!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Се зголемува откупот и продажбата на земјоделски производи


Скопје, 16 февруари, 2017 - 14:05 (META) 

Откупот и продажбата на земјоделски производи во четвртото тримесечје од 2016 година се зголемени за 39,3 проценти во споредба со истиот период од претходната година, објави Државниот завод за статистика.

Кај откупот на земјоделски производи од индивидуалните производители има зголемување за 65,4 проценти, а кај продажбата на земјоделски производи од сопствено производство намалување за 2,9 проценти.

Зголемување на откупот и продажбата на земјоделски производи има кај индустриските, градинарските и фуражните растенија, овошјето, добитокот, живината и јајцата и млечните производи, а намалување кај житата, грозјето, алкохолните пијалаци, млекото и рибата.


Албански државјанин шверцувал свежа риба на Ќафасан


Струга, 13 септември, 2016 - 14:01 (META) 

Царинска управа на Република Македонија открила и запленила 20 килограми свежа риба на граничниот премин Ќафасан, кај Струга.

Шверцуваната риба била откриена при контрола на албански автомобил, управуван од албански државјанин, пријавен за влез во земјата на граничниот премин на албанско-македонската граница.

Непријавените риби, пронајдени во две торби, кои биле сместени пред совозачкото седиште, се привремено здржани, а против возачот ќе биде поведена прекршочна постапка.


Паника кај рибарите и екологистите: кинески крап – толстолобик во водите на Охридско Езеро


Охрид, 28 јануари, 2016 - 10:36 (META) 

Во Охрид подолго време се зборува дека во водите на езерото егзистира некаков вид крап кој не е автохтон, а лаичкиот свет го нарекуваше кинески. Сега и научниците од Хидро-биолошкиот институт од Охрид, еколозите, како и рибарите од СРД „Св. Апостол Петар“ го кренаа гласот, алармирајќи за можните тешки последици по живиот свет и билошката рамнотежа.

Неавтохтон за Охридското Езеро крап од подвидот толстолобик, за кус период, бил уловен двапати: лани во декември на далјанот во Струга и деновиве во езерото на охридскиот дел, за време на риболовот за потребите на вештачкиот мрест. Доколку почне природно да се размножува, толстобикот може да предизвика сериозни последици врз автохтониот жив свет, предупредуваат познавачите.

За јавноста и за научниците нема сомнеж дека оваа риба доспеала до езерските води поради човечка негрижа и неодговорност. Граѓаните на Охрид би сакале да им веруваат на информациите дека од другата страна на езерото, во Поградец, Албанија, овој вид риба, вештачки се одгледува во тамошните рибници, од каде е можно да е префрлена во езерските води. Се тврди дека на локалниот пазар во Поградец се продава по цена од 150 денари за еден килограм.

Зоран Спиркоски од Хидро-биолошкиот институт во Охрид, чија специјалност е вештачкото оплодување и одгледување на пастрмката, вели дека човечкиот фактор, без сомнеж, е причината за ваквата појава.

– Појавата на рибата, во секој случај, е овозможена од човечки фактор. Некој ја внел во сливното подрачје на Охридско Езеро, најверојатно за одгледување во некои рибници и на тој начин преку водотеците дошла на места каде не треба да се наоѓа, во овој случај Охридско Езеро – вели Спиркоски.

Загрижени се и рекреативните риболовци.

Радован Димитриевски од СРД „Св. Апостол Петар“ предупредува дека во Македонија не се води доволно грижа за тоа каква сè риба се увезува и со што се порибуваат природните езера. Тој стравува дека Охридско Езеро може да го снајде судбината на Преспанско, каде исчезнуваат одредени автохтони видови риба.

– Неавтохтоните видови ќе го нарушат еколошкиот систем, кој е уникатен и треба да го зачуваме. По ова, веројатно ќе се појави и некој друг вид риба, бидејќи никој не води грижа со што сè се порибува во Македонија. Преспанско Езеро се пориби со неавтохтон вид крап, а со тоа е уништен преспанскиот крап – предупредува Димитриевски.

Инаку, кинескиот толстолобик во Македонија го има во Тиквешко и во Крушевско Езеро и во други акумулации, каде биле уловени примероци тешки до 20 килограми.


