!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Наместо 500 евра просечна плата, СДСМ ја намалува платата за 1,3 отсто


Скопје, 4 октомври, 2017 - 10:29 (META) 

Заев ветуваше „живот“ и 500 евра плата, а по долг период на економски пораст, СДС успеа да ја намали просечната плата за 1,3 отсто два месеци по ред, вели ВМРО-ДПМНЕ. Опозициската партија тврди дека македонската економија е без кормило и се работи целосно без план, дека инвеститорите се уценувани, а Македонија не е веќе позната по добрите вести, туку по негативните и црни економски извештаи и биланси.

„На Македонија со владата на СДС не ѝ бега рецесија и огромна сиромаштија.Кризата се почувствува и во фирмите. Се бележи пад во домашниот бруто-производ за 1,8 отсто. Откако СДС дојде на власт, нема ниту една странска инвестиција. Се огласи и Народната банка. Таа потврди пад на активноста на банките за 1,6 отсто. СДС успеа да ги задолжат граѓаните за 420 милиони евра, пари кои беа расипнички и неодговорно потрошени. Единствено нешто што граѓаните видоа од тие пари беше луксузирање и партиско вработување“, се вели во партиското соопштение.


Ципрас вети успешен крај на програмата за спас на Грција


Солун, 10 септември, 2017 - 18:48 (META) 

Грција успешно ќе ја заврши спасувачката програма во 2018 година, помогната од суштинскиот економски пораст, вели грчкиот премиер Алексис Ципрас, кој вети дека ќе ги поддржи младите Грци, како и малите бизниси во процесот на обновување на земјата.

На отворањето на 82. Меѓународен саем во Солун синоќа, Ципрас изјави дека грчката економија ќе постигне пораст во 2017 година по деветгодишната рецесија и додаде дека земјата отворила 236.000 нови работи места во првите седум месеци од 2017 година, што е најбрзиот пораст на вработеноста од 2001 година.

Саемот, на кој оваа година има 1.500 изложувачи, е посветен на Кина, која ќе учествува со 150 компании, од кои повеќето во сферата на високите технологии.


Тевдовски: Економијата може да влезе во рецесија


Скопје, 18 април, 2017 - 14:36 (META) 

Три индикатори даваат предупредување дека економијата во Македонија може да влезе во рецесија ако нешто сериозно не се преземе, изјави на прес-конференција претседателот на Комисијата за економија на СДСМ, Драган Тевдовски.

Според него, податоците за почетокот на 2017 година покажуваат пад во градежништвото, намален обем на индустриското производство и намалена побарувачка на купувачите.

– Трговијата на мало има пад од 2,5 проценти во јануари и во февруари 2017 година во однос на истиот период лани. Тоа се должи, пред сè, на намалената побарувачка од купувачите. Ова е податок добиен токму од фирмите, кои во извештајот за деловните тенденции во трговијата на мало на Државниот завод за статистика, како најограничувачки фактор на почетокот од 2017 година ја означиле токму слабата побарувачка од купувачите – изјави Тевдовски.

Тој додаде дека индустриското производство во првите два месеци бележи пад од 1,9 отсто во споредба со истиот период во 2016 година.

„Тоа се должи, пред сè, на падот на преработувачката индустрија од 4,1 отсто, пад има и кај рударството, од 6 проценти, а сериозен пад имаат повеќе оддели на преработувачката индустрија. Градежништвото бележи намалување за 24 проценти во јануари 2017 година во однос на истиот месец во претходната година“, додаде Тевдовски.

Тој истакна дека во програмата на новата влада е предвидена поддршка за домашните претпријатија, пораст на платите и социјална праведност.


Светска банка предвидува пораст на македонската економија од 3,3 проценти годинава


Вашингтон, 11 јануари, 2017 - 15:48 (META) 

Домашниот бруто-производ (БДП) на Македонија ќе се зголеми 3,3 проценти оваа година и 3,7 проценти следната година, предвидува Светска банка во јануарскиот извештај за глобалните перспективи.

