандидати од ист подносител ќе имаат ист реден број во сите општини.

Во општините каде што некоја партија или коалиција нема свој претставник, нејзиниот број ќе биде изоставен и на негово место ќе биде напишан редниот број на наредниот носител, без да се остава празно место.

Според роковите за локалните избори, општинските изборни комисии најдоцна до 21 септември треба да ги објават листите на кандидати за членови на совет и за градоначалници.

Денеска завршува и рокот од пет дена во кој политичките партии ќе можат да достават барање за запишување, дополнување или бришење на податоци од избирачкиот список, кој ДИК треба да го заклучи најдоцна до 24 септември. ДИК го потпишува избирачкиот список и изводите од него најдоцна до 29 септември.


Објавен огласот за нов јавен обвинител, почнуваат да течат роковите за пријавување


Скопје, 14 септември, 2017 - 9:48 (META) 

Собранието на Република Македонија денеска го објави огласот за именување нов државен јавен обвинител, по разрешувањето на Марко Зврлевски од оваа функција.

Со ова и официјално почнува да тече рокот од 15 дена за пријавување на заинтересираните кандидати за оваа функција.

„Заинтересираните кандидати кои ги исполнуваат условите предвидени со членот 44, ставови 1 и 2 од Законот за јавно обвинителство (да е државјанин на Република Македонија, активно да го владее македонскиот јазик, да е работоспособен и да има општа здравствена способност, да има стекнато универзитетска диплома за дипломиран правник во Република Македонија или нострифицирана диплома од странство, да има положено правосуден испит во Република Македонија и да има работно искуство од најмалку осум години со потврдени резултати на правни работи по положениот правосуден испит, или редовен или вонреден универзитетски професор кој предавал повеќе од десет години правен предмет од правосудната практика), пријавите со потребните документи треба да ги поднесат до Собранието на Република Македонија, во рок од 15 дена од денот на обајвувањето на одлуката во ’Службен весник’“, пишува во огласот, потпишан од претседателот на Собранието, Талат Џафери.

oglas za imenuvanje na javen obvinitel 2

Рокот за пријавување на заинтересираните кандидати е 15 дена, пишува во огласот потпишан од претседателот на Собранието, Талат Џафери

Инаку, Собранието го изгласа распишувањето на огласот за именување нов државен јавен обвинител пред точно една недела.

Според Законот, по пријавувањето на кандидатите, Владата мора да поднесе барање за мислење до Советот на јавни обвинители, кое има обврзувачка улога.

Советот има рок од 15 дена од денот на приемот на барањето од Владата да даде позитивно или негативно мислење за сите пријавени кандидати. По тоа, до Собранието доставува предлог за именување јавен обвинител со кандидатите за кои Советот дал позитивно мислење.

Доколку Советот на јавни обвинители од оправдани причини во рок од 15 дена не достави мислење, добива дополнителен рок од 15 дена, а ако и во овој рок Советот не достави мислење, се смета дека мислењето е позитивно.

Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот.

За именувањето, како и за разрешување државен јавен обвинител, Собранието одлучува со просто мнозинство, односно со 61 глас.

Засега во јавноста своите кандидатури ги најавија адвокатите Александар Тортевски, Звонко Давидовиќ, Александар Наков, Сејфула Османи и нотарката Лорија Ваневска.


Сугарески: Владата го усвои предлогот за продолжување на рокот за легализација


Скопје, 29 август, 2017 - 16:23 (META) 

Владата на денешната седница го усвоила предлогот на Министерството за транспорт и врски за измени и за дополнувања на Законот за постапување со бесправно изградени објекти, со што се дава нова можност за легализација на дивоградбите, информираше министерот за транспорт и врски, Горан Сугарески.

– Сметано од 1 јануари до 31 декември 2018 година, сите граѓани што претходно не успеале да поднесат барање за легализација, ќе можат да го направат тоа во овој дополнителен рок. Граѓаните, пак, кои поднеле барања, но не ја обезбедиле неопходната документација, ќе имаат дополнителни шест месеци од 1 јануари до 30 јуни 2018 година – изјави Сугарески.

Тој нагласи дека услов за легализација на објектот е тој да бил изграден заклучно со 3 март 2011 година и додаде дека и понатаму се потребни истите документи за аплицирање како и претходно.

