!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Европскиот парламент денеска ќе гласа за резолуцијата за Македонија


Стразбур, 14 јуни, 2017 - 10:41 (META) 

Европскиот парламент (ЕП) денеска во Стразбур ќе гласа за резолуцијата за Република Македонија, која е препорака на парламентот поврзана со извештајот на Европската комисија за 2016 година.

За резолуцијата предложена од европратеникот Иво Вајгл од Словенија, инаку специјален известувач на ЕП за Македонија, се дебатираше на 5 април, а денеска се очекува нејзино изгласување во рамките на тридневната пленарна седница. На дневен ред на седницата се и резолуциите за Србија и за Косово, а ќе се решава и за други работи во надлежност на ЕП.

Се очекува гласањето да биде пред 15 часот.

Со оваа резолуција, која беше усвоена од Комисијата за надворешни работи на ЕП, се препорачува почнување на преговорите за членство на Република Македонија со Европската Унија.


Северна Кореја е непосредна воена закана, смета министерот за одбрана на САД


Сингапур, 3 јуни, 2017 - 12:01 (META) 

Северна Кореја забрзано развива ракета со нуклеарна боева глава која може да претставува закана за Соединетите Американски Држави и за други земји, изјави денеска американскиот министер за одбрана, Џејмс Матис, говорејќи на меѓународна конференција во Сингапур.

Министерот за одбрана на САД ја нарекол Северна Кореја „непосредна воена закана“, јавуваат светските агенции. Матис истакнал дека администрацијата на американскиот претседател Доналд Трамп е охрабрена од тоа што Кина повторно покажала посветеност на соработката со САД и со другите земји што би влијаело на тоа Пјонгјанг да ја напушти програмата за нуклеарно оружје.

Советот за безбедност на Обединетите нации (ОН) вчера усвои резолуција со која се воведуваат санкции против четири институции и 14 севернокорејски функционери, вклучувајќи го и функционерот за кого се верува дека е на чело на разузнавачките служби на земјата.

Текстот на документот што го предложија САД е усвоен едногласно, а резолуцијата ја поддржа и Кина.


Попоски учествуваше на конференција во Брисел посветена на Холокаустот


Брисел, 26 април, 2017 - 19:30 (META) 

Министерот за надворешни работи, Никола Попоски, денеска учествуваше на меѓународна конференција на тема „Незавршена правда: реституција и сеќавање“, посветена на жртвите од Холокаустот, која се одржа во Европскиот парламент во Брисел.

„Македонија веројатно е еден од најдобрите примери во регионот и во Европа, што во целост се има погрижено и за делот на враќање на имотите на Евреите, но исто така и за одржување на меморијата, на сеќавањето и на одржување на врската, за што го има изградено и еден од позначајните меморијални центри на Холокаустот во светот“, истакнал Попоски.

Во рамки на посетата, од Министерството за надворешни работи информираат дека Попоски во Брисел се сретнал со повеќе европратеници, во контекст на подготовката на резолуцијата на Европскиот парламент за Македонија.

„Надминувањето на политичката криза на одржлив начин е возможно само преку домашен дијалог во демократски институции, проследен со враќање на европската перспектива за Македонија“, нагласил Попоски.


Советот за безбедност на ОН се закани со нови санкции кон Пјонгјанг


Њујорк, 20 април, 2017 - 21:12 (META) 

Советот за безбедност на Обединетите нации вечерва ја усвои резолуцијата со која остро се осудуваат последните тестирања на ракети од страна на Северена Кореја и се закани со нови санкции кон Пјонгјанг, јавуваат светските агенции.

Со резолуцијата, која е усвоена едногласно, се осудува однесувањето и „илегалните активности“ на властите во Пјонгјанг, кои се повикуваат повеќе да не изведуваат нуклеарни проби и тестирањата на ракети, забранети со претходните резолуции на Советот за безбедност на ОН.

„Илегалните активности на Северна Кореја со нуклеарни и со балистички ракети во голема мера доведуваат до зголемување на тензиите во регионот и пошироко“, било наведено во резолуцијата.

Резолуцијата е усвоена по договор со Русија, која денеска демантираше дека го блокирала текстот, туку дека сакала во него да се вметне формулацијата „низ дијалог“, која претходно била исфрлена од документот на барање на САД.

Резолуцијата ја поддржала и Кина, која е сојузник на Северна Кореја.

Инаку, Пјонгјанг е под санкции на ОН од 2006 година.


