Волци што одат „по риба“ – буквално (видео)


Национален парк „Војажер“, 16 декември, 2018 - 13:04 (META) 

Тим биолози во американската држава Минесота направиле снимки на волци кои скокаат во вода и ловат риби од поток.

Првите вакви снимки на волци беа објавени деновиве на страницата на Фејсбук на Националниот парк „Војажер“ и се резултат на повеќегодишен проект кој опфаќа следење на движењето на волците со ГПС-околувратници.

Откритието на тимот предводено од докторантот Томас Гејбл е објавено преку труд во научното списание Mammalian Biology („Биологија на цицачите“).

Тие забележале дека една  од глутниците во националниот парк поминува многу време покрај еден поток. Истражувајќи на локацијата, забележале дека волците во текот на ноќта стојат на брегот и повремено скокаат во водата откако ќе слушнат звуци на прскање. Кога поставиле камери за ноќно снимање утврдиле дека волците според звуците го откриваат присуството на риби кои ги ловат и потоа ги јадат на брегот.

„Може да видите како волците одеднаш скокаат во водата неколку пати откако слушаат плискање – научиле дека звукот е поврзан со рибите и знаат дека значи храна“ – изјавил истражувачот Том Гејбл за Њујорк Тајмс на 14 декември.

Волците обично се поврзуваат со лов на копнени животни и до сега само во многу ретки случаи е забележено дека ловат риби во приморски подрачја. Такви случаи имало во Аљаска и канадска Британска Колумбија, при мрестењето на лососите.

Според научниот труд, волците од Националниот парк „Војажер“ во Минесота ловат слатководни риби како штуки и бели чистачи. Истото истражување открило дека ова група волци, во недостаток на вообичаен плен како што се елените, јадат боровинки и ловат дабари.

Професорот Џозеф Бамп од Универзитетот од Минесота, специјалист за истражување на дивиот свет, изјавил дека ова ново однесување не е целосно изненадувачко, со оглед на тоа што волците се исклучително адаптибилни во поглед на барање храна.


МЗШВ: Започнати се постапки за доделување на концесии за повеќе риболовни води


Скопје, 18 јули, 2018 - 12:41 (META) 

Владата на вчерашната седница донесе одлуки за започнување на постапки за доделување на рибите по пат на концесија за повеќе риболовни води, информираат од Министерство за земјоделство, шумарство и водостопанство (МЗШВ).

„Започнатите постапки за доделување концесии на рибите за органзирање рекреативен риболов се однесуваат на рекреативните зони на Охридското и Дојранското езеро, риболовните ревири Црна Река 1 – Демир Хисарски, Црн Дрим 2, Злетовска Река, Треска 1 – Кичевски и aкумулација Матка, а за вршење стопански риболов на риболовните подрачја Охридско и Дојранско езеро“, се вели во соопштението на МЗШВ.

Во него се додава дека риболовната основа за риболовнта вода Охридско Езеро во почетокот на 2018 година е изменета во правец на целосна заштита и одржливо користење на рибите во езерото.

„Конкретно, направени се измени во делот на утврдување на периодот на мрест и времето во кое е дозволен риболовот и детално се уредени специфичните локации на мрест на рибите, особено за охридската пастрмка, охридската белвица и крапот. Исто така, заради одржување на популацијата намалени се количините на дозволен улов на видот охридска белвица. Направени се измени кои ги задоволуваат потребите на рекреативните риболовци, а со тоа и развојот на риболовниот туризам“, велат од МЗШВ.


Спортските риболовци алармираат дека охридската пастрмка безмилосно се уништува


Охрид, 27 март, 2017 - 13:12 (META) 

Спортските риболовци од Здружението на рекреативни риболовци „Свети Апостол Петар“ од Охрид алармираат за безмилосно уништување на охридска пастрмка и бараат конкретна одговорност.

„Бараме да се утврди одговорност кај надлежните установи и министерства и нивните раководни лица за уништување на охридска пастрмка и тие да бидат казнети согласно важечките закононски и подзаконски регулативи“, стои во нивната реакција.

Тие сметаат дека Пандорината кутија ја отворило барањето на концесионерот за стопански риболов на Охридско Езеро за мораториум на улов на охридска пастрмка од 10 години. Јавно ги прашуваат надлежните институции и министерства каде и како се потрошија неколку милиони евра за вештачки мрест и порибување на охридска пастрмка, затоа што нема никаков ефект за заштита на охридската пастрмка.

„Зошто секоја година државата го финансира вештачкиот мрест од 150 до 200 илјади евра од кои концесионерот зема околу 70 проценти, а нема обврска да порибува? На концесионерот државата му порибува а тој само ја лови риба и плус добива субвенции? Ваква концесија нема никаде во светот. Зошто надлежните научни институции изработија риболовни основи а надлежното министерство ги прифати и додели концесија за стопански риболов иако со години укажуваме дека тоа е катастрофална грешка. Она што и се случи на охридската пастрмка сега и се случува на охридската белвица. Ако на охридската пастрмка и се потребни околу 40 години за реанимација тогаш на охридската белвица и требаат повеќе од 60 години. Зошто надлежното министерство и научните институции од областа на рибарство дозволија измени и дополнувања на риболовните основи со кои на концесионерот за стопански риболов квотата на улов на охридска белвица од 2 тони му се зголеми на 8, а сега на 25 тони годишно, кога во истата риболовна основа пишува дека прирастот на охридска белвица на годишно ниво е 17 тони“, стои во дописот до медиумите.

Од здружението укажуваат дека на  концесионерот му е дозволено 6 пати да лови охридска белвица во строгата забрана (татиљ), што не било дозволно „ни во турско“, а најмалата дозволена големина за улов на охридска белвица од 35 сантиметри е намалена на 22 сантиметри, а бројот на мрежи е зголемен два пати.

– Ако концесионерот лови само 400 килограми охридска пастрмка за 5 години, тогаш од каде е охридската пастрмка која се продава по угостителски објекти и рибарници во Охрид, Струга и низ цела Македонија. На годишно ниво  во промет имаме најмалку 4 тони охридска пастрмка. Односно за 4 години најмалку 20 тони. Укажувавме дека со доделување на концесија за стопански риболов на Охридско Езеро само ќе го легализираме криволовот и шверцот на охридска пастрмка, но никој не не слушаше – вели Радован Димитриевски, претседател на Здружението на рекреативни риболовци „Свети Апостол Петар“ од Охрид.