Поповски: Јавноста ги знае сите информации за истрагата за Никола Саздовски


Скопје, 10 јули, 2018 - 16:48 (META) 

Роберт Поповски, министерот задолжен за комуникации, отчетност и транспарентост, по многуте реакции во јавноста и социјалните мрежи за водењето на истрагата за убиството на 21-годишниот скопјанец Никола Саздовски, кој на 29 јуни беше брутално претепан на автобуска постојка во Автокоманда и вчера почина, порача дека јавноста е навреме информирана за истрагата за случајот.

Поповски, во соопштението, изразувајќи го сочувството на Владата до семејството на починатото момче, апелира да не се користи говор на омраза и да не се потпалува насилство.

„Во случајот со младиот Никола Саздовски, чијшто живот за жал згасна прерано, јавноста е целосно и навремено информирана за активностите кои ги преземаа и се уште ги преземаат сите владини надлежни институции. Не постојат информации или какви било податоци кои се прикриваат или не се достапни за медиумите и граѓаните. Министерството за внатрешни работи веднаш по несаканиот инцидент за настанот објави информација во дневниот билтен, а во наредните денови беа приведени и двајца од тројцата сторители“, порачува Поповски.

Тој во името на Владата ги повика сите државни институции „да ја завршат постапката во однос на случајот транспарентно и со целосна посветеност во интерес на правдата“.


Владата ги повика граѓанските организации внимателно да ги следат сите јавни набавки


Скопје, 20 јуни, 2018 - 11:00 (META) 

Ги повикуваме сите граѓански организации внимателно да ги следат сите постапки на јавните набавки, со една цел, колку што е можно повеќе да ги отстраниме сите сомнежи како се прават постапките, рече министерот задолжен за комуникации, отчетност и транспарентност, Роберт Поповски, на денешната прес-конференција, на која, со министерот за здравство, Венко Филипче, генералниот директор на ЕЛЕМ, Драган Миновски и директорот на Службата за општи и заеднички работи на Владата, Пеце Мирчевски ги повикаа граѓанските организации внимателно да ги следат сите јавни набавки на државните органи.

– Ги повикуваме граѓанските организации што имаат експертиза за тоа, медиумите и граѓаните, внимателно да ги следат сите набавки. Целта е да се следи како се трошат парите на граѓаните и граѓанските организации ќе имаат можност да се вклучат од самиот почеток на постапката се до склучување на договорите – рече Поповски.

Министерот за здравство Венко Филипче, рече дека сите заинтересирани граѓански здруженија ќе имаат можност за увид од почнување на тендерската постапка, па се до склучување на договорите во министерството за здравство. Дополнително, тие ќе може да присуствуваат на сендиците на комисиите за јавни набавки.

– Во следниот период Министерството за здравство, во соработка со експерти од невладиниот сектор, ќе изврши анализа на ризиците од корупција во јавните набавки во Министерството за здравство. Со увид на ризик-факторите при процес на јавните набавки, ќе се намали и ризикот од судирот на интереси, во насока на спречување на непотизам и блиски релации со компании пријатели. Се прават анализи и за промена во самите тендерски постапки. Се проценуваат потребните количини за набавка на лекови, за да се намали потребата од интервентен увоз на лекови, но се прават и обиди за заштеда од неколку милиони евра со систем на централизирани набавки – изјави Филипче.

Генералниот директор на ЕЛЕМ, Драган Миновски исто така рече дека компанијата е целосно отворена за увид во тендерските постапка од почеток до крај, па дури и во оние фази за кои постои доверливост во постапката.

– Имавме состанок со неколку невладини организации и сме максимално отворени за бараните податоци. Подготвени сме на партнерски однос, заштита на доверливоста за неизнесување на податоци на трети страни за да не се наштети на постапката – рече Миновски.

Директорот на Службата за општи и заеднички работи на Владата, Пеце Мирчевски рече дека оваа служба ги отвора вратите за граѓаните да ги мониторираат јавните набавки.

– Нема место за провизии и приоритетни добавувачи. Сите тендерски договори ги објавуваме пред очите на јавноста – рече Мирчевкси.


Форум за справување со дезинформации денеска ќе се одржи во Велес


Велес, 19 јуни, 2018 - 9:56 (META) 

Денеска во Велес ќе се одржи Форум за јавни политики на тема „Справување со дезинформациите – комбиниран пристап на властите, граѓанското општество и медиумите за долгорочни решенија“, во големата сала на Општина Велес со почеток во 10 часот.