Досега процентот на легализирани дивоградби е околу 40 проценти или околу 186.000 објекти кои се легализирани и запшани во катастарот.

Сугарески ги повика сите пратенички групи во Собранието да ги прифатат овие законски измени, кои, според него, се исклучиво во интерес на граѓаните на Република Македонија.


Рокови, процедури и можни сопки за изборот на новиот Јавен обвинител


Скопје, 17 август, 2017 - 16:16 (META) 

Со разрешувањето на Марко Зврлевски од функцијата државен јавен обвинител, Владата може да почне со процедурата за именување на негов наследник. Ако разрешувањето на Зврлевски ја окупираше јавноста добар дел од летото, со развлекувањето на расправата од страна на пратениците на ВМРО-ДПМНЕ, тогаш речиси извесно е дека постапката за именување на нов јавен обвинител, која и онака е покомплицирана, ќе биде актуелна во текот на оваа есен.

Постапката за назначување на нов Јавен обвинител е уредена со членот 41 од Законот за јавно обвинителство:

  • Владата дава предлог до Собранието;
  • Собранието распишува оглас за кандидати за јавен обвинител во „Службен весник“ и во најмалку два дневни весника од кои еден мора да биде на албански јазик;
  • Рокот за пријавување на кандидатите е 15 дена од денот кога огласот ќе биде објавен во „Службен весник“;
  • За именувањето на новиот државен јавен обвинител, Владата мора да поднесе барање за мислење до Советот на јавни обвинители, кое овојпат има обврзувачка улога, за разлика од постапката за разрешување, кога мислењето на Советот е повеќе од процедурална природа;
  • Советот има рок од 15 дена од денот на приемот на барањето од Владата да даде позитивно или негативно мислење за сите пријавени кандидати.

По ова Владата до Собранието доставува предлог за именување јавен обвинител со кандидатите за кои Советот дал позитивно мислење.

  • Доколку Советот на јавни обвинители од оправдани причини во рок од 15 дена не достави мислење, добива дополнителен рок од 15 дена;
  • Ако и во овој рок Советот не достави мислење, се смета дека мислењето е позитивно – што е друга разлика од постапката за разрешување;
  • Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот;
  • За разрешувањето и за именувањето јавен обвинител, Собранието одлучува со просто мнозинство, односно со 61 глас.

Покрај, основните услови – да е државјанин на Република Македонија, активно да го владее македонскиот јазик, да е работоспособен и да е во добра општа здравствена состојба, да има стекнато универзитетска диплома за дипломиран правник во Република Македонија или нострифицирана диплома од странство и да има положено правосуден испит во Република Македонија – кандидатите за државен јавен обвинител треба да исполнуваат и посебни услови. Тоа подразбира да имаат работно искуство од најмалку осум години со потврдени резултати на правни работи по положениот правосуден испит, или редовен или вондреден универзитетски професор кој предавал повеќе од десет години правен предмет од правосудната практика.

Премиерот Заев вчера изјави дека негов личен став е новиот јавен обвинител да биде експерт, кој ќе ја има довербата, пред сè, кај граѓаните.

Мандатот на државниот јавен обвинител е шест години, со право на повторен избор.

Дел од медиумите излегоа со информации дека до назначувањето на нов државен јавен обвинител, вршител на должност на функцијата ќе биде поранешниот министер за труд и социјална политика и поранешен заменик-министер за внатрешни работи Џелал Бајрами.


Роковник на ДИК: Кој, кога и што треба да направи до локалните избори


Скопје, 7 август, 2017 - 18:29 (META) 

Државната изборна комисија (ДИК) денеска го усвои роковникот за локалните избори, според кој изборите ќе се одржат на 15 октомври, вториот круг на 29 октомври, а политичките партии своите листи на кандидати треба да ги поднесат најдоцна до 9 септември.

Јавниот увид во избирачкиот список почнува на 21 август и ќе трае до 9 септември. Рокот за собирање потписи за листи на независните кандидати за советници и за градоначалници е од 21 август до 4 септември.