СДСМ: ЕПП и Бундестагот јасно кажаа дека мора да се почитува парламентарното мнозинство


Скопје, 30 март, 2017 - 13:11 (META) 

„И Резолуцијата на Европската народна партија (ЕПП), како и заклучоците на германскиот Бундестаг во кои се вели дека мора да се почитува парламентарното мнозинство и дека нови избори не се опција, се јасни пораки до Груевски и до Иванов да престанат со непресметливото однесување, кое ги загрозува државните и националните интереси на Македонија и интересите на граѓаните“, се вели во соопштението на СДСМ.

Во него се додава дека Европската народна партија јасно стави до знаење дека не толерира корумпирани политичари и корупциски скандали, дека ги осудува провокациите и агресивното однесување кое претставува закана за мирот и за стабилноста и истовремено повика на воздржаност од етнички провокации.

„Пораките во Резолуцијата усвоена од Европската народна партија се уште еден доказ дека Груевски е изолиран политичар кој ја изгуби довербата од сите значајни меѓународни политички субјекти. Пораките содржани во Резолуцијата го осудуваат сето тоа што Никола Груевски ѝ го прави на Македонија“, велат од СДСМ.


ЕУ: Повикот за суспензија на дијалогот со Белград не е во интерес на Косово


Брисел, 9 март, 2017 - 18:02 (META) 

Повикот за суспензија на дијалогот меѓу Косово и Србија, во усвоената резолуција на косовскиот парламент, не придонесува за нормализирањето на односите меѓу Белград и Приштина и не е во согласност со досегашната посветеност на Косово на тој процес, соопштила денеска портпаролката на Европската комисија, Маја Коцијанчич, пренесува балканскиот сервис на „Радио Слободна Европа“.

Парламентот на Косово усвои резолуција со која се бара прекинување на дијалогот со Белград, сè додека не биде ослободен лидерот на Алијанса за иднината на Косово и поранешен премиер, Рамуш Харадинај, кој ја чека одлуката на француските правосудни органи за негова екстрадиција во Србија.

„Косово отсекогаш беше цврсто посветено на дијалогот и на понатамошна нормализација на односите меѓу Косово и Србија, во интерес на сопствениот народ, но и заради тоа што напредокот во дијалогот е услов за напредок на земјата на европскиот пат. Ги повикуваме сите политички лидери на Косово да продолжат да бидат конструктивни во дијалогот, да ги спроведат постигнатите договори и со тоа да ја унапредат нормализацијата на односите и европската перспектива“, стои во изјавата на Коцијанчич.


ВМРО-ДПМНЕ: СДСМ сака да ги осуди партизаните и борците од АСНОМ за нивната борба


Скопје, 7 март, 2017 - 9:45 (META) 

„Усвојување резолуција во Собранието на Република Македонија со која се осудува геноцидот врз албанскиот народ во Македонија во периодот 1912-1956 година. Ова е точка од платформата преку која СДСМ сака да ги осуди борците од АСНОМ и партизаните за нивната борба за слободна држава“, се вели во редовното утринско соопштение на ВМРО-ДПМНЕ.

Во него се додава дека „граѓаните не се должни да ги трпат штетите што ги нанесуваат Зоран Заев и СДСМ“.

– Граѓаните на изборите ниту гласаа за платформа од друга држава, ниту гласаа за формирање тиранска влада во Македонија. Граѓаните гласаа за проекти и за економски просперитет. Зоран Заев и СДСМ се уценети заради нивните криминали да прифатат сè што ќе им биде сервирано за да си ја спасат кожата, притоа заобиколувајќи ја волјата на граѓаните – се додава во соопштението на ВМРО-ДПМНЕ.

Од партијата велат дека „новата тиранска влада на чело со уценетите Заев и СДСМ ќе има единствено улога против волјата на граѓаните да го прогласат албанскиот јазик и неговото писмо за официјален државен јазик, заедно со македонскиот и со неговото кирилско писмо“.

– Тие немаат проблем ниту да ги променат името на државата, химната, знамето, банкнотите, униформите, написите. Доколку Зоран Заев и СДСМ сметаат дека платформата од Тирана е добра за Македонија, ВМРО-ДПМНЕ ги охрабрува да се согласат да распишат парламентарни избори и да им ја понудат на граѓаните на Македонија да ја изгласаат – додаваат од партијата.


Европскиот парламент го повика Косово на засилена борба со корупцијата


Брисел, 28 февруари, 2017 - 14:41 (META) 

Комитетот за надворешни работи на Европскиот парламент (АФЕТ) денеска ја усвои предлог-резолуцијата за Косово со 40 гласови „за“, 12 „против“ и со пет „воздржани“.