Овие прогнози на Светска банка за македонската економија се пониски од јунската прогноза лани, кога се предвидуваше пораст на економијата од 4 проценти.

Светска банка за глобалната економија годинава предвидува пораст од 2,7 проценти, што е исто така намалување во однос на јунската прогноза, кога се предвидуваше дека економијата ќе се зголеми за 2,8 проценти.

Светска банка ја задржа својата прогноза за САД од јуни, за пораст на економијата од 2,2 отсто, а за Русија и за Бразил очекува да излезат од рецесија.


Поскапува нафтата поради референдумот во Велика Британија


Виена, 23 јуни, 2016 - 12:04 (META) 

Цената на нафтата во Азија се зголеми само неколку часа пред почетокот на референдумот во Велика Британија на кој граѓаните на таа земја треба да одлучат дали државата ќе остане членка на Европската Унија.

Како и финансиските пазари, така и трговците со нафта се сосредоточени на референдумот, бидејќи аналитичарите предупредуваат дека излегувањето на Велика Британија од ЕУ би можело да ја турне земјата во рецесија, при што ефектите ќе се прелијат и на глобално ниво.

Цените на нафтата закрепнаа од падот на минималното ниво под 30 долари за еден барел во февруари, но и понатаму се далеку во однос на рекордно високото ниво од преку 100 долари за еден барел во средината на 2014 година.


Грција ќе ја избегне рецесијата годинава


Атина, 20 ноември, 2015 - 17:47 (META) 

Владата во Атина соопшти дека Грција ќе ја избегне очекуваната рецесија годинава и дека ќе претрпи само мало забавување на економијата во 2016 година.

Владата денеска го достави предлог-буџетот за 2016 година до парламентот, предвидувајќи нулта пораст на домашниот бруто-производ за оваа и пад од 0,7 отсто за следната година.

Преговорите за третиот пакет помош за Атина ја доведоа земјата пред финансиски колапс пред неколку месеци, но владата успеа да постигне договор со кредиторите, согласувајќи се на воведување на уште поригорозни мерки за штедење.

 


Јапонија излезе од рецесија


Токио, 16 февруари, 2015 - 11:33 (META) 

Во последниот квартал од минатата година, Јапонија излезе од рецесија. Сепак, порастот е послаб од што проценуваа аналитичарите.

Владата информираше дека јапонскиот домашен бруто-производ во четвртиот квартал остварил пораст од 0,6 отсто во однос на претходниот квартал, односно 2,2 отсто на годишно ниво.

 


Јапонија влезе во рецесија


Токио, 17 ноември, 2014 - 11:54 (META) 

Јапонската економија неочекувано влезе во рецесија во третиот квартал. Поради тоа премиерот Шинзо Абе најверојатно ќе се откаже од непопуларното зголемување на ДДВ и од распишувањето нови предвремени избори, две години пред истекот на мандатот.

Јапонската економија во третиот квартал ослаби за 0,4 проценти, по падoт од 1,9 проценти во периодот од април до јуни. Економистите во третиот квартал очекуваа пораст за 0,5 проценти.

Третата најголема економија во светот, според прогнозите, во наредниот период ќе оствари пораст, но потрошувачката и извозот во моментов се слаби, со што е отежната ситуацијата во која се наоѓаат компаниите со големи резерви на стока.

 


Германија избегна рецесија


Бон, 12 ноември, 2014 - 14:28 (META) 

Економскиот раст на Германија забавува, но земјата, сепак, успеа да избегне нова рецесија во третиот квартал, соопшти Министерството за економија во Берлин.

Два дена пред објавувањето на официјалните податоци за порастот на домашниот бруто-производ во три месеци, заклучно со септември, министерството наведе дека по благиот пад во вториот квартал, сите индикатори укажуваат на тоа дека економската активност се стабилизирала во третиот квартал и дека економскиот пораст е во плус, пренесува агенцијата „Франс прес“.

Рецесијата се дефинира како негативен економски раст во два последователни квартали.