Алаѓозовски: Повлечени 10 проекти од Годишната програма за култура за 2018


Скопје, 16 април, 2018 - 11:34 (META) 

Десет проекти од Годишната програма на Министерството за култура за 2018 година со вкупна вредност од осум милиони и 500.000 денари се повлечени по ревизијата на Комисијата од Министерството, информираше денеска министерот за култура Роберт Алаѓозовски при посетата на затворот Шутка.

– Во овој момент комисиите ги разгледуваат и одлучуваат по однос на приговорите. Начинот на којшто ќе можеме да одговориме на приговорите ќе зависи од достапните средства што ќе ги имаме на располагање – рече Алаѓозовски на новинарско прашање за проектите од Годишната програма за кои имаше реакции во јавноста и за кои беше побарана ревизија.

Во однос на најавата на градоначалникот на општина Центар Саша Богдановиќ за отстранување на четири споменици, министерот рече дека тоа е работа на општината и дека се работи за споменици од проектот Скопје 2014.


Алaѓозовски: Трошоците се од бифето на Министерството за вода и кафе за сите гости


Скопје, 26 март, 2018 - 14:08 (META) 

Министерот за култура, Роберт Алаѓозовски, вели дека неговите лични трошоци за шестте месеци додека е министер, не надминуваат 6.000 денари месечно. Како што изјави тој денеска, дезинформација е веста дека потрошил речиси 9.000 евра за угостителски услуги. Тој посочи дека во наведениот износ не се издвоени неговите лични трошоци.

– Расчленетите ставки од алатката за транспарентност беа прикажани како групен трошок и сите беа поднесени под графата: трошења во кафеани. Во алатката за транспарентност има три типа на трошоци – угостителски услуги во странство, угостителски услуги надвор од Министерството за култура и беа прикажани трошоците направени во бифето на Министерството за култура. Во бифето не постои исхрана, туку само пијалаци. Во таа смисла, постои спецификација и административните службеници имаат направено превид што ги немаат издвоено личните трошоци на министерот од кумулираните трошоци во рамки на Министерството за култура – рече Алаѓозовски.

Тој појасни дека трошоците биле направени генерално за кафиња и вода а не, како што рече, „за тајни сметки во ексклузивни ресторани и во хотели во странство“.

Поради ова недоразбирање во јавноста, рече Алаѓозовски, во Министерството за култура ќе воведат построг правилник за користење на безалкохолните пијалаци со цел и износот на таа фактура да биде понизок.


Алаѓозовски демантира дека ноќеска требал да се отстрани споменикот Воин на коњ


Скопје, 22 март, 2018 - 13:04 (META) 

Министерот за култура Роберт Алаѓозовски ги оцени како шпекулации информациите дека ноќеска требало да биде отстранет споменикот Воин на коњ на централниот плоштад во Скопје.

– Немаме активна постапка за отстранување друг споменик освен оној по кој беше постапено (Андон Јанев – Ќосето). Така што, шпекулации се тврдењата и бранувања во јавноста дека ќе отстрануваме некој следен споменик – изјави денеска Алаѓозовски по потпишувањето договор за донација од турската агенција ТИКА за Националниот конзерваторски центар.

Посочи дека тие одлуки ги носат трезвено и по долга анализа и дека работните групи за проектот Скопје 2014 досега имале изработено неколку елаборати.

– Во моментот кога тие ги предаваат своите елаборати во Министерството, ние понатаму сме во координација со другите надлежни институции кои произлегуваат од предлог заклучоците или од она што е напишано во елаборатите и постапуваме понатаму. Во таа смисла, понекогаш ги контактираме и Јавното обвинителство, Финансиската полиција, Специјалното јавно обвинителство, како и Општина Центар или Град Скопје доколку и тие на некој начин имаат надлежност во однос на елаборатите и се координираме – проверуваме дали се прекршени законите, дали има други прекршувања на законите. Сето тоа бара време, а понекогаш е потребно да се направат дополнителни елаборати во однос на специфична област – рече Алаѓозовски.