– Денешното гласање повторно праќа силен сигнал дека иднината на независно Косово е во Европската Унија. Со само неколку чекори до либерализација на визниот режим, извештајот ги охрабрува сите политички страни на Косово да продолжат со својата работа на конструктивен начин и во европски дух – изјави потпретседателката на Европскиот парламент и известувачка на Европскиот парламент за Косово, Улрике Луначек.

Сепак, таа оцени дека и на двете страни недостига имплементација на договорите кои се постигнати во дијалогот меѓу Белград и Приштина. Таа изрази незадоволство од начинот на кој српските власти управуваат со премините, спогодбите за енергетика и со катастарот, но и поради тоа што косовските власти не ја оформиле Заедницата на српски општини (ЗСО).

Луначек изрази надеж дека косовското собрание што побргу ќе ја ратификува спогодбата за демаркација со Црна Гора, потсетувајќи дека тоа е последната пречка за добивање визна либерализација.

Таа, исто така, ги повика пратениците од Српска листа да дејствуваат како граѓани на Косово, а не според мислењето на Белград и да се вратат во Собрание за да помогнат во изгласувањето на другите спогодби, меѓу кои е и законот за верски заедници.

Луначек подвлече дека независноста на Косово е иреверзибилна и дека нема повлекување.

Европските пратеници нагласија дека Косово треба да вложи повеќе напори во борбата против организираниот криминал и корупцијата.


Европскиот парламент бара транспарентна транзиција на власта и попис


Брисел, 28 февруари, 2017 - 11:16 (META) 

Со 54 гласoви „за“ и со осум „против“, Комитетот за надворешни работи на Европскиот парламент (АФЕТ) денеска ја усвои предлог-резолуцијата за напредокот на Република Македонија во европските интеграции во 2016 година, јавува МИА.

Европратениците претходно усогласија 28 компромисни амандмани и денеска сите ги усвоија, а во нив се содржани и термини „Македонија“, „македонски“, но, исто така, и предвидување дека македонската држава ќе добие нова влада, па се бара „транспарентна транзиција“.

Прифатен е и амандман со кој европратениците очекуваат „формирање на нова, стабилна и одговорна влада и транспарентна транзиција, во согласност со уставните и со законските барања и постапки“.

Европарламентот е „загрижен за сигналите што доаѓаат од граѓанските организации, а кои се однесуваат на влошување на климата во која тие работат и останува загрижен за радикалните јавни напади на граѓанските организации и странски претставници од страна на политичарите и медиумите“, се вели во предлог-резолуцијата.

ЕП ја признава и ја охрабрува важната улога на граѓанските организации за мониторинг, поддршка и унапредување на демократските процеси, вклучувајќи го и изборниот процес, како и обезбедувањето на проверка и рамнотежа, се вели во текстот на предлог-резолуцијата.

Отворањето на пристапните преговори за Македонија со ЕУ, наместо „безусловно“, како што се бараше претходно, сега се условува со компромисен амандман на Резолуцијата, во кој се вели: „Отворањето на преговорите за членство треба да се гарантира по исполнувањето на потребните услови“.

Резолуциите на Европскиот парламент немаат правно дејство, туку се само советодавни и може, но не мора да се земат предвид од другите институции и од членките на ЕУ.


Генералното собрание на ОН ќе му оддаде почит на Чуркин


Њујорк, 21 февруари, 2017 - 9:59 (META) 

Генералното собрание на Обединетите нации ќе одржи специјален состанок за да му оддаде почит на амбасадорот на Русија во Обединетите нации, Виталиј Чуркин.

Тоа го најави претседателот на 71. сесија на Генералното собрание на ОН, Питер Томсон.
Томсон, исто така, најави минута молк во знак на сеќавање на Чуркин, за кој рече дека бил „еден од најпочитуваните и највлијателните членови на семејството на ОН“.

Истовремено, Советот за безбедност на ОН усвои резолуција по повод смртта на рускиот дипломат.

Руското министерство за надворешни работи соопшти дека шефот на руската мисија при ОН, Виталиј Чуркин, ненадејно починал во Њујорк само еден ден пред својот 65. роденден.

Во соопштението на министерството се наведува дека станувало збор за „исклучителен руски дипломат“, кој пред да биде поставен на местото амбасадор на Русија во ОН во мај 2006 година, бил амбасадор на Русија во Белгија и во Канада, како и амбасадор за врски со НАТО.