Унгарија: EП го пика носот каде што не му е место, Груевски ја бранеше Европа


Будимпешта, 30 ноември, 2018 - 11:59 (META) 

Откако Европскиот Парламент (ЕП) вчера при гласањето за резолуцијата за Македонија усвои и два амандмани за азилот на Никола Груевски во Унгарија, со кои се бара негова екстрадиција во Македонија, од Унгарија стаса остар одговор.

Владиниот портпарол, односно Државниот секретар за меѓународна комуникација на кабинетот на унгарскиот премиер Виктор Орбан, Золтан Ковач, во интервју за телевизијата „Ехо“ порача дека резолуцијата, односно амандманите, немаат правно дејство, дека ЕП си го пика носот каде што не му е место. Ковач рече и дека единствениот „грев“ на Груевски бил што кренал ограда и го спречил продорот на мигрантите.

-Постапката за политички азил на Груевски не е политичка, туку правна работа. Европскиот парламент нема никаква врска со екстрадицијата на Груевски и она што го прави е дека го пика носот таму каде што не му е местото. Верувам дека мнозинството пратеници гласаа за резолуцијата, иако тие немаат никаква врска со случајот Груевски.  Најголемиот грев на Груевски е што изгради ограда и застана во одбрана на Европа од тероризмот и миграцијата – изјави Ковач.

Дека амандманите немаат правно дејство, но сепак се „шлаканица“ за Унгарија, вчера изјави и ректорот на ФОН, Нано Ружин.


Ружин: Амандманите во ЕП за Груевски немаат правно дејство, ама го рушат угледот на Унгарија


Брисел, 29 ноември, 2018 - 16:15 (META) 

Иако амандманите на Резолуцијата за Македонија, со кои Европскиот Парламент денеска побара Унгарија да го екстрадира во Македонија избеганиот поранешен премиер и осуденик Никола Груевски, немаат правно дејство, туку повеќе се етичко-морален став, сепак станува збор за мерка што е непопуларна за Унгарија, вели за „Мета“ универзитетскиот професор и ректор на ФОН, Нано Ружин.

– Дејство, од правен аспект, нема. Повеќе се работи за етичко-морален став на ЕП. Така е затоа што во овој момент ЕУ не е супранационална институција, туку секоја држава го задржува своето право, особено во доменот на политичкиот систем, правото итн. Но како и да е, сепак е една мерка која што е непопуларна за Унгарија. И го руши угледот како држава, како политички систем, како демократија, и нормално кога понатаму би се градел еден општ став за евентуални санкции, овие амандмани би биле еден вид аргументи против Унгарија – објаснува Ружин.


ЕП: Да се засили независноста на судството и да продолжи борбата против перењето пари


Брисел, 29 ноември, 2018 - 15:41 (META) 

Во денешната резолуција за Македонија подготвена од специјалниот известувач за земјава, Иво Вајгл, Европскиот Парламент (ЕП) оценувајќи ја ситуацијата во земјава порача дека мора да се почитува Договорот од Преспа, но и да се прави подобра заштита на судството од политичките влијанија и да се решат преостанатите прашања од областа на владеењето на правото, соопшти ЕП на својата официјална страница.

Европарламентарците преку Резолуцијата, во која беа вметнати и два амандани со кои се бара Унгарија да го екстрадира Никола Груевски на Македонија, ја поздравуваат „силната посветеност на земјата“ на целосното спроведување на Пржинскиот договор и Итните реформски приоритети „коишто доведоа до засилени напори во реформите чија цел е ЕУ“.

Но, Резолуцијата донесена од законодавното тело на Европската Унија исто така содржи и повик до државната власт да ја засили битката против перењето пари и против конфликтите на интерес. Се бара и подобра заштита на правосудството од политичките влијанија и решавање на преостанатите проблеми од областа на владеењето на правото „која се уште има сериозни предизвици“.

Резолуцијата беше усвоена со 470 гласа „за“, 116 „против“, а 46 пратеници беа воздржани.