„На Форумот, во одделни панел дискусии, ќе се обратат Роберт Поповски – министер задолжен за комуникации, транспарентност и отчетност,  Дамјан Манчевски – министер за информатичко општество и администрација, Аце Коцевски – градоначалник на Општина Велес, Едвард Гонзалес – директор на канцеларијата на УСАИД за општ развој, пратеници и претставници на политичките партии, како и стручњаци од областа и претставници на новинарски и медиумски организации“, соопштуваат од Влада.

Темите на кои ќе се разговара се феноменот на дезинформирање неговото потекло и развој како и што можат да преземат властите, медиумите, граѓанското општество и политичките партии во борбата против дезинформациите.


Спасовски: Не се расчистени 15 случаи на напади врз новинари


Скопје, 29 мај, 2018 - 16:07 (META) 

Петнаесет случаи за напади врз новинари сѐ уште не расчистени, соопшти министерот за внатрешни работи Оливер Спасовски денеска на прес-конференција во владата.

– Во последните неколку години имавме бројни напади на новинари. МВР направи анализа за да се утврди на кое ниво се истрагите досега. Се утврди дека во одредени постапки пропуштени се дејствија кои требало да бидат направени во краток рок, во некои постапки недостасуваат докази. Од 2013 до јуни 2017 до МВР се поднесени 47 пријави кои се однесуваат на физички напад на новинари или говор на омраза. Во Скопје се 29, во Охрид 14, две во Струмица, и во Штип и во Битола по еден – рече Спасовски.

Во периодот од 2017 до денес, до МВР се поднесени 12 пријави за напади врз новинари, од кои пет се во Охрид, четири се во Скопје, два во Велес и еден во Штип.

– Постапувано е во сите случаи и за две лица веќе се поднесени кривични пријави за сторени кривични дела насилство и загрозување на сигурноста, во три случаи се покренати прекршочни постапки против шест лица за констатирани три прекршоци – рече Спасовски.

Тој истакна дека сега заживува функционирањето на внатрешната контрола на МВР, која претходно прогледувала низ прсти.

– Апелирам до сите што доживеале објективен напад, како омаловажување или навреда да го пријават во полиција на 192 каде сѐ се снима и има траг. Не се пријавува на „Фејсбук“ – рече Спасовски.

Министерот за транспарентност, отчетност и комуникација, Роберт Поповски потенцираше дека ќе има нула толеранција за загрозување на слободата на изразување.

– Нула толеранција за каков било обид за загрозување на слободата на изразување. Секој напад врз медиумските претставници, физички или вербален, ќе биде најостро санкциониран – порача Поповски.


Поповски: По 10 години, конечно повеќе критички текстови од пофалби во медиумите


Скопје, 3 мај, 2018 - 13:36 (META) 

По 10 години има повеќе критички текстови отколку пофалби во медиумскиот простор, порача денеска министерот без ресор задолжен за комуникации, отчетност и транспарентност, Роберт Поповски, на редовната владина прес-конференција.

– Го одбележуваме овој ден на медиумите, во демократска, слободна и европски ориентирана Република Македонија. За прв пат, после 10 години, ќе има можеби повеќе критички текстови од пофалби, укажувања, сугерирања за медиумските слободи и права, како што секојдневно има изминативе 10-тина месеци, за секое прашање од важност и интерес за граѓаните. Денеска има гласност, наспроти молк – рече Поповски.

Тој констатираше дека „професионалните и независни медиуми се гласот на граѓаните во секоја демократска држава“.

– Оваа отворена и демократска Влада го слуша гласот на своите граѓани за да се подобрува во раководењето на државата и никогаш да не скршне од зацртаните приоритети. Затоа на врвот на политичката агенда на Владата е концептот на отворена влада, којшто подразбира демократизација на медиумскиот амбиент, односно поддршка на слободно и професионално новинарство, активна транспарентност и пристапност – рече Поповски.

Тој ја повика опозицијата да даде поддршка за Законот за аудио и аудиовизуелни медумски услуги со што би се отпочнале реформите во медиумската индустрија во Македонија. Истовремено, ги обвини пратениците од опозицијата кои претседаваат со Комисијата за транспорт и врски, дека на двапати без образложение ја одложиле седницата на која треба да се дискутира за Законот за АВМУ.

Министерот за комуникации, отчетност и транспарентност ги повика сопствениците на медиумите да ја подобрат положбата на новинарите, зголемувајќи ги платите и сигурноста на работните места.