Елаборатот за споменикот Воин на коњ, рече дека им е пристигнат пред повеќе од два месеца и е препратен до сите надлежни институции што ги посочи, додавајќи дека понатаму ќе постапуваат инспекторите од тие органи.


Синдикатот на културата и Алаѓозовски се жалат на лошите закони на претходната власт


Скопје, 7 март, 2018 - 15:10 (META) 

На две прес-конференции денеска, Синдикатот на културата и министерот за култура Роберт Алаѓозовски, се пожалија на „лошите закони од претходната власт“. Синдикатот на културата се пожали и дека новата власт во изминативе месеци се уште не променила ништо во однос на тие закони, а нејзината намера да спроведува некои законски одредби само ќе ги продлабочи проблемите на вработените во културата.

Претставниците на синдикатот побараа Министерството за култура посилно да се ангажира во подготвување нов закон за култура, а во неговото пишување да бидат вклучени и и претставници на синдикати и носителите на дејност. Сегашниот, велат тие, уметниците и културни работници ги става во ригидна административна рамка, кој ја ограничила слободата на творење и претставува пример за легална закана од страна на работодавецот и отвора простор за партиски притисок и манипулација.

Беше побарано и Министерство за информатичко општество и администрација да го пролонгира рокот, кој сега е крајот на март, за изготвување на систематизации и за доделувања решенија за распределување на вработените, а Министерството за финансии да одобри средства за порамнување на платите во различните дејности на културата.

Министерот Алаѓозовски изјавувајќи дека е свесен оти формулацијата „даватели на услуги“ е понижувачка, рече дека законот мора да се почитува, но Министерството за култура е подготвено да изнајде решение.

– Предложивме да се употребува терминот „носител на дејност“ наместо „давател на услуги“,  како времено, техничко решение за издавање на решенијата и нивно евидентирање во електронскиот систем на МИОА – рече Алаѓозовски.


Карневалот во Вевчани со маски за загадувањето и за трошоците на пратениците


Вевчани, 13 јануари, 2018 - 18:10 (META) 

Во Вевчани со карневалската поворка која тргна во 14 часот денеска почна традиционалниот карневал кој датира 1.400 години наназад. Одбележувањето ќе заврши утре со спалувањето на маските и честитки за Стара нова година.

Општествено политичките случувања кај нас и во светот и годинава беа инспирација за василичарите да имаат креативни и критички маски во дефилето. Колоритните маски продефилираа низ Горна и Долна маала, а покрај традиционалните Глупав Август, ѓаволите, музикантите, зетот и невестата, забележани беа „Скопје 2025“ за загаденоста во главниот град, но имаше и карневалска група што ги исмејуваше народните избраници и нивните паушали за патни трошоци, за двојазичноста, случувањата во Собранието, правата на ЛГБТ заедницата…

Вевчанскиот карневал привлече голем број туристи од земјава, но имаше посетители од Србија, Бугарија, Турција. Покрај бројните туристи кои допатуваа во Вевчани беа присутни политичари и дипломати од странските амбасади.

На свеченото прогласување на карневалот за беше и министерот за култура Роберт Алаѓозовски, кој рече дека е првпат на вевчанскиот карневал, и приватно и професионално.

– Вевчани и карневалот се носители на отпорот и на традицијата, на демократската борба и на критичноста, на слободоумноста и на креативноста. Тие резонираат и со новите владини политики. . Креативни се отворени и го шират принципот за кој се залагаме демократизација на културата и општеството, освојување на нови хоризонти на критичната култура – рече Алаѓозовски.


Кривична пријава против поранешната директорка на Завод и музеј од Охрид


Охрид, 16 декември, 2017 - 14:02 (META) 

Заводот и музеј Охрид поднесе кривична пријава против поранешната директорка Тања Паскали – Бунташеска, која поради неспроведување на судска одлука за уривање на потпорните ѕидови до музејскиот комплекс „Куќа на Робевци“ меѓу установата и еден од соседите нанела голема финансиска штета врз буџетот на Македониј во износ од околу 123.000 евра, соопшти министерот за култура Роберт Алаѓозовски.