Европскиот парламент во неа, посочувајќи дека консултативниот референдум на 30 септември годинава го немал потребниот одѕив, сепак ја поздравува одлуката на Собранието да го почне процесот на уставни измени за спроведување на Договорот од Преспа.

„Оваа спогодба го испраќа многу потребниот сигнал за стабилност и помирување во целиот Западен Балкан“, велат европарламентарците.

– Откако сите услови ќе се исполнат, членството на Македонија во ЕУ ќе осигури ветувачка иднина за нејзините сегашни и идни генерации. ЕУ исто така мора да ги исполни своите ветувања на земјата која предолго стои во чекалницата и може да обезбеди значителен придонес за стабилноста, безбедноста и напредокот на Југоисточна Европа во целост – порача специјалниот известувач за Македонија, Словенецот Иво Вајгл.


Европратениците побараа Унгарија да го екстрадира Груевски


Брисел, 29 ноември, 2018 - 14:02 (META) 

Европскиот парламент денеска при гласањето за резолуцијата за Македонија и усвои и два амандмани со кои се бара Унгарија да го екстрадира експремиерот Никола Груевски во Македонија, јави МИА.

Групите на Социјалдемократите и на Зелените пред неколку дена поднесоа одделни амандмани на оваа тема, но се стравуваше дека оној на Зелените нема да помине поради поостриот речник.

Амандманот поднесен од европратеничката на Зелените, Јудит Саргентини освен што бара екстрадиција, гласи и дека Груевски побегнал од Македонија со дипломатска помош од Унгарија за да избегне затворска казна и го смета овој потег како мешање во внатрешните работи на Македонија како и чин на презик кон судството и владеењето на правото во земјата.

Социјалдемократите поднесоа два амандмани за азилот на Груевски, и двата беа усвоени. Со овие амандмани, Европскиот парламент става на знаење дека Никола Груевски добил „транспарентен судски процес“ потврден од повеќе судски инстанци и потсетува дека тој е инволвиран во дополнителни пет кривични истраги.

Европскиот парламент ги отфрли сите грчки амандмани, вклучително и оние кои бараа да се избрише зборот „македонски“ од извештајот, како и амандманот на грчка пратеничка која бараше во резолуцијата за Македонија да се вклучи ниската излезност на референдумот, известува МИА.

Усвоен е и амандманот на групата на Зелените за загрозувањето на животната средина преку одредени инфраструктурни проекти. Европскиот парламент бара да се суспендираат проектите во Националниот парк Маврово додека не биде комплетирана „Стратешка проценка за животната средина“ во целосна согласност со европското законодавство за животна средина.

Резолуцијата на известувачот Иво Вајгл беше усвоена со 470 гласови за и 116 против.

Сами по себе, резолуциите како оваа, па и гореспоменатите амандмаи, не се строго обврзувачки, туку посочуваат политичка желба и ориентација нешто да се преземе. Имајќи ја предвид важноста на Европскиот парламент, сепак, во поголем дел од слични случаи во минатото се презеле мерки за да се спроведе посоченото од европратениците.

Но бидејќи станува збор за Унгарија, која во текот на последните два мандати на Виктор Орбан е „бунтовното дете“ во ЕУ и многупати отворено се спротивстави дури и на директиви, сосема изгледно е дека овие две резолуции ќе останат само акти во архивата на ЕП.


Путин ќе ја посети Србија во јануари


Белград, 12 октомври, 2018 - 16:42 (META) 

Претседателот на Русија, Владимир Путин изразил желба да ја посети Србија во јануари, му пренел рускиот амбасадор во Белград, Александар Чепурин на српскиот претседател Александар Вучиќ, јавува дописничката на „Мета“ од Белград.

Како што соопштиле од кабинетот на српскиот претседател, било договорено, подготовките за доаѓање на Путин во Белград да почнат веднаш, „за посетата да го потврди традиционалното пријателство на двете земји и братството на двата народа“.

Вучиќ на почетокот на октомври разговарал со Путин во Москва, кој, според пишувањата на руските медиуми не добил одобрување за признавање на Косово, што, како што наведуваат медиумите, подразбира одвојување на северот на Косово.

