Чакаровски: Ќе се усогласиме, вакцинирањето нема да биде услов за упис во училиштата


Скопје, 23 април, 2018 - 14:59 (META) 

Министерството за здравство нема да бара вакцинирањето да биде услов за упис во училиштата. Во постојан контакт сме со Министерството за образование, ќе ги усогласиме ставовите. Не е точно дека работиме на тоа дека децата нема да се запишуваат во градинка или во училиште ако не бидат вакцинирани. Ќе работиме на тоа на родителите кои се скептични да им укажеме дека кај нив не треба да постои страв дека вакцините се небезбедни.

Ова го изјави денеска заменик-министерот за здравство Гоце Чакаровски, пред почетокот на одбележувањето 65 години од основањето на Институтот за белодробни заболувања кај децата, во Козле.

Иако нагласи дека индивидуално право е на секој родител да одлучи дали ќе го вакцинира своето дете, напомена и дека како Министерство за здравство мора да водат сметка за колективната безбедност, бидејќи, како што посочи, едно невакцинирано дете, а инфицирано може да биде причина за инфективно заболување кај многу дечиња.

– Ќе ги убедиме родителите дека ќе увеземе најквалитетни вакцини. Наша работа е да ги увериме дека вакцинирањето на детето е позитивна работа – рече заменик-министерот за здравство.

Министерот за здравство Венко Филипче во саботата рече дека вакцинацијата ќе биде задолжителна за упис во училиште и во градинка. По бранот бурни реакции на социјалните мрежи, излезе со нов став, објаснувајќи дека може да биде оставено да решаваат родители, но со тоа се загрозува колективниот имунитет.

Според Законот за заштита на населението од заразни заболувања, имунизацијата е задолжителна, а според членот 67 од законот, родителот што нема да дозволи неговото дете да се вакцинира, ќе биде казнет со парична казна од 300 до 650 евра.

Според член 46, став 2 од Законот за основно образование, пак, образованието исто така е задолжително, односно секое дете има право на образование, но наведува и дека кога детето се запишува во училиште треба се да приложи потврда дека е вакцинирано.


Активистите ги повикуваат родителите на бојкот на наставата, поради загадениот воздух


Скопје, 14 декември, 2017 - 10:36 (META) 

Активистите за чист воздух и здрава животна средина, ги повикуваат родителите да ја бојкотираат наставата во училиштата на 20 декември (среда), поради енормно загадениот возух.

На Фејсбук-страницата „Бојкотирам настава“ тие велат дека, ниту еден протест до сега, не помогнал во решавање на проблемот со загаденоста, па затоа и се менува начинот на искажување на револт.

„Мерните станици низ Скопје веќе две недели покажуваат оргомна загаденост на воздухот. За важноста на справување со загадувањето, како најголем и најопасен проблем, ги потсетуваме одговорните веќе четири години. Досега се обидовме со чести собири за искажување на назадоволството од непсравувањето со ниедна точка од овој комплексен проблем, за да ги потестиме службениците да си ја сработат работата за која се нафатиле да ја сработат, а за што добиваат плата од наши пари. Бидејќи досегашните форми на протест не вродија со никаков плод, отсега го менуваме начинот на искажување револт“, се вели во апелот.

Утринава скопјани се разбудија во густа магла, намалена видливост и големо загадување на амбиенталниот воздух. Мерните станици на Министерството за животна средина, во скопското подрачје покажуваат енормно загадување на воздухот. Многу високо ниво на канцерогените ПМ10-честички и ПМ2,5-честички има во Центар, Карпош, Лисиче, Гази Баба и Ректорат.


МОН: Омбудсманот погрешно го протолкувал дописот за шамиите во училиштата


Скопје, 19 септември, 2017 - 16:43 (META) 

Министерство за образование и наука (МОН) вели дека не доставило никаков допис до директорот на Основното училиште „Братство и единство“ во Охрид со кој им се забранува на ученичките да посетуваат настава затоа што носеле шамија на главата, за што денеска народниот правобранител ја осуди оваа постапка на МОН.

Од таму сметаат дека нивниот допис е протолкуван погрешно.

„До Министерството за образование и наука се обрати родител на две ученички од Основното училиште „Братство и единство“ во Охрид со барање за мислење за случајот со неговите ќерки на кои не им е дозволено следење на настава во основно училиште поради носењето превез. Министерството за образование и наука во одговорот на писмото укажа дека согласно Законот за основно образование, основното образование е задолжително. Исто така, укажа дека во надлежност на директорот е да ја организира, планира и да ја води работата на основното училиште и е одговорен за остварување на правата и обврските на учениците. Зачудува погрешното толкување на дописот на МОН дека со него се дава дозвола за какво било однесување на директорот или на родителот на ученичките“, се вели во соопштението на МОН.

Поради заблудите во јавноста за овој случај, МОН исто така укажува дека директорите на општинските основни училишта се избираат и се разрешуваат од страна на градоначалниците на предлог на училишниот одбор на основното училиште.