Тој истакна дека судска постапка која се водела пред Основниот суд – Охрид уште од 2008 година, а постапка завршила со правосилна пресуда за вознемирување на правото на сопственост на тужителот од страна на тужениот Завод и Музеј – Охрид во декември 2009 година. Со пресудата, Завод и Музеј – Охрид бил задолжен да отстрани делови од градби – ѕидови од парцелата на тужителот.

– Но, поранешната директорка на Завод и Музеј – Охрид не го сторила тоа, а тужителот повел постапка за изрекување на судски пенали заради неизвршување на пресудата од декември 2009 година. Постапката завршила со пресуда на Апелациониот суд – Битола, со која биле изречени судски пенали во висина од 3.000 денари дневно – рече Алаѓозовски.

Тој додаде дека и покрај ваквото задолжение со дневни судски пенали, Паскали – Бунташеска не пристапила кон рушење на ѕидовите по судската пресуда, со што би се избегнало плаќањето на дневните пенали.

– Како последица од ова непостапување, се насобрале судски пенали во износ од 2.322.290 денари, што е повеќе од 700 денови доцнење со извршувањето на пресудата. Оваа сума, која им е исплатена на тужителите, е директна штета на установата и на буџетот на РМ. За жал, овде не се запрело. Поранешната директорка на Завод и Музеј – Охрид продолжила со неизвршување на судската пресуда. Неизвршувањето траело уште неколку години и сето ова се криело како од министерството, така и од сегашната в.д директорка при примопредавањето на должноста, на 24 јули оваа година. Тужителите на 24.10.2017 година, повторно на истиот начин, преку извршител, по истата пресуда од 2009 година, за дневни пенали ја блокираа сметката на Завод и Музеј – Охрид. Овој пат, сумата на налогот за извршување е во износ од 5.239.217 денари, што претставува повеќе од 1.700 денови или повеќе од 4 години неизвршување на пресудата – рече Алаѓозовски, додавајќи дека судската пресуда е конечно исполнета на 05 декември годинава.


МНТ и Археолошкиот музеј се поплавија, Алаѓозовски најави тужби за изведувачите


Скопје, 2 декември, 2017 - 15:35 (META) 

Министерот за култура, Роберт Алаѓозовски, рече дека новите објекти на Македонскиот народен театар и на Археолошкиот музеј ги имаат истите проблеми како и објектите изградени пред 60 години. Тој додаде дека поради врнежливото време, покривот на МНТ протекува.

– Поради силниот ветер, се откина дел од лимениот покрив на Центарот за култура во Штип. Ситуацијата дополнително се комплицира затоа што е на крај на фискална година и дури и тендери за итни работи не може да се спроведат до крајот на годината – изјави Алаѓозовски по денешниот увид во состојбата на објектот на МНТ.

Тој побара одговорност од изведувачите, надзорните органи и од стручните служби и упати апел до компаниите за да помогнат со донации или да интервенираат во институциите.

– Ќе утврдиме кој и зошто не ги извел квалитетно работите и ќе поднесеме тужби – изјави Алаѓозовски.


Владата ќе одлучува што со „Воинот на коњ“, „Ќосето“ и „Мајка Тереза“


Скопје, 13 ноември, 2017 - 13:27 (META) 

Министерството за култура ги добило од работната група првите елаборати за спомениците на Андон Јанев – Ќосето кај коплексот судови, на „Мајка Тереза“ и за „Воин на коњ“ на плоштад „Македонија“, соопшти министерот за култура, Роберт Алаѓозовски, кој денеска учествуваше на конференцијата за програмата на Европската Унија „Креативна Европа“.

Елаборатите, како што изјави Алаѓозовски, ќе бидат проследени до Владата, која ќе одлучи што понатаму со нив.