Од друга страна, претседателот на надворешно-политичкиот одбор на Горниот дом на рускиот парламент, Константин Косачов кој престојувал во Белград, изјавил дека Русија ќе го поддржи секое решение за Косово кое го поддржува српскиот народ, а кој е во согласност со Уставот и Резолуцијата 1244 на Советот за безбедност на ОН.


Димитров: Политичарите може да живеат од нерешен спор, ама и да го решат


Брисел, 29 август, 2018 - 15:22 (META) 

Политичарите можат да направат цела кариера и да живеат од нерешен спор, а можат и да се вложат и да го решат, заштитувајќи го најважното за двете страни, за граѓаните на нивните држави да живеат подобро, порача министерот за надворешни работи, Никола Димитров, зборувајќи пред Комисијата за надворешни работи во Европскиот парламент (AFET), на чија агенда е и првото читање на предлог резолуцијата на ЕП за Македонија.

На денешниот состанок Димитров пред членовите на Комитетот елаборираше за актуелностите во Република Македонија, во пресрет на историски важниот референдум и за спроведување на клучните реформи во земјата и подготовките за скрининг процесот со Европската комисија.

– Не бараме скратени патишта или незаслужени награди. Но, би сакале успешните приказни и шанси да бидат соодветно валоризирани и искористени, особено во време кога на Регионот, но и пошироко му требаат такви примери – порача Димитров.

Шефот на македонската дипломатија изрази благодарност за поддршката и конструктивниот пристап на Европскиот парламент во процесот на пристапување на Македонија во Европската Унија, рефлектирана меѓу другото и преку Жан Моне процесот на соработка со Собранието на РМ, како и во резолуциите за Македонија.

МНР Димитров оствари средби и со евро-пратениците Удо Булман (Претседавач на групата на социјалисти и демократи во ЕП), Андреј Ковачев (потпретседавач на групата ЕПП), Иво Вајгл (известител за РМ во ЕП, член на групата на Европски либерали и демократи), со Јоханес ван Бален (претседател на Групата на пријатели на РМ во ЕП, АЛДЕ), како и со Дејвид МекАлистер (претседавач на АФЕТ, член на ЕПП).


ЕП ја почна битката против враќање на километражите на автомобилите


Брисел, 1 јуни, 2018 - 11:08 (META) 

Европскиот Парламент (ЕП) вчера изгласа резолуција со која бара од Европската Комисија (ЕК) во рок од една година да изготви законска рамка со која ќе се забрани враќањето на километражите на автомобилите и километражата ќе се контролира при секој технички преглед.

Проблемот е толку голем, што во земји како Бугарија, Словачка и Полска, бројката на продадени користени автомобили со вратена километража достигнува до 80 отсто.

– Од пет до 12 отсто од користените возила што се продаваат во ЕУ и 30 до 50 отсто од оние што се продаваат надвор од границите на ЕУ се со вратена километража. Има потреба да се формираат национални бази на податоци за километражата на секое возила и да се воспостави прекугранична размена на тие податоци. Доколку ЕК подготви закони, тоа би значело придобивка од шест до девет милијарди евра годишно и би ја вратило довербата на купувачите во користените возила, а исто така ќе придонесе и за безбедноста на патиштата – рече во ЕП известувачот, европарламентарецот од Германија, Исмаил Ертуг.

Покрај тоа, се бара од производителите да воведат технологии што ќе го оневозможат враќањето на бројчаниците.

Според резолуцијата што беше изгласана во ЕП вчера, проверката на километражата треба се прави при секое сервисирање, при секој технички преглед, почнувајќи од првото регистрирање на возилото.

Враќањето на километражата предизвикува директни штети не само на купувачите, туку и на животната средина и на безбедноста во сообраќајот, се вели во резолуцијата.

Редовна проверка на километражата засега функционира во Белгија и Холандија, а само шест членки на ЕУ имаат закони со кои враќањето на бројчаниците се смета за кривично дело. Во другите земји тоа се смета само за прекршок.