„Ако постојат сознанија за постапување на директорот со кое по негова вина е нанесена штета на учениците, на нивните родители или на училиштето, училишниот одбор свикува седница на која се донесува заклучок во писмена форма кој се доставува до директорот. Понатаму во законот е регулирано дека во случај на евентуално постоење на прекршување на законите и оневозможување на остварување на правата на учениците, надлежност имаат покрај училишниот одбор, Државниот просветен инспекторат, градоначалникот и, на крајот, по спроведена постапка од страна на другите органи, Министерството за образование и наука“, велат од МОН.


Битолски средношколци со неписмени соопштенија се повикуваат на протести


Битола, 20 март, 2017 - 13:56 (META) 

„Бојкотираме за да учиме на македонски јазик, не бојкотираме за партија!“ Вака гласи повикот на социјалните мрежи со кои средношколци од повеќе училишта во Битола ги организираат своите соученици да ја прекинат наставата и да излезат на протести.

Притоа, се повикуваат претседателите на класовите да прават списоци и да бележат кој сè излегол на протестите. Протестот кој беше најавен за денеска во 11.30 часот, ги вознемири дел од родителите на ученици во гимназијата „Јосип Броз Тито“, особено зашто ученици од други училишта дошле да ги повикаат на протест гимназијалците, со зурли и со тапани, скандирајќи „Македонија“ и читајќи соопштение „како треба да се сака татковината“.

– Децата ни јавуваат дека други ученици со зурли и со тапани се во училишниот двор и ги повикуваат на протести. Само оваа гимназија досега не ја има прекинато наставата и не го има поддржано бојкот, освен поединци – вели еден од родителите.

Во техничкото училиште, пак, ученик од втора година читал соопштение по училниците зошто треба да се излезе на протестите. Ученикот пред професорите што не го дозволувале ваквиот чин, се правдал дека за сè знае директорот. Директорот, меѓутоа, не одговара на нашите телефонски повици и пораки.

Ученици од повеќе средни училишта денеска, сепак, излегоа на протест.


Омбудсманот бара веднаш да престане злоупотребата на деца во протестите


Скопје, 3 март, 2017 - 14:00 (META) 

Народниот правобранител денеска повика веднаш да престане злоупотребата на деца во протестите кои се организираат деновиве. За овие случувања, како што соопштуваат од канцеларијата на Омбудсманот, тие добиле и претставки од родители.

„Народниот правобранител ги предупредува сите инволвирани страни дека секоја злоупотреба на децата подлежи на санкции и укажува дека ќе ги истражи поплаките. Доколку навистина се докаже дека одредени лица, вработени во образовни институции, биле поттикнувачи, за истите ќе бара најстроги казни, затоа што станува збор за деца кои според сите меѓународни и домашни регулативи уживаат посебна заштита“, стои во соопштението на Народниот правобранител.

Од институцијата апелираат до наставниците и до родителите по никоја цена да не дозволуваат инволвирање на учениците во какви било собири и протести и ги повикуваат надлежните институции веднаш да реагираат и да ги спречат ваквите појави.


Родители на деца со аутизам од Штип најавуваат кампување пред институциите


Скопје, 14 септември, 2016 - 16:57 (META) 

Единствениот вработен дефектолог во Центарот за аутизам во Штип пред два дена си дал отказ, а родителите на децата со аутизам не биле информирани за тоа. Тие денеска наидоа на затворена врата во Центарот за аутизам.

Родителите немаа информација зошто е затворен Центарот за аутизам, каде нивните деца ги поминуваат часовите додека тие се на работа. Но, како што изјавија, не е првпат центарот да биде затворен.

– Нема политика во нашите инсистирања да се направи нешто со центарот. На почетокот, кога се отвори, работеше логопед, но таа набргу отиде на боледување. Не ѝ се најде замена. Од понеделникот овде не работи единствениот дефектолог. Ова веќе не е центар за аутизам, бидејќи сега во него работат само домаќинка, педагог и медицинска сестра – изјави Зоран Мијалков, родител на дете со аутизам.

Родителите и роднините на децата со аутизам велат дека овој центар никогаш не профункционирал како што треба.

– Кај сите нас има разочарување. Каде ги сместија децата?! Ова е подрум. Нема ни игралиште, ниту двор, ни соодветна храна – реагира Васка Кавракова, баба на дете со аутизам.

Семејствата потсетија и на ветувањето дадено од политичарите на отворањето дека ќе обезбедат возило за превоз на децата. Разочарани, родителите најавуваат кампирање пред институциите.

Од Центарот за социјални работи соопштуваат дека од утре децата со аутизам ќе бидат редовно згрижени, откако е најдена замена за дефектологот што дал отказ. Оттаму соопштија дека центарот работел, но бил со затворени врати поради тоа што вработените не сакале да се снима внатре.


СДСМ: Kако со плата помала од 10.000 денари да се обезбедат 9.000 денари по ученик?