– Дел од елаборатите се подготвени и ги разгледуваме надлежностите на институциите на локално и на централно ниво за овие објекти – рече министерот за култура, кој појасни дека процедурите се толку згрешени што е сложено да се отплетка кој е надлежен да преземе активности во однос на овие објекти поставени во Скопје.

Алаѓозовски изјави дека културното наследство не само што не било соодветно третирано, туку дека било и злоупотребено.

– Многу актуелни градби, како скулптуралната композиција која носи чуден наслов „Мајка Тереза“ беше погрешно финансирана од програмата за културно наследство, иако таму нема никакво културно наследство. Истото се однесува и за спорните градби на Плаошник. Ние ќе го заштитиме вистинско културно наследство. Обезбедивме средства за манастирот Трескавец, обезбедивме средстав за Офицерскиот дом, ќе обезбедиме средства и за нашето најзагрозено културно наследство – рече Алаѓозовски, додавајќи дека нема да се дозволи проектот „Скопје 2014“ да продолжи и да повлекува финансиски средства.


Распишани годишните конкурси за културни проекти од национален интерес


Скопје, 30 септември, 2017 - 14:48 (META) 

Министерството за култура денеска ги распиша годишните конкурси за финансирање на проекти од национален интерес во културата за 2018 година. Тие се отворени до 15 ноември, резултатите ќе бидат објавени околу Нова година, а за поддршка и за помош на заинтересираните корисници ќе бидат организирани и инфосесии во наредните 45 дена.

Министерот Роберт Алаѓозовски на прес-конференција рече дека ја исполниле целта конкурсот да го објават во септември, кога е законскиот рок, но во исто време успеале значајно да ги редизајнираат конкурсните документи. Тие се во согласност со критериумите и приоритетите на новата стратегија за култура, која е се уште во јавна расправа.

– Бидејќи овој повик за годишна програма се објавува сега, а треба да опфати проекти дури до крајот на годината, веројатнио ќе го дополниме со уште еден отворен повик кој ќе трае во текот на целата година со т.н. ад хок повици за сите кои имаат поитни проекти да може да изреагираат – рече тој.

Конкурсите се наменети за физички лица кои се државјани на Република Македонија и за правни лица од областа на културата. На нив не може да се пријавуваат националните установи, кои се финансирани преку нивните годишни програми за кои постои посебен повик.


Алаѓозовски: „Скопје 2014“ е како вирус што прво треба да се стави во карантин


Скопје, 18 септември, 2017 - 16:21 (META) 

Проектот „Скопје 2014“ го сметаме како еден вид вирус што прво треба да го ставиме во карантин, да го третираме изолирано, па откако ќе направиме одлуки што понатаму со овој проект, може, евентуално, да го планираме во идниот развој, изјави денеска министерот за култура, Роберт Алаѓозовски, на прес-конференција за првите 100 дена од мандатот на Владата.

Тој информираше дека петчлена работна група во Министерството за култура го анализира проектот и ќе му пристапи во фази и по приоритети. За некои споменици и објекти кои се најспорни и за кои има реакции и од јавноста, веќе има првични предлози како да се решат, но ќе ги разгледа и за нив ќе одлучи Владата.

– Тоа е споменикот на Андон Јанев Ќосето, како и на проектите кои се во различни фази на изградба, со што сè уште се создаваат финансиски импликации врз државниот буџет. Поради комплексноста на какви било интервенции на дел од објектите, се договоривме работната група да изготви повеќе можни сценарија за некои од нив, а Владата да донесе одлука што конкретно и поединечно со овие проекти – рече Алаѓозовски.

На новинарско прашање за Музејот на вода во Охрид, кој е во надлежност на Завод и музеј – Охрид, Алаѓозовски одговори дека новиот состав на Национална комисија на УНЕСКО ќе го разгледа и проблемот со состојбата на овој музеј, во рамки на решавањето на севкупниот проблем со загрозеноста на статусот на Охрид, како дел од листата на УНЕСКО.