– Сакам да ве уверам дека заедно со вас, од новинарската заедница, согласни сме, треба да се промени и економската ситуација на новинарите во Македонија и да се осигураат вашите
работни места и повисоки плати. Апелирамe кон сопствениците на медиумите да ги следат политиките на пораст на платите – рече Поповски.


Поповски: Ќе се обидеме Велес да стане синоним на борбата со лажните вести


Скопје, 19 април, 2018 - 16:03 (META) 

На панелот „Медиумите во дигиталната ера: Борбата против лажните вести“ на Дигиталниот самит кој денес завршува во Скопје, министерот за комуникации, отчетност и транспарентност, Роберт Поповски, рече дека Велес, за жал, станал синоним на лажните вести.

– Ние ќе се обидеме Велес да стане синоним на борбата со лажните вести не само во тој град, туку и во Македонија – рече Поповски.

Според него, Велес не ги измислил лажните вести, туку „луѓе од Велес добро заработиле креирајќи лажни вести кои влијаеле на изборите во една огромна држава“.

Поповски говореше и за слободата на медиумите и генерално за слободата на говорот во Македонија.

– Минатата власт ги злоупореби сите алатки за да искриви вистината, беа креирани медиуми кои пласираа лажни вести. Лагите беа драматични. Беше тешко да се тужи портал, измислија форма на кајрони во турските серии. Надаполнување на лагите беше и ширењето на говорт на омраза – составен дел на лагите. Омразата беше форсирана во медиумите. Кога дојдовме на власт на лагата и ја спротивставивме вистината. Претходната власт ги криеше информациите. ние сега ги објавуваме – рече Поповски.


СЕММ: Министерот Поповски неосновано критикува


Скопје, 13 април, 2018 - 11:33 (META) 

Советот за етика во медиумите на Македонија (СЕММ) реагира на, како што вели, неоснованата критика на министерот без ресор задолжен за комуникации, отчетност и транспарентност, Роберт Поповски, околу ажурноста на СЕММ во обработката на поднесена претставка од неговиот кабинет за содржина објавена на порталот „ДоказМ“.

Поповски на вчерашната јавна расправа на Комисијата за транспорт, врски и екологија за Предлог – законот за изменување и дополнување на Законот за аудио и аудиовизуелни медиумски услуги, истакна дека Советот реагирал ненавремено, односно дека одговорот за овој случај доцнел месец и половина и дека тој самиот го потсетувал СЕММ да го забрза процесот на донесување одлука по поднесената жалба.

„Негирајќи ги овие искази, СЕММ потсетува дека жалба од Кабинетот на министерот без ресор задолжен за комуникации, отчетност и транспарентност официјално доби на 25.02.2018 година, по што, според Правилникот за работа на Комисијата за жалби, доставено е барање за одговор до засегнатиот портал. По истекот на рокот за одговор од 7 работни дена, односно на 07.03.2018 година, Комисијата за жалби одржа седница на 09.03.2018 година, а нејзината одлука е објавена на 12.03.2018 година.


ВМРО-ДПМНЕ: Наводната транспарентност не го прикрива криминалот на функционерите


Скопје, 21 март, 2018 - 16:06 (META) 

Доколку сакаат каква било споредба со власта на ВМРО-ДПМНЕ од 2014 година не треба да кријат од јавноста дека тогаш во време на економска и политичка криза, ВМРО-ДПМНЕ обезбеди раст на економијата од 2,9 проценти, се вели во реакцијата на партијата на прес-конференцијата на министерот за комуникации, транспарентност и отчетност, Роберт Поповски.

Од таму додаваат дека „оваа власт има најниско ниво на реализација на капитални инвестиции.“

„Ниту една бледа прес конференција за наводна транспарентност, не може да ја прикрие информацијата дека двајцата функционери за кои Заев тврдеше дека има сомненија за криминал, се уште се заштитени. Празни прес-конференции не помагаат за да се покријат ветувањата за просечна плата од 30.000 денари и повисоки пензии“, се вели во соопштението.


Поповски презентираше алатка за отчетност: Потрошивме двојно помалку од претходниците


Скопје, 21 март, 2018 - 13:15 (META) 

Помалку од двојно државни пари потрошиле функционерите на оваа влада во првите шест месеци од стапувањето на функцијата, во однос на функционерите на претходната влада по преземањето на функциите во 2014 година, информираше денеска министерот за комуникации, транспарентност и отчетност Роберт Поповски.