Македонија мора да му се извини на Ел-Масри до март


Скопје, 9 февруари, 2018 - 12:57 (META) 

На Република Македонија и се заканува прва Резолуција со осуда од Совет на Европа доколку до март годинава не му се извни на германскиот државјанин со либанско потекло, Калид ел-Масри.

Ова беше кажано на денешната прес-конференција на вториот мониторинг-извештај за реформите во судството што го одржаа претставници на три невладини организации кој што го спроведуваат проектот „Заедничка акција за итни реформи во судството“.

Ангела Шумкоска од Здружение на млади правници појасни дека одлуката на Судот за човекови права во Стразбур, во случајот со Ел-Масри против Македонија, е донесена уште 2012 година и дека се уште не е извршена.

Комитетот на министри на Советот на Европа разгледувајќи го извршувањето на судските пресуди од ЕСЧП за Македонија во декември 2017 година, констатирал дека до март 2018 година, државата е должна официјално да му се извини на Ел-Масри. На истиот состанок Комитетот на министрите издал налог за изготвување на нацрт-времена резолуција која би била усвоена од страна на министрите на Советот на Европа на состанокот во јуни, доколку Македонија не ги исполни обврските.

Шумкоска појасни дека во земјава генерално има проблем со јавната свест кај одговорните во надлежните институции за спроведување на одлуките на судот во Стразбур, но и генерално,по што настануваат клонирани случаи, односно исти или слични повреди на правата загарантирани со ЕКЧП.

Мониторирајќи го објавувањето на судските одлуки, Институтот за европска политика (ЕПИ) констатирал дека негативниот тренд продолжува и по воведување на единствениот судски портал sud.mk.

Во набљудуваниот период од октомври до декември, најмногу пресуди објавил Управниот суд, потоа Граѓанскиот суд во Скопје, а Кривичниот суд објавил само 18 судски одлуки.

Институтот за човекови права пак, констатирал дека во набљудуваниот период има благ тренд на подобрување од аспект на транспарентноста во Судскиот совет, Советот за утврдување на факти, кој во меѓувреме е укинат, и Советот на јавни обвинители.

Покрај ова кај Судскиот совет за прв пат е констатирана и промена на начинот на избор на претседатели на судови и на судии при што повеќе внимание се обраќа на квалитативното оценување.


Европскиот парламент ја осуди турската офанзива во Сирија


Брисел, 8 февруари, 2018 - 19:50 (META) 

Пратениците на Европскиот парламент ја осудија турската воена акција против Курдите на северот на Сирија, како и апсењето на неколку стотина лица кои ја критикуваа таа операција.

Во Резолуцијата, која што беше усвоена денеска, пратениците апелираа до Турција да ја укине вонредната состојба воведена по неуспешниот воен удар во 2016 година, бидејќи се користи за „гушење на легитимната и мирољубива опозиција“.

Според Резолуцијата, потребно е да се услови обезбедувањето на финансии кои и се даваат на Турција, за подготовка за членство во ЕУ, а Анкара во замена за тоа, треба да ја подобри ситуацијата во врска со човековите права и демократијата.

Турција ги почна преговорите за членство во ЕУ во 2005 година, но тие се прекинати.


ВМРО-ДПМНЕ изгласа резолуција за осуда на политичкиот прогон


Валандово, 23 декември, 2017 - 12:56 (META) 

ВМРО-ДПМНЕ на Конгресот во Валандово изгласа резолуција за осуда на политичкиот прогон организиран од СДСМ.

Конгресот го осуди, како што велат, политичкиот прогон спроведуван од СДСМ и монтираните судски постапки спроведени од СЈО и ОЈО, како и сите постапки поврзани со настаните од 27 април.

„Главни причини и мотив за политичкиот прогон од СДСМ за лицата е заложбата за почитување и промоција на националните и државните интереси од страна на членовите, поддржувачите или симпатизерите на ВМРО-ДПМНЕ“, велат од партијата.

Од таму повика на ревизија на сите случаи на политичкиот прогон на лицата кои што се обвинети.