Скопје, 5 септември, 2016 - 10:40 (META) 

Залудно ВМРО-ДПМНЕ на Никола Груевски и министерот – лажго Спиро Ристовски се фалат дека вовеле „концепт на бесплатно образование“, кога трошоците за почеток на учебната година за еден ученик изнесуваат колку една минимална плата од 9.000 денари, се вели во соопштението на СДСМ.

Од опозициската партија велат дека за да ја почнат учебната година, родителите се изложени на огромни трошоци.

„Плаќаат за тетратки, ранци, осигурување, ужинка, за комплети за техничко образование и за дневен престој. Во многу училишта од родителите се бара да платат за униформи, за обезбедување, но и за бели листови за копирање, за тоалетна хартија и за сапун. Сè е тоа огромен товар на семејниот буџет“, се вели во соопштението на СДСМ.

Од опозициската партија прашуваат што е со оние семејства што имаат двајца или тројца ученици?

„Трошоците за почеток на училишната година за тројца ученици ја надминуваат просечната плата во Македонија, која е помала од синдикалната минимална кошничка. Како родителите да издвојат пари за сите трошоци, кога повеќе од половина од вработените се со плата пониска од 12.000 денари? Со кои пари да ги подготват учениците тие 34,8 проценти од родителите кои земаат помалку од 10.000 денари плата?“, се додава во соопштението на СДСМ.


Атанасов: Состојбата во образованието е катастрофална


Скопје, 1 септември, 2016 - 13:31 (META) 

„Образованието во Македонија е во катастрофална состојба. Владата и министрите на ВМРО-ДПМНЕ и на ДУИ носеа лоши закони, остваруваа погрешни цели и трошеа многу пари на промашени проекти. Ја понижија просветата, особено со екстерното тестирање, кое, веднаш да кажам, ќе биде укинато“, изјави претседателот на комисијата за образование на СДСМ, Петар Атанасов.

Тој додаде дека СДСМ ќе создаде образовен систем што ќе создава силни индивидуи со сопствен став и со мотивација активно да го градат општеството.

– Наместо преобемните програми, лошите учебници и голата фактографија и тестирања, прв приоритет ќе ни бидат децата и нивната задолжителна програма, преку намалување на наставните содржини и предмети, подигнување на степенот на употребливост на знаењето, професионалното насочување и работа со децата и поттикнување на вработувањата на завршените ученици од средните стручни училишта – додаде Атанасов.

Според него, втор врвен приоритет на СДСМ во поглед на образованието ќе биде поддршката на наставниците, преку укинување на екстерното тестирање, ослободување од прекумерната административна работа и мотивирање и наградување на наставниот кадар.

Атанасов ветува дека оваа учебна година ќе заврши без екстерно тестирање, со посветени наставници, мотивирани ученици и со позитивни родители.


Основци од Гостивар следат настава во студени училници


Гостивар, 27 јануари, 2016 - 16:25 (META) 

Од почетокот на второто полугодие, поголемиот дел од учениците од основното училиште „Гоце Делчев“ во Гостивар следат настава во студени училници. Парното греење на првиот кат од овој училишен објект не работи, а дел од училниците се затоплуваат со греалки, кои родителите на децата ги носат од дома.

Дел од родителите најавуваат дека нема да ги пуштаат децата на училиште додека не се реши проблемот.

– Јас денеска нема да го носам детето на училиште. Сè додека не се реши проблемот со парното, ќе ја бојкотираме наставата – вели родител на ученик во ОУ „Гоце Делчев“.

Од управата на училиштето велат дека проблемот со парното греењето е стар две години.

– Во 2014 година, кога се поставувал овој систем за затоплување, настанал проблем при неговото инсталирање. Се обидовме во текот на зимскиот распуст да го решиме проблемот, но не успеавме – велат од управата.

Од секторот за образование при Општина Гостивар, велат дека побарале помош за решавање на проблемот од Министерството за образование, но одговор оттаму сè уште немаат добиено.

Поради проблемот со греењето, наставата во основното училиште „Гоце Делчев“ се одвива со скратени часови.


Родители и ученици од струшките основни училишта се закануваат со бојкот на наставата


Струга, 7 септември, 2015 - 14:34 (META) 

Поради прекин во снабдувањето со електрична енергија, предизвикан од блокираните жиро-сметки, дел од учениците и од родителите од струшките основни училишта се заканија со бојкот на наставата.

Родителите велат дека доколку во текот на наредната недела не се најде решение на проблемот, нема да ги пуштаат своите деца на училиште. Бараат државата да пројави интерес и за Струга.

– Јас мислам дека ќе има реакција од родителите. Може да има и бојкот на наставата, може да има и неодржување на еден час, а може и да има и протести пред Општината поради состојбата со немање на струја. Срамота е сега, во овај век, Министерството за обраование да не реагира, да нема струја во образовните институции – вели Зуфер Арслани, претседател на совет на родители во училиштето „Браќа Миладиновци“.

Директорот на училиштето, Шќелким Алиу, вели дека иако има најави, засега нема решение на проблемот бидејќи сметката на училиштето е блокирана.