Анализата на софтверот (vlada.mk/otchetnost-troshoci), кој претставува Алатка отчетност за трошоците, покажува дека 60 функционери во Владата предводени од Зоран Заев за шест месеци (1 јуни -1 декември 2017), вкупно потрошиле 21.890.462 денари (355.942 евра), а владата на Никола Груевски за период од (1 јуни-1 декември 2014) година потрошила 44.909.835 денари (730.242 евра)

– Поединечно, Никола Груевски како тогашен премиер потрошил 5.183.102 денари (84.278 евра) во период кога од дома ги креираше и ги диктираше политиките. Премиерот Зоран Заев во првите шест месеци од владеењето со динамична меѓународна агенда потрошил 2.918. 932 денари (47.462 евра). Тогашниот министер за транспорт и врски, Миле Јанакиески потрошил 1.753.132 денари, додека сегашниот министер Горан Сугарески ,77.972 денари. Тогашниот министер за финансии, Зоран Ставрески во тој период потрошил 2.619.357 денари, а сегашниот Драган Тевдовски 583.170 денари – изјави Поповски.

Поповски апелираше сите функционери кои користат државни пари во работењето, односно од локална самоуправа, пратеници, обвинителство да го следат овој пример и да објавуваат како ги трошат парите на граѓаните.

– Посебно сакам да апелирам на користење на наративниот дел од софтверот, во кој треба текстуално да се опише за што биле потрошени парите. Претставуваше сериозна тешкотија да се убедат луѓето од администрацијата да ги дадат податоците, посебно за периодот од 2014 година. Овие бројки веруваме дека се прецизни, можеби се случиле отстапки затоа што некои информации недостасуваат – објасни Поповски.

Тој додаде дека за сите овие функционери, следниот извештај ќе биде објавен на 31 мај годинава, кога ќе истечат вторите шест месеци од работењето. Очекува дека во иднина, податоците ќе се апдејтираат на месечно ниво.


Селмани до Поповски: Врзете си ги кучињата пред да биде предоцна


Скопје, 12 март, 2018 - 13:50 (META) 

Неколку десетици новинари денеска напладне излегоа на протест пред Владата за да побараат да се преземат мерки за заканите и навредите кои функционерот на ДУИ, Бекир Асани, му ги упати на претседателот на здружението на новинари, Насер Селмани.

На протестот, Селмани рече дека новинарите постојано се изложени на закани и притисоци и побара да се преземат мерки да се замолчат насилнциите.

– Не прифаќаме објаснување дека во владата има добри и лоши дечки затоа што владата е влада на Македонија. Не прифаќаме во Македонија да постојат две влади. Ние даноци плаќаме на оваа влада. Не е време владата да пишува осуди, тоа не е доволно и оваа влада има обврска да ги замолчи насилниците. Ако сега молчиме, ако моите колеги бидат замолчени, да знаете дека вие сте на ред, дека ќе дојдат утре по вас. Сакам да ве повикам да бидете будни затоа што еден режим што испративме и нема да дозволиме да се формира нов. Не им се плашам, не му се плашев на Никола Груевски кога неговите силеџии му се закануваа на моето семејство, не им се плашам на насилниците на ДУИ и на оние кои што молчат и седат во иста влада со нив – рече Селмани.

На почетокот на протестот пред владата дојдоа и министерот задолжен за комуникации, отчетност и транспарентност, Роберт Поповски, одговорниот за прес-тимот на владата, Зоран Бојаровски и владиниот портпарол, Миле Бошњаковски.

Поповски пред собраните новинари рече дека владата и сите партнери во владината коалиција изразуваат најостра осуда за сите напади врз новинари.

– Во име на владата и на сите партнери во владината коалиција изразуваме најостра осуда за сите напади врз новинарите што се случуваат. Ве уверувам дека оваа влада има нула толеранција за било какви закани, уцени и притисоци врз новинарите. Бидете уверени дека никој нема да биде заштитен – рече Поповски.

На ова реагираше Селмани кој му порача на Поповски „да си ги врзат кучињата“.

– Очигледно вие не правите доволно тој човек да се смири, затоа ви кажувам – врзете ги кучињата! Тоа се ваши кучиња, тие луѓе се дел од вашата коалиција, нема оправдување за ова. Тие мора да бидат врзани да не касаат затоа што кога ќе касаат ќе биде доцна– потенцираше Селмани.

Новинарите на протестот побараа да се обезбеди полициска заштита на претседателот на ЗНМ, Селмани и потенцираа дека нападот врз него е напад на сите новинари.