Од рибокрадци одземени рибарски мрежи, риба, опрема и риболовен алат


Охрид, 22 ноември, 2015 - 14:02 (META) 

Рибарски мрежи во вкупна должина од околу 2.000 метри, сто парчиња риба – охридска белвица, едно кајче и повеќе примероци од риболовен алат, прибор и друга опрема, се пронајдени и одземени при патроли на полициската станица за граничен надзор на Охридско Езеро.

Акциските контроли на езерската полиција се реализираа пред два дена, во соработка со инспектори од Државниот инспекторат за земјоделство, по целата должина на северо-западната езерска гранична линија, но и во другиот дел од територијалните води на езерскиот басен. Акциите беа координирани со полициски службеници од полициската станица за граничен надзор Франгово.

Во нелегален риболов затекнат е еден жител од струшкото крајезерско село Калишта, кој забележувајќи ја патролата, се обидел да побегне. Од неговиот чамец одземен е улов од риба – белвица и пастрмка, како и друга рибарска опрема.

Во водите на Охридско Езеро, во истиот регион, езерската патрола пронајде висечки рибарски мрежи кои се најстрого забранети за користење и за риболов.

За пронајдените риби и рибарска опрема, запознат е јавниот обвинител и подготвен е записник. Со потврда, целокупното количество риба и другите предмети се одземени.


Кулинарски специјалитет од Тајланд предизвикува рак на црниот дроб


Банкок, 14 јуни, 2015 - 15:00 (META) 

Тим научници и лекари од Тајланд се обидуваат да ги сменат навиките за исхрана на дел од населението во североисточниот дел од земјата, откако било откриено дека кулинарскиот специјалитет што го подготвуваат од свежа риба е главниот виновник за големата стапка на заболени од рак на црниот дроб, се вели во сторијата објавена од „Би-Би-Си“.

Јадењето кое се нарекува „кои плаа“ (koi plaa), жителите на посочениот регион го подготвуваат од мали риби, кои откако ситно ќе ги исечат, ги мешаат со локални треви, лимета и со живи црвени мравки. Специјалитетот го служат свеж, без да го готват.

Со децении кај дел од популацијата на североистокот на Тајланд биле констатирани екстремно високи стапки на заболување од рак на црниот дроб, кој кај мажите бил неколкупати повисок од светскиот просек.

Иако причината за тоа подолго време била поврзувана со воспаление на црниот дроб, предизвикан од паразити откриени во сировата риба, дури во последната децинија се прават напори за едукација на луѓето да ги сменат навиките на исхрана и, пред сè, да го готват „кои плаа“ за да ги убијат паразитите пред да ги изедат.

„Поврзаноста меѓу јадењето и високата стапка на заболувања ја проучуваме во нашите лабаратории повеќе од 30 години. Откривме дека паразитите во црниот дроб предизвикуваат реакција на имунолошкиот систем, кој доведува до воспаление, кое по повеќе години доведува до рак“, појаснува д-р Банчоб Срипа, од лабараторијата за испитување на тропски болести на Универзитетот „Кон Каен“.

Неговиот тим открил дека во некои заедници на североистокот на Тајланд, дури 80 отсто од луѓето биле инфицирани од овие паразити, дел од нив деца на четиригодишна возраст.

Според лекарите, ракот ретко се развива пред педесеттата година од животот, но кога ќе се појави, мали се шансите на пациентите да преживеат.


Запленети рибарски мрежи и риба кај струшко Калишта


Охрид, 21 март, 2015 - 14:35 (META) 

При патрола на полициската станица за граничен надзор, пронајдени се и одземени рибарски мрежи во должина од околу сто метри со 28 парчиња риба – охридска белвица, во водите на Охридско Езеро.

Мрежите, по консултација со јавниот обвинител и со надлежниот инспектор од Државниот инспекторат за земјоделство, како строго забранети за риболов, се подигнати заедно со уловот, соопшти портпаролот на СВР од Охрид, Стефан Димоски.

– Мрежите, како и улов од 28 парчиња риба, охридска белвица, се пронајдени, на 19 овој месец, околу 6 часот наутро, во близина на крајезерската населба Калишта на струшкото крајбрежје, на оддалеченост од околу 300 метри од брегот на езерото. Бидејќи овластениот концесионер во тој дел од Охридско Езеро не ги поставил рибарските мрежи, констатиран е прекршок од Законот за рибарство и аквакултура од непознати лица, по што мрежите во консултација со јавниот обвинител се подигнати за понатамошна постапка – рече Димоски.