– ДИК е подготвена за организирање и за спроведување на локалните избори. Сите потребни подготовки кои се однесуваат на успешното спроведување на локалните избори се при крај – изјави Реџеп Прекопуца, потпретседател на ДИК.

ДИК денеска испрати барање до Министерството за внатрешни работи да направи список на полнолетните државјани за да се утврди точната бројка во гласачи во избирачкиот список.

Ждрепката за утврдување на редослед на кандидатите на гласачко ливче ќе се изврши најдоцна до 18 септември, а набљудувачите треба да се акредитираат најдоцна до 4 октомври.

Од денеска почнува и надзорот на медиумите за начинот на кој ќе известуваат за време на локалните избори од Агенцијата за медиуми.


Џафери ќе ги распише локалните избори утре во 12 часот во Собранието


Скопје, 5 август, 2017 - 15:39 (META) 

Претседателот на Собранието, Талат Џафери, утре ќе ги распише локалните избори, кои треба да се одржат на 15 октомври, информираат од кабинетот на претседателот.

„Претседателот на Собранието, Талат Џафери, в недела, на 6 август, во 12 часот ќе потпише решение за распишување избори за членови на советите на општините и на советот на Град Скопје и за градоначалници на општините и за градоначалник на градот Скопје“, се вели во соопштението.

Џафери неодамна информираше дека 6 август е краен рок за да ги распише локалните избори и со тоа да почнат да течат роковите и организацијата.


Новиот Зврлевски ќе се избира на оглас: Какви се роковите, процедурата и условите


Скопје, 15 јуни, 2017 - 8:08 (META) 

Штом заврши постапката за разрешување на актуелниот државен јавен обвинител, Марко Зврлевски, Владата веднаш ќе почне процедура за именување негов наследник, изјави премиерот Зоран Заев.

Сепак, за разлика од процедурата за разрешуавање на Зврлевски, која може да заврши до крајот на оваа недела, а десетина дена откако Владата ја почна, постапката за именување нов државен јавен обвинител е покомплицирана и најверојатно добар дел од летото ќе ги окупира надлежните институции и јавноста.

Постапката е пропишана во членот 41 од Законот за јавно обвинителство:

  • Владата дава предлог до Собранието;
  • Собранието распишува оглас за кандидати за јавен обвинител во „Службен весник“ и во најмалку два дневни весника од кои еден мора да биде на албански јазик;
  • Рокот за пријавување на кандидатите е 15 дена од денот кога огласот ќе биде објавен во „Службен весник“;
  • За именувањето на новиот државен јавен обвинител, Владата мора да поднесе барање за мислење до Советот на јавни обвинители, кое овојпат има обврзувачка улога, за разлика од постапката за разрешување, кога мислењето на Советот е повеќе од процедурална природа;
  • Советот има рок од 15 дена од денот на приемот на барањето од Владата да даде позитивно или негативно мислење за сите пријавени кандидати.

По ова Владата до Собранието доставува предлог за именување јавен обвинител со кандидатите за кои Советот дал позитивно мислење.

  • Доколку Советот на јавни обвинители од оправдани причини во рок од 15 дена не достави мислење, добива дополнителен рок од 15 дена;
  • Ако и во овој рок Советот не достави мислење, се смета дека мислењето е позитивно – што е друга разлика од постапката за разрешување;
  • Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот;
  • За разрешувањето и за именувањето јавен обвинител, Собранието одлучува со просто мнозинство, односно со 61 глас.

Покрај, основните услови – да е државјанин на Република Македонија, активно да го владее македонскиот јазик, да е работоспособен и да е во добра општа здравствена состојба, да има стекнато универзитетска диплома за дипломиран правник во Република Македонија или нострифицирана диплома од странство и да има положено правосуден испит во Република Македонија – кандидатите за државен јавен обвинител треба да исполнуваат и посебни услови. Тоа подразбира да имаат работно искуство од најмалку осум години со потврдени резултати на правни работи по положениот правосуден испит, или редовен или вондреден универзитетски професор кој предавал повеќе од десет години правен предмет од правосудната практика.

Премиерот Заев вчера изјави дека негов личен став е новиот јавен обвинител да биде експерт, кој ќе ја има довербата, пред сè, кај граѓаните.

Мандатот на државниот јавен обвинител е шест години, со право на повторен избор.