!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

За неколку дена ќе се знае дали имало злоупотреби на АКМИС во Кривичниот суд


Скопје, 10 октомври, 2017 - 16:23 (META) 

За неколку дена треба да биде познато дали имало злоупотреби на автоматизираниот систем за управување со судските предмети (АКМИС) во Кривичниот суд во Скопје, односно дали се местело одредени предмети да бидат распределени кај одредени судии, изјави претседателот на Комисијата на Министерството за правда, Лазар Нанев, по денешниот увид во судот.

– Побаравме материјали кои ќе покажат дали системот работел според законската регулатива. Законска обврска е секој суд во Македонија да има внатрешни процедури и на месечно ниво да го проверува работењето на системот, а ние ќе видиме дали таа процедура се почитувала. Ќе видиме дали законски или незаконски се вклучувале и се исклучувале судии од системот. Резултатите од ревизијата би биле готови за неколку дена – рече Нанев.

Тој рече дека во судот биле за да извршат анализа во записниците и дека во најголем дел завршиле работа, а она што следи е целосна анализа на сите списи и анализа дали АКМИС функционирал како што треба.

Нанев истакна дека анализите ќе покажат дали бил злоупотребен системот и при распределбата на предметите од Специјалното јавно обвинителство. Доколку има злоупотреби, тоа повеќе не е работа на комисијата, туку на други институции, додаде Нанев.

Инаку, Комисијата на Министерството за правда врши ревизија на распределбата на судските предмети во 2016 и 2017 година.

Постоењето индиции за злоупотреба на автоматизираниот систем за управување со судските предмети беше нотирано и во извештајот на експертската група на Европската Унија, предводена од Рајнхард Прибе.


Богдановиќ вети детална ревизија на проектот „Скопје 2014“


Скопје, 10 октомври, 2017 - 12:18 (META) 

Кандидатот за градоначалник на општина Центар од СДСМ, Саша Богдановиќ, денеска најави детална ревизија на проектот „Скопје 2014“, како и дека ќе ја објави целата документација за проектот.

Богдановиќ изјави и дека „новата власт во Скопје“ ќе ја запре и изградбата на панорамското тркало.

– Галиите, шмизлите, Прометеј и целиот криминален и налудничав проект „Скопје 2014“ ги одзедоа душата и убавината на централното градско подрачје. Се украдоа милионски суми од граѓаните за барок и за стиропор. Со енергична борба успеавме да спасиме да не никнат и шпански скали. Со новата власт во Скопје ќе се сопре и изградбата на панорамското тркало. Проектот, за жал на центарци, на скопјани и на цела Македонија е целосно реализиран, но Општина Центар сè уште може да направи многу повеќе во однос на ова чувствително прашање што досега никогаш не е докрај расчистено – рече Богдановиќ.

Кандидатот за градоначалник на општина Центар најави дека со надлежните институции ќе направи детална и функционална ревизија за тоа како се спроведувале тендерите и деталните урбанистички планови за „Скопје 2014“.

– Поради тоа што станува збор за проект од јавен интерес, јас, како градоначалник на Општина Центар, ќе ја објавам целата документација за „Скопје 2014“. Од одговорност нема да биде поштеден никој – изјави Богдановиќ.


ВМРО-ДПМНЕ: Николовски нема легитимитет да зборува за фер доделување земјиште


Скопје, 14 септември, 2017 - 19:19 (META) 

Владата на ВМРО-ДПМНЕ во 2014 година поднесе измени на законот за доделување земјоделско земјиште, по пат на електронско јавно надавање, за фер и транспарентно доделување на земјоделското земјиште во државна сопственост за комерцијални намени, се вели во реакцијата на ВМРО-ДПМНЕ на прес-конференцијата на министерот за земјоделство, шумарство и водостопанство, Љупчо Николовски.

Во соопштението се додава дека СДСМ преку иницијативата за ревизија на договорите за доделување државно земјоделско земјиште, се пресметува со земјоделците кои не се под негова контрола.

„Николовски нема никаков легитимитет и кредибилитет да зборува за фер и за правично доделување земјоделско земјиште и за воведување нови постапки, бидејќи пред извесен период се објави оглас за земјоделско земјиште, потпишан од истиот министер, а според критериуми утврдени со закон што го донесе претходната влада. Доколку имало какви било проблеми со процедурите и со постапките, истиот со владата од СДС ќе иницираше промени во законот, за подобрување на постапките и на процедурите“, се додава во соопштението на ВМРО-ДПМНЕ.


Таравари подготвува нови смени на директори и извод за роденчињата уште во болница


Скопје, 16 јули, 2017 - 17:02 (META) 

Хигиената во болниците останува главен проблем и во следните пет-шест месеци еден од моите главни фокуси ќе биде хигиената во сите болници, рече министерот за здравство, Арбен Таравари, по денешното чистење на слободниот простор меѓу клиниките во скопскиот Клинички центар. Тој истовремено најави дека наскоро ќе бидат обелоденети и наодите на инспекциите во некои болници, а тогаш ќе има и казни.

– Ќе има казни за менаџери, за вработени, но тоа ќе биде како што ќе каже инспекторатот. Лошо е во Клиниката за гинекологија, а ни во штипската болница не е подобро, најдени се некои работи што не треба да ги има во болница – рече Таравари.

Тој додаде дека постои можност наскоро да се ангажира приватна фирма за чистење на болниците, за да се сузбијат интрахоспиталните инфекции.

-Веќе размислуваме за решенија и како да го поправиме тоа. Можеби ќе ангажираме надворешни фирми, прво експериментално во две болници. Во клиниката во Гостивар и на Клиниката за гинекологија ќе почне една фирма што бесплатно ќе работи и според тоа како ќе бидат задоволни пациентите и лекарите и дали интрахоспитални инфекции ќе бидат намалени, ќе одлучиме дали тоа ќе го спроведеме на уште неколку клиники каде можеме финансиски – изјави Таравари.

Министерот во однос на ревизиите на досегашното работење и именувањата на нови директори на здравствените установи и клиниките рече дека ќе има смени и оваа и следните недели.

– Засега е направена ревизија само на Министерството за здравство, а ќе направиме ревизии на клиниките кога ќе именуваме нови директори. Именувања ќе правиме и оваа недела, но полека, не брзаме, 70-80 отсто од клиниките во наредните недели ќе имаат нови директори – рече Таравари.

Тој најави дека наскоро ќе се промовира измена во системот „Мој термин“, односно новороденчињата ќе бидат заведени во матичната книга на родени уште истиот ден по раѓањето и веднаш ќе добијат извод, како и календар на вакцини со препораки за мајката за следните неколку месеци.

– Се работи за една новост, кога ќе се роди детето, да не се оди никаде туку во болница да се дава извод од матичната книга на родени и препораки за мајките за следните неколку месеци… – рече министерот, најавувајќи повеќе детали за следната недела.

 


Бектеши: Еднакви услови за домашните и за странските компании


Скопје, 7 јуни, 2017 - 15:07 (META) 

Министерот за економија, Крешник Бектеши, денеска одржа работна средба со Пинто Рикардо, кој е тим-лидер на проектот за ревизија на индустриската политика 2009-2020 година во Македонија.

На средбата министерот Бектеши беше информиран за анализата со која ќе бидат идентификувани индустриските сектори што имаат потенцијал за економски развој и за зголемување на извозот, а ќе биде изработена во рамки на проектот, во соработка со Министерството за економија.

Министерот Бектеши на Рикардо и на неговиот тим им понуди целосна поддршка за периодот од 12 месеци, колку што ќе трае проектот.

Проектот, во соработка со Министерството за економија, до септември ќе излезе со извештај кој ќе произлезе од спроведените анализи за активностите на индустрискиот сектор, а ќе содржи предложени мерки за забрзување на неговиот развој.

Проектот за ревизија на индустриските политики 2009-2020 е поддржан од Европската Унија со буџет од 250.000 евра, кои ќе се користат за анализа на работата на индустриските сектори во земјата.


Државна ревизија: СДСМ нема тапии за дел од имотот, членарината плаќана на трансакциска


Скопје, 23 мај, 2017 - 16:43 (META) 

Во 2015 година општинските организации на СДСМ ги уплатувале директно на трансакциска сметка на партијата собраните пари за месечна членарина, без да се наведат поединечно собраните суми, а партијата за дел од градежните објекти што ги наследиле од претходникот, уште не го решила сопственичкиот статус.

Тоа се двете главни напомени од ревизијата на  финансиските извештаи на СДСМ за 2015 година што ја извршил Државниот завод за ревизија.

Исто така била утврдена и слабост при евидентирањето на приходите и расходите, образецот на партијата за Годишен финансиски извештај не е усогласен со Законот за финансирање на политичките партии, односно не е регулиран начинот на плаќање, уплата и евидентирање на членарината како извор на финансирање, а не е регулиран ни начинот за пренос на средствата од членарина од редовната сметка на сметката за изборна кампања.

Државниот завод за ревизија порачува дека партијата треба да преземе мерки за да ги отстрани слабостите и информира дека не добил реакција од партијата.

Покрај погоре наведените забелешки, другите активности, финансиски трансакции и информации наведени во финансиските извештаи на партијата биле во согласност за законите и востановените политики.

СДСМ во 2015 година имала приходи од 42,36 милиони денари, односно 688.000 евра, а расходи од 41,87 милиони денари, односно 679.750 евра.


Државна ревизија: ВМРО-ДПМНЕ во 2015 заработила 2,4 милиони евра


Скопје, 23 мај, 2017 - 15:09 (META) 

Во 2015 година, партијата ВМРО-ДПМНЕ исплатила аванс за кој на државната ревизија не и доставила документација од која може да се утврди по која основ е исплатен, а тој аванс не бил опфатен ниту во извршениот попис за 2015 година, утврдил Државниот завод за ревизија. Станува збор за сума од 1,54 милиони денари, односно 25.000 евра. Иако во поголем дел од ревизорскиот извештај всушност се зборува за „аванси“, сепак станува збор за една исплата на аванс, како што може да се види од одговорот на Државната ревизија на забелешката на   ВМРО-ДПМНЕ, кои се исто во извештајот.

Во конечниот извештај за ревизијата на финансиските извештаи на ВМРО-ДПМНЕ за сметката за редовно работење за 2015 година се вели и дека партијата за „ситен инвентар“ не располагала со соодветна документација и не направила попис на ситниот инвентар.

ВМРО-ДПМНЕ во 2015 година имала вкупно 148.648.000 денари (2,4 милиони евра) приходи, а 145.655.000 денари (2,364 милиони евра) расходи.

Исто така биле утврдени и слабости при евидентирањето на приходите и расходите, образецот на партијата за годишен финансиски извештај не е усогласен со Законот за финансирање на политичките партии, односно не е регулиран начинот на плаќање, уплата и евидентирање на членарината како извор на финансирање, а не е регулиран ни начинот за пренос на средствата од членарина од редовната сметка на сметката за изборна кампања.

 

СЈО вчера покрена случај „Талир“ за незаконско финансирање на ВМРО-ДПМНЕ, со кој ја опфаќа и 2015 година, за која е новообјавениот извештај на државната ревизија.


СДСМ: Пред 11 години долгот изнесуваше 1,8, а денес повеќе од 5 милијарди евра


Скопје, 19 мај, 2017 - 17:07 (META) 

„Следува период во кој новата влада ќе ги преиспита сите задолжувања што ги направи досегашната власт изминативе години на крајно нетранспарентен начин,“ велат од СДСМ.

Од партијата најавуваат дека ќе биде спроведена и темелна ревизија на сите нетранспарентни трошења на пари на граѓаните од буџетот на државата.

„Никола Груевски и неговите соработници заминуваат од власт оставајќи јавен долг во висина од речиси пет милијарди евра. Пред 11 години, во 2006 година јавниот долг изнесуваше 1,8 милијарди евра. На девизната депозитна сметка Груевски затекна над 250 милиони евра. За сите злоупотреби на пари на граѓаните ќе следува одговорност. Новата и одговорна влада ќе ја подигне економијата и транспарентно и отчетно ќе раководи со јавните финансии“, стои во соопштението на СДСМ.


Долгот на „Агрокор“ изнесува 5,4 милијарди евра


Загреб, 11 мај, 2017 - 17:42 (META) 

Хрватската компанија „Агрокор“ денеска испратила соопштение во кое се наведува дека актуелниот долг на фирмата, заклучно со 31 март 2017 година, изнесува околу 5,4 милијарди евра, пренесува балканскиот сервис на „Радио Слободна Европа“.

Наведената сума на долгови, по доспеани камати, други позајмици, одложено плаќање на даночни обврски и друго, како што било посочено, не ги прикажува долговите на целата групација, туку само тие на најголемите 19 друштва во рамките на „Агрокор“.

Во оваа сума не е прикажан ниту заемот од 80 милиони евра што компанијата го подигна на 13 април оваа година.

Од фирмата навеле дека и понатаму ги проверуваат потенцијалните неправилности во финансиските извештаи и според тоа, можна е ревизија и на овие податоци.

Инаку, на почетокот на април хрватското собрание донесе посебен закон за спасување на „Агрокор“.


СДСМ: Ќе има одговорност за палмите од 500.000 евра што завршија на депонија


Скопје, 25 април, 2017 - 16:16 (META) 

Ќе има ревизија и одговорност за набавките на скапите палми од 500.000 евра што завршија во депонија, порачаа денеска од СДСМ.

„Исушените палми од 500.000 евра што се најдоа на депонија, се класичен доказ дека Никола Груевски и ВМРО-ДПМНЕ во сè, па и во палмите, гледаат тендери за лично збогатување, и тоа во услови кога ја предизвикаа најголемата сиромаштија кај повеќе од 500.000 граѓани во Македонија“, стои во соопштението на СДСМ.

Оттаму додаваат дека и покрај противењето на целата јавност на идејата да се садат палми, кои сега овенати завршија на депонија, „за Груевски и за градоначалникот на Скопје, Коце Трајановски, најважно беше како да се дограбат до пари од граѓаните“.

Како што пренесуваат денеска медиумите, околу 140 палми кои беа засадени во Скопје, ќе завршат на депонија, бидејќи се исушиле поради големиот студ зимава, а на нивно место ќе бидат засадени јавори.

Од Градот Скопје претходно денеска реагираа дека палмите во Скопје, засадани во 2015 година, не биле проект на Градот, туку дел од проектот кој го реализира Јавното претпирјатие „Македонски